Tiene Tịp Okụk Man Ẹda Ẹnam Utom Abasi ke Edem Mbufo ye ke Ofụri Ererimbot

MME NTIENSE JEHOVAH ẹkwọrọ eti mbụk Obio Ubọn̄ “tutu esịm ata utịt ikpehe isọn̄” nte Jesus ọkọdọhọde ke ẹyekwọrọ ke mme akpatre usen emi. (Utom 1:8; Matt. 24:14) Mmọ ẹda ini ye odudu mmọ ẹnam n̄kpọ Abasi. Sia mmọ ẹnịmde ke Jehovah ọyọnọ ikọt esie se mmọ ẹyomde, mmọ ẹka iso ndibem iso nyom Obio Ubọn̄ Abasi. (Matt. 6:25-34; 1 Cor. 3:5-9) Jehovah ama se mmọ ẹnamde onyụn̄ ọdiọn̄ mmọ.

EBIET EMI ISIDADE OKỤK INAM N̄KPỌ ABASI KE OFỤRI ERERIMBOT

² Ndusụk mbon emi ẹsikụtde nsio nsio usụn̄ emi ikwọrọde ikọ, ẹnyụn̄ ẹdiọn̄ọde ke nnyịn isinyamke-nyam Bible ye mme n̄wed nnyịn ẹsibụp m̀mê isida m̀mọ̀n̄ okụk inam kpukpru oro. Okụk emi ẹsidade ẹmịn̄ Bible ye mme n̄wed nnyịn idịghe ekpri. Inyụn̄ idịghe ekpri okụk ke ẹsida ẹbọp ẹnyụn̄ ẹse ẹban̄a Bethel emi nditọete ẹdude ẹmịn̄ mme n̄wed, ẹse ẹban̄a utom ukwọrọikọ, ẹnyụn̄ ẹnam nsio nsio n̄kpọ eken man ẹkeme ndikwọrọ eti mbụk. Ẹsiyom ekpri n̄kpọ ẹnọ mme esenyịn circuit, mme isụn̄utom emi mîdụhe ke Bethel, mme akpan asiakusụn̄, ye mbon en̄wen emi ẹnamde san̄asan̄a utom ofụri ini ẹnọ Abasi man mmọ ẹda ẹse ẹban̄a idemmọ ẹnyụn̄ ẹka iso ẹnam utom mmọ. Kpukpru emi owụt ke ẹbiat okụk etieti ke idụt kiet kiet ye ke ofụri ererimbot ẹnam utom ukwọrọikọ mfịn. Edi ẹsida kpukpru okụk emi ke m̀mọ̀n̄?

³ Ediwak mbon emi ẹmade nte Mme Ntiense Jehovah ẹsikpepde mme owo Bible ke ofụri ererimbot ẹsinọ enọ imaesịt ẹte ẹda ẹnam utom emi. Edi Mme Ntiense Jehovah ẹsinen̄ede ẹsio okụk ẹnọ ẹda ẹnam utom emi. Ndusụk mmọ ẹsinọ enọ imaesịt ẹsọk n̄kọk itieutom idụt mmọ. Mmọ ẹnam ukem ukem se ikọt Abasi ke eset ẹkenamde ke ini ẹkeyomde ndibọp itie emi ẹdidade ituak ibuot inọ Jehovah. (Ex. 35:20-29; 1 Chron. 29:9) Ndusụk owo ẹsinọ esop Abasi n̄kpọ-akpa, utọ nte isọn̄ m̀mê ufọk. Mme owo, mme esop, ye mme circuit ẹsitịp n̄kpri n̄kpọ n̄ko man ẹda ẹnam utom emi. Ke ini ẹtan̄de kpukpru emi ẹdian, ẹsiwak ẹkem se idade inam utom Abasi.

⁴ Mme Ntiense Jehovah ẹdiọn̄ọ ke edi utom mmimọ ndida okụk mmimọ ye se inyenede nnam utom ukwọrọikọ. Jesus ye mme mbet esie ẹma ẹnyene ekebe emi mmọ ẹkesisịnde okụk man ẹda ẹse ẹban̄a idemmọ. (John 13:29) Bible etịn̄ ke ndusụk iban ẹma ẹsida okụk mmọ ẹse ẹban̄a Jesus ye mme mbet esie. (Mark 15:40, 41; Luke 8:3) Mbon emi ẹkemade utom ukwọrọikọ ẹnyụn̄ ẹtienede ẹnam ẹma ẹsinọ apostle Paul n̄kpọ ese aban̄a idemesie. (Phil. 4:14-16; 1 Thess. 2:9) Mme Ntiense Jehovah ẹsisịn idem ẹkwọrọ ikọ ẹnyụn̄ ẹnọ okụk man ẹda ẹnam utom emi ukem nte nditọete ke eyo Jesus ye eyo mme apostle ẹkenamde. Emi anam ẹkeme ndinọ mbon emi ẹnyenede eti esịt ke kpukpru ebiet “mmọn̄ uwem ke mfọn.”—Edi. 22:17.

EBIET EMI ISIDADE OKỤK INAM N̄KPỌ KE ESOP

⁵ Ẹsida enọ imaesịt emi mme owo ẹnọde ke esop kiet kiet ẹnam se ededi emi oyomde ẹnam ke esop. Nnyịn isisịnke collection, idorike etịbe inọ owo ite ekpe, isinyụn̄ iben̄eke mme owo okụk. Ẹbon ekebe ke itie oro isisopde idem man owo kiet kiet esịn se “enye ekebierede ke esịt esie.”—2 Cor. 9:7.

⁶ Ẹsida okụk emi ẹsịnde ke mme ekebe emi ẹse ẹban̄a Ufọkmbono Obio Ubọn̄ ẹnyụn̄ ẹdep mme n̄kpọ emi ẹyomde ke Ufọkmbono Obio Ubọn̄. Otu mbiowo ẹkeme ndibiere n̄ko ndisio okụk esop nnọ ẹsọk n̄kọk itieutom man ẹda ẹnam utom Abasi ke ofụri ererimbot. Ofụri esop ẹsitịn̄ m̀mê imenyịme ẹnọ. Nte ediwak esop ẹsisan̄ade ẹnọ okụk kpukpru ini man ẹda ẹnam utom Abasi ke ofụri ererimbot edi emi. Edieke kpukpru owo ẹdiọn̄ọde se itịbede ke esop emi edinamde ẹyom okụk, ẹnyụn̄ ẹtịpde se mmọ ẹkekeme, emi idiyakke ẹtịn̄ n̄kpọ ẹban̄a okụk ke esop ke ubọk ke ubọk.

NTE ẸSISEDE ẸBAN̄A OKỤK ORO ẸTỊPDE

⁷ Mbono esop ama asuana, owo iba ẹsision̄o okụk ke ekebe ẹnyụn̄ ẹda risit ẹwet ibatokụk oro ẹnịm. (2 Ndi. 12:9, 10; 2 Cor. 8:20) Otu mbiowo ẹdiọn̄ọ nte ẹditịmde okụk oro inịm tutu ekem ini emi ẹnọde ẹsọk n̄kọk itieutom m̀mê ini emi ẹdidade okụk oro inam n̄kpọ ke esop. Kpukpru utịtọfiọn̄, eyenete oro esede aban̄a okụk esop esiwet nte ẹkebiatde okụk esop onyụn̄ anam ẹtịn̄ ẹnọ esop. Ndien ọfiọn̄ ita ama ebe, anam-ndutịm otu mbiowo ọyọdọhọ ẹdụn̄ọde ẹse nte ẹkebiatde okụk esop.

OKỤK ẸBIATDE KE CIRCUIT

⁸ Nditọete emi ẹdude ke circuit ẹsitịp okụk emi ẹdade ẹnịm mbono circuit mmọ, m̀mê ẹdade ẹnam n̄kpọ en̄wen ke circuit. Ekebe esidu ke nsio nsio itie ke Itie Mbono man mbon emi ẹmade ẹtịp okụk yak ẹda ẹnam n̄kpọ ke circuit. Ndusụk ini ẹkeme ndidọhọ esop n̄ko ẹtịp okụk man ẹda ẹnam se ẹyomde ke circuit.

⁹ Akpana circuit kiet kiet ẹkeme nditịp okụk oro ẹdade ẹnam n̄kpọ ke circuit mmọ, ẹnyụn̄ ẹnọ se iyọhọde isụhọ ẹda ẹdian ẹse ẹban̄a utom Abasi ke ofụri ererimbot. Edi edieke circuit mînyeneke okụk ikem ndida nnịm mbono m̀mê ndida ntọn̄ọ mbono en̄wen, esenyịn circuit ekeme ndien ndidọhọ mme esop ẹtịp okụk. Otu mbiowo ẹyeneme n̄kpọ emi ẹnyụn̄ ẹbiere se esop ẹkpenọde ẹsọk circuit. Ekem ofụri esop ẹyetịn̄ m̀mê imenyịme ẹnọ.

¹⁰ Edieke n̄kpọ okụk ọwọrọde ke circuit oro oyomde mbiowo ke circuit ẹse ẹban̄a, ẹyenyene mbono ye mbiowo circuit oro ke usen mbono circuit mmọ. Edieke ẹyomde ẹda okụk ẹnam n̄kpọ en̄wen ke ebede mme n̄kpọ emi ẹsinamde kpukpru ini, ana mbiowo circuit oro ẹnyịme mbemiso ẹnamde n̄kpọ oro. Ini ekededi emi ẹyomde ndisio okụk circuit nnam utọ n̄kpọ oro, ana ẹwet ibat okụk emi ẹyomde ndida nnam ẹnyụn̄ ẹyak mbiowo ẹnyịme kan̄a mbemiso ẹnamde.

¹¹ Ẹsinam ndutịm man ke ini ke ini ẹdụn̄ọde ẹse nte ẹkebiatde okụk circuit.

NTE ẸSISEDE ẸBAN̄A MBON EMI ẸYOMDE UN̄WAM

¹² Ntak kiet emi Jesus ye mme mbet esie ẹkenyenede ekebe okụk ekedi man ẹn̄wam mme ubuene. (Mark 14:3-5; John 13:29) Mme Christian ẹsụk ẹnanam emi sia Jesus ọkọdọhọ ete: “Mme ubuene ẹdodu ye mbufo kpukpru ini.” (Mark 14:7) Didie ke Mme Ntiense Jehovah ẹsinam oro mfịn?

¹³ Ndusụk ini, nditọete nnyịn ke esop ẹkeme ndiyom un̄wam ke ntak usọn̄, udọn̄ọ, m̀mê ke ntak emi n̄kpọ oro mmọ mîkemeke ndinyan̄a ọwọrọde mmọ. Mme iman ye mbon eken emi ẹdiọn̄ọde nte n̄kpọ etiede ye mmọ ẹkeme ndin̄wam. Se apostle John ọkọdọhọde ẹnam edi emi. Enye ọkọdọhọ ete: “Owo ekededi eke enyenede n̄kpọ udu uwem ke ererimbot emi onyụn̄ okụtde eyenete esie odude ke unana ndien enye eberi usụn̄ mbọm esie abaha enye, ke usụn̄ ewe ke ima Abasi odu enye ke esịt? N̄kpri nditọ, ẹyak nnyịn ikûma ke ikọ inua m̀mê ke edeme, edi ẹyak ima ke edinam ye ke akpanikọ.” (1 John 3:17, 18; 2 Thess. 3:6-12) Ndinam n̄kpọ Abasi esịne nnyịn ndise mban̄a nditọete nnyịn emi ẹyomde un̄wam.—Jas. 1:27; 2:14-17.

¹⁴ Ke akpa leta emi apostle Paul ekewetde ọnọ ẹsọk Timothy, enye ama etịn̄ nte ẹkpen̄wamde mbon emi ẹyomde un̄wam. Se enye eketịn̄de odu ke akpa Timothy 5:3-21. Edi utom Christian kiet kiet ndise mban̄a mbonufọk esie. Ana nditọ, nditọ nditọ, m̀mê iman mbon emi ẹsọn̄de m̀mê emi ẹdọn̄ọde ẹn̄wam mmọ. Ndusụk ini, ukara ye mme n̄ka ke obio ẹsin̄wam utọ mbon emi, ntre iman mmọ m̀mê mbon en̄wen ẹkeme ndisịn mmọ enyịn̄ man ẹn̄wam mmọ. N̄kpọ ekeme nditịbe emi edinamde esop ẹn̄wam eyenete emi ama ekebịghi ke esop. Edieke eyenete oro mînyeneke owo m̀mê iman emi akpan̄wamde enye, ndien ukara inyụn̄ in̄wamke, mbiowo ẹkeme ndidọhọ nditọete ẹn̄wam. Esinenem nditọete ndida se mmọ ẹnyenede n̄n̄wam mbon emi ẹyomde un̄wam.

¹⁵ Ukọbọ, ekọn̄, unyekisọn̄, ukwọ, akan̄, m̀mê mme afanikọn̄ eken emi ẹwakde nditịbe ke ndiọkeyo emi ẹsinam ediwak nditọete nnyịn ẹyom un̄wam. (Matt. 24:7-9) Ekeme ndidi mme esop emi ẹdude ke itie oro n̄kpọ emi etịbede idinyeneke n̄kpọ ndomokiet ndida n̄n̄wam nditọete do, ntre Otu Emi Ẹsede Ẹban̄a Utom Mme Ntiense Jehovah ẹyedọhọ nditọete ke mme itie en̄wen ẹn̄wam. Ntre ke mme Christian ke Asia Minor ẹkenam ẹnọ nditọete mmọ udia ke Judea ke ini akan̄. (1 Cor. 16:1-4; 2 Cor. 9:1-5) Edieke ikpebede uwụtn̄kpọ mmọ, nditọete nnyịn ẹyeda oro ẹdiọn̄ọ ke imama mmọ, iyonyụn̄ iwụt mme owo ke idi ata mme mbet Jesus Christ.—John 13:35.

NTE ISISAN̄ADE INYENE N̄WED KE ESOP

¹⁶ Bible ye mme n̄wed nnyịn ke isikama ikwọrọ etop Obio Ubọn̄ inọ mme owo. Otu mbiowo ẹsimek asan̄autom unamutom kiet ẹte ese aban̄a mme n̄wed ke esop. Eyenete emi esisede aban̄a mme n̄wed emi isidaha utom emi inam mbubru. Enye esiwet ibat nsio nsio n̄wed emi ẹdiyomde ke esop onyụn̄ otobo enịm man nditọete ke esop ẹnyene se ẹyomde.

¹⁷ Nnyịn emi ima ikayak idem inọ Abasi imọdiọn̄ọ ke ini, ifiọk, odudu, ukeme, okụk, inyene, ye uwem nnyịn ẹdi enọ Abasi, ke ana ida kpukpru emi inam n̄kpọ Abasi. (Luke 17:10; 1 Cor. 4:7) Edieke idade kpukpru emi inam n̄kpọ Abasi, ọwọrọ imenen̄ede ima Jehovah. Esidọn̄ nnyịn ndida kpukpru se inyenede nnam n̄kpọ Jehovah sia imọdiọn̄ọ ke enye ama se ededi emi owo anamde ọnọ enye ke ofụri esịt. (N̄ke 3:9; Mark 14:3-9; Luke 21:1-4; Col. 3:23, 24) Jesus ọkọdọhọ ete: “Mbufo ẹkebọ ke mfọn, ẹnọ ke mfọn.” (Matt. 10:8) Edieke idade ini ye inyene nnyịn inam n̄kpọ Abasi, esịt eyenem nnyịn.—Utom 20:35.