Ebiet Devil Okotode

“Utom mi akpan akpan edi ndikpaha nditọn̄wọn̄ ntem ke itie mmọ ndinyụn̄ nnam mmọ ẹtie sụn̄,” ntem ke eyenan̄wan emi anamde utom ibio-ini nte esenyịn ke bọs ufọkn̄wed ke South Dakota anam an̄wan̄a. Enye obụk ete:

“Kiet ke otu nditọiren ẹmi esinọ mi ọkpọsọn̄ n̄kọn̄ibuot. Kam fiọk, enye edi n̄kpasịp isua itiokiet ke emana, edi inua esie ndusụk ini ekeme ndinam ibuot oyon̄ eyenubom. Ami n̄kesinyene ndimomụm enye ntem ke itie esie nnyụn̄ ntie nda ubọk mi mfụk enye inua ndinam enye odop uyo. Enye eyetịgha, eyewai, eyeyịp, eyesụn̄i, onyụn̄ ofiori n̄kpo. Ke idiọk usen, ẹyeyom ẹtetie ẹmụm enye ẹtem ke itie esie.

“Friday ekedi idiọk usen, ndien ke ukem ini ibikpai okomụmde mi tọn̄ọ ke afara sụhọde, enye ama obụp ete: ‘Ntak emi Abasi okobotde Devil-e?’ N̄wed Mi eke Mme Mbụk Bible ama odu ke bọs oro. Mma ndọhọ enye ke n̄wed emi eyen̄wam enye ndikụt ebiet Devil okotode. Ndi emekeme ndinịm ke akpanikọ nte ke nnyịn ima idụn̄ọde ofụri mbụk 41 ọtọkiet? Akayak esisịt ami ndikpa mba nnọ eyen emi, edi edu esie ama okpụhọde okosịm udomo oro enye mîsinyịmeke ndikpọn̄ bọs ke ini nnyịn isịmde ufọkn̄wed. Enye esiyom ndikaiso ke mme mbụk en̄wen!”

Ndikpep n̄wọrọnda n̄wed emi omosion̄o mme ukem utịp ẹmi ke idem ediwak n̄kpri nditọ en̄wen edi. Afo emekeme ndibọ enyene ndiye ndise n̄wed emi ẹmịn̄de ke ikpọ abc, oro enyenede page-256 ke ndiwet n̄kpọ nyọhọ babru etienede mi nnyụn̄ nnọ ẹdi ye ₦15.

Mbọk ẹnọ, ke ukpeusụn̄ post, ọsọn̄ ikpaedem n̄wed oro N̄wed Mi eke Mme Mbụk Bible ẹdi, emi nsịnde ₦15 nnọ edi.