Aqane Troa Cile Kowe La Itre Ewekë Ka Ahacen La Hni Së

1-2. Tune kaa Paulo e itre xaa ijin, nge kola xatua së tune kaa enehila hnene la tulu i angeic? (Roma 7:​21-​24)

AME la eö a meku Paulo aposetolo, nemene la ka canga mama koi eö? Easa canga mekun la ketre mesinare ka catr, maine atre hamë ini ka maca, maine kolo ketre atr ka cinyanyine la ketre götrane la Tusi Hmitrötr. Nyipici, ketre trahmany ka catr me mele nyipici Paulo. Ngo ame itre xaa ijin, hnei angeic hna hane hnehengazo me hleuhleu, me dekurag. Tui easë, hna hane fe traqa koi Paulo la itre mekun ka ahacene la hni angeic.

² E jë la Roma 7:​21-​24. Ame ngöne la tusi Paulo kowe la angetre Roma, hnei angeic hna qejepengöne la itre mekun ka traqa koi angeic, nge ka hane fe traqa koi së. Ngacama ka mele nyipici Paulo, nge tru la aja i angeic troa drengethenge Akötresie, ngo ketre atr ka ngazo angeic, matre jole koi angeic tro pala hi a kuca la aja i Akötresie. Ketre, kola ahacene la hni Paulo hnene la itre ngazo hnei angeic hna kuca ekö, memine la ketre jol ka ej thei angeic.

3. Nemene la itre hnying hne së hna troa sa ngöne la tane mekun celë? (Wange ju fe “Göi Troa Trotrohnin.”)

³ Ngacama ame itre xaa ijin Paulo a dekurag, ngo angeic a isine matre tha tro kö a mekun atrun pala ha la itre ewekë ka ahacen la hnia angeic. Ame ngöne la tane mekun celë, tro sa ce wang la itre hnyinge celë: Hnauëne la Paulo a qeje angeic ka hape, “atr ka ngazo”? Hnei angeic hna lepetrije tune kaa la itre mekun ka ahacen la hni angeic? Nge tune kaa la aqane tro fe sa lepetrij la itre mekun ka ahacen la hni së?

ITRE EWEKË KA AHACEN LA HNI PAULO

4. Qaja jë la ketre kepin matre kola traqa koi Paulo la itre mekun ka ahacen la hni angeic.

⁴ Itre huliwa ka ngazo hna kuca ekö. Qëmeken tro Paulo (lo hna hëne ekö ka hape, Saulo) a kapa la hmi keresiano, tru catr la itre huliwa ka ngazo hnei angeic hna kuca. Hnei angeic hna nyixölen lo itre ka tranyi Setefano hnei etë. (It. Hu. 7:​58; 8:1) E thupen, hnei angeic hna axösisin me qanangazone la itre keresiano.​—It. Hu. 8:3; 26:​9-​11.

5. Tune kaa Paulo pine la itre ewekë hnei angeic hna kuca ekö?

⁵ Thupene la Paulo a kapa la nyipici, tru catr la hnei angeic hna hleuhleu pine la itre ewekë hnei angeic hna kuca ekö. Nge kola tro la itre macatre, nge kola hace catr la hni angeic. Ame lo macatre 55 M.K., hnei angeic hna cinyanyine kowe la ekalesia ne Korinito ka hape: “Tha ijije kö troa hë ni ka hape, aposetolo, ke hnenge lo hna axösisine la ekalesia i Akötresie.” (1 Kor. 15:9) Nge 5 lao macatre thupen, hnei angeic hna qeje angeic ngöne la tusi Efeso ka hape, “Eni, lo ka co catr thene la ange ka hmitrötr.” (Efe. 3:8) Ame ngöne la tusi angeic koi Timoteo, öni angeic, “Eni ekö la ketre ka silitrengathoi Akötresie, me iaxösisi, me pi tru.” (1 Tim. 1:​13) Pane mekune jë la itre ijine Paulo a wang la itre ekalesia, nge hetre trejin hnei angeic hna axösisin, maine itre fami angatr. Tune kaa angeic?

6. Nemene la ketre ewekë ka ahacene la hni Paulo? (Wange ju la ithuemacany.)

⁶ Hetre ka ithinyi ngöne la ngönetrei. Hnei Paulo hna aceitunëne la ketre jol hnei angeic hna melën memine la ‘ka ithinyi ngöne la ngönetrei angeic.’ (2 Kor. 12:7) Tha hnei angeic kö hna qaja hnyawan la ewekë cili. Maine jë, kola qaja la ketre sine mec, maine ketre ewekë ka ahacen la hni angeic, maine ketre jole pena. Ame la hnëewekë “hetre ka ithinyi ngöne la ngönetreing” ke, kola qaja la ketre akötr ka tru thei angeic.b

7. Pine nemene matre jole koi Paulo tro pala hi a kuca la loi? (Roma 7:​18, 19)

⁷ Itre tria i angeic. Paulo a isi memine la pengö i angeic ka ngazo. (E jë la Roma 7:​18, 19.) Aja i angeic troa kuca la loi, ngo kola huli angeic hnene la ngazo. Hnei angeic hna qaja ka hape, kolo pala hi a isi la ngazo ka eje thei angeic memine la aja i angeic troa kuca la loi. Matre hnei angeic hna nue trengecatr troa saze. (1 Kor. 9:​27) Drei jë kö la Paulo a dekurag la kola fetra hmaca lo itre thiina i angeic ka ngazo!

NEMENE LA KA XATUA PAULO?

8. Nemene la hnei Paulo hna kuca matre saze la pengö i angeic?

⁸ Kola mama ngöne la itre tusi Paulo laka, hnei angeic hna lapa mekun la aqane xatua angeic me itre keresiano hnene la uati hmitrötr, matre troa isi memine la itre aja i angatr ka ngazo. (Roma 8:​13; Gal. 5:​16, 17) Hnei angeic hna qaja hnyawan la itre thiina me itre huliwa nyine tro la itre keresiano a neën, matre amadrinë Iehova. (Gal. 5:​19-​21, 26) Kolo hi lai a amaman ka hape, hnei angeic hna waipengö i angeice kö, me thele eamo ngöne la Trengewekë i Akötresie, me isine troa saze. Nge hnei angeice fe hna trongëne la itre eamo hnei angeic hna hamën koi itre xan.

9-10. Nemene la ka xatua Paulo troa isi memine la itre ewekë ka ahacen la hni angeic? (Efeso 1:7) (Wange ju fe la foto.)

⁹ Ngacama ame itre xaa ijin Paulo a dekurag, ngo tru la itre ewekë ka xatua angeic troa madrin. Hnauëne la easa qaja lai? Madrine catre angeic la angeic a dreng la itre ewekë ka lolo hna kuca ngöne la itre ekalesia. (2 Kor. 7:​6, 7) Nge angeic fe a madrin pine la aqane imelekeu i angeic me itre trejin. (2 Tim. 1:4) Ketre, atre hi angeic laka, Iehova a kepe angeic. Matre madrine catre angeic troa nyihlue i Akötresie memine la “mekuthetheu ka wië.” (2 Tim. 1:3) Ame lo kola akalabusi angeic e Roma, hnei angeic hna ithuecatr kowe la itre keresiano troa ‘madrine thei Joxu.’ (Fil. 4:4) Ame la easa e la hna qaja hnei Paulo, easa öhne laka, tha angeice kö a mekun lapane la itre jol me itre tria i angeic. Ame la kola traqa la itre mekun ka jol, angeic a canga lepetrij itre ej, me mekune catrëne la itre ewekë ka amadrinë angeic.

¹⁰ Ame fe la ketre ewekë ka xatua Paulo troa madrin, ke ene la thupene mel. Atre hi angeic laka, Iehova a hnimi angeic, nge thatraqai angeice fe la thupene mel. (Gal. 2:​20; e jë la Efeso 1:7.) Xecie koi angeic laka, jëne la huuje i Iesu, hnei Iehova hna nue la itre ngazo i angeic. (Roma 7:​24, 25) Celë hi matre, ijiji angeic hi troa ‘nyihlue i Akötresie’ ngöne la madrin, ngacama hetre itre tria me huliwa ka ngazo hnei angeic hna kuca ekö.​—Heb. 9:​12-​14.

11. Tune kaa la aqane ithuecatre koi së hnene la tulu i Paulo?

¹¹ Tui Paulo, easë pala hi a isine matre tha tro kö a mekun, me qaja maine kuca la ketre ewekë ka troa akötrë Iehova. Maine jë, hnei easë hna hane qaja ka hape, ‘Ekölö pe ni atr ka ngazo!’ Öni Elizac ketre trejin föe ka 26 lao macatre ka hape: “Ame la eni a lapa mekun la hna melën hnei Paulo, ke kola ithuecatre koi ni. Eni a madrin la eni a öhn laka, hnei Paulo hna hane isi memine la itre aja ka ngazo tui eni. Nge kola amekunë ni laka, atre kö Iehova la hna melën hnene la itre hlue i Nyidrë.” Nemene la nyine tro sa kuca matre hetre mekuthetheu ka wië me madrin, ngacama hetre itre ewekë ka ahacen la hni së, tui Paulo?

NEMENE LA NYINE TRO SA KUCA?

12. Hnauëne la troa kuca la itre huliwa ka easenyi së koi Iehova?

¹² Catre jë kuca la itre huliwa ka easenyi së koi Iehova. Maine tro sa xeni hnyawa, me kuci spor me canga meköl, ke tro së lai a egöcatr. Ketre tun, kola thue trengecatre së, la easa e Tusi Hmitrötr e nöjei drai, me cainöj, me hnëkën me sine la itre icasikeu, me hamë mekun. Maine tro pala hi sa kuca la itre ewekë cili, tro lai a xatua së troa hetre mekun ka loi, nge tha tro kö sa mekun la itre ewekë ka akucakucanyi së. Ketre, tro sa madrin.​—Roma 12:​11, 12.

13-14. Hna xatuane tune kaa la itre xaa keresiano hnene la itre huliwa i Akötresie?

¹³ Hna tithi John hnei cancer lo angeic a 39 lao macatre. Ame lo xötrei, hna traqa koi angeic la itre mekun ka ngazo. Öni angeic: ‘Hnauëne la kola tithi ni hnei mec, nge jeune pala kö ni?’ Ame lo ijine cili, hetre nekö i angeic ka köni macatre. Nemene la ka xatua angeic? Öni angeic: “Ngacama eni a kucakuca, ngo eni me faming a kuca la itre huliwa ka easenyi hun koi Iehova. Eahun a sine la itre icasikeu, me cainöj, me kuca la hmi ne la fami e nöjei wiik. Ngacama jole catr e xaa ijin, hnei eahun pala hi hna kuca tun.” Ame enehila, John a qaja ka hape: “Nyipici laka, easa jol lo xötrei, ngo kola tro la itre drai, nge kola nyihnan la itre mekun ka ngazo hnene la trengecatr me ihnim hna hamën hnei Iehova. Tro la Akötresi së a aegöcatrenyi eö tune la aqane aegöcatrenyi ni.”

¹⁴ Öni Eliza, lo hne së hna qaja e kula ka hape: “Ame la eni a sine la itre icasikeu me ini Tusi cas, ke eni a öhne laka, Iehova a drei ni me hnimi ni. Nge eni a madrin.” Öni Nolan, ketre atre thupë sirkoskripsio e Afrique me Diane föi angeic ka hape: “Ame la nyio a dekurag, nyio a isine troa kuca la itre huliwa i Akötresie. Nge Iehova a xatua nyio tro pala hi a waiewekë ka loi. Nyio a isine troa mekun ka hape, tro pala hi Iehova a xatua nyio me amanathithi nyio. Ngacama thatre kö nyio la aqane tro Nyidrëti a kuca, ngo tro kö Nyidrëti a kuca.”

15. Nemene la nyine tro sa kuca, matre lepetrij la itre ewekë ka ahacen la hni së? Qaja jë la ketre ceitun.

¹⁵ Ngo maine aja së troa lepetrij la itre ewekë ka ahacen la hni së, hetre itre xaa ewekë kö nyine tro sa kuca. Pane mekune jë laka, eö a akötre ju. Tro eö lai a thel troa tro e nöjei drai matre apëne la akötr. Ngo hapeu, eje hmekuje kö lai nyine troa kuca? Waea. Tro eö lai a pane ithel göne la meci eö me wai droketre, matre atre la qan. Ketre tun, loi e tro sa ithel ngöne la Tusi Hhmitrötr me itre itusi së, me wange la ketre trejin ka macaj, matre atre la aqane tro sa cile kowe la itre ewekë ka ahacen la hni së. Tro sa ce wange la lue eamo ka troa xatua së.

16. Nemene la ka troa xatua eö troa atre la qane la itre mekun ka ajolë eö? (Salamo 139:​1-4, 23, 24)

¹⁶ Sipo Iehova jë troa xatua eö troa atre la ka loi koi eö. Atre hi Dravita joxu laka, atrepengö i angeic hnyawa hi hnei Iehova. Celë hi matre, hnei angeic hna sipo Nyidrë troa xatua angeic troa atre la qane la itre mekun hnei angeic hna “hnehengazon.” (E jë la Salamo 139:​1-4, 23, 24.) Ketre tun, sipo Iehova jë troa xatua eö troa atre la kepin matre eö a hnehengazon, me aqane tro eö a cile kowe la itre mekune i eö ka ngazo. Nge hnyinge jë fe ka hape: ‘Nemene la ka axouenyi ni? Nemene la ka amejëne la itre mekun ka ajolë ni? Eni kö a lepetrij, maine mekune lapan itre ej?’

17. Nemene la itre tane mekun ka troa xatua eö troa hetre mekun ka loi? (Wange ju fe la foto.)

¹⁷ Inine jë la ketre tane mekun ka ihmeku memine la jole i eö. Ame itre xaa ijin, ka loi troa inine la ketre thiina i Iehova ka troa xatua eö. Hnei Paulo hna kepe thangan la hnei angeic hna lapa mekun la thupene mel, me aqane nue Iehova la itre ngazo së. Ijije hi tro eö a hane thel ajuin la itre tane mekun cili. Xome jë la itus Nyine Thele Mekun Ne La Itretre Anyipici Iehova, me Index des publications des Témoins de Jéhovah, maine itre xaa itusi së ka hetreny ngöne la qene hlapa i eö, matre thel ajuin la utipine i Akötresie, me aqane nue Nyidrë la ngazo, me ihnimi nyipici i Nyidrë. Ame la eö a öhne la itre tane mekun ka troa xatua eö, amë jë ngöne la ketre list. Nge amë amamane pi lai list, matre ame la eö a nyiqane dekurag, tro eö a sine ajuine la ketre tane mekun. Thele jë la aqane tro eö a trongën la hnei eö hna e, ngöne la mele i eö.​—Fil. 4:8.

18. Nemene la itre tane mekun hna thel ajuin hnene la itre xaa trejin?

¹⁸ Hnei Eliza, lo hne së hna qaja ha e kula, hna thel ajuin la tulu i Iobu, la angeic a ini Tusi cas. Pine nemen? Öni angeic: “Ceitui eni hi me Iobu. Hna aca traqa la itre itupath koi angeic. Ngacama akötre catre angeic, nge thatre kö angeic la kepin matre kola traqa la itre itupath, ngo tha cile kö angeic troa mejiun koi Iehova.” (Iobu 42:​1-6) Öni Diane, lo hne së hna qaja ha e caha ka hape: “Hneng me föeng hna inine la itre thiina i Iehova ngöne la itre itusi së. Tru la hni ne ole i nyio, ke Iehova a xatua nyio troa nyitipu Nyidrë. Nge ame la nyio a dekurag pine la itre tria i nyio, ke nyio hmaca a mekun laka, Iehova a ini nyio, me xatua nyio troa loi thiina. Celë hi ka acatren la aqane imelekeu i nyio me Nyidrë.”​—Isa. 64:8.

MEJIUNE JË KOWE LA ITRE DRAI ELANY

19. Tune kaa së e itre xaa ijin, ngo nemene la nyine tha tro kö sa thëthëhmin?

¹⁹ Ngacama easa trongëne asë la itre eamo ngöne la tane mekune celë me ini Tusi cas, ngo tro pala hi a traqa koi së la hnehengazo me kucakuca. Nge ame itre xaa ijin, ke tro sa dekurage catr! Ngo, jëne la ixatua i Iehova, atreine hi së lep apujene la itre mekun ka ahacene la hni së. Nge the thëthëhmine kö laka, ame e nöjei drai, easa madrin me mel ka loi, ke ka lolo la imelekeu së me Iehova, nge Nyidrëti a madrin kowe la itre huliwa hne së hna kuca koi Nyidrë.

20. Nemene la nyine tro sa catre kuca?

²⁰ Catre jë së kuca la hne së hna atrein, matre tha tro kö la itre jole së, me itre hne së hna kuca ekö, maine itre tria së a sewe së troa madrin. Jëne la ixatua i Iehova, ijiji së hi troa cile kowe la itre mekun ka ahacen la hni së. (Sal. 143:10) Mekune jë la ijin laka, patre hë la itre mekune cili, nge tro hi sa hetre mekun ka loi. Ame ngöne la fen ka hnyipixe, tha tro hë së lai a seseu la easa hlë e hmakany, ngo tro pe sa madrin troa nyihlue i Iehova Akötresi së!