“Nnyịn Kemi Imenyene Ufọkmbono Obio Ubọn̄ Nnyịn”
ẸMEMỊN̄ ekese n̄kpọ ẹban̄a Mme Ufọkmbono Obio Ubọn̄ oro ẹbọpde ẹma usọp usọp ke mme utọ idụt nte Great Britain, Canada, ye United States. Nte ededi, se owo mîtịmke ifiọk edi akpanikọ oro nte ke mme itie utuakibuot eke Mme Ntiense Jehovah ẹmi ẹbọpde ẹma usọp usọp edi se ẹkesibọpde ke ediwak isua ke mme idụt oro ẹtọn̄ọde-tọn̄ọ ntatenyịn.
Ke mme idụt Africa Mme Ntiense do ẹsiwak ndibọp mme itie mbono district eke ibio ini ke urua ifan̄. Ikụreke ke itie ẹmi ndidu nte mme itie mbono ye itie udakibuot mbak anai-nai eyo, edi ẹsidu n̄ko nte itienna ọnọ mbon mbono. Ẹkeme ndinọ mbiet ifiọkutom ntre mban̄a Central America.
Ke uwụtn̄kpọ, ke Obio Guatemala, Guatemala, ẹma ẹnọ $200 oro ẹketịpde ẹsọk Esop Vivibien eke Mme Ntiense Jehovah. Ke ini Ntiense obio oro ọkọnọde itieisọn̄ ke n̄kann̄kụk oro, Mme Ntiense ẹma ẹbiere ndida etịbe oro mbọp uke-uke ufọk oro mmọ ẹdikemede ndida nnịm mme mbonoesop.
Ẹkenyene ndida ọkpọ nnyanyan̄a nnam ibibene okon̄de osịm ikpat ition; ẹnịm ufan̄ oro ofụm ekemede ndibe ndụk ke enyọn̄. Ẹma ẹbiere ẹte ke ufọk oro ekpenyene ndidi ikpat 13 ke uniọn̄ ye ikpat 20 ke ubom. Ke ini mbiowo esop ẹkekade itie ubọpufọk oro, ke n̄kpaidem mmọ ẹma ẹkụt ediwak etuek ọkpọ nnyanyan̄a, ẹkọn̄de ke ikpat 20 osịm 30 onyụn̄ okponde ke inch 3 osịm 5, nte ẹdade ke itieisọn̄ oro. Mmọ ẹma ẹdọhọ ẹte, ‘Ntak nnyịn mîbọpke enye ke Saturday efen-e?’
Ke mbubịteyo Wednesday oro eketienede, ẹma ẹnam ndutịm ubọpufọk oro. Eyenete eren kiet ama edep tian ọkọmufọk ke Thursday, eyenete efen edep eto, ndien efen edep okpukwak. Etisịm uwemeyo Thursday ẹma ẹkpok eto oro ke udomo oro ẹyomde, ndien mmọ ẹma ẹtọn̄ọ ndinam ndori-ọkọmufọk ye tian oro ẹkenọde ke enọ. Etisịm okoneyo Friday ẹma ẹkụre utom ndori-ọkọmufọk oro.
Ke tụhi tụhi usenubọk Saturday, moto mbiomo ama emen ndori-ọkọmufọk ye eto eken, tian ọkọmufọk, ye okpukwak aka obio-in̄wan̄ oro. Moto inan̄ ẹma ẹmen n̄kpọ nte irenowo 50, iban, ye nditọn̄wọn̄ ẹka obio-in̄wan̄ oro. Etisịm n̄kanika 8 usenubọk kpukpru owo ẹma ẹbehe.
Ndudu oro ẹketịbide ke nsatisọn̄ itiat volcano ekedi n̄wọrọnda utom ẹkenamde. Mbemiso emi, Mme Ntiense oro ẹma ẹdep ọkpọ nnyanyan̄a 50 ẹto enyene ọkpọ nnyanyan̄a oro ke cent 12 ke idem kiet—emi akakpade $6 ke ofụri ofụri. Inikiet inikiet, ẹma ẹda ofụt ẹkpok ọkpọ nnyanyan̄a oro ẹbon ke isọn̄. Ẹma ẹyọk ọkpọ nnyanyan̄a ẹmi ẹsịbe ke ikpat ition ke uniọn̄ ẹnyụn̄ ẹsiak ukem ukem iba.
Ke adan̄aemi ẹkekọn̄de ndori-ọkọmufọk ẹdian ke itie mmọ, mmọ eken ke ẹkekọn̄ ọkpọ nnyanyan̄a ẹmi ẹkesiakde iba mi ẹdian nnennen ye ibiọn̄ ibiọn̄, ẹdiande ubak kiet ke n̄kan̄ an̄wa ẹnyụn̄ ẹdiande ubak eken ke n̄kan̄ esịtufọk, man otodo ndiye ọkpọ nnyanyan̄a ẹmi ẹkpesịn uyai ke ibibene n̄kan̄ esịtufọk ye eke n̄kan̄ an̄wa. Edikem, ẹma ẹdori tian ke adan̄aemi mbon eken ẹkedade itiat ye ntan ẹdi ndisịn isọn̄ ada ukem. Mbemiso n̄kụteyo, ẹma ẹbọp ufọk a-hour-12 oro ẹkụre, ndien nditọete ẹma ẹfiak ẹnyọn̄ ufọkidụn̄ mmọ ke akwa obio oro ye esịt idara.
Ekem, ẹma ẹsuan ikọn̄ eto-ofụm oro ẹkotde pine ẹyọhọ ofụri obubịt isọn̄ufọk oro, ndien ẹma ẹbon ndusụk ntie-mbere akpakaha, ye nnyan n̄kpọitie ifan̄ oro ẹkedade nyọhọ-nsụhọ ọkpọ nnyanyan̄a oro ẹnam. Idahaemi Ufọkmbono Obio Ubọn̄ oro ama odu ọnọ akpa mbonoesop.
Ke ediwak idụt ọkpọsọn̄ ufiop—Africa, mme isuo Pacific ye Caribbean, Asia, Mexico, Central ye South America—ẹmi iso-ọfọn million Mme Ntiense Jehovah ẹdụn̄ọde, mme utọ uke-uke ufọk ntre ẹmeda idatesịt ẹsọk Mme Ntiense obio oro koro mmọ ẹma ẹkeme ndidọhọ ẹte: “Nnyịn kemi imenyene Ufọkmbono Obio Ubọn̄ nnyịn.”