Aqane Tro Eö a Olene Kowe La Thupene Mel

1-2. Nemene la hna upi së hnene la huuje i Iesu, nge pine nemen? (2 Korinito 5:​14, 15) (Wange ju fe la foto.)

MAINE hna malatranyi eö hnene la ketre ibatima, nge hna huli eö qa cili hnene la ketre atr, hapeu, tro kö eö a olene koi angeic? Ngacama hnei angeice fe hna amelene la itre xan, ngo aja i eö troa ketre sipu amaman la hni ne ole i eö, ke hna ketr la hni eö hnene la hnei angeic hna kuca.

² Tune lo hne së hna ce wang ngöne la tane mekun hnapan, tha ijiji së kö troa sipu amele së qa ngöne la ngazo. Ngo, hnene la mel hna huujën hnei Iesu hna amele së, ke ej a (1) aijijë Iehova troa köletrij la itre ngazo së, (2) aijijë së troa mejiun troa pexeje elany, me (3) aijijë së troa iloi hmaca me Akötresie. Celë hi ka hamë mejiune koi së troa mel epine palua ngöne la fen ka hnyipixe. Hnei Iesu hna amaman la ihnimi nyidrë kowe la itre atr, la nyidrëti a huujën la mele i nyidrë. Nge qëmeken tro nyidrëti a traqa e celë fen, hnei nyidrëti hna hnimi angatr. (It. Ed. 8:​30, 31) Öni Paulo aposetolo ka hape “kola upi huni hnene la ihnimi Keriso.” (E jë la 2 Korinito 5:​14, 15.) Kolo lai a hape, loi e tro la ihnimi Keriso a upi së troa wangatrune la mele hnei nyidrëti hna hamën.

3. Pine nemen matre isapengöne kö la aqane tro la itre atr a amaman la hni ne ole i angatr kowe la thupene mel?

³ Tune kaa la aqane tro eö a amaman la hni ne ole i eö kowe la thupene mel? Isapengöne kö la aqane tro eö a sa me ketre. Pane mekune jë laka, köni atr a thele troa itrony ngöne la ketre götran. Ame pe, isa traone i angatre kö, matre isa kö la itre gojenyi hnei angatre hna xom. Nemene la hnei eö hna ajan? Eö a ajan troa amamane la hni ne ole i eö kowe la thupene mel. Ngo isapengöne kö la hnei eö hna troa kuca matre amamane la hni ne ole i eö, memine la hna troa kuca hnei ketre. Eje hi, isa aqane imelekeu i epone kö me Iehova. Celë hi matre, ame ngöne la tane mekun celë, tro sa ce ithanatane la köni pengöne atr: (1) itre ka ini Tus, (2) itre ka bapataiso, me (3) itre ka nanazij.

ITRE KA INI TUS

4. Nemene la aqane goeëne Iehova la itre ka ini Tus?

⁴ Maine eö a ini Tus, pane mekune jë la: Ame la eö a kapa la maca ka loi, ke kola amaman ka hape, hnei Iehova hna ee eö koi Nyidrë, matre nyisinee i eö. (Ioa. 6:​44; It. Hu. 13:48) “Iehova la ka waipengön la itre aliene hni.” Matre öhne hi Nyidrë la itre trengecatr hnei eö hna nu troa atrepengöi Nyidrë. Ketre, Nyidrëti fe a madrin, la eö a saze, matre mele thenge la itre trepene meköti Nyidrë. (It. Ed. 17:3; 27:11) Thupene mel la ka aijijë eö troa hetre imelekeu me Iehova. (Roma 5:​10, 11) Matre the wangacone kö la thupene mel.

5. Tune kaa la aqane tro la itre ka ini Tus a trongëne la eamo ngöne Filipi 3:​16?

⁵ Tro eö a amamane tune kaa la hni ne ole i eö kowe la thupene mel? Troa trongëne la hnei Paulo hna qaja kowe la angetre Filipi, kola hape: “Pine laka hne së asë hi hna kökötr ngöne la lapaun, loi e tro pala hi së a isa nyinyape hnyawa ngöne la iwaja ka cas.” (Fil. 3:​16) Hnene la ketre Tusi Hmitrötr hna ujën la xötre cili ka hape: “Loi e tro pala hi sa lapa ngöne la gojeny hne së hna trongën enehila.” Haawe, the nue ketre pi kö troa sewe eö troa trongëne la gojeny ne la mel.​—Mat. 7:​14; Luka 9:​62.

6. Nemene la nyine troa kuca hnene la ka ini Tus, e jole koi angeic troa saze? (Dreuteronomi 30:​11-​14) (Wange ju fe la foto.)

⁶ Tune kaa e jole koi eö troa kapa la ketre ini qa hnine la Tusi Hmitrötr? Ithele jë göne la ini cili, nge sipo Iehova jë troa xatua eö troa trotrohnine hnyawan. (Sal. 86:11) Maine eö pala hi a luelu, ke pane nue pi la ini cili, tro kö eö lai a trotrohnine e thupen. Ngo catre jë kö ini Tusi Hmitrötr. Nge tune kaa, e jole koi eö troa nue la ketre hna majemine ka ngazo? The thëthëhmine kö laka, tha tro kö Iehova lai a sipo së troa kuca la ketre ewekë hne së hna thatreine kuca. Atre hi Nyidrë laka, itre atr ka ngazo së. Matre ijiji eö hi lai troa metrötrëne la itre trepene meköti Nyidrë. (E jë la Dreuteronomi 30:​11-​14.) Nge tro kö Iehova a xatua eö. (Isa. 41:​10, 13; 1 Kor. 10:13) Matre the dekurage pi kö. The goeëne catrëne kö la itre jol, ngo goeëne jë pe la itre hnei Iehova hna hamëne koi eö, tune la mele i Iesu. Ame la kola kökötr la ihnimi eö koi Nyidrë, tro eö lai a öhne ka hape “tha ka hace kö” la itre hna amekötin hnei Nyidrë.​—1 Ioa. 5:3.a

7. Nemene la nyine troa lapa mekun hnene la itre jeune ka tru ngöne la nyipici?

⁷ Maine eö la ketre jeune ka tru ngöne la nyipici, nge eö a ini Tus memine la kem me thine i eö, ke ka tru catr eö koi nyidro. Öni Tusi Hmitrötr: “Easenyi Akötresieti jë, nge tro nyidrëti a easenyi koi nyipunie.” (Iako. 4:8; 1 Aq. Jo. 28:9) Ame la eö a thel troa easenyi Iehova, ke Nyidrëti a easeny koi eö. The mekune pi kö ka hape, hnei Iehova hna ee eö koi Nyidrë, ke hnei eö hna tru ngöne la nyipici. Hnei Nyidrëti hna ee eö, ke aja i Nyidrë troa imelekeu me eö. Nemene la hnei Iehova hna kuca, matre hetre imelekeu i eö jë me Nyidrë? Hnei Nyidrë hna hamën la nekö i Nyidrë. The thëthëhmine pi kö la ahnahna cili. (Roma 5:​1, 2) Matre, qëmeken troa sine la Drai Ne Amekunën, pane lapa mekune jë la itre manathith hnei eö hna kapa jëne la mec i Iesu. Tro lai a uku eö troa catre huliwa, matre eatrëne la itre hnei eö hna mekun ngöne la itre huliwa i Iehova. Aqane tro hi eö lai a amaman la hni ne ole i eö kowe la thupene mel.b

ITRE KA BAPATAISO

8. Tune kaa la aqane amaman la itre ka bapataiso la lapaune i angatr kowe la thupene mel?

⁸ Maine ase hë eö xomi bapataiso, nyimu aqane amamane eö la lapaune i eö kowe la thupene mel. Hnei eö hna saze la aqane mele i eö, matre easenyi Iehova me tro thenge la itre trepene meköti Nyidrë. Hnei eö fe hna drengethenge la hna amekötin hnei Iesu, ene la troa tro fë la maca ka loi me inine la itre atr. Nge thupene la hnei eö hna nue mel koi Iehova, hnei eö hna xomi bapataiso. Hapeu, hnei eö kö hna qëmek kowe la icilekeu, ke eö ngöne la nyipi hmi? (2 Tim. 3:​12) Tro la aqane mele nyipici me catre i eö a amamane ka hape, eö a hnimi Iehova, nge tru la hni ne ole i eö kowe la thupene mel.​—Heb. 12:​2, 3.

9. Nemene la nyine troa hmekën hnene la itre ka bapataiso?

⁹ Ngo loi e tro la itre ka bapataiso a hmek. Ijije hi tro angatr a wangacon la thupene mel. Tune kaa? Pane mekune jë la ka traqa kowe la itre keresiano ne Efeso. Thupene la kola amele Iesu hmaca, hnei nyidrë hna felisite angatr, pine la aqane catre i angatr. Ngo hnei nyidrëti fe hna qaja ka hape: “Hetre ewekë ka ngazo hnenge hna öhne thei eö: patre hë lo ihnimi eö hnapan.” (Hna Am. 2:​3, 4) Kola amaman e celë hnei Iesu ka hape, ijije hi tro sa kuca la itre huliwa i Iehova, ke hna majemin, ngo tha qa kö kuhu hni. Tune la troa thith, sine la itre icasikeu me cainöj. Nemene la nyine tro eö a kuca, e kola ae trootro la ihnimi eö koi Iehova?

10. Tune kaa la aqane tro eö a “mekune” la itre huliwa i Iehova me nue itre ej “troa löthi” eö? (1 Timoteo 4:​13, 15)

¹⁰ Hnei Paulo aposetolo hna ithuecatr koi Timoteo troa “mekune” la itre huliwa i Iehova me nue itre ej “troa löthi” angeic. (E jë la 1 Timoteo 4:​13, 15.) Matre, thele jë la itre aqane troa madrin ngöne la huliwa i Iehova. Aqane tro hi së lai a nue “la uati hmitrötre troa aegöcatrenyi” së. (Roma 12:11) Nemene la nyine tro sa kuca? Hnëkëne jë la itre icasikeu, matre tro eö a drenge hnyawan. Maine pena, tro jë ngöne la itre götran gaa pë mej, matre ini Tusi cas me lapa mekun. Ka tune la eë, tro ej a mele catr e tro pala hi sa nyi een. Haawe, loi e tro sa catre kuca la itre huliwa i Iehova, matre tro pala hi a mel e kuhu hni së la itre hnei Iehova hna kuca koi së, tune la thupene mel. Ketre, ame la itre wiik qëmeken la Drai Ne Amekunën, xomi ijine jë troa lapa mekun la itre manathith hne së hna kapa, qane lo easa Temoë Iehova. Tro lai a akökötrene la hni ne ole së kowe la thupene mel, lo ka aijijë së troa nyisinee i Iehova.

11-12. Maine tha pi kuca hë së la itre huliwa i Iehova, kolo kö lai a hape, patre hë la uati hmitrötr the së? Qejepengöne jë. (Wange ju fe la foto.)

¹¹ Maine tha catre hë eö ngöne la huliwa i Iehova, the kucakuca kö, nge the mekune kö ka hape, patre hë la uati hmitrötr thei eö. Mekune jë la hnei Paulo hna cinyanyine kowe la angetre Korinito: “E tro ni a kuca nge tha ajange kö, hnëqange kö lai.” (1 Kor. 9:​17) Kola hapeue lai?

¹² Atr ka ngazo Paulo, matre ame itre xaa ijin, patre kö thei angeic la aja troa cainöj. Ngo ame ngöne la itre ijine cili, angeic a isine troa catre cainöj. Ijije fe tro eö a hane catr tui Paulo. Isine jë troa kuca la loi, ngacama pëkö aja thei eö. Sipo Iehova jë troa hamë eö la ‘aja me trengecatre troa kuca.’ (Fil. 2:​13) Catre jë acatrene la imelekeu i eö me Iehova, me kuca la itre huliwa i Nyidrë. Nge tro kö eö lai a öhn, tro hmaca kö a catr la ihnimi eö koi Iehova, nge tro hmaca eö a hetre aja troa kuca la itre huliwa i Nyidrë.

13. Tune kaa la aqane tro sa isa waipengö së ka hape, easë pala hi “ngöne la lapaun”?

¹³ Ame itre xaa ijin, loi e tro sa waipengö së, thenge la hna qaja ngöne 2 Korinito 13:5 ka hape: “The mano kö nyipunie isa tupathe ka hape, nyipunieti kö ngöne la lapaun. Nge catre jë isa waipengöi nyipunie.” Matre isa hnyinge jë ka hape: ‘Eni kö a amë panëne la itre huliwa ne la Baselaia?’ (Mat. 6:​33) ‘Ame la eni a iëne la itre nyine iamadrinë, mama kö ka hape, eni a sisine la ngazo?’ (Sal. 97:10) ‘Eni kö a acatrene la cas me tingeting memine la itre trejin ngöne la ekalesia?’ (Efe. 4:​2, 3) Ame ngöne la ijin ne la Drai Ne Amekunën, easa lapa mekun la thupene mel hnei Iehova hna hamë së. Ijine hi lai tro sa waipengö së, me wang ka hape, easë kö a mel koi Keriso maine koi së kö.c

ITRE KA NANAZIJ

14. Hnauëne laka, nanyi hë itre xan qa ngöne la ekalesia?

¹⁴ Ame la itre xaa trejin, tha sine hë angatr la itre icasikeu, ngacama itre macatre ne nyihlue i Iehova angatr. Pine nemen? Ame la itre xan, tru pala ha la hnei angatr hna “hnehengazone la itre ewekë thatraqane la mel.” (Luka 21:34) Ame itre xan, hna athixötrë angatr hnene la hna qaja maine kuca hnene la ketre trejin. (Iako. 3:2) Nge ame pena itre xan, hnei angatr hna kei kowe la ngazo, nge hmahma fe angatr troa sipo ixatua. Maine nanyi hë eö qa ngöne la ekalesia, nemene la nyine tro eö a kuca? Tro la thupene mel, memine la ihnimi Iehova me Iesu koi eö a xatua eö tune kaa?

15. Nemene la ka amamane laka, Iehova a mekune la itre mamoe ka nanyi qa ngöne la ekalesia? (Ezekiela 34:​11, 12, 16)

¹⁵ Tune kaa la aqane goeëne Iehova la itre mamoe ka nanyi qa ngöne la ekalesia? Tha Nyidrëti kö a nuetriji angatr. Nyidrëti pe a thele angatr, me thua i angatr, me thele troa abëekë angatr koi Nyidrë. (E jë la Ezekiela 34:​11, 12, 16.) Tha celë kö lai hnei Iehova hna kuca koi eö enehila? Eje hi! E ka hape, eö a e la tane mekune celë, ke kolo hi lai a amamane laka, eö a ajan troa amadrinë Iehova. Maine hnei Iehova hna öhne la ewekë ka loi thei eö lo xötrei me ee eö koi Nyidrë, hapeu, tha tro hmaca kö Nyidrëti a kuca tun koi eö enehila?

16. Nemene la ka troa xatuane la ketre trejin troa bëeke koi Iehova? (Wange ju fe la foto.)

¹⁶ Hane hi la ithuecatr hna qaja ngöne la boroshür Bëeke Jë Koi Iehova: “Loi e xecie koi epun laka, ce Iehova me epun la epuni a bëeke koi Nyidrë. Tro Nyidrëti a xatua epuni troa elë hune la itre hnei epuni hna seseun, me axapone la itre hni epuni hna akötrën, me atingetingëne la hni epun me mekun, ke hetrenyi hë la mekuthetheu ka wië. Ame hë e cili, tro hmaca ha hetre aja i epuni troa ce nyihlue i Iehova memine la itre hlue i Nyidrë.” The thëthëhmine kö laka, tru la aja ne la itre qatre thup troa xatua eö. Ceitu angatr memine “la ketre hnë zae e ijine eny, me ketre hnapo kowe la wene.” (Isa. 32:2) Atre hi eahun laka, tru la hni ne ole i eö kowe la thupene mel, matre hnyinge jë ka hape, ‘Nemene la nyine tro ni a kuca matre troa “iloi” me Iehova?’ (Isa. 1:​18; 1 Pet. 2:​25) Ijiji eö kö troa sine la ketre icasikeu ngöne la Uma Ne Baselaia? Ijiji eö kö troa sipo ixatua kowe la ketre qatre thup, matre tro ketre a ini Tus me eö? Tro kö Iehova a amanathithine la itre trengecatre hnei eö hna kuca matre troa bëek koi Nyidrë, memine la hni ne ole i eö kowe la thupene mel.

TRO EÖ A AMAMANE TUNE KAA LA HNI NE OLE I EÖ?

17-18. Nemene la nyine tro sa kuca matre troa huliwan hnyawane la traeme së qëmekene la Drai Ne Amekunën?

¹⁷ Hnei Iesu hna qaja ka hape, hna hamëne la thupene mel “matre tha tro kö a meci la atre amamane la lapaune i angeic kowe la Nekön, ngo tro pe a hetrenyi la mele ka pë pun.” (Ioa. 3:​16) Jëne la thupene mel, Iehova a thepe së qa ngöne la ngazo me mec. Matre tha tro kö sa sixan la thupene mel. (Roma 3:​23, 24; 2 Kor. 6:1) Ame la itre drai qëmekene la Drai Ne Amekunën, ke itre ijine lai tro sa mekun ajuine la ihnimi Iehova me Iesu. Tro la ihnimi cili a uku së troa amamane la hni ne ole së koi nyidro.

¹⁸ Tro eö a amamane tune kaa la hni ne ole i eö? Nyipici laka, isa kö la aqane tro eö a sa me itre xan. Ngo tro kö Iehova a amanathithine la itre trengecatr hnei eö hna kuca, tune la aqane amanathithine Nyidrë la trengecatr ne la itre xaa hlue i Nyidrë, itre ka mel tha “göi angatre kö, ngo thatraqai nyidrëti pe, atre meci pi angatr.”​—2 Kor. 5:​15.