Da Inyene Fo Kpono Jehovah
‘AMI ndịghe imọ owo; ami n̄kam ndi uyen nnyụn̄ nnyene ata esisịt n̄kpọ.’ ‘Ami nnyeneke ekese ifiọkn̄wed; nso ke n̄keme ndinọ Jehovah?’ ‘Ami mmobiomo ndo idiọk idiọk; Jehovah eyesio mi efep ke ibat.’ ‘Ami mmọsọn̄ ke isua emana; ini ebe mi ndikọ inyene.’
Ndi utọ ekikere ẹmi ẹdụk fi esịt nte ekerede aban̄a ibuotikọ nneme emi? Edi, ekeme ndidi emenyene inyene akan nte afo ekerede. Ti ikọ ẹmi Ọbọn̄ Jesus ọkọdọhọde esop ke Smyrna, ete: “Mmọfiọk ukụt ye ubuene fo edi emenyene inyene.” (Ediyarade 2:9) Jesus ama ebemiso ọdọhọ ke Ukwọrọikọ oro ke Obot, ete: “Ẹkûbon n̄kpọuto ẹnịm ẹnọ idem ke isọn̄ . . . edi ẹbon n̄kpọuto ẹnịm ẹnọ idem ke heaven . . . koro ọtọ nte n̄kpọuto fo odude, do ke esịt fo edinyụn̄ odu.” (Matthew 6:19-21) Nte ikọ Eteufọk nnyịn ẹmi ẹdemede fi ukpọn̄? Ih, ekeme ndidi n̄kpọ odu ke idemfo oro Ete nnyịn eke heaven, Jehovah, ye Eyen esie ẹdade nte ata ọsọn̄urua n̄kpọ. Ẹyak nnyịn idụn̄ọrede ise.
Uyai Uyen—Odudu ye Ifịk
Didie ke uyen ekeme ndinam ọsọn̄urua utom nnọ Jehovah? Mme N̄ke 20:29 ọsọn̄ọ ọnọ nnyịn ete ke n̄kparawa owo ẹnyene ata eti inyene—kpa odudu. Edemede owo ukpọn̄ didie ntem ndikụt uyen ayakde odudu ye nsehe uyen esie esịn ke utom Abasi nnyịn!
Ẹyak nnyịn ida mbụk ifiak ika edem ikosịm ntọn̄ọ ntọn̄ọ iduọk isua 1930 ke ini ediwak uyen ẹkekopde ẹban̄a akpanikọ oro esịnede ke Bible. Uyen kiet emi ekedide isua 16 ke emana ama ọbuọt ufan esie n̄wed un̄wam ukpep Bible oro, Creation, emi Watch Tower Society ekemịn̄de. Etisịm ini oro enye okotde osịm ibuotikọ oro, “Obufa Edibotn̄kpọ” onyụn̄ okotde aban̄a ediyak idem nnọ, enye ama ọfiọk se enye okoyomde ndida uwem esie nnam. Inikiet inikiet, enye ama ayak idemesie ọnọ ata ọkpọsọn̄ Andibot. Ke isua oro eketienede enye ama okot n̄wed efen, Vindication (Akpa N̄wed), onyụn̄ ọfiọk aban̄a idotenyịn edibuana ke edimenede enyịn̄ Abasi ye itie edikara esie ke enyọn̄. Ntọt emi ama edemede enye ikan̄ ikan̄ udọn̄ ọnọ utom uyọhọ-ini. Ke isua oro enye ama esịn eben̄e oyom mme ifetutom usiakusụn̄, ndien tutu osịm mfịn emi enye ke akaiso ke utom uyọhọ-ini. Ke adan̄aemi ediwak nsan̄a esie idahaemi ẹma ẹkekụre utom mmọ ke isọn̄, ediwak mbon oro ẹsụhọde ke ẹsụk ẹwụt edu uyakidem ofụri-ukpọn̄ nnọ Ete nnyịn eke heaven.
Ndi mme uyen eyomfịn ẹwụt ukem ọsọn̄urua edu emi? Mmọ ke akpanikọ ẹwụt! Mme mbụkutom Yearbook ẹwụt ke akwa udịm oro ẹwakde nte ntọi mbara idahaemi ke ẹtiene ẹdụk udịm usiakusụn̄. (Psalm 110:3) Philippines ama ọtọt ete ke mbahade 13 eke ikie ke otu kpukpru asiakusụn̄ ofụri-ini mmọ isịmke kan̄a isua 20 ke emana. Ndi oro edi ntre ke ebiet efen? Ih, edi ntre. Ke uwụtn̄kpọ, ndụn̄ọde ẹnamde ke n̄kpri isuo Trinidad ye Tobago owụt nte ke mbufa asiakusụn̄ 282 ẹma ẹsịn enyịn̄ ọtọn̄ọde ke September 1, 1986, osịm September 30, 1988. Ke otu ibat oro, 48 ikosịmke kan̄a isua 20 ke emana. Ndi afo akpama ndikop nto kiet ke otu mmọemi?
Sobo ye Charmaine Francis. Enye ọdọhọ ete: “Toto ke ini n̄kedide eyenọwọn̄, ete ye eka mi ẹma ẹsitịn̄ ẹnọ mi ẹban̄a edinam n̄kpọ Jehovah nnyụn̄ nnam akpanikọ nnọ enye. Ke ini ete ye eka mi ẹbụpde se n̄kpanamde edieke ẹkpesịnde mmimọ ke ufọk-n̄kpọkọbi ke ntak edikwọrọ eti mbụk, ami nyebọrọ nte, ‘Ami ndinam n̄kpọ Jehovah.’ Mma nnam uyakidem mi ke ini n̄kedide isua 13, mma nnyụn̄ nna baptism ke ndide isua 14. Ke oro ebede, ke kpukpru ini nduọkodudu ufọkn̄wed, mma nsibuana ke utom usiakusụn̄ unọ un̄wam. Ke 1983 mma ndụk utom usiakusụn̄ ofụri-ini. Ke akpa isua usiakusụn̄ mi, mma ndara ndin̄wam n̄wanndọ kiet akabade edi asan̄autom Jehovah. Idahaemi ami ke nnịm ukpepn̄kpọ Bible usụkkiet. Kiet ke anam ntịmidem ọnọ baptism, ndien ita en̄wen ke ẹdụk ukpepn̄kpọ.”
Idahaemi, mme uyen, idịghe mbufo ẹmenyịme ke mmimọ n̄ko imenyene ọsọn̄urua n̄kpọ ndida n̄kpono Jehovah? Ke akpanikọ mbufo ẹmenyene! Ọkpọkọm mbufo idahaemi idụhe ke utom uyọhọ-ini, ẹmekeme ndikpono Jehovah nte ekemde ye mme idaha mbufo. Ẹkeme ndidi ediwak isua ẹsụk ẹnana mbufo ke iso ndika ufọkn̄wed. Edi, mbufo ẹmenyene ọsọn̄urua ifet nditoro Jehovah nnọ mme andikpep ye nsan̄a ubet ukpepn̄kpọ mbufo. Christian Kalloo, emi edide isua duop ke emana, ama ada n̄wed Life—How Did It Get Here—By Evolution or by Creation? esie akama aka ufọkn̄wed. Utịp? Enye ama onịm itiaba ye mbon oro ẹkenyenede udọn̄ ke ibuotikọ oro. Enye n̄ko ama onịm kiet ke utom eke ufọk-ke-ufọk. Afo emekeme ndinam kpasụk ntre.—Men Matthew 21:15, 16 domo.
Akwa Andikpep Nnyịn Ekpep Nnyịn N̄kpọ
Prọfet Isaiah ọkọdọhọ ete: “Ọbọn̄ Jehovah ọmọnọ mi edeme mmọ eke ẹkpepde n̄kpọ.” Enye ama ọnọ Jehovah itoro ke ntak ukeme utịn̄ikọ esie. Enye n̄kọ ama ewet un̄wọn̄ọ oro Jehovah ọn̄wọn̄ọde ete: “Spirit mi emi odorode fi ke idem, ye ikọ mi emi nsịnde fi ke inua, idikpọn̄ke inua fo, ye inua nditọ fo, ye inua nditọ nditọ fo.” (Isaiah 50:4; 59:21) Kpasụk nte mme owo ẹmi mîkọfiọkke n̄wed ẹnyụn̄ ẹdide ikpîkpu owo ẹkekabarede ẹdi mme apostle Jesus ndien Abasi anam mmọ ẹdi mbon eti ibuot ke mme n̄kpọ eke spirit, ntre ke Jehovah anam mme ikpîkpu owo ẹnyene eti ibuot mfịn.
Yearbook eke 1986 enyene ọnọ-nsịnudọn̄ ntọt ọnọ mbon oro ẹnyenede esisịt ifiọkn̄wed m̀mê oro mînyeneke-nyene. Ke ediwak idụt Mme Ntiense Jehovah ẹtịm ufọkn̄wed edikot ye ediwet n̄wed man ẹkpep ikpọ owo ndikot n̄wed. Jehovah ọdiọn̄ mme utọ owo oro didie ntem! Ọtọn̄ọde ke 1962 osịm 1984 ke Nigeria, n̄kpọ nte owo 19,238 ẹma ẹnam ata eti n̄kọri ke ndikpep ndikọt nnyụn̄ n̄wet n̄wed ndien idahaemi ẹkeme ndinen̄ede n̄kot Bible ke idemmọ nnyụn̄ n̄kot n̄ko nnọ mbon oro mmọ ẹnọde ikọ ntiense. Nso eti edidiọn̄ ke mmọ ẹnyene ntem! Eyenete eren kiet ama anam ọfọn etieti tutu eyedi se enye akabade edi
andikpep ke ufọkn̄wed ukot n̄wed ke esop esie.
N̄ko kere ban̄a ifiọkutom Ezekiel Ovbiagele. Enye ikekemeke ndikot n̄wed ke ini enye akanade baptism ke 1940. Ke ama ekekpep ndikot n̄wed, enye ama anam n̄kọri tutu osịm idaha esịnde enyịn̄ nte asiakusụn̄, ndien ke ukperedem, ke 1953, ẹma ẹmek enye nte esenyịn oro asan̄ade-san̄a.
Isua emana ndomokiet idụhe oro akpande owo ndikaiso ke ukpepn̄kpọ. Ndusụk owo ẹkeme ndikot n̄ke eset emi: “Afo ukemeke ndikpep akani ebua mbufa n̄kari!” Oro ekeme ndidi akpanikọ ye ebua, edi mme owo idịghe unam. Idem mbon usọn̄ ẹkeme ẹnyụn̄ ẹsikpep n̄kpọ edieke mmọ ẹnen̄erede ẹyom ndifiọk nnyụn̄ nnam n̄kpọ Jehovah. Ekeme ndidi afo ọmọfiọk ndusụk owo oro ẹkenamde ntre. Ke uwụtn̄kpọ, ẹma ẹsịn udọn̄ ẹnọ Alice Okon ke Nigeria ndikot Bible nnyụn̄ n̄kpep mban̄a idọtenyịn oro Bible ọnọde; enye ama onyịme onyụn̄ adat esịt ke idotenyịn oro anade ke iso. Ke edide isua 80 ke emana, enye ikọsọn̄ke ikaha ndikpep n̄kpọ. Nte afo ukereke ke enye ama anam esịt Jehovah adat? Enye enyene inyene ke mbuọtidem. Mme N̄ke 3:14 ọsọn̄ọ ọnọ nnyịn ete ke ndinyene eti ibuot “[ọfọn] akan udori silver, mbun̄wụm esie onyụn̄ ọfọn akan eti gold.” Ke ini owo ekemede nditịn̄ akpanikọ nnennen nnennen, ikọ esie ẹkabade ẹbiet “apple o-gold ke usan e-silver.”—Mme N̄ke 25:11; Colossae 3:16.
Nyene Inyene ke Mbuọtidem ye Nti Utom Idem Okposụkedi Obiomode Ndo
Owo oro amanade ye ndo ekeme ndikop mmemidem etieti nte enye ọkọride okpon onyụn̄ ọfiọkde aban̄a idaha esie. Onyụn̄ edi n̄kpọ mfụhọ ke owo obiomode ndo ke isua akwa owo esie. Nte mme utọ owo ẹmi ẹnana idotenyịn ke ntak n̄kpọ emi? Baba, enye ekeme ndikam mberede usụn̄ nnọ nsinsi uwem.
Ke ini Ekọn̄ Ererimbot I, Edward Stead akanam utom nte ọbọk-enan̄ ke ekpri obio Arvada, Wyoming, U.S.A., ndien n̄wan esie ama enyene ekpri ufọkisen. Udọn̄ọ efiomnsa oro okomụmde enye ama osụhọde odudu esie ndin̄wana mbiọn̄ọ udọn̄ọ, ndien enye ama ọdọn̄ọ udọn̄ọ ewan̄kọ, emi okomụmde mme ikek idem esie ọkọbi tutu idem esie ama on̄wụne nte n̄kpọitie mbọn n̄kpọnnam esie. Okposụkedi ke ntak oro mîkenyeneke ukeme, enye okosụk ekekeme nditịn̄ ikọ, enye ama onyụn̄ esimenede ubọk esie esisịt. Nte ini akade enye ama oyom ndiwot idem. Ekem enye ama okụt akpanikọ, onyụn̄ ọbọ enye ye ọkpọsọn̄ udọn̄.
Ke akpa enye ekesitie ke inuaotop ufọkisen oro enyene nneme ye isenowo aban̄a obufa ido ukpono esie. Enye ama ekeme ndimenede ubọk esie ọfọn ekem ndikụbọde n̄wed a-Bible n̄wụt mbon oro ẹkesituakde ẹda ndikpan̄ utọn̄. Ndusụk mbọn oro ẹkemade ukeme esie ẹkesikot enye mbụn̄ọ ọkwọrọikọ. Ekem, enye ama ebiere ke imọ imekeme ndinọ ikọ ntiense ke mme obio en̄wen edieke ẹbọpde san̄asan̄a ufọk ẹdori ẹnọ imọ ke moto pickup. Ẹma ẹnam emi, ndien ke ediwak isua enye ama asiak usụn̄ ke esen esen ido emi, awatde ediwak tọsịn itiat ọtọn̄ọde ke Wyoming osịm Texas, asan̄ade ye n̄kparawa asiakusụn̄ iba m̀mê ita ẹmi ẹsisede enye enyịn. Ke udomo ini emi enye okodude uwem, enye ekedi akwa n̄kpọ nsịnudọn̄ ọnọ kpukpru owo oro ẹkediọn̄ọde enye.
Edieke afo okopde mmemidem ke ntak obiomode ndo, mbọk kot mbụk odude ke page 22-25 ke Enyọn̄-Ukpeme (Ikọmbakara) eke November 15, 1986. Kpukpru irenowo oro ẹsiakde do ẹdi mbiowo, mme ọnọitem eke spirit, ẹdotde ndinọ nditọete mmọ oro ekemede ndidi ẹkop nsọn̄idem ke n̄kan̄ eke obụkidem edi ẹyomde ẹbọp mmimọ ke n̄kan̄ eke spirit ndọn̄esịt. Mmọ ẹnyene inyene didie ntem ke enyịn Abasi!—1 Timothy 6:18.
Esterleta Dick, emi edide isua 63 ke emana, edi Ntiense oro ama akana baptism ke isua 16. Ke 1978 enye ikekwe usụn̄ aba, edi enye amanam utom nte asiakusụn̄ ofụri-ini ke isua iba ẹmi ẹbede. Didie ke emi ekeme nditịbe? Ọfọn, yak enye ọbọrọ.
Enye ọdọhọ ete, “Usen kiet, ekpri eyenete an̄wan emi edide asiakusụn̄ ama obụp mi ete: ‘Sista Dick, afo kpukpru ini emesịm utịt mbuba fo nte asiakusụn̄ unọ un̄wam. Ntak mûdomoke ndidi asiakusụn̄ ofụri-ini-e?’“
Esterleta ama efehe ndịk ete ke imọ ididi n̄kpọ ubiọn̄ọ inọ nditọete, edi enye ama eti ete ke esenyịn circuit ama esịn udọn̄ ọnọ utom usiakusụn̄. Enye ọdọhọ ete: “Mma ntọn̄ọ, ndien idahaemi mmabiat isua iba kan̄a ke utom usiakusụn̄. Ami mmesinam utom unọ ikọ ntiense efak mmonyụn̄ nnyene ata ediwak mfiakn̄ka. Akande oro, mmonịm ukpepn̄kpọ Bible itiokiet. Didie? Mbemiso n̄kade mbịne enyeneufọk, ẹyekot ebiet ukpepn̄kpọ otode ẹnọ mi ke ufọk ọkọrọ ye mme itien̄wed Abasi oro ẹsiakde ẹsịn, man n̄keme ndinyene se ntịn̄de ke ukpepn̄kpọ oro. Owo ita ke otu nditọ ukpepn̄kpọ Bible mi ẹsidụk ukpepn̄kpọ ye ami, ndien kiet amana baptism.”
Owo Ekededi Ekeme ‘Ndiyọhọ Ubọk Esie’ ye Ẹnọ
Nte edinọ enọ etre ke n̄kan̄ eke spirit? Baba. Ke ini Edidem David eset akanamde ntịmidem ọnọ edibọp temple, enye ama obụp ete: “Anie ndien [onyịme] ndiyọhọ ubọk esie mfịn emi nnọ Jehovah?” (1 Chronicles 29:5) Owo ekededi ama ekeme ndinam ntre. Ukem ntre mfịn, ediwak n̄kpri m̀mê ikpọ owo, ẹnyenede eti nsọn̄idem m̀mê oro mînyeneke ẹyom nditịp n̄kpọ obụkidem ke unyịmesịt nsịn ndinam mme udọn̄ n̄kpọ Obio Ubọn̄ ẹkaiso. Ekeme ndinam emi ebe ke ọfis n̄kọk itieutom obio oro owo otode m̀mê ebe ke esop n̄kann̄kụk. Ke usụn̄ emi owo ekededi ekeme, nte ukeme esie edide, ndin̄wam ke mbiomo ubiatokụk man ẹkụt ẹte ke ẹkwọrọ eti mbụk emi ke ofụri isọn̄. Enye edi ifet ebererede.—2 Corinth 9:8-12.
Nte akakan n̄kpọ, afo emenyene inyene ke n̄kan̄ eke spirit ndida n̄kpono Jehovah. N̄kparawa owo ẹnyene odudu ye nsehe uyen. Mbon oro mînyeneke ifiọkn̄wed ẹkeme ndikpep ndiwa mfri n̄kpọinua mmọ nnọ Jehovah. Mbon oro ẹbiomode ndo ẹkeme ndinyene nnyụn̄ n̄kọri ke ifiọk, eti ibuot, ye asian, anam ediwak mmọ idịghe mme anditoro Jehovah ofụri-ini ikpọn̄îkpọn̄ edi n̄kọ mme ọnọitem ye mme ekpemerọn̄ ke esop Christian. Nte afo unyeneke inyene ukan nte afo ekekerede? Ntre, da mme inyene fo kpono Jehovah.—Mme Hebrew 13:15, 16.