Ẹnọ Un̄wam Okụk Ebe ke Mme Enọ Imaesịt
Edi mbonutom unyịmesịt ẹn̄wam ke kpukpru utom oro ikebemde iso itịn̄ iban̄a, ke ntre ẹsụhọrede ubiatokụk. Mme Ntiense Jehovah ẹnam utom ukwọrọikọ eke ufọk-ke-ufọk ye edisuan mme n̄wed ke unyịmesịt. Mmọ ẹsikpe okụk ke kpukpru se mmọ ẹbiatde. Mbiowo ẹmi ẹsede enyịn ke mme esop, ẹmi mme asan̄autom unamutom ẹnọde un̄wam, ibọhọ okụk baba kiet ke utom mmọ. Mmọ ẹse ẹban̄a kpukpru ubiatokụk mmọ.
Idem mbon Otu Ukara ye kpukpru mbon eken ẹmi ẹnamde utom uyọhọ-ini ke nditịm nnyụn̄ nsion̄o mme Bible ye mme n̄wed Bible ẹsibọ sụk ubetufọk ye udia ye ekpri okụk ekpatọfọn̄ man ẹda ẹse ẹban̄a ubiatokụk mmọ. Kpasụk ntre ke edi ye mme esenyịn uyọhọ-ini ẹmi ẹsan̄ade-san̄a.
Uke-uke etịbe oro ẹsibọde ke mme n̄wed ke akamba udomo esise aban̄a sụk akpan ekọmurua mme n̄kpọutom, edimịn̄, ye edinọ n̄wed ọwọrọ. Ẹda mme etịbe okụk oro Mme Ntiense Jehovah ẹsinọde ke idemmọ, ebe ke enọ imaesịt m̀mê unen n̄kpọ akpa ẹse ẹban̄a kpukpru ubiatokụk eken.
Ke kpukpru mbonoesop Mme Ntiense Jehovah, edide ke n̄kann̄kụk m̀mê ke n̄kpri mbono, mme ekebe etịbe ẹsidu ẹnọ mbon oro ẹmade nditịp n̄kpọ nsịn. Owo isimenke usan isan̄a ibọ okụk. Owo ibiereke se anade ẹkpe m̀mê ọyọhọ ubak duop. Nte ẹwụtde ke N̄wed Abasi, owo kiet kiet ekeme ndinọ nte enye akaduakde ke esịt esie.—2 Corinth 8:12; 9:7.
• Didie ke ẹn̄wam kpukpru utom Mme Ntiense Jehovah ke n̄kan̄ okụk?