Ntọt M’ọkwọrọ Obio Ubọn̄

Eyen-Isua-Ition Edemede Udọn̄

EYEN-isua-ition oro ekenyenede inem inem ifiọk n̄kpọntịbe odu ke otu Mme Ntiense Jehovah ẹwakde ẹbe 40,000 ke Venezuela. Enye ama akpan̄ utọn̄ mfọn mfọn ke utịn̄ikọ an̄wa oro ọkọkọn̄ọde ke n̄wed oro, Life—How Did It Get Here?—By Evolution or by Creation? ndien ke ukperedem otode nneme ubon ke n̄wed emi. Eyen-isua-ition emi, emi otode ubon ukara Abasi, ke ntem ama ọfiọk edidọhọ oro ukpepn̄kpọ edito ke unam mforo owo ọdọhọde ke owo ekedidu uwem oto efere. Ikpehe kiet ke n̄wed emi eneme aban̄a ukpepn̄kpọ emi ẹkpepde nte ke uwem okoto organic soup (efere emi n̄kpri n̄kpatan̄a n̄kpọ ẹdọn̄ọde).

Ke isua 14, ubon kiet ke udiana enyịnusụn̄ (ebe, n̄wan, n̄kpri nditọiren iba, ye eyenan̄wan-isua-itiaba) ama esisua eben̄e oro ubon Ntiense emi ekesiben̄ede mmọ ndidụn̄ọde Bible ye ikot ndika ke Ufọkmbono Obio Ubọn̄.

Usen kiet ke adan̄aemi n̄wan Ntiense emi ekeyetde usan, enye ama okop inem inem nneme ke ufọt eyen esie eren ye ekpri eyenan̄wan mbọhọidụn̄ oro, ke ekperede ọkọ adan̄a. Ekpri eyeneren emi ọkọdọhọ ete: “Nso ke afo ọdiọn̄ọ! Mbon ererimbot ẹdọhọ ẹte ke owo okoto ke efere!” Ekpri eyenan̄wan emi ama ọbọrọ, nte enye esidọhọde: “Idat anam fi?” Ekpri eyeneren oro ama ọtọn̄ọ ntak ọdọhọ ete: “Baba, ami ndọn̄ọke idat. Mbon ererimbot ẹdọhọ ẹte ke owo okoto ke efere; edi Jehovah akanam owo.” Ekpri eyeneren emi akasak ekikere oro nsahi, ekerede ke edi ata efere ẹdade ẹdia n̄kpọ, emi enye mîkamaha. Do enye ama akaiso ndisian ekpri eyenan̄wan oro ete: “Ete mi ẹyenọ ete fo n̄wed Creation man enye okụt nte ke Abasi okobot owo.” Ekpri eyenan̄wan oro, nte ededi, ama ọdọhọ ke mmimọ idi mbon Catholic onyụn̄ etre nneme do.

Ke ini ebe eyenete an̄wan emi, emi edide ebiowo, ọkọnyọn̄de utom edi, n̄wan emi ama emen nneme emi enye okokopde etịn̄. Okposụkedi n̄kpọntịbe ke ufọt n̄kpri nditọ ẹmi ekedide n̄kpọ imam ọnọ mmọ, eyenete eren emi ama ekere ete iso-ọfọn Jehovah oyom imọ inọ eren mbọhọidụn̄ emi ikọ ntiense inikiet efen. Ntre usen if an ke ukperedem, enye ama aka ebịne mbọhọidụn̄ esie onyụn̄ asian enye nneme nditọ ẹmi. Enye ọkọdọhọ ke ibuot eyen imọ, imọ iyom ndinọ enye n̄wed Creation kiet. Ntiense emi ama ọdọhọ yak mbọhọidụn̄ oro okot n̄wed emi ye unana asari, sia enye ediwụtde ebiet uwem ọkọtọn̄ọde.

Ke n̄kpaidem eyenete emi, usen ifan̄ ke ukperedem n̄wan ye ebe ẹmi, ẹmi ke ata anyanini ẹkesuade-sua akpanikọ, ẹma ẹdụk ufọk eyenete eren emi, ẹtuade n̄kpọfiọk ke edu oro mmọ ẹkenyenede ke ediwak isua ntre. Mmọ ẹkedọhọ ke mmimọ ima idu ke n̄kpaidem ke uduot n̄wed Creation emi.

Utịp ekedi ukpepn̄kpọ Bible oro ẹketọn̄ọde ye ubon emi. Mmọ ẹma ẹtọn̄ọ ndidụk ukpepn̄kpọ kpukpru ini ndien ibịghike ẹma ẹkabade ẹdi mme asuanetop eti mbụk. Eren oro, n̄wan esie, ye n̄kpri nditọiren iba ẹkena baptism ke mbono district kiet, ndien ekpri eyenan̄wan oro edi asuanetop Obio Ubọn̄ n̄ko. N̄wan esie ama ọtọn̄ọ utom usiakusụn̄ unọ un̄wam ofụri ini ndondo oro ama akana baptism.

Jesus Christ ọfiọk mbon oro esịt mmọ ọfọnde, ndien enye ekeme, onyụn̄ adada idem n̄kpri owo ndisịm utọ eti esịt oro.​—John 10:14.