Ke Ini N̄kpa Adade Owo Ima

“KE 1981 cancer ama owot eka mi. Enye ikedịghe ata eka mi. N̄kpa esie ama otụk mi ke idem ata idiọk idiọk ye eyeneka mi eren. Ami n̄kedi isua 17, ndien eyeneka mi eren ekedi 11. Mma ntaba eka mi ata etieti. Ẹkebọk mi nte owo Catholic, ndien ke ẹma ẹkekpep mi ẹte ke eka mi okodu ke heaven, ih, ami mma nyom ndiwot idemmi man n̄kodu ye enye. Enye ekedi ata ufan mi.”​—Roberta, eyen isua 25.

Nte mbiet n̄kpọ ntem ama otịbe ọnọ fi? Ke edide ntre, afo nnennen ọmọfiọk ubiak oro asan̄ade ye ediduọk owo ima. N̄kpa ndinyene odudu ntre ndida owo ro afo amade etie nte ọdiọk akaha. Ndien ke ini enye otịbede, ekikere nte e tutu amama afo ukemeke nditịn̄ ikọ nnọ kiet eken, ndisak imam ọtọkiet, m̀mê ndifat owo oro afo amade ekeme ndidi se isọn̄de etieti ndiyọ. Ndien nte ikọ Roberta owụtde, owo ndidọhọ fi nte ke owo ima fo odu ko ke heaven itreke ubiak oro.

Nte ededi, ekpetie fi didie ke idem edieke ọkpọfiọkde ete ke imekeme nditọn̄ọ ntak ndiana kiet ye akpan̄kpa oro afo akamade ke n̄kpet n̄kpet ini iso, baba, idịghe ke heaven edi kpa mi ke isọn̄ ke emem emem, edinen idaha? Ndien nso edieke afo ọfiọkde ete ke ini oro mme owo ẹyenyene idotenyịn unyene mfọnmma nsọn̄idem, n̄ko nte ke mmọ tutu amama idikpaha? Afo emekeme ndidọhọ ete, ‘Ke akpanikọ oro edi se ẹkerede-kere!’

Kpa ye oro, ko ke edem ke akpa isua ikie C.E., Jesus Christ ama ọdọhọ uko uko ete: “Ami ndi ediset ye uwem: owo eke ọbuọtde idem ye Ami, okposụkedi nte enye ama akpa, enye eyedu uwem.” (John 11:25) Oro ekedi un̄wọn̄ọ nte ke mme akpan̄kpa ẹyetọn̄ọ ntak ẹdu uwem​—nduaidem nduaidem idotenyịn ke akpanikọ!

Nte ededi, eyedi afo ke eyịk ete: ‘Ndi eti ntak odu ndinịm utọ un̄wọn̄ọ oro ke akpanikọ? Ami n̄keme didie ndinịm nte ke enye idịghe sụk se ẹkerede-kere? Ndien edieke ntak odude ndinịm enye ke akpanikọ, un̄wọn̄ọ emi ndisu ọkpọwọrọ nso ọnọ mi ye mbon ima mi?’ Ibuotikọ etienede mi eyeneme mmọemi ye mme mbụme eken.