Ibuot 86
Mbụk Eyeneren Emi Okosopde
KE AKAM osụk okụrede nditop n̄ke nnọ mme Pharisee mban̄a edifiak n̄kụt erọn̄ emi okosopde ye okụk emi okosopde, Jesus akaiso idahaemi ye n̄ke en̄wen. Enyeemi aban̄a ima ima ete ye nte enye anamde n̄kpọ ye nditọiren esie iba, emi kiet kiet enyenede akpan ndudue.
Akpa, edi udọ, emi edide akpan owo emi n̄ke emi aban̄ade. Enye ọbọ udeme inyene esie, emi ete esie ọnọde enye ye unana edimen̄e. Enye ndien ọkpọn̄ ufọk onyụn̄ akabade esịn idem ke ata oburobụt usụn̄ uwem. Edi kpan̄ utọn̄ kop nte Jesus ọnọde mbụk emi, nyụn̄ se m̀mê afo emekeme ndidiọn̄ọ owo ẹmi mbụk emi adade aban̄a.
Jesus ọtọn̄ọ ete, “Owo kiet ekenyene nditọiren iba: ndien udọ ọdọhọ ete esie ete, Ete, nọ mi udeme n̄kpọ eke edinyenede mi. Ntem ke ete edeme inyene esie ọnọ mmọ.” Nso ke udọ anam ye se enye ọbọde?
Jesus anam an̄wan̄a ete, “Ibịghike-bịghi udọ atan̄ kpukpru se enyenede, adaha aka anyan idụt; ndien do ke enye asuan inyene esie ke edidu otịme uwem.” Ke akpanikọ, enye abiat okụk esie ke ndidu uwem ye mme akpara. Edikem nsọn̄ọn̄kpọ edi, nte Jesus akade iso ndibụk:
“Ke ini enye ama akasuan kpukpru ama, ọkpọsọn̄ akan̄ otịbe ke idụt oro; enye onyụn̄ ọtọn̄ọ ndidu ke unana. Ndien enye aka akadian idem ye eyen idụt oro, enyeoro onyụn̄ ọdọn̄ enye aka in̄wan̄ ọkọbọk mme edi. Enye onyụn̄ oyom ndidia ikpọk udia, eke mme edi ẹdiade, nyụhọ; owo inyụn̄ inọhọ enye n̄kpọ.”
Edi n̄kpọ esuene didie ntem ndidi se ẹnyịkde enye ndikabade ndi ọbọk-edi, sia unam ẹmi ẹkedide ndedehe nte ekemde ye Ibet! Edi se ikabiakde eyeneren oro ikan ekedi ọkpọsọn̄ ọbiọn̄ oro akakam anamde enye oyom udia oro ẹkedade ẹbọk mme edi. Ke ntak enyene-ndịk unọmọ oro okosịmde enye, Jesus ọkọdọhọ, “enyịn [ama an̄wan̄a] enye.”
Ke akade iso ke mbụk esie, Jesus anam an̄wan̄a ete: “Enye okụt idemesie, ete, Sese, adan̄a ediwak mbio-utom ete mi ẹnyene udia eke awakde akan mmọ ndidia; edi se mi mi, mmọn̄ ndikpa ye biọn̄. Nyedaha nnyụn̄ ntiene ete mi, nnyụn̄ ndọhọ enye nte, Ete, mmanam idiọkn̄kpọ ndian heaven ye ke iso fo: ndotke aba ndikere eyen fo: da mi nte owo-utom fo kiet. Ndien enye adaha ke enyọn̄ etiene ete esie.”
N̄kpọ odu mi ndikere mban̄a: Edieke ete esie ọkpọkọtọkde enye onyụn̄ aduat enye ye iyatesịt ke ini enye ọkọkpọn̄de ufọk, etie nte eyen emi ikpekenyeneke esịt kiet ke se enye oyomde ndinam. Ekeme ndidi enye ekpekebiere ndifiak nnyọn̄ man okoyom utom ke ebiet en̄wen ke obio emana esie mbak enye edifiak okụt ete esie iso. Nte ededi, utọ ubiere oro ikodụkke enye ekikere. Ufọk ekedi ebiet oro enye oyomde ndika!
Nte an̄wan̄ade, ete oro ke n̄ke Jesus ada aban̄a ima ima, enyene-esịtmbọm Ete nnyịn eke heaven, Jehovah Abasi. Ndien afo iso-ọfọn omokụt n̄ko ete ke eyeneren oro okosopde, m̀mê idiọk udọ, ada aban̄a mme anamidiọk oro ẹtịmde ẹdiọn̄ọ. Mme Pharisee, ẹmi Jesus etịn̄de ikọ ọnọ, ke mbemiso ẹma ẹsụk Jesus uyo ke ndidia n̄kpọ ye mme utọ owo ẹmi. Edi mmanie ke akpan ada aban̄a?
Ke Ini Ẹkụtde Eyeneren Emi Okosopde
Ke ini idiọk udọ, m̀mê eyeneren emi okosopde ke n̄ke Jesus afiakde ọnyọn̄ edi ufọk ete esie, didie ke ẹdara enye? Kpan̄ utọn̄ kop nte Jesus obụkde:
“Ke ini enye odude kan̄a nsannsan, ete esie okụt enye, onyụn̄ atua enye mbọm, efehe, awan̄a enye ke itọn̄, onyụn̄ otịm enye inua.” Nso utọ enyene-esịtmbọm ye ete oro enyenede ufiop ufiop esịt ima, otịmde ada aban̄a Ete nnyịn eke heaven, kpa Jehovah!
Anaedi ete emi ama okop aban̄a uwem use esie. Kpa ye oro, ete adara ndida enye nsịn ke ufọk inyụn̄ ibetke ite anam kan̄a n̄kpọ an̄wan̄a ke nde ke nde. Jesus n̄ko emenyene utọ edu udara owo oro, ebemde iso asan̄a ekpere mme anamidiọk ye mme ọbọ a-tax, emi idiọk udọ adade aban̄a ke n̄ke emi.
Ke akpanikọ, enyene-ifiọk ete oro ke n̄ke Jesus nte eyịghe mîdụhe, enyene ndusụk ifiọk aban̄a edikabade esịt eke eyen esie ke ndikụt mfụhọ mfụhọ iso esie nte enye ọnyọn̄de edi. Edi ete ndibemiso nnam n̄kpọ ima ima anam edi mmemmem n̄kpọ ọnọ eyen oro ndiyarade idiọkn̄kpọ esie, nte Jesus obụkde ete: “Edi eyen ọdọhọ enye ete, Ete, mmanam idiọkn̄kpọ ndian heaven ye ke iso fo: ndotke aba ndikere eyen fo: da mi nte owo-utom fo kiet.”
Kpa ye oro, ikọ emi ikam ikụreke-kụre eyen emi ke inua ke ini ete esie ọtọn̄ọde edinam, ọnọde ifụn esie uyo ete: “Ẹwara ẹda ata eti ọfọn̄idem oro ẹdisịne enye; ẹnyụn̄ ẹsịne enye n̄kpanuen ke ubọk ye ikpaukot ke ukot: ẹnyụn̄ ẹda eyenenan̄ emi enyenede isek ẹwot, ẹyak nnyịn idia inyụn̄ idat esịt: koro eyen mi emi ama akpa, onyụn̄ ọtọn̄ọ ntak odu uwem; enye ama osop, ndien ikụt enye.” Ntre ke mmọ ẹtọn̄ọ “ndinam mbre.”
Mi kan̄a, “akpan esie odu ke in̄wan̄.” Se m̀mê afo emekeme ndidiọn̄ọ mme owo ẹmi enye adade aban̄a ke ndikpan̄ utọn̄ nnọ nsụhọ mbụk emi. Jesus etịn̄ aban̄a akpan oro ete: “Nte enye asan̄ade ekpere ufọk, okop ikwọ ye unek; ndien enye okot eyenufọk kiet, obụp enye se mme n̄kpọ oro ẹwọrọde. Enyeoro ọdọhọ ete, Eyenuka amafiak edi: ete fo ama onyụn̄ owot eyenenan̄ eke enyenede isek, koro okụtde enye ye nsọn̄idem. Edi akpan oro akpaha esịt, inyụn̄ inyịmeke ndidụk; ntre ke ete esie ọwọrọ edi edikpe ye enye. Edi enye ọbọrọ ete esie ete, Sese, mmanam utom nnọ fi adan̄a ediwak isua ẹmi, akanam nnyụn̄ nnenike uyo fo: edi akananam afo unọhọ mi ndomo eyen ebot kiet, ete nda nnam mbre ye mme ufan mi: edi ke adan̄aemi eyen fo emi ama ekedi, emi akadiade inyene fo ye mme akpara, afo ama owot eyenenan̄ eke enyenede isek ọnọ enye.”
Mmanie, ukem nte akpan oro, ẹsisụk uyo ẹban̄a mbọm ye ntịn̄enyịn oro ẹnọde mme anamidiọk? Nte idịghe mme scribe ye mme Pharisee? Sia edide nsụkuyo oro mmọ ẹsụkde Jesus koro enye adarade mme idiọkowo akada n̄ke emi edi, nte an̄wan̄ade akpan oro ada aban̄a mme owo ẹmi.
Jesus etre mbụk esie ye eben̄e oro ete emi onịmde akpan esie ke iso: “Eyen mi, afo odu ye ami kpukpru ini, kpukpru se inyenede mi onyụn̄ enyene fi. Edi odot nnyịn ndidara nnyụn̄ nnem esịt, koro eyeneka fo emi ama akpa, onyụn̄ odu uwem: ama osop, ndien ikụt enye.”
Jesus ke ntre itịn̄ke se akpan emi anamde ke akpatre. Ke akpanikọ, ke ukperedem, ke n̄kpa ye ediset ke n̄kpa Jesus ẹma ẹkebe, “ediwak mme oku [ẹma] ẹnyụn̄ ẹsụk ibuot ẹnọ akpanikọ,” ekeme ndidi ama esịne ndusụk mmọemi ẹdide eke otu “akpan” emi Jesus etịn̄de aban̄a mi.
Edi mmanie ke eyomfịn ke nditọiren iba ẹmi ẹda ẹban̄a? Enyene ndidi mbon oro ẹdide ẹdidiọn̄ọ ekese n̄kpọ ẹban̄a mme uduak Jehovah ndinam isọn̄ odu ọnọ mmọ ndidụk itie ebuana ye enye. Akpan oro ada aban̄a ndusụk mme andibuana ke “ekpri otuerọn̄,” m̀mê “ufọk Abasi eke mmọemi ẹdide ikpan, ẹmi ẹwetde enyịn̄ mmọ ke heaven.” Mmọemi ẹma ẹda ẹdu ebietde eke akpan oro ẹnyene. Mmọ ikenyeneke udọn̄ ndidara otu eke isọn̄, kpa “mme erọn̄ en̄wen,” ẹmi mmọ ẹkekerede ke mbon ẹmi ke ẹkeda itie uwọrọiso mmimọ ẹnyene.
Idiọk udọ, ke n̄kan̄ eken, ada aban̄a mme owo ke otu ikọt Abasi ẹmi ẹdahade ẹwọrọ man ẹkebọ inemesịt oro ererimbot ọnọde. Nte ededi, nte ini akade, mmọemi ke editua n̄kpọfiọk ẹfiak edem ẹdi ẹnyụn̄ ẹtọn̄ọ ntak ẹkabade ẹdi mme ọsọn̄idem ikọt Abasi. Ke akpanikọ, Ete etie ima ima onyụn̄ enyene esịtmbọm didie ntem ye mmọ oro ẹdiọn̄ọde ufọn oro mmọ ẹyomde edifen nnọ ye edifiak ntiene enye! Luke 15:11-32; Leviticus 11:7, 8; Utom 6:7; Luke 12:32; Mme Hebrew 12:22b; John 10:16.
▪ Mmanie ke Jesus otop n̄ke, m̀mê mbụk emi ọnọ, ndien ntak-a?
▪ Anie edi akpan owo ẹtịn̄de ẹban̄a ke n̄ke emi, ndien nso itịbe inọ enye?
▪ Mmanie ke eyo Jesus ke ete ye udọ ẹda ẹban̄a?
▪ Didie ke Jesus ekpebe n̄ke enyene-esịtmbọm ete oro ke uwụtn̄kpọ esie?
▪ Nso idi ekikere akpan ke idara oro ẹdarade eyeneka esie, ndien didie ke mme Pharisee ẹnam n̄kpọ nte akpan oro?
▪ Nso ebuana ke n̄ke Jesus oro enyene ke eyo nnyịn?