Yom Mmọemi Ẹnịmde Ẹnọ Nsinsi Uwem
“Kpukpru mmọemi ẹkenịmde ẹnọ nsinsi uwem ẹbuọt idem.”—UTOM 13:48.
1. Kaban̄a esịt owo, nso ukeme ke Jehovah enyene?
JEHOVAH ABASI ekeme ndikot esịt. Ẹma ẹnam emi an̄wan̄a ke ini prọfet Samuel akakade ndiyet eyen Jesse aran nte edidem Israel. Ke okụtde Eliab, Samuel “ọdọhọ ete, N̄kọm enyeemi Jehovah ediyetde aran odu enye ke iso. Edi Jehovah ọdọhọ Samuel, ete, Kûse enye iso, kûnyụn̄ use nte enye okon̄de idaha; koro mmesịn enye: koro mmensehe nte owo esede; koro owo ese enyịn, edi Jehovah ese esịt.” Nte asan̄ade ekekem, ẹma ẹda Samuel usụn̄ ndiyet David aran, oro ‘ekekemde esịt ye Abasi.’—1 Samuel 13:13, 14; 16:4-13.
2. Nso inyene orụn̄ ke ndamban̄a esịt owo, ntem nso ke nnyịn ikot iban̄a emi ke N̄wed Abasi?
2 Owo esiwụt akpan edu kiet. Enye esinyene akpan edu oro enyenede orụn̄ ke ndamban̄a esịt esie. (Matthew 12:34, 35; 15:18-20) Ntem, nnyịn imokot iban̄a owo oro “ekọn̄ odu[de] enye ke esịt.” (Psalm 55:21) Ẹsian nnyịn ete ke “owo ikpahesịt awak ndidue.” Nnyịn inyụn̄ ikot: “Odu nsan̄a ẹmi ẹyomde ndinuak kiet eken mbai mbai, edi odu ufan emi adianade owo akan eyeneka.” (Mme N̄ke 18:24, NW; 29:22) Ke inemesịt, ndusụk owo ẹtie nte mme Gentile ke Antioch ke Pisidia eset. Ke ẹkopde ẹban̄a enọ Jehovah kaban̄a edinyan̄a, “mmọ ẹdat esịt, ẹnyụn̄ ẹkpono ikọ Ọbọn̄ [“Jehovah,” NW]: ndien kpukpru mmọemi ẹkenịmde ẹnọ nsinsi uwem ẹbuọt idem.”—Utom 13:44-48.
Mme Andinịm ke Akpanikọ ‘Ẹnyene Esịt oro Asanade’
3, 4. (a) Mmanie ẹdi mmọ eke esịt mmọ asanade? (b) Didie ke mmọ oro esịt mmọ asanade ẹkụt Abasi?
3 Mbon oro ẹkenịmde ke akpanikọ ke Antioch ẹma ẹkabade ẹdi mme Christian oro ẹnade baptism, ndien mbon oro ẹkenamde akpanikọ ke otu mmọ ẹma ẹkeme ndimen ikọ Jesus emi ntịn̄ mban̄a idemmọ: “Ọfọfọn ọnọ mmọ eke esịt mmọ asanade: koro mmọ ẹyekụt Abasi.” (Matthew 5:8) Edi mmanie ẹdi “mmọ eke esịt mmọ asanade.” Ndien didie ke mmọ ‘ẹkụt Abasi’?
4 Mmọ eke esịt mmọ asanade ẹsana ke esịt esịt idem. Ekemmọ edi esịtekọm, ima, udọn̄, ye uduakesịt ẹmi ẹsanade. (1 Timothy 1:5) Mmọ ẹmekụt Abasi idahaemi koro mmọ ẹkụt nte enye anamde n̄kpọ ke ibuot mbon nsọn̄ọnda. (Men Exodus 33:20; Job 19:26; 42:5 domo.) Ikọ Greek emi ẹsịnde mi “ẹyekụt” n̄ko ọwọrọ “ndida ekikere n̄kụt n̄kpọ, ndikop, ndifiọk.” Sia Jesus ke mfọnmma usụn̄ okowụtde edu Abasi, “mmọ eke esịt mmọ asanade,” oro ẹbuọtde idem ke Christ ye ke uwa usio-isop idiọkn̄kpọ esie, ẹmi ẹfende mme idiọkn̄kpọ mmọ, ẹmi ẹnyụn̄ ẹkemede ndinọ Abasi utuakibuot oro ẹnyịmede, ẹnyene ikike ẹban̄a edu oro. (John 14:7-9; Ephesus 1:7) Ye mbon oro ẹyetde aran, ndikụt Abasi osịm ata akpatre esie ke ini ẹnamde mmọ eset ẹka heaven, kpa ebiet emi mmọ ẹnen̄erede ẹkụt Abasi ye Christ. (2 Corinth 1:21, 22; 1 John 3:2) Edi kpukpru mmọ eke esịt mmọ asanade ẹkeme ndikụt Abasi ebe ke nnennen ifiọk ye utuakibuot akpanikọ. (Psalm 24:3, 4; 1 John 3:6; 3 John 11) Ẹnịm mmọ ẹnọ nsinsi uwem ke heaven m̀mê ke paradise isọn̄.—Luke 23:43; 1 Corinth 15:50-57; 1 Peter 1:3-5.
5. Didie ikpọn̄îkpọn̄ ke owo ekeme ndikabade ndi andinịm ke akpanikọ ye ata anditiene Jesus Christ?
5 Mbon oro owo mînịmke mmọ inọ nsinsi uwem idikabakede idi mme andinịm ke akpanikọ. Mmọ ikemeke ndinyene mbuọtidem. (2 Thessalonica 3:2) Akande oro, owo ndomokiet ikemeke ndidi ata mbet Jesus Christ ibọhọke ẹkpep enye n̄kpọ ndien Jehovah, oro okụtde esịt, odụri owo oro edi. (John 6:41-47) Nte ededi, ke ndikwọrọ ikọ ke ufọk ke ufọk, Mme Ntiense Jehovah ibemke iso ibiere ikpe inọ baba owo kiet. Mmọ ikemeke ndikot esịt edi ẹyak utịp ẹsịn ke ima ima ubọk Abasi.
6. (a) Nso ke ẹketịn̄ ẹban̄a ọkpọ ọkpọ edisobo owo ke utom eke ufọk-ke-ufọk? (b) Nso ndutịm ke ẹkenam ndin̄wam Mme Ntiense Jehovah ndiyom mmọemi ẹnịmde ẹnọ nsinsi uwem?
6 Eyen ukpepn̄kpọ kiet nte odotde ọkọdọhọ ete: “[Paul] ama ekpep akpanikọ an̄wan̄wa ye ke ufọk ke ufọk. Idịghe ke mbot utịn̄ikọ ikpọn̄, edi ke ọkpọ okpọ edisobo ye mme owo enye ama ọkwọrọ Christ. Ediwak ini ọkpọ ọkpọ edisobo owo esitịm okụt unen akan utọ m̀mê usụn̄ edinam efen ekededi ke ndisịm mme ukpọn̄.” (August Van Ryn) Mme utọ n̄wed nte Ñwed-item Ufök-ñwed Utom Ukara-Abasi, Reasoning From the Scriptures, ye Utom Obio Ubọn̄ Nnyịn ẹn̄wam Mme Ntiense Jehovah ndinọ mme utịn̄ikọ ye ndinam ọkpọ ọkpọ edisobo owo oro ọfọnde akan ke utom an̄wautom mmọ. Se idide n̄kpọ un̄wam, n̄ko, edi mme nnamn̄wụt Esop Utom ye item Ufọkn̄wed Utom Ukara Abasi. Mbon oro ẹsidụkde ufọkn̄wed emi ẹsibọ ata eti ukpep ke mme utọ edu utịn̄ikọ nte nti ntọn̄ọikọ, edikama N̄wed Abasi nte ọfọnde, ikọ eke owụtde ifiọk, mfan̄a anamde ẹnịm ke akpanikọ, edida mme uwụtn̄kpọ, ye mme utịtikọ eke ọfọnde. Ẹyak nnyịn ise nte Bible ẹsịnde item emi, oro ekemede ndinam ikọt Abasi ẹkụt unen ẹkan nte mmọ ẹyomde mmọemi ẹnịmde ẹnọ nsinsi uwem.
Ntọn̄ọikọ Emi Anamde Owo Ekere N̄kpọ
7. Ntọn̄ọ ntọn̄ọ ikọ ke Ukwọrọikọ Jesus ke Obot ekpep nso aban̄a mme ntọn̄ọikọ?
7 Ke uwụtn̄kpọ Jesus, mmọ oro ẹtịmde idem ẹnọ edinọ ikọ ntiense eke ufọk-ke-ufọk ẹkeme ndikpep n̄kpọ mban̄a ntọn̄ọikọ ẹmi ẹdemerede udọn̄. Ke ọtọn̄ọde Ukwọrọikọ esie ke Obot, enye ama ada ikọ oro “inemesịt odu” (NW) utịm ike-usụkkiet. Ke uwụtn̄kpọ, enye ọkọdọhọ ete: “Inemesịt odu ọnọ mmọ oro ẹnyenede udọn̄ ke n̄kpọ eke spirit, koro Obio Ubọn̄ Heaven enyenede mmọ. . . . Inemesịt odu ọnọ mmọemi ẹnyenede ifụre ifụre ido, koro mmọ eyeda isọn̄ ẹnyene.” (Matthew 5:3-12, NW) Ikọ ẹmi ẹkedi nnennen ẹnyụn̄ ẹn̄wan̄a. Ndien ntọn̄ọikọ oro ke akpanikọ ẹma ẹdemede udọn̄ ẹnyụn̄ ẹnam mme andikpan̄ utọn̄ nnọ enye ẹkere n̄kpọ, koro anie owo mîyomke ndikop inemesịt?
8. Ke utom eke ufọk-ke-ufọk, didie ke ẹkpetọn̄ọ ibuotikọ ndida nnyene nneme?
8 Ẹkpenyene nditọn̄ọ ibuotikọ ndida nnyene nneme ekededi ke utom eke ufọk-ke-ufọk ke in̄wan̄în̄wan̄, inem inem usụn̄. Edi ikpanaha owo baba kiet ada ntọn̄ọikọ oro anamde owo edịghe, utọ nte, “Mmenyene etop oro otode ufụm enyọn̄ nditịn̄ nnọ fi.” Eti mbụk enyene ntọn̄ọ oto heaven, edi utọ ntọn̄ọikọ oro ekeme n̄ko ndinam enyeneufọk ekere m̀mê ikpada Ntiense oro ke akpanikọ m̀mê ikposio enye unyọn̄ usọp usọp nte ikekeme.
Nditịm Nsiak Ikọ Abasi
9. (a) Didie ke ẹkpesiak, ẹkot, ẹnyụn̄ ẹbuan itien̄wed Abasi ke an̄wautom? (b) Nso uwụtn̄kpọ ke ẹsiak ndiwụt nte Jesus akadade mme mbụme anam n̄kpọ?
9 Ke an̄wautom, nte edide ke mbot utịn̄ikọ, ẹkpenyene ndisiak mme itien̄wed Abasi nte ọfọnde, ẹkot ye nsọn̄uyo oro odotde, ẹnyụn̄ ẹbuan ke in̄wan̄în̄wan̄, nnennen usụn̄. Mme mbụme ẹnamde enyeneufọk ekere aban̄a mme akpan n̄kpọ ẹdude ke N̄wed Abasi ẹkeme n̄ko ndin̄wam. N̄ko, mme usụn̄ unam n̄kpọ Jesus ẹnọ ukpep. Ke ini kiet, eren oro ọfiọkde Ibet Moses ama obụp enye ete: “Andikpep, ndinam nso man nnyene nsinsi uwem?” Ke ibọrọ Jesus obụp ete: “Ẹwewet didie ke ibet? Okot didie?” Eyịghe idụhe, Jesus ama ọdiọn̄ọ ke emi edi mbụme oro eren emi ekemede ndibọrọ. Enye ama ọbọrọ nnennen nnennen, ọdọhọde ete: “Ma Jehovah Abasi fo ke ofụri esịt fo, ye ke ofụri ukpọn̄ fo, ye ke ofụri odudu fo, ye ke ofụri ekikere fo; nyụn̄ ma mbọhọidụn̄ fo nte idemfo.” Emi ama anam Jesus otoro enye, ndien nneme ama akaiso.—Luke 10:25-37.
10. Nso ke ẹkpenyene ke ekikere adan̄a nte ibuotikọ ndida nnyene nneme oro owo adade abuanade, ndien nso ke ẹkpetre ke ini ẹbụpde mme enyeneufọk mme mbụme?
10 Mmọ oro ẹnọde ikọ ntiense ke ufọk ke ufọk ẹkpenyene ndisọn̄ọ ntịn̄ ibuot nneme eke ibuotiko ndida nnyene nneme ẹnyụn̄ ẹnam an̄wan̄a ntak ẹkotde mme itien̄wed Bible oro atatde ibuotikọ oro. Sia Ntiense esidomode ndisịm esịt enyeneufọk, akpana enye etre ndibụp mme esuene esuene mbụme. Ke ndikama ikọ Abasi, ‘nneme nnyịn akpakam enyene inem ke esịt kpukpru ini, nte esịnde inụn̄ ke esịt.’—Colossae 4:6.
11. Ke ndikama N̄wed Abasi nnen̄ede mme ukwan̄ ekikere, nso uwụtn̄kpọ ke nnyịn inyene ito idomo oro Satan okodomode Jesus?
11 Akpan akpan ke mme mfiakn̄ka, ẹkeme ndidi se ẹyomde ẹnen̄ede mme ukwan̄ ekikere ke ndiwụt se N̄wed Abasi enen̄erede etịn̄ m̀mê ọwọrọde. Jesus ama anam ukem n̄kpọ oro ke ndisịn Satan, oro ọkọdọhọde ete: “Edieke Afo edide Eyen Abasi, sio idemfo [ke edikon̄ ebiet temple, nte owo oro oyomde ndiwot idem] duọk ke isọn̄; koro ẹma ẹwet ẹte, Enye eyenọ mme angel Esie uyo aban̄a Fi: ndien mmọ ẹyekama Fi ke ubọk mmọ, mbak Afo edituak ukot Fo ke itiat.” Psalm 91:11, 12, ẹmi Satan okokotde oto iwụtke ke enen ndisịn uwem ke afanikọn̄, kpa enọ otode Abasi. Ke ọdiọn̄ọde ke akwan̄a ndidomo Jehovah ke ndida uwem esie nnam mbubru, Jesus ọkọdọhọ Satan ete: “Ẹma ẹwet n̄ko ẹte, Kûdomo Jehovah Abasi fo.” (Matthew 4:5-7) Edi akpanikọ, Satan idịghe etịn̄-akpanikọ. Edi ke ini mme owo eti ekikere ẹnọde ukwan̄ ekikere emi edibiọn̄ọde n̄kọri eke spirit mmọ, akpana asan̄autom Ikọ Abasi ke usọ owụt se N̄wed Abasi enen̄erede etịn̄ onyụn̄ ọwọrọde. Emi edi ofụri ikpehe ‘editịm nsiak ikọ akpanikọ’—kiet ke otu akpan ukpepn̄kpọ emi ẹsikpepde ke Ufọkn̄wed Utom Ukara Abasi.—2 Timothy 2:15.
Mbukpek Enyene Itie Esie
12, 13. Ntak emi ọfọnde ndikama mbukpek ke an̄wautom?
12 Mbukpek enyene nnennen itie ke utom Christian. Ke uwụtn̄kpọ, Paul ama akpak nsan̄autom esie Timothy ndikaiso ke n̄kpọ oro enye ekekpepde ẹkenyụn̄ “ẹnamde onịm ke akpanikọ.” (2 Timothy 3:14, NW) Ke Corinth, Paul “onyụn̄ ebuen ikọ ke synagogue kpukpru sabbath, an̄wana ndinam mme Jew ye mme Greek ẹnịm ke akpanikọ.” (Utom 18:1-4) Ke Ephesus, enye ama okụt unen ke ‘ndibuen ikọ ye mme owo, nnyụn̄ nnọ mmọ item mban̄a Ubọn̄ Abasi.’ (Utom 19:8) Ndien ke ini odude ke idak ukpeme ke Rome, apostle oro ama okot mme owo ẹdi ẹtiene enye onyụn̄ ọnọ mmọ ikọ ntiense, “an̄wana ndiwọn̄ọde mmọ esịt,” ndusụk mmọ ẹma ẹnyụn̄ ẹkabade ẹnịm ke akpanikọ.—Utom 28:23, 24.
13 Nte ededi, inamke n̄kpọ m̀mê Ntiense ekeme ndidomo nditie mbukpek mbukpek didie, mmọemi ẹnịmde ẹnọ nsinsi uwem kpọt ẹkeme ndikabade nnịm ke akpanikọ. Mfan̄a anamde ẹnịm ye in̄wan̄în̄wan̄ edinam n̄kpọ an̄wan̄a, oro ẹnọde ke usọ usọ usụn̄, ẹkeme ndikpek mmọ ndinịm ke akpanikọ. Edi nso efen ikeme ndin̄wam ke ndikpek mmọ?
Tie Mbufiọk Mbufiọk Nyụn̄ Nam Ẹnịm
14. (a) Nso ke editịn̄ nyịri nte owụtde mbufiọk abuana? (b) Mfan̄a anamde ẹnịm oyom nso?
14 Kiet ke otu edu oro ẹsidoride nsọnuyo ke Ufọkn̄wed Utom Ukara Abasi edi editịn̄ nyịri nte owụtde mbufiọk. Emi abuana edisịn ofụri n̄wọrọnda ekikere ye n̄kpọ enyenede ebuana ke ndutịm owụtde eti ekikere. Edide akpan n̄kpọ n̄ko edi mfan̄a anamde ẹnịm, emi oyomde ẹsịn eti itiat idakisọn̄ ẹnyụn̄ ẹnọ eti nsọn̄ọikọ. Enyenede ebuana ye emi edi edin̄wam mme andikpan̄ utọn̄ ndikọk ibuot ke ndimụm ọsọ isọn̄ akpanikọ n̄kama, nditat mme akpan n̄kpọ nte odotde, nnyụn̄ nda mmọ mbuan uforo uforo. N̄ko, N̄wed Abasi ọnọ mme ndausụn̄.
15. (a) Didie ke Paul ekedemede udọn̄ onyụn̄ onịm ọsọ isọn̄ akpanikọ ke ini enye eketịn̄de ikọ ke Obot Mars? (b) Ke utịn̄ikọ Paul, nso uyarade ke nnyịn inyene iban̄a editịn̄ nyịri nte owụtde mbufiọk?
15 Edu utịn̄ikọ ẹmi ẹwụt idem ke ọwọrọetop utịn̄ikọ apostle Paul ke Obot Mars ke Athens eset. (Utom 17:22-31) Ntọn̄ọikọ esie ama edemede udọn̄ onyụn̄ onịm ọsọ isọn̄ akpanikọ, koro enye ọkọdọhọ ete: “Mbufo mbio Athens, mmokụt nte ke kpukpru usụn̄, mbufo ẹdi mme andibak mme abasi etieti.” Ye mmọ, nte eyịghe mîdụhe, emi eketie nte ikọ itoro. Ke ama akasiak itieuwa oro ẹyakde ẹnọ “Abasi Emi Owo Mîfiọkke,” Paul ama akaiso ye editịn̄ nyịri nte owụtde mbufiọk ye mfan̄a anamde ẹnịm. Enye ama osio owụt nte ke Abasi oro mmọ mîfiọkke “[okobot] ererimbot ye kpukpru se idude ke esịt.” Ke mîbietke Athena m̀mê mme abasi Greek eken, ‘enye idụn̄ke ke mme temple eke ubọk owo ẹnamde; inyụn̄ iyomke owo ẹda ubọk ẹnam n̄kpọ ẹnọ imọ.’ Apostle oro ndien ama owụt nte ke Abasi emi ọkọnọ nnyịn uwem inyụn̄ inamke nnyịn ifiọn̄ọ ubọk iyom enye nnannan. Paul ndien ama ebuen ikọ ete ke Andibot nnyịn emi okofụmide ini ndisịme ndisịme ukpono ndem oro, ‘owụk kpukpru owo ke kpukpru ebiet, ete ẹkabade esịt.’ Emi ke mbufiọk ama ada okosịm akpan n̄kpọ oro nte ke ‘Abasi eyekpe ikpe ọnọ mme andidụn̄ isọn̄ ke edinen ido, ke ubọk Owo emi ẹkemekde, oro enye akanamde eset ke n̄kpa.’ Sia Paul “ọ[kọ]kwọrọde Jesus ye ediset ke n̄kpa,” mbon Athens ẹmi ẹma ẹdiọn̄ọ ẹte ke Ebiereikpe oro edi Jesus Christ.—Utom 17:18.
16. Didie ke utịn̄ikọ Paul ke Obot Mars ye edibọ ukpep ke Ufọkn̄wed Utom Ukara Abasi ẹkeme nditụk utom an̄wautom owo?
16 Edi akpanikọ, Paul ikọnọhọ ikọ ntiense ke ufọk ke ufọk ke Obot Mars. Edi otode utịn̄ikọ esie ye ukpep oro ẹnọde ke Ufọkn̄wed Utom Ukara Abasi, Mme Ntiense Jehovah ẹkeme ndikpep ekese n̄kpọ oro ẹkemede ndikọri utom an̄wautom mmọ. Ih, kpukpru ẹmi an̄wam ndinam mmọ ẹdi mme asan̄autom oro ẹtịmde ẹkụt unen, kpa nte mbufiọk mbufiọk ikọ Paul ye mfan̄a anamde ẹnịm ẹkekpekde ndusụk mbon Athens oro ndikabade ndi mme andinịm ke akpanikọ.—Utom 17:32-34.
Kama Mme Uwụtn̄kpọ Ẹnọde Ukpep
17. Nso orụk uwụtn̄kpọ ke ẹkpeda ke utom an̄wautom?
17 Ufọkn̄wed Utom Ukara Abasi n̄ko an̄wam mme asan̄autom Abasi ndikama nti uwụtn̄kpọ nnọ ikọ ntiense ke ufọk-ke-ufọk ye ke mme usụn̄ utom an̄wautom mmọ eken. Ke ndisọn̄ọ ntịn̄ mme akpan n̄kpọ, ẹkpeda mmemmem uwụtn̄kpọ emi enemde ndikop. Ntiense akpada mmọ oto mme idaha ẹmehede onyụn̄ odu ke ukpeme ndinam ebuana odude ke mmọ an̄wan̄a. Mme uwụtn̄kpọ Jesus ẹma ẹsịm kpukpru se ẹyomde ẹmi.
18. Didie ke Matthew 13:45, 46 enyene ufọn ke utom an̄wautom?
18 Ke uwụtn̄kpọ, kere ban̄a ikọ Jesus emi: “Obio Ubọn̄ Heaven ebiet owo-urua eke oyomde ndiye pearl; ndien ke enye ama okụt pearl kiet emi okponde ekọmurua, aka akanyam kpukpru se enyenede, edep pearl oro.” (Matthew 13:45, 46) Mme pearl ẹdi mme ọsọn̄urua itiat oro ẹsifiọhọde ke esịt ikpọk n̄kọp ye mme unam ikpọk eken. Edi ibat ibat pearl kpọt ẹdi “ndiye.” Owo-urua oro ama enyene esịtifiọk oro ẹyomde man ẹdiọn̄ọ akakan ufọn pearl kiet emi, ndien ama onyịme ndiyak kpukpru n̄kpọ eken ẹka man enyene enye. Iso-ọfọn ke mfiakn̄ka m̀mê ke ukpepn̄kpọ Bible, ẹkeme ndida uwụtn̄kpọ emi ndiwụt nte ke owo emi enen̄erede oyom Obio Ubọn̄ Abasi eyenam n̄kpọ nte owo-urua oro. Utọ owo emi eyenọ Obio Ubọn̄ akpa itie ke uwem, ọdiọn̄ọde nte ke enye odot uwaidem ekededi.
Beri Ye Ndemede Udọn̄
19. Ke utom eke ufọk-ke-ufọk, nso ke mme utịtikọ ẹkpewụt enyeneufọk?
19 Ke Ufọkn̄wed Utom Ukara Abasi, ikọt Abasi ẹkpep n̄ko nte ke akpana utịt utịn̄ikọ m̀mê nneme enyene nnennen ebuana ye ibuotikọ onyụn̄ owụt mme andikpan̄ uton̄ se ẹkpenamde onyụn̄ ẹsịn udọn̄ ọnọ mmọ ndinam enye. Ke utom eke ufọk-ke-ufọk, oyom ẹwụt enyeneufọk nte an̄wan̄ade usụn̄ oro ẹdoride enyịn enye ndida, utọ nte edibọ n̄wed Bible m̀mê ndinyịme mfiakn̄ka.
20. Nso eti uwụtn̄kpọ ke utịtikọ oro edemerede owo udọn̄ ke nnyịn ikụt ke Matthew 7:24-27?
20 Utịtikọ Ukwọrọikọ Jesus oro ke Obot ọnọ eti uwụtn̄kpọ. Ke mmemmem uwụtn̄kpọ oro an̄wan̄ade, Jesus ama owụt ke ekpedi usụn̄ eti ibuot ndinam mme ikọ imọ. Enye ekeberi ete: “Mmọdo kpukpru owo eke ẹkopde ikọ Mi emi, ẹnyụn̄ ẹnịmde mmọ, nyedomo enye ye enyene-ibuot owo emi ọbọpde ufọk esie ke enyọn̄ akamba itiat: ndien edịm edep, mmọn̄ ukwọ onyụn̄ edi, ofụm onyụn̄ abara, ebere ufọk oro; ndien enye iduọhọ, koro ẹbọpde enye ke enyọn̄ akamba itiat. Ndien kpukpru owo eke ẹkopde ikọ Mi emi, ndien mînịmke, ẹyedomo enye ye ndisịme owo emi ọbọpde ufọk esie ke enyọn̄ utan: ndien edịm edep, mmọn̄ ukwọ onyụn̄ edi, ofụm onyụn̄ abara, ebere ufọk oro: ndien enye ọduọ: n̄wụre esie onyụn̄ okpon.” (Matthew 7:24-27) Emi owụt mfọn mfọn didie ntem nte ke mme asan̄autom Abasi ẹkpedomo ndidemede udọn̄ mme enyeneufọk!
21. Nso ke nneme nnyịn okowụt, edi nso ke ana ẹdiọn̄ọ?
21 Mme akpan n̄kpọ ẹmi ẹnemede ẹkụre mi ẹwụt nte Ufọkn̄wed Utom Ukara Abasi ekemede ndin̄wam ediwak owo ndidi mme anditan̄a Obio Ubọn̄ ẹmi ẹdotde. Ke akpanikọ, owo ndidot mfọn mfọn oto Abasi akpan akpan. (2 Corinth 3:4-6) Asan̄autom okpodot nte edidodot, baba owo kiet ikemeke ndikpak mme owo ndikabade ndi mme andinịm ke akpanikọ ibọhọke Abasi odụri enye edi ebe ke Christ. (John 14:6) Edi, akpana ikọt Abasi ẹbọ ufọn ẹto mme enọ eke spirit oro Jehovah ọnọde nte mmọ ẹyomde mmọemi ẹnịmde ẹnọ nsinsi uwem.
Didie ke Afo Ọkpọbọrọ?
◻ Mmanie ẹdi “mmọ eke esịt mmọ asanade,” ndien didie ke mmọ ‘ẹkụt Abasi’?
◻ Nso mme n̄kpọ ke akpana ẹkere ẹban̄a ke ini ẹtọn̄ọde etop Obio Ubọn̄ ke utom eke ufọk-ke-ufọk?
◻ Didie ke ẹkeme nditịm nsiak Ikọ Abasi ke an̄wautom?
◻ Nso idin̄wam ke editịn̄ nyịri nte owụtde mbufiọk ke an̄wautom?
◻ Nso ke akpana eti ẹban̄a mme uwụtn̄kpọ oro ẹkamade ke an̄wautom?
◻ Nso ke mme utịtikọ ẹkamade ke utom unọ ikọ ntiense ẹkpeyọhọ?
[Ndise ke page 16]
Jesus ọkọdọhọ ke “mmọ eke esịt mmọ asanade” “eyekụt Abasi.” Nso ke emi ọkọwọrọ?
[Ndise ke page 18]
Ẹkpenyene ndisiak mme itien̄wed Abasi nte ọfọnde, ẹkot ye nsọn̄uyo oro odotde, ẹnyụn̄ ẹbuan ke in̄wan̄în̄wan̄, nnennen usụn̄