Ibuot 87
Da Ọniọn̄-Ọniọn̄ Edinam Nịm N̄kpọ Nọ Ini Iso
JESUS ndisụk n̄kụre n̄ke idiọk udọ edi emi, oro enye obụkde ọnọ otuowo oro esịnede mme mbet esie, mme ọbọ a-tax oro mîsinamke akpanikọ ye mme idiọk owo eken oro ẹdiọn̄ọde, ye mme scribe ye mme Pharisee. Idahaemi, ke etịn̄de ikọ ọnọ mme mbet esie, enye otop n̄ke kiet oro aban̄ade owo inyene kiet oro ọbọde idiọk etop aban̄a esenyịn, m̀mê akama-ukpọhọde ufọk esie.
Nte Jesus obụkde, owo inyene oro okot akama-ukpọhọde esie onyụn̄ asian enye ete ke imọ imọn̄ isio enye ke utom. Akama-ukpọhọde oro eyịk ete, “Ndinam didie, koro ete ọbọde mi itie akama-ukpọhọde? Nnyeneke idem ndifụn̄ isọn̄; ndiben̄e eben̄e edi mi n̄kpọ bụt. Mmọfiọk se ndinamde, man, ke adan̄aemi ẹdibọde mi ukpọhọde, owo ẹkpeda mi ẹsịn ke ufọk mmọ.”
Nso idi uduak akama-ukpọhọde emi? Enye okot mmọ oro ẹkamade eteufọk esie isọn ete ẹdi. Enye obụp ete, “Akama ete mi ifan̄?”
Akpa owo ọbọrọ ete, ‘Galọn aran olive 580.’
Akama-ukpọhọde emi ọdọhọ enye ete, ‘Bọ n̄wed isọn fo, tetie ini kiet, wet 290.’
Enye obụp owo efen ete: “Afo akama ifan̄?”
Enye ọdọhọ ete, ‘Ekebe ibokpot 630.’
‘Bọ n̄wed isọn fo, wet 504.’
Akama-ukpọhọde emi odu ke itie unen esie ndisụhọde ibatokụk oro ẹkamade eteufọk esie, sia enye osụk esede aban̄a mbubehe okụk eteufọk esie. Ke ndisụhọde ibatokụk oro, enye anam ufan ye mmọ oro ẹdiwụtde enye mfọnido ke ini ẹdibọde enye utom esie.
Ke ini eteufọk okopde se ikotịbede, enye okop inemesịt. Ke akpanikọ, enye “otoro ukwan̄ akama-ukpọhọde, koro enye anamde [n̄kpọ] ọniọn̄-ọniọn̄.” Ke akpanikọ, Jesus adian do ete: “Mbon eyo emi ẹdi ọniọn̄ ke mbubehe mmọ ye mbio emana mmọ, ẹkan nte nditọ un̄wana ẹdide.”
Idahaemi, ke adade ukpepn̄kpọ mi ọnọ mme mbet esie, Jesus esịn udọn̄ ọnọ mmọ ete: “Ẹda mammon ukwan̄ido ẹkọ mme ufan ẹnịm ẹnọ idem mbufo; man ke ini oro ebede efep, mmọ oro ẹkpeda mbufo ẹdụk ke nsinsi idụn̄.”
Jesus itoroke akama-ukpọhọde emi ke ntak idiọkido esie edi otoro ke ntak ikike esie, ọniọn̄-ọniọn̄ edinam. Ediwak ini, “mbon eyo emi” ke ọniọn̄ ẹsida okụk m̀mê idaha mmọ ẹnam ufan ye mbon oro ẹkemede ndiwụt mmọ mfọnido ke usiene. Ntre mme asan̄autom Abasi, “nditọ un̄wana,” n̄ko ẹnyene ndida inyene obụkidem mmọ, kpa “mammon ukwan̄ido,” nnam n̄kpọ ọniọn̄-ọniọn̄ ke usụn̄ oro edinọde mmọ ufọn.
Edi nte Jesus ọdọhọde, mmọ ẹkpenyene ndida inyene ẹmi nnam ufan ye mmọẹmi ẹdidade mmọ “ẹdụk ke nsinsi idụn̄.” Kaban̄a mme andibuana ke otu ekpri otuerọn̄, ebiet idụn̄ ẹmi ẹdu ke heaven; amaedi “mme erọn̄ en̄wen,” mmọ ẹdu ke Paradise isọn̄. Sia edide Jehovah Abasi ye Eyen esie ikpọn̄îkpọn̄ ẹkeme ndida mme owo ndụk ke ebietidụn̄ ẹmi, nnyịn ikpenyene ndisịn ifịk ke ndida “mammon ukwan̄ido” ekededi oro nnyịn inyenede n̄n̄wam ufọn n̄kpọ Obio Ubọn̄ ndien ke ntre ikọride itie ufan ye mmọ. Adan̄aoro, ke ini inyene obụkidem ẹkpude m̀mê ẹbede ẹfep, nte mmọ ke akpanikọ ẹdibede ifep, nsinsi ini iso nnyịn eyetịm edi akpanikọ.
Jesus akaiso ke ndidọhọ nte ke mme owo oro ẹkam ẹnamde akpanikọ ke ndise mban̄a idem n̄kpọ obụkidem ẹmi, m̀mê ata n̄kpri n̄kpọ, ẹyenam akpanikọ n̄ko ke ndise mban̄a mme n̄kpọ oro ẹdide ata akpan n̄kpọ. Enye ama akaiso ete, “Ntem edieke mbufo mîdaha ukwan̄ mammon inam akpanikọ, anie edisịn mbufo ata inyene [oro edi, mme ufọn n̄kpọ eke spirit, m̀mê eke Obio Ubọn̄] ke ubọk? Onyụn̄ edieke mbufo mînamke akpanikọ ye se idide eke owo en̄wen [mme ufọn n̄kpọ Obio Ubọn̄ oro Abasi ayakde esịn mme asan̄autom esie ke ubọk], anie edinọ mbufo se idide eke idem mbufo [kpa utịp uwem ke nsinsi ebietidụn̄]?”
Nnyịn ikemeke ndidi mme ata asan̄autom Abasi ndien ke ukem ini oro idụk ufụn inọ mammon ukwan̄ido, inyene obụkidem, nte Jesus eberide ete: “Baba eyenufọk kiet ikemeke ndisan̄a utom mme ete iba: koro enye eyesua kiet, ama eken; mîdịghe ntre, enye eyesọn̄ọ ada ye kiet, esịn enye eken ke ndek. Mbufo ikemeke ndisan̄a utom Abasi ye eke mammon.” Luke 15:1, 2; 16:1-13; John 10:16.
▪ Didie ke akama-ukpọhọde ke n̄ke Jesus anam ufan ye mmọ oro ẹkemede ndin̄wam enye ke ukperedem?
▪ Nso idi “mammon ukwan̄ido,” ndien didie ke nnyịn ikeme ndida mmọ nnam ufan?
▪ Mmanie ẹkeme ndida nnyịn ndụk “ke nsinsi idụn̄,” ndien mme ebietidụn̄ ẹmi ẹdi nso?