Ẹbuọt Idem man Ẹnyene Nsinsi Uwem
“Ẹnyene mbuọtidem ẹsịm edinyan̄a ukpọn̄.”—MME HEBREW 10:39.
1. Nso ke n̄wed-ofụri-orụk-ifiọk eke mbon Catholic onyịme kaban̄a nte Bible adade ikọ oro “ukpọn̄”?
IDỤHE ebiet ndomokiet emi Bible ọdọhọde ke mme owo ẹnyene ukpọn̄ oro mîkpaha ke nsinsi, emi ọbọhọde odu uwem ke ikpọkidem ama akakpa, onyụn̄ akaiso odu uwem ke obio mme spirit. Idem New Catholic Encyclopedia onyịme ete: “Ekikere oro nte ke ukpọn̄ esibọhọ odu. uwem ke ikpọkidem ama akakpa idụhe ke Bible. . . . Ukpọn̄ ke A[kani] T[estament] iwọrọke ubak owo, edi edi ofụri ofụri owo oro—owo nte odu-uwem n̄kpọ. Ukem oro n̄ko, ke O[bufa] T[estament] enye ada aban̄a uwem owo: kpa uwem owo oro.” Ntre mme owo inyeneke-nyene ukpọn̄, mmọ ẹdi ukpọn̄.
2. (a) Ukpepn̄kpọ ukpọn̄ ikpaha ke nsinsi okoto m̀mọ̀n̄? (b) Nso idi akpanikọ kaban̄a idaha owo ke enye ama akakpa?
2 Nte ibuotikọ enye eken okosiode owụt, ukpepn̄kpọ ukpọn̄ ikpaha ke nsinsi edi ekikere ukpono ndem emi ẹkemede ndidụn̄ọde mfiak edem n̄kosịm ini mbụk eset. Andikọtọn̄ọ enye edi enyeemi ekesịnde ntuaha ke in̄wan̄în̄wan̄ ikọ Abasi oro nte ke owo “eyekpa n̄kpa” ke ntak nsọn̄ibuot. (Genesis 2:17) Edi andibiọn̄ọ, Satan kpa Devil ọkọdọhọ ete: “Mbufo idikpaha.” (Genesis 3:4) Ndien oro ekedi nsu. (John 8:44) Ke ukperedem, Satan ama emenede ukpepn̄kpọ ukpọn̄ ikpaha ke nsinsi ke enyọn̄. Edi akpanikọ emi aban̄ade idaha owo ke enye ama akakpa edi nte ẹwụtde ke Ikọ odudu spirit Abasi ke Ecclesiastes 9:5 ete: “Mme akpan̄kpa . . . ifiọkke baba n̄kpọ kiet.”—Se n̄ko Rome 5:12.
Idotenyịn Nsinsi Uwem
3. Kaban̄a nso idotenyịn ke Bible enyene ekese n̄kpọ nditịn̄?
3 Ke adan̄aemi Bible owụtde in̄wan̄în̄wan̄ ete ke utọ n̄kpọ nte ukpọn̄ ikpaha ke nsinsi idụhe, enye enyene ekese n̄kpọ nditịn̄ mban̄a nsinsi uwem. Idotenyịn nsinsi uwem ekedi n̄wọrọnda ukpepn̄kpọ Jesus. Enye ọkọdọhọ ete: “Ndien nsinsi uwem oro edi ndifiọk Fi, ata Abasi kierakiet, ye Enyeemi Afo ọkọdọn̄de, kpa Jesus Christ.” (John 17:3) Kaban̄a mbon oro ẹkọn̄de mbuọtidem ke Abasi ye Christ, Jesus ọkọdọhọ ete: “Ami nnyụn̄ nnọ mmọ nsinsi uwem.” (John 10:28) Ye ọyọhọ mbuọtidem, enye ọkọdọhọ ete: “Owo eke onịmde ke akpanikọ enyene nsinsi uwem. . . . Enye eyedu uwem ke nsinsi.” (John 6:47, 51) Enye n̄ko ama ọdọhọ ete: “Koro Abasi akamama ererimbot ntem, tutu Enye osio ikpọn̄îkpọn̄ Eyen emi Enye obonde ọnọ, man owo ekededi eke ọbuọtde idem ye Enye okûtak, edi enyene nsinsi uwem.”—John 3:16.
4. Nso ke Jesus eketịn̄ aban̄a idotenyịn ini iso?
4 Sia ukpọn̄ oro mîkpaha ke nsinsi mîdụhe oro ọbọhọde odu uwem ke owo akpade, didie ke ẹdinyene un̄wọn̄ọ nsinsi uwem oro Bible etịn̄de mi? Jesus ama ọnọ ntọt efen efen aban̄a emi ke ini enye akakade ekese Martha ye Mary ke eyeneka mmọ Lazarus ama akakpa. Enye ọkọdọhọ Martha ete: “Ami ndi ediset ye uwem: owo eke ọbuọtde idem ye Ami, okposụkedi nte enye ama akpa, enye eyedu uwem.” Enye ama obụp Martha ete: “Nte omonịm emi ke akpanikọ?” Martha ama ọbọrọ ete: “Edi ntre, Ọbọn̄, mmonịm ke akpanikọ nte Afo edi Christ Eyen Abasi.”—John 11:25-27.
5, 6. Jesus ndikanam Lazarus afiak edidu uwem okowụt nso?
5 Man owụt ete ke ẹma ẹnọ imọ, nte eyen Abasi, odudu ndinam mme akpan̄kpa ẹfiak ẹdidu uwem, Jesus ama aka itie ẹkebụkde Lazarus. Lazarus ama akpa ke usen inan̄, ndien ikpọkidem esie ama ọtọn̄ọ ndibu. Kpa ye oro, “[Jesus ama] ofiori ke ọkpọsọn̄ uyo, ete, Lazarus, wọrọ di. Akpan̄kpa ọwọrọ edi, nte ẹkeda ọfọn̄-udi ẹbọp enye ubọk ye ukot; ẹnyụn̄ ẹda ubak ọfọn̄ ẹbọp enye iso. Jesus ete mmọ, Ẹtat enye, ẹyak enye ọnyọn̄ ufọk.” (John 11:43, 44) Ẹma ẹnam Lazarus oro akakpade afiak edidu uwem!
6 Owo ikadaha Lazarus ito heaven m̀mê ebiet en̄wen ekededi ke obio mme spirit. Enye ikakaha obio mme spirit ke ini enye akakpade edi okodu ke udi oro enye mîkọfiọkke n̄kpọ, kpa ebiet oro kpukpru mme akpan̄kpa ẹdude. (Psalm 146:4; John 3:13; Utom 2:34) Ikpowụtke ifiọk ndikere nte ke ukpọn̄ Lazarus oro mîkemeke ndikpa ke okokop inem uwem ke heaven, ndien ekem ẹwamarede ukpọn̄ oro ke heaven man akpafiak adiana ye anana mfọnmma ikpọkidem esie ke isọn̄ ndidu uwem inikiet efen ke ererimbot oro ọyọhọde ye ufen, udọn̄ọ, ye n̄kpa. Edi sia enye mîkodụhe ke heaven, ẹma ẹdara edifiak nnam enye edidu uwem, koro oro ọkọwọrọ enye ndifiak ndidu uwem ke ediwak isua efen efen ye edifiak ndiana ye mbon ima esie. Nte ini akade, enye ama afiak akpa.
7, 8. (a) Ke ewe mme idaha efen ke Jesus akanam mme akpan̄kpa ẹset? (b) Ntak emi Jesus akanamde mme utịben̄kpọ eke edinam mme owo ẹfiak ẹnyene uwem-e?
7 Ke ini Jesus akanamde n̄kaiferi emi akakpade eset, “akamba n̄kpaidem [ama] omụm” ete ye eka esie. (Mark 5:43) Edi, nte ini akade n̄kaiferi oro ama afiak akpa n̄ko. Ke ini Jesus akanamde eyeneren ebeakpa eke obio Nain eset, “ndịk [ama] omụm mmọ kpukpru; mmọ ẹnyụn̄ ẹnọ Abasi itoro.” (Luke 7:16) Edi eren oro n̄ko nte ini akade ama akpa. Kaban̄a mme utịben̄kpọ ẹmi, The New International Dictionary of New Testament Theology ọsọn̄ọ ete: “Mbon oro Christ akanamde ẹset ke n̄kpa ke ini utom ukwọrọikọ esie ke isọn̄ ẹkenyene ndikpa, koro edinam mmọ ẹset ikọwọrọke ke mmọ idikpaha ke nsinsi.”
8 Ntak emi Jesus akanamde mmọemi ẹset ke n̄kpa-a? Ikedịghe man anam mmọ ẹnyene nsinsi uwem ke ini oro, edi man owụt ete ke imọ ikedi Messiah ikonyụn̄ iwụt se Abasi ọkọnọde imọ odudu ndinam. Edinam oro ama ọsọn̄ọ mbuọtidem ke idotenyịn ediset ke n̄kpa ye nsinsi uwem ke ini iso ke idak ukara Obio Ubọn̄ Abasi eke heaven ke ubọk Christ.—Matthew 6:9, 10; John 11:41, 42.
9. Ukpepn̄kpọ Jesus aban̄ade idotenyịn ediset ke n̄kpa akan̄wan̄a Martha ye Paul nnennen nnennen didie?
9 Martha ama ọdiọn̄ọ idotenyịn oro oto ebuana oro enye ekenyenede ye Jesus, koro Martha ke mbemiso ama asian enye aban̄a Lazarus ete: “Mmọfiọk nte enye eyeset ke ediset ke n̄kpa ke akpatre usen.” (John 11:24) Martha ama ọdọn̄ọ ete ke ediset ke n̄kpa eyeda itie, idịghe ke akpatre usen esie (Lazarus), edi ke ini iso, “ke akpatre usen”—Usen Ikpe, ke ini ẹdinamde mme akpan̄kpa ẹset ke idak ukara Obio Ubọn̄ Abasi. Apostle Paul ama ọdiọn̄ọ oro n̄ko koro enye ọkọdọhọde ete: “[Abasi] omonịm usen eke Enye edikpede ikpe ọnọ ererimbot ke edinen ido.” (Utom 17:31) Paul n̄ko ọkọdọhọ ete: “Nti owo ye mme idiọkowo ẹyeset ke n̄kpa.” (Utom 24:15) Enye ikọdọhọke ite ke ediset ke n̄kpa ama adada itie, edi nte ke “eyeset ke n̄kpa” ke ini iso—ke idak ukara Obio Ubọn̄.
10. Nso ikọ ke akwa andikpep usem French etịn aban̄a se Christendom onịmde ke akpanikọ aban̄a ediset ke n̄kpa ke ẹmende ẹdomo ye in̄wan̄în̄wan̄ ukpepn̄kpọ Bible?
10 Ke n̄wed oro Immortality of the Soul or Resurrection of the Dead? akwa andikpep usem French edide owo Protestant, kpa Oscar Cullmann, ewet ete: “Ata akamba, ukpụhọde odu ke idotenyịn Christian kaban̄a ediset mme akpan̄kpa ye ukpepn̄kpọ ukpọn̄ ikpaha ke nsinsi eke mbon Greek. . . . Okposụkedi Ido Ukpono Christ ke ukperedem ọkọtọn̄ọde ebuana ke ufọt ukpepn̄kpọ iba ẹmi, ndien mfịn Christian oro enyenede ukeuke ifiọk otịmerede mmọ ofụri ofụri, ami n̄kwe ntak n̄kpedịpde se ami ye ediwak nditọ ukpepn̄kpọ eken idade nte akpanikọ . . . Mbuọtidem ke ediset ke n̄kpa akara uwem ye ekikere eke Obufa Testament ofụri ofụri. Owo ke ofụri ofụri, emi akpade, edi se ẹfiakde ẹnam enyene uwem oto ke obufa utom obot Abasi.”
Ediset ke N̄kpa—N̄ka M̀mọ̀n̄?
11, 12. (a) Nso idi uduak Abasi inọ mme owo ye isọn̄ emi? (b) Didie ke Jesus okowụt ete ke uduak Abasi kaban̄a isọn̄ ikpụhọkede?
11 Ke ini Abasi okobotde mme owo, enye ama ọnọ mmọ isọn̄ nte nsinsi ebietidụn̄ mmọ onyụn̄ aduak ndinam ekondo emi ọyọhọ ye edinen orụk owo. (Genesis 1:26-28; Psalm 115:16) Bible etịn̄ aban̄a Jehovah nte “Abasi emi obotde isọn̄, onyụn̄ anamde enye; enye owụk enye, ibotke enye ke ikpîkpu, obot enye man ẹdụn̄ ke esịt.”—Isaiah 45:18.
12 Kpa ye ediwak tọsịn isua unana mfọnmma ye n̄kpa tọn̄ọ nte owo ọkọsọn̄ ibuot, osụk ededi uduak Abasi nte isọn̄ edi nsinsi ebietidụn̄ owo: “Nti owo ẹyeda isọn̄ ẹnyene, ẹnyụn̄ ẹdụn̄ ke esịt ke nsinsi.” (Psalm 37:29) “Ọfọfọn ọnọ mmọ eke ẹnyenede ifụre ifụre ido: koro mmọ ẹyeda isọn̄ ẹnyene.” (Matthew 5:5) Ntre, ke ini Jesus akanamde mme akpan̄kpa ẹfiak ẹdidu uwem, enye akanam mmọ ẹset kpa mi ke isọn̄, ndien mbon en̄wen ẹma ẹsọsọp ẹdiọn̄ọ mmọ nte mbon oro ẹkekpan̄ade. Emi ọsọn̄ọ ete ke idak ukara Obio Ubọn̄, ẹyenam mme akpan̄kpa ẹfiak ẹdidu uwem ke isọn̄ man ẹnyene ifet ndidu uwem nsinsi ke isọn̄. (Ediyarade 20:12, 13) Oro eyesu uduak oro Abasi aduakde aban̄a mme owo ye isọn̄.—Isaiah 46:9-11; 55:11; Titus 1:1, 2.
13. Nso afanikọn̄ isak iso ise mme ufọkederi Christendom, ndien didie ke mmọ ẹdomo ndikan enye ubọk?
13 Nte ededi, sia mme ufọkederi Christendom ẹnịmde ukpọn̄ ikpaha ke nsinsi ke akpanikọ, emi amada mfịna ọsọk mmọ: Didie ke mmọ ẹkeme ndiyịri ediset ke n̄kpa eke “owo ke ofụri ofụri,” nte Jesus okowụtde, ye edinịm oro mmọ ẹnịmde ukpọn̄ ikpaha ke nsinsi emi ama okododu ke heaven m̀mê ke hell? The Catholic Encylopedia ọdọhọ ete: “Esop Latheran Ọyọhọ inan̄ ekpep ete ke kpukpru owo, m̀mê ẹdi owo oro ẹmekde m̀mê owo oro ẹsịnde, ‘ẹyefiak ẹset ye ikpọkidem mmọ oro mmọ ẹdade ẹsan̄a kemi.’” Enye adian do ete: “Kpa nte ikpọkidem edide nsan̄a ndiọi edinam oro ukpọn̄ anamde, ye ufan eti ido esie, etie nte unenikpe Abasi oyom ete ikpọkidem etiene ọbọ ufen onyụn̄ ọbọ n̄kpọ eyenutom oro ẹnọde ukpọn̄.” Nte ekemde ye se ẹnịmde ke akpanikọ emi, ikpọkidem eyefiak akadiana ye ukpọn̄ ke heaven m̀mê ke hell. Ke adan̄a anyanini didie? Kpa n̄wed oro ọdọhọ ete, “Ẹyenam ikpọkidem nti owo ye ndiọi owo ẹmi ẹnamde ẹset mi ẹdu ke nsinsi.”
14. Didie ke ewetn̄wed Jesuit odomo ndinam ekikere oro Christendom ẹnyenede aban̄a ikpọkidem ndiset ke n̄kpa an̄wan̄a?
14 Ke n̄wed oro The Future Life, emi Jesuit J. C. Sasia ewetde, nnyịn ikot ite: “Uwem eke heaven ke ntre edide eke inemesịt n̄ko oto ubọn̄ ubọn̄ udọn̄ [eke ikpọkidem ndifiak ndiana ye ukpọn̄].” Kaban̄a ikpọkidem ndifiak ndiana kiet ye ukpọn̄ ke hell, kpa n̄wed oro ọdọhọ ete: “Ke hell, ke [ikpọkidem] ama ekeset ke n̄kpa, kpukpru udọn̄ idem owo ẹyebọ san̄asan̄a ufen esiemọ . . . ẹyenen̄ede ẹtụhọde udọn̄ ukop ntụk m̀mê editụk n̄kpọ, koro oto idiọkn̄kpọ obụkidem akpan akpan ke mme enyene-ubiomikpe ẹmi ẹkedue Abasi. . . . Mmọ ndifiak n̄kadiana ye ikpọkidem mmọ ediwọrọ udiana ndutụhọ ye ukụt ọnọ mmọ.”
15. Ntak emi edikpep nte ke Abasi esitụhọde mme owo ke hell ke nsinsi edide n̄kpọ esuene-e?
15 Ntre, edinyịme ekikere ukpono ndem eke ukpọn̄ ikpaha ke nsinsi emeberede usụn̄ ọnọ Christendom ndinyịme ekikere ukpono ndem n̄ko eke ọkpọsọn̄ editụhọde mme ukpọn̄—ye ikpọkidem nde—ke hell ke nsinsi. Edi, kaban̄a edinam eset oro ẹkesifọpde nditọn̄wọn̄ nte uwa ẹnọ mme nsunsu abasi, Jehovah ọkọdọhọ ete: “Mmọ . . . ẹfọp nditọ mmọ ke ikan̄ ẹnọ Baal ke edifọp uwa, eke mmen̄kowụkke mmọ, mmen̄konyụn̄ ndọhọke, mîkonyụn̄ idụkke mi ke esịt.” (Jeremiah 19:5) Ntre edi n̄kpọ esuene ndikpep nte ke Abasi esitụhọrede mme owo ke nsinsi, ke ini Ikọ esiemọ etịn̄de in̄wan̄în̄wan̄ ete ke ẹdisosobo mme anamidiọk oro mîkabakede esịt ẹfep, fap fap. “Ẹyesịbe kpukpru owo [“ukpọn̄,” NW] eke mîdikopke uyo prọfet oro [Jesus] ẹfep ke otu mbio obio.”—Utom 3:23; se n̄ko Matthew 10:28; Luke 17:27; John 3:16; 2 Peter 2:12; Jude 5.
Uwem Unana N̄kpa
16. Nso ke Bible ekpep aban̄a uwem unana n̄kpa?
16 Nte ededi, ndi Bible ikpepke ite ke eyeda mme owo ẹka heaven man ẹkedu uwem unana n̄kpa do? Ih, enye ekpep. Edi emi inyeneke n̄kpọ ndomokiet ndinam ye ukpọn̄ ikpaha ke nsinsi. Uwem unana n̄kpa oto edinam oro ẹnamde owo eset nte edibotn̄kpọ eke spirit (nte ekedide ye Jesus) inyụn̄ itoho ke enye ndinyene ukpọn̄ oro mîkpaha ke nsinsi oro ọkọbọhọde n̄kpa odu uwem. Ẹma ẹyak utịp ini iso eke uwem unana n̄kpa ẹnọ ndusụk mme anam-akpanikọ, kpa mbon ẹmi ẹbietde Christ, ndien ẹkenyene ndibọ utịp emi n̄kukụre ke ini Christ edide ke ukara Obio Ubọn̄ ke heaven, idịghe ndondo oro ke Christ ama ọkọdọk aka heaven ke akpa isua ikie.—Psalm 110:1; 1 Corinth 15:53, 54.
17. Owo ifan̄ ẹdinyene uwem unana n̄kpa, ndien nso udeme ke mmọ ẹnyene ke uduak Abasi kaban̄a isọn̄?
17 Akande oro, ẹkeyak idotenyịn oro ẹnọ ata ekpri ibat ubonowo. Jesus okokot mmọemi “ekpri otuerọn̄.” (Luke 12:32) Otuowo emi, oro edide 144,000 ke ibat, ẹdi se ẹnamde ẹset ẹkenyene uwem eke heaven nte mme edibotn̄kpọ eke spirit oro mîkemeke ndikpa man ẹkara ofụri isọn̄ ye Christ ke Obio Ubọn̄ esie eke heaven. (2 Peter 3:13; Ediyarade 7:4; 14:1, 4; 20:4) Nte ini akade, mme owo ẹyedụn̄ọ ke isọn̄ oro mmọ ẹdikarade, kpa mme mfọnmma owo, ẹmi nte eyịghe mîdụhe ẹdisịmde ediwak tọsịn million. Ediwak owo ẹmi ẹdide mbon oro ẹfiakde ẹdidu ke isọn̄ ke ‘ediset nti owo ye mme idiọkowo.’ (Utom 24:15) Kpa ye oro, mbon en̄wen ẹyedu ẹmi ẹdinyenede uwem ke obufa ererimbot ke ẹsiode mbon oro ẹnamde ẹset ke n̄kpa ẹfep. Mmọemi ẹdi mmanie?
“Idikpaha ke Nsinsi”
18. Ke adianade ye idotenyịn ediset ke n̄kpa odude ọnọ mme akpan̄kpa, nso n̄kpọ n̄kpaidem ke Jesus ekebemiso etịn̄?
18 Ke adan̄aemi ata idotenyịn odude ọnọ mme akpan̄kpa edide ediset ke n̄kpa, utịbe utịbe idotenyịn efen odu ke eyo nnyịn. Enye enyene n̄kpọ ndinam ye se Jesus akakade iso ndidọhọ Martha. Ke ama ọkọdọhọ ete: “Owo eke ọbuọtde idem ye Ami, okposụkedi nte enye ama akpa, enye eyedu uwem [ke ediset ke n̄kpa],” Jesus ama adian do ete, “ndien owo ekededi eke odude uwem onyụn̄ ọbuọtde idem Ami idikpaha ke nsinsi.” (John 11:25, 26) Ke ikọ eke ukperedem emi, Jesus ama ebemiso etịn̄ n̄kpọ n̄kpaidem kiet ete: Ini eyedi emi mbon oro ẹdude uwem mîdikpaha aba! Edi ini ewe ke oro edida itie?
19. (a) Ke nso ikpehe ini ke ẹdinyene idotenyịn oro owo mîdikpaha tutu amama? (b) Didie ke Bible etịn̄ aban̄a mbon oro ẹnyenede idotenyịn oro mîdikpaha tutu amama?
19 Idahaemi—eyo nnyịn—edi ini oro anade ẹbọ un̄wọn̄ọ oro! Kpukpru uyarade ẹmewụt nte ke nnyịn imenen̄ede ikpere utịt idiọk ererimbot emi. (Matthew 24:3-14; 2 Timothy 3:1-5, 13) Ntre, mme owo oro mfịn ẹkọn̄de mbuọtidem ke Abasi ye ke Eyen esie ẹmenyene idara idara idotenyịn edibọhọ utịt editịm n̄kpọ emi nnyụn̄ n̄kaiso ndu uwem mbe ndụk obufa ererimbot Abasi—ikpaha tutu amama! Ẹtịn̄ ẹban̄a mmọemi ke Ediyarade 7:9, 14 nte “akwa otuowo, eke baba owo kiet mîkemeke ndibat, eke ẹtode ke kpukpru obio ye esien ye idụt ye usem . . . ẹmi ẹketode ke akwa ukụt ẹwọn̄ọ,” ẹmi Abasi onịmde uwem ke ntak mmọ ẹnyenede mbuọtidem. Jesus ama etịn̄ aban̄a nsobo idiọk editịm n̄kpọ emi, oro edide ke iso nte “akwa ukụt . . . , orụk eke akanam mîdụhe toto ke editọn̄ọ ererimbot tutu osịm emi, eke mîdinyụn̄ idụhe aba.”—Matthew 24:21; se n̄ko Mme N̄ke 2:21, 22; Psalm 37:10, 11, 34.
20, 21. Didie ke ediwak million owo ẹkọn̄ mbuọtidem mfịn ke Abasi ye Christ, ndien nso ke ediwak mmọ mîdiyomke?
20 Ke ofụri ererimbot, ediwak million akwa otuowo ẹmi ẹyomde ndidu uwem ke nsinsi ke isọn̄ ẹma ẹkọkọn̄ mbuọtidem ke mme un̄wọn̄ọ Abasi ye ke owo oro enye ọkọnọde odudu ndidi “ediset ye uwem,” kpa Jesus Christ. Ndien mmọ ẹma ẹyak idem mmọ ẹnọ Abasi, ẹyararede emi ẹwụt ke ndina baptism. (Matthew 28:19, 20) Mmọ ẹnyịme ẹte ke edinyan̄a mmimọ ke ofụri ofụri enyene “Abasi nnyịn emi etiede ke ebekpo, onyụn̄ enyene Eyenerọn̄,” kpa Jesus Christ.—Ediyarade 7:10.
21 Mbon akwa otuowo ẹmi ẹbọhọde utịt ererimbot emi idiyomke ediset ke n̄kpa koro mmọ “idikpaha ke nsinsi”! Nte afo ke anam n̄kpọ ndidi kiet ke otu emi? Edieke edide ntre, nso enyene-ndyọ, anana-mbiet ifet iberede ntem inọ fi—kpa ifet edibọhọ utịt idiọk editịm n̄kpọ Satan nnyụn̄ ndi se ẹdade ẹkesịn ke edinen obufa emana oro edidade mfọnmma nsọn̄idem ọsọk fi ye nsinsi uwem ke paradise isọn̄! (Luke 23:43; Ediyarade 21: 4, 5) Ke ndikpep se uduak Abasi edide nnyụn̄ nyịre ke ndinam enye, afo emekeme ndiwụt nte ke imọ “idịghe mbon mfiakedem n̄ka nsobo.” Afo n̄ko emekeme ‘ndibuọt idem nsịm edinyan̄a ukpọn̄.’—Mme Hebrew 10:39; 1 John 2:15-17; Ediyarade 7:15.
Mme Mbụme Ndụn̄ọde
◻ Nso idi ata idotenyịn odude ọnọ mme akpan̄kpa?
◻ Ntak emi edinịm oro Christendom onịmde ediset ikpọkidem ke akpanikọ edide n̄kpọ emiom ọnọ Abasi-e?
◻ Nso ke Bible ekpep aban̄a uwem unana n̄kpa?
◻ Nso utịbe utịbe idotenyịn ke mme owo ekeme ndinyene mfịn?