Kepine Matre Ka Nyipiewekë Koi Së La Thupene Mel

1-2. Pine nemene matre easa ajan tro ketre a amele së? (Roma 7:​22-​24) (Wange ju fe la foto.)

PANE mekune jë la: Kola kei tran la ketre trahmany hnene la ketre batima. Ka mele hi angeic, ngo thatreine kö angeic lö qa cili. Ame hi la hnei angeic hna atreine kuca, ke troa sue me sipo ixatua.

² Ceitu easë hi memine la atre cili. Pine nemen? Pine laka, ame la Adramu a icilekeu memine la Atre Xup, ke hna tithi angeic hnene la ngazo. Nge hna xötr la ngazo kowe la itre nekö i angeic. Matre ngazo asë hë la itre atr, nge pëkö jëne mele i angatr. Ame ngöne la tusi Paulo kowe la angetre Roma, angeic a qaja la pengöne la atr ka ngazo laka, ceitui angatr me itre hna akalabusin. (E jë la Roma 7:​22-​24.) Hnei angeic hna sipon troa “amele [angeic] qa ngöne la ngönetrei” ka troa mec. Eje hi, hna hnöthi angeic hnene la ngazo, ka tro xomi angeic kowe la mec. (Roma 6:​23) Ceitu hi lai me easë. Matre drei la ka troa amele së?

3. Kola amele së tune kaa hnene la thupene mel?

³ Eloine pe, thupene la Paulo a qaja la pengöi angeic, angeic fe a qaja la ketre mejiun. Ame la angeic a ase hnying ka hape: “Drei la ka troa amele ni qa ngöne la ngönetrei celë ka troa mec?” ketre sa jë hi angeic ka hape: “Oleti koi Akötresie jëne Iesu Joxu së!” (Roma 7:​25) Paulo a qaja e celë laka, tro Iehova a amele së jëne la thupene mel.a Tro eje lai a (1) aijijë Iehova troa köletrij la itre ngazo së, (2) aijijë së troa pexej hmaca elany, me (3) aijijë Iehova troa nyisinee së. Ame la easa ce wange la itre mekun celë, tro lai a acatrene la ihnimi së koi Iehova, “Akötresie, atre hamë mejiune.” (Roma 15:13) Tro fe lai a akökötrene la hni ne ole së koi Iesu, “atre thepe së jëne la thupene mel.”​—Kol. 1:​14.

JËNE LA THUPENE MEL IEHOVA A KÖLETRIJ LA ITRE NGAZO SË

4-5. Pine nemene matre nyipiewekë la thupene mel koi së asë? (Atre Cainöj 7:​20)

⁴ E pëkö thupene mel, ke thatreine jë kö troa nue la itre ngazo së. Pine laka, itre atr ka tha pexeje kö së, matre easë asë a kei kowe la ngazo. Easa qaja me kuca la itre ewekë ka akötrë Iehova. (E jë la Atre Cainöj 7:​20.) Ame la itre xaa huliwa së, ke ka ngazo catr. Thenge la Wathebo i Mose, ame la ka humu atr, me nyixetë, ke troa humuth. (Lev. 20:10; Num. 35:​30, 31) Ngacama ngazo ka co la hne së hna kuca, ngo ketre ngazo pala hi lai. Kola anyipicine lai hnene la hna qaja hnei Dravita, kola hape: “Tro ni a thupëne la aqane ujëng matre tha tro kö ni a tria hnene la thinemeng.” (Sal. 39:1) Eje hi, ijije hi tro sa tria memine la që së.​—Iako. 3:2.

⁵ Hapeu, hnei eö kö hna qaja la ketre ewekë me hace fë e thupen? Hapeu, hnei eö kö hna kuca la ketre ewekë ka ngazo? Hnei easë asë hna qaja me kuca la itre ewekë hne së hna hace fë e thupen. Öni Tusi Hmitrötr: “Maine easë a qaja ka hape: ‘Pëkö ngazo së,’ easë lai a amenu së kö, nge patre kö la nyipici the së.”​—1 Ioa. 1:8.

6-7. Nemene la ka aijijë Iehova troa köletrij la itre ngazo së? (Wange ju fe la foto.)

⁶ Thupene mel a aijijë Iehova troa köletrij la itre ngazo së. (Efe. 1:7) Ngacama Iehova a nue la itre ngazo së jëne la thupene mel, ngo tha kolo kö lai a hape, Nyidrëti a thing la lue meke i Nyidrë qëmekene la ngazo. (Isa. 59:2) Pine laka, ka meköti Nyidrë, hnei Nyidrë hna kuca la ketre ewekë matre troa köletrij la itre ngazo së.

⁷ Wathebo i Mose a upe la angetre Isaraela troa huujëne la itre öni, matre köletrije la itre ngazo i angatr. (Lev. 4:​27-​31; 17:11) Itre huuje cili a qajaqaja la huuj ka sisitria i Iesu, me itre thangane ka loi hna troa kapa qa ngön. Tro la huuje i Iesu a aijijë Iehova troa köletrij la itre ngazo së. Tune la hna amaman ngöne la tusi Paulo kowe la angetre Korinito, ka sisitria la huuje i Iesu. Thupene la hna e wengëne la itre huliwa ka ngazo hna kuca ekö hnene la angetre Korinito, öni angeic: “Ase hë ahmitrötrë nyipunie, me jelemeköti nyipunie ngöne la ëje ne la Joxu Iesu Keriso, nge jëne la ua ne la Akötresi së.”​—1 Kor. 6:​9-​11.

8. Nemene la nyine tro eö a lapa mekun, la eö a hnëkë kowe la Drai Ne Amekunën ne la macatre celë?

⁸ Ame la eö a hnëkë kowe la Drai Ne Amekunën ne la macatre celë, xomi ijine jë troa lapa mekun la aliene la thupene mel koi eö. Pine laka hetrenyi hë la thupene mel, tha tro kö eö a hace fë la itre ngazo hnei eö hna kuca ekö, nge ase hë eö ietran. Hapeu, ka jole kö koi eö troa kapa lai? Maine jë eö a qaja ka hape, ‘Atre hi ni laka, ase hë Iehova nue la ngazong, ngo thatreine kö ni thëthëhmine la hnenge hna kuca.’ Maine eje hi lai, the thëthëhmine kö laka: Iehova Akötresie la ka nue la itre ngazo, nge hnei Nyidrëti hna nue Iesu troa ameköti së. Tha hnei Iehova kö hna nue eö maine ketre atr troa amekötin ka hape, drei la ka ijij troa kapa la utipine i Nyidrë. Öni Tusi Hmitrötr: “Maine tro sa tro ngöne la lai ke Akötresie ngöne la lai, . . . tro la madra ne la Neköi Nyidrë, Iesu, a ahmitrötrë së qa ngöne la nöjei ngazo së.” (1 Ioa. 1:​6, 7) Loi e tro sa mejiun kowe la trenge nyipici cili, tune la itre xaa ini ne la Tusi Hmitrötr. Iehova a amaman koi së asë la utipine i Nyidrë jëne la thupene mel, nge öni Tusi Hmitrötr, Nyidrëti a “treqen troa nue la ngazo.”​—Sal. 86:5.

JËNE LA THUPENE MEL TRO SA PEXEJ ELANY

9. Ame la hnëewekë “ngazo” ngöne la Tusi Hmitrötr, ke kolo kö a qaja hmekuje hi la huliwa ka ngazo? (Salamo 51:5)

⁹ Ame la hnëewekë “ngazo” ngöne la Tusi Hmitrötr, ke tha kolo hmekuje kö a qaja la ketre huliwa ka ngazo. Eje fe a qaja la pengö së, qane lo kola hnaho së. (E jë la Salamo 51:5) Hnene la pengö së, matre easa kuca la itre huliwa ka ngazo, nge easë fe a wezipo, me qatre trootro, me mec. Celë hi kepine matre, itre medreng a wezipo me mec, ngacama pëkö huliwa ka ngazo hnei nyudren hna kuca. Nge itre atr ka loi a akötr me mec, tune la itre atr ka ngazo. Pine la ngazo i Adramu, itre atr ka ngazo asë hi së.

10. Tune kaa Adramu me Eva thupene la nyidroti a kei kowe la ngazo?

¹⁰ Tune kaa Adramu me Eva thupene la nyidroti a kei kowe la ngazo? Hna traqa la ketre ewekë ka ahacene la hni nyidro. Thupene la nyidroti a icilekeu me Iehova, hnei nyidroti hna xeni pun la tha idrei nyidro kowe la wathebo i Akötresie, lo hna cinyanyine “ngöne la itre hni i” nyidro. (Roma 2:​15) Canga öhne ju hi nyidro la ketre ewekë ka saze thei nyidro. Matre hnei nyidro hna juetrëne la itre xaa götran ne la ngönetrei i nyidro, me zae Iehova, kösë lue ka atrekënö. (Gen. 3:​7, 8) Ame e cili, nyidroti petre hi a hane dreng la hace hni, me seseu, me xou, me pë madrin me hmahma. Nge aqane trongene hë lai, utihë la nyidroti a mec.​—Gen. 3:​16-​19.

11. Nemene la thangane la ngazo the së?

¹¹ Pine laka itre atr ka ngazo asë hi së, matre easë fe a hane hace hni, me hmahma me seseu. Nge kolo fe a akötre la ngönetrei së me aliene hni së, pine la ngazo. Ketre, thele ju hë së la nöjei pengön ewekë matre nyinyine la itre jole së, ngo eje pala hi. Pine nemen? Pine laka Tusi Hmitrötr a qaja ka hape, “mele ka gufa la hna hamën” koi së. (Roma 8:​20) Celë hi hne së hna öhn enehila ngöne la mele së, me xötreithi së. Itre atr enehila a nue trengecatr matre thupëne la ihnadro, me apëne la ihumuth, me xatuane la itre ka pë mo, me thele troa tingeting la itre nöj. Ngo nemene la hne së hna öhn? Ngacama hetre ewekë ka saze, ngo “ka gufa” la itre trengecatre i angatr, ke tha patre kö la itre jole cili. Tune kaa la aqane tro la thupene mel a amele së?

12. Nemene la mejiun hna hamë së jëne la thupene mel?

¹² Jëne la thupene mel, easa mejiune laka, “easenyi hë matre tha tro hmaca kö a othe la itre ewekë hna xup hnene la ngazo me mec.” (Roma 8:​21) Ame ngöne la fen ka hnyipixe, tro hë së a pexej, matre tha tro hmaca kö a wezipo la ngönetrei së me he së. Ketre, tha tro hmaca kö sa hace hni, me seseu, me xou, me pë madrin, me hmahma. Nge tha tro kö a gufa la itre trengecatre së troa thupëne la ihnadro me thele tingeting. Tro ha eatrën itre ej fene la musi Iesu Keriso “Joxu Ne Tingeting,” atre hamë së la thupene mel.​—Isa. 9:​6, 7.

13. Nemene la itre xaa nyine tro eö a lapa mekun la eö a hnëkë kowe la Drai Ne Amekunën?

¹³ Tune kaa la mele i eö elanyi ngöne la fene ka hnyipixe? Eö a hlë e hmakany, nge egöcatr eö. Tha eö hmaca kö a seseu tro eö me itre sinee i eö a pë xen, maine wezipo, maine meci pena. Ijiji eö enehila troa hetre tingeting, e tro eö a “xölehuje catrëne lo mejiune së . . . kösë iuhni kowe la mele së, iuhni ka tha uk nge ka catr.” (Heb. 6:​18, 19) Tune la iuhni ka cilaxome la he, tro la mejiune i eö a acatrene la lapaune i eö me cilaxomi eö ngöne la itupath. Loi e troa xecie koi eö laka, Iehova hi “la atre nyithupen kowe la itre ka thele nyidrë.” (Heb. 11:6) Ijije hi troa akeukawanyi eö enehila, me hetre mejiun, jëne la thupene mel.

JËNE LA THUPENE MEL EASA ILOI HMACA ME AKÖTRESIE

14. Tune kaa la imelekeu së me Akötresie thupene la hna kei kowe ngazo, nge pine nemen?

¹⁴ Qane lo Adramu me Eva a kei kowe la ngazo, iananyi hë la itre atr me Akötresie. Tusi Hmitrötr a qaja ka hape, ame la itre atr asë ke, ithupëjia angatr me Akötresie. (Roma 8:​7, 8; Kol. 1:​21) Pine nemen? Pine laka, ka pexej la itre trepene meköti Iehova, matre thatreine kö Nyidrë kapa la ngazo. Tusi Hmitrötr a qeje Nyidrë ka hape: “Ka hmitrötre catr la luemeke i nyipë troa goeëne la ngazo, nge thatreine kö nyipëti kapa la ngazo.” (Habak. 1:​13) Matre hnene la ngazo hna ananyi Akötresie me itre atr. Haawe, thatreine kö së troa iloi hmaca me Iehova, me imelekeu me Nyidrë. Ngo thupene mele hi la ka aijijë së troa iloi hmaca me Akötresie.

15. Pine nemene matre hnene la huuje i Iesu hna aijijëne la itre atr troa imelekeu hmaca me Akötresie?

¹⁵ Tusi Hmitrötr a qaja ka hape, Iesu la “huuj nyine he la itre ngazo së.” (1 Ioa. 2:​2, ith.) Pine nemene matre hnene la huuje i Iesu hna aijijëne la itre atr troa imelekeu hmaca me Akötresie? Ka pexeje la mele i Iesu, matre hnene la meci nyidrë hna aijijë Iehova troa iloi me itre atr. Matre celë hi ka aijijë Iehova troa iloi hmaca memine la itre atr. (Roma 3:​23-​26) Ngo tune kaa kowe la itre atr ka nyihlue i Nyidrë qëmeken tro Iesu a mec? Hnei angatr hna mele nyipici koi Iehova, matre hnei Nyidrë hna jelemeköti angatr, kösë itre ka meköti angatr koi Nyidrë. (Gen. 15:​1, 6) Pine nemen? Pine laka, xecie koi Iehova laka, tro Iesu a huujëne la mele i nyidrë. (Isa. 46:10) Hnene la thupene mele hna aijijëne la itre atr troa iloi hmaca me Akötresie.

16. Nemene la ketre ewekë nyine tro eö a lapa mekun, la eö a hnëkë kowe la Drai Ne Amekunën? (Wange ju fe la foto.)

¹⁶ Tune kaa la mele i eö enehila, la eö a imelekeu me Iehova? Tha fene mingöminge kö! Maine jë, eö a hë Iehova ka hape, ‘Kaka’ thenge la hnei Iesu hna qaja. (Mat. 6:9) Nge ma eö fe a hë Nyidrë ka hape, “Ehnemu.” Mekune kö, nyipiewekë tro sa metrötr me ipië, la easa hë Nyidrë ka hape, “Kaka” maine “Ehnemu.” Pine nemen? Pine laka itre atr ka ngazo së, maine ju tha ijiji easë kö troa easenyi Iehova. Ngo hnene la thupene mel matre easa nyisinee i Nyidrë. Aja i Iehova tro sa “iloi hmaca me nyidrë, nge tro ha hetre tingetinge jëne la madra [hnei Iesu] hna anenin hune la sinöe ne iaxösisi.” (Kol. 1:​19, 20) Celë hi kepin, matre hetre imelekeu së me Iehova enehila, ngacama itre atr ka ngazo së.

THUPENE MEL A AMAMAN LA UTIPINE I IEHOVA

17. Hnauëne la easa qaja ka hape, thupene mel la ketre hatren la utipine i Iehova? (Efeso 2:​4, 5)

¹⁷ Thupene mel la ketre hatren laka, “ka tru catre la utipin i” Iehova. Eje hi, hnei Nyidrëti hna amele së, “ngacama ka meci hë së ngöne la ngazo.” (E jë la Efeso 2:​4, 5.) Ame “la itre ka hmalahnine troa kapa la mele ka pë pun” angatr a thele ixatua, ke atre hi angatr laka, hna hnöthi angatr hnene la ngazo, nge loi e troa amele angatr. (It. Hu. 13:48) Iehova a xatua angatr jëne la maca ne la Baselaia, ka aijijë angatr troa atrepengöi Nyidrë me Iesu. (Ioa. 17:3) Ka tria hnyawa Satana, la angeic a mekun ka hape, tro la ngazo i Adramu me Eva a sewe Iehova troa eatrëne la aja i Nyidrë.

18. Ame la easa lapa mekun la thupene mel, nemene la nyine tro pala hi sa mekun?

¹⁸ Ame la easa lapa mekun la itre thangane ne la thupene mel, ke loi e tro pala hi sa mekun la nyipi kepin matre Iehova a hamëne ej. Hnei Nyidrë hna hamëne la thupene mel nyine amele së, ngo hetre ketre ewekë kö ka sisitria. Ej a aijijë Iehova troa sa koi Satana. (Gen. 3:​1-5, 15) Jëne la thupene mel, Iehova a ahmitrötrëne la ëje i Nyidrë, me jelethoi Satana. Nyidrëti fe a amele së qa ngöne la ngazo me mec, ke Nyidrëti la Akötresie ka ihnim. Ketre, hnene la ihnimi gufa i Nyidrë, matre Nyidrëti a aijijë së, ngacama itre atr ka ngazo së, troa amaman ka hape, ka thoi lae Satana. (It. Ed. 27:11) Tune kaa la aqane tro eö a amaman la hni ne ole i eö kowe la thupene mel? Troa sa la hnyinge celë ngöne la tane mekun e thupen.