“Emi Edi Ikpọkidem Mi”
“Ẹ BỌ ẹta; . . . emi edi ikpọkidem mi.” (Matthew 26:26, The New Jerusalem Bible)
Ye ikọ ẹmi, Jesus Christ ama emen uyo eke leaven mîdụhe ọnọ mme apostle esie ke ini ọkọtọn̄ọde Udia Mbubịteyo Ọbọn̄. Edi nso ke ikọ esie ẹmi, “Emi edi ikpọkidem mi” ọkọwọrọ?
IBỌRỌ mbụme emi edi akpan n̄kpọ ọnọ mbon Roman Catholic, sia ikọ Jesus edide isọn̄ ọnọ ukpepn̄kpọ ata ikpọkidem ye iyịp Christ. Nte asan̄ade ekekem ye edinịm ke akpanikọ emi, ke ini mbon Catholic ẹnamde usọrọ Mass ẹnyụn̄ ẹdiade uyo, enye akabade edi ata ikpọkidem m̀mê obụkidem Christ. Mmọ, ke ntre, ẹyefan̄a ọkpọsọn̄ ọkpọsọn̄ ye New World Translation of the Holy Scriptures, emi ewetde ikọ Jesus ntem: “Ẹbọ, ẹta. Emi ọwọrọ ikpọkidem mi.” Uwetn̄kpọ emi ọnọ ekikere nte ke uyo ekedi ndamban̄a ikpọkidem Jesus, idịghe ikpọkidem oro ke idemesie. Ewe edikabade ọnọ nnennen ekikere?
Ikọ Greek oro ẹkabarede “edi” m̀mê “ọwọrọ” edi e·stinʹ. Enye ke akpan ọwọrọ “edi,” edi enye n̄ko ekeme ndiwọrọ “ndida nnọ, ndiwụt.” Ewe uwetn̄kpọ ọfọn akan ke udọn̄ikọ emi?
Odotde ẹtịm ẹfiọk edi ikọ idakisọn̄ oro odude ke Matthew 26:26 ke usem-Spanish La Sagrada Escritura, Texto y comentario por Profesores de la Compañía de Jesús, Nuevo Testamento I (Edisana N̄wed Abasi, Uwetn̄kpọ ye Edinam An̄wan̄a eke Mme Prọfesọ N̄ka Jesus, Obufa Testament). Enye ọdọhọ ete: ‘Edikabade, ke idaha ikọ usem, nte enende ekeme n̄ko ndidi se ẹsịnde ndiwụt m̀mê ndamban̄a nte edi—ọwọrọde ata idem. Nte mme uwụtn̄kpọ ke emi ọwọrọ ndamban̄a, ẹkeme ndisiak Genesis 41:26; Ezekiel 5:5; Daniel 7:17; Luke 8:11; Matthew 13:38; 16:18; Galatia 4:24; Ediyarade 1:20. Se edi ọwọrọde ([ke usụn̄ifiọk eke] edidi ata ukem ye) edi ubiere oro ekerede-kere, nte ẹkemede ndikụt ke n̄wed ukpepn̄kpọ, oro ẹsiode ikọ ediwụt nte n̄kpọ edide ukem ye n̄kpọ, m̀mê ndamban̄a n̄kpọ, ẹfep, n̄ko ye usụn̄ nte ubak udimikọ oro akan̄wan̄ade Akpa Ufọkederi.’
Nte uwetn̄kpọ Roman Catholic emi in̄wan̄în̄wan̄ owụtde, ke usem, ikọ Jesus ekeme ndin̄wan̄a owo ke usụn̄ ekededi. Ke akpanikọ, ẹkabade ikọ Greek oro, e·stinʹ, “se ọwọrọde” ke ebiet efen ke New Jerusalem Bible Catholic. (Matthew 12:7) Ewe ikọ ke akabade ikọ ekpemek ke Matthew 26:26? Sia Jesus okosụk odude uwem ke mfọnmma ikpọkidem ke ini enye eketịn̄de ikọ eke itien̄wed oro, uyo oro enye ọkọnọde mme anditiene enye ikpekedịghe ata ikpọkidem esie. Akande oro, ẹma ẹwa ofụri mfọnmma ikpọkidem eke owo esie nte uwa ufak. (Colossae 1:21-23) Ntem, mfọnn̄kan usụn̄ ndisịn ufan̄ikọ emi edi: “Emi ọwọrọ ikpọkidem mi.” Uyo oro leaven mîdụhe akada aban̄a ikpọkidem Jesus, emi ediwade ke ibuot ubonowo.
Idem edieke ọkpọ ọkpọ Bible fo esịnede ikọ oro “Emi edi ikpọkidem mi,” kûyak oro afịna fi. Jesus ediwak ini ama esida ukem ikọ oro. Ke ini enye ọkọdọhọde ete: “Ami ndi inuaotop” ye, “Ami ndi ata vine,” owo ndomokiet ikọdọhọke ke enye edi ata inuaotop m̀mê ata vine. (John 10:7; 15:1) Ndien ke ini enye, nte ekemde ye The New Jerusalem Bible, ekemende cup wine ọnọ mme mbet esie onyụn̄ ọdọhọde ete: “Cup emi edi obufa ediomi,” owo ndomokiet ikekereke ite ke cup oro ekedi obufa ediomi. (Luke 22:20) Ntre n̄ko, ke ini enye ọkọdọhọde ke uyo oro ‘ekedi’ ikpọkidem imọ, ana nnyịn idiọn̄ọ nte ke uyo oro ‘ọkọwọrọ’ m̀mê akada aban̄a ikpọkidem esie.