Metrötrëne Jë La Hna Axeciën Hnei Itre Xan

1-2. Pine nemen matre isapengöne kö la mekun hne së hna xom me ketre trejin?

HNA hane kö ameköti eö pine la ketre mekun hnei eö hna axeciën? Hnei eö kö hna hane amekötine la ketre trejin pine la mekun hnei angeica hna xom? Hna hane fe traqa lai koi së.

² Tha sesëkötre kö së laka, ame itre xaa ijin, isapengöne kö la itre mekun hne së hna xom me itre xaa trejin. Pine nemen? Pine laka, isapengöi easë kö, nge isa aqane mekune së kö. Hnene la qenenöje së, me aqane hetru së, me aqane mele së, matre isa aqane waiewekë i easë kö. Ngo tha tro kö sa nue la eisapengöi easë troa thë la cas me tingeting ne la ekalesia.​—Efe. 4:3.

3. Nemene jë la hne së hna troa kuca, e tha kapa kö së la mekun hna xom hnene la ketre trejin?

³ Maine tro la ketre trejin a axecië mekun nge tha kapa kö së, ke tro së lai a thel troa wai angeic matre tro angeic a saze mekun, maine pena tro sa qaja koi itre xan. Aja i easë troa xatua angeic. Eje hi, tru la ihnimi së kowe la itre trejin, nge aja i easë tro angatr a madrin. (It. Ed. 17:17) Matre, tha aja i easë kö tro angatr a axecië mekun nge tro angatr a hace fë e thupen, maine ka troa angazon la imelekeu i angatr me Iehova.

4-5. Tune kaa la aqane tro sa ujë, e tro la ketre trejin a xomi mekun ka isapengöne memine la mekuna së?

⁴ Maine tha kapa kö së la mekun hna xom hnene la ketre trejin, hapeu, tro kö sa qaja koi angeic? Ame itre xaa ijin, ijije hi tro sa qaja. Maine easa dreng ka hape, angeic a mekun troa kuca la ketre ewekë ka ngazo, tro së lai a thel troa xatua angeic matre saze la aqane waiewekë i angeic, ke easa hnimi angeic. (It. Ed. 27:​5, 6) Ngo tune kaa easë, e tro la ketre trejin a axecië mekun, nge pëkö ngazo hna kuca, ngo ka isapengöne pe memine la mekuna së? Tro la xötr ka nyitane la ini së a sa la hnyinge celë, ej a hape, tha tro kö “a ameköti angeic pine la aqane waiewekë i angeic.”​—Roma 14:1.

⁵ Nge tune kaa, e jole koi së troa metrötrëne la mekun hna xom hnene la trejin? Ame ngöne la tane mekune celë, tro sa ce wang la kepin matre, loi e tro sa metrötrën la mekun hna xom hnei itre xan, memine la aqane tro sa kuca. Ngo tro sa pane ce wang la itre ijin ka uku së troa qaja angazone la itre trejin, pine la itre mekun hnei angatr hna xom.

NEMENE LA ITRE MEKUN KA TROA UKU SË TROA IQEJ?

6-7. Eu la itre ijin, easë a nyiqane qaja angazon la mekun hna axeciën hnei ketre?

⁶ Tune lo hne së hna qaja ha, hetre thangane catr la aqane hetru së me mele së kowe la aqane ujë së. Easa mekun ka hape, casi hi la aqane waiewekë së me itre xan, ngo tha eje kö. Tro sa ce wange la itre xaa ceitun. Ceitune 1: Ame la kola co hnene la ketre trejin trahmany, ka iji gorok catr la keme i angeic. Matre, ame la angeic a öhn la itre trejin a iji ka haitr, ngöne la itre ijine madrin, ke dekurage catre angeic. Hnei angeic hna ameköti angatr, ke ame koi angeic, ka ngazo la hnei angatr hna kuca. Ceitune 2: Hna tith la ketre trejin föe hnene la ketre mec, ngo lolo hë la meci angeic. E thupen angeic a dreng ka hape, hna hane tith la ketre trejin föe hnene la meci cili. Aja i angeic troa xatua eahlo, matre angeic a iele eahlo troa nyitipu angeic, ene la troa xen la ketre pengöne xen, maine xome la ketre wenekas maine aqane inyië pena. Ceitune 3: Ame la ketre trejin trahmany ke, ka sine la ketre hmi ka thoi ekö. Xele catre angeic ma wang la aqane mele i angeic ekö. Ame la angeic a dreng ka hape, hnene la ketre trejin hna hane lö kowe la uma hmitrötr la kola hmine la ketre wezipo, ke tha loi kö angeic.b

⁷ Tro fe sa ce wange la itre xaa ceitun. Ceitune 4: Hnene la aqane hetrun la ketre trejin trahmany, matre tha kapa kö angeic la kola hnai enaj hnene la itre trahmany, maine li trauziz hnene la itre föe. Ngacama atre hi angeic la ithuemacany ka hnyipixe hna hamën, ngo angeic a catre fë mekun. Ceitune 5: Atre hi la ketre qatre thup la ketre trejin trahmany ka kuca la itre ini ka tru, nge ka trotriji Iehova e thupen. Ame ngöne la ekalesia, hetre trejin nekötrahmany ka mekun troa ini aqeany. Matre hnene la qatre thup hna thel troa sewe angeic memine la kem me thine i angeic troa xome la mekun cili.

8. (a) Nemene la ka troa ukune le ketre kem me thin troa xöjetrij la itre xaa kem me thin? (b) Nemene la thangane lai kowe la ekalesia?

⁸ Tro sa ce wang la ketre ijin tro la itre kem me thin a xöjetrij la itre xaa kem me thin. Ceitune 6: Hetre nekö i eö matre eö a isin troa hia nyudren “ngöne la itre ihaji me itre ini qaathei Iehova.” (Efe. 6:4) Ngo ame koi eö, itre xaa kem me thin a nue la itre nekö i angatr troa isa kuci mekun. Pine laka, angatr a nue la itre nekö i angatr troa traqa tar, me elone la itre jeux video (ngacama pëkö isi), maine hetre telefon nge nekönatr pala kö angatr. Matre nekö i eö a mekun ka hape, tha ka itrotrohni kö eö. Angatr a hnying ka hape, “Hnauën laka, tha ceitui epone kö memine la itre xaa kem me thin?” Hnene hi lai, matre eö a nyiqane xöjetrij la itre xaa kem me thin. Nyipici laka, ijije hi troa aciane la iwesitrë la kola axecië mekun hnene la ketre trejin, nge ka isapengöne kö memine la mekuna së. Tro së lai a qaja angazon la aqane huliwane angeic la manie i angeic, maine itre ijin angeic a tro troa vakas, maine itre nyine iamadrinë hnei angeic hna iën. Ngo tha tro kö sa nue la itre mekuna së troa thë la cas ne la ekalesia.

9. Nemene la nyine tha tro kö sa mekun? (Wange ju fe la foto.)

⁹ Maine isapengöne kö la aqane axecië mekun ne la lue trejin, tha kolo kö lai a hape, ka nyipici la ketre, nge ka tria la ketre. (Roma 14:5) Tha hnene kö laka, hna upi së troa “ca mekun” göne la itre trepene meköti Iehova, matre tro fe a ceitu la aqane axecië mekune së. (2 Kor. 13:11) Ceitune hi la itre mekun hne së hna axeciën memine la hne së hna troa kuca la easa tro kowe la ketre götran. Casi hi la götran hne së hna tro kow, ngo nyimutre la itre gojeny. Easa iëne la gojeny ka loi koi së nge ka hmaloi. Ketre tun, itre trejin a isa axecië mekun, ngo casi hi la aja i angatr me së, ene la troa amadrinë Akötresie. Celë hi matre, tha tro kö sa xöjetriji itre xan pine la itre mekun hnei angatr hna axeciën.​—Mat. 7:1; 1 Thes. 4:​11.

KEPIN MATRE EASA METRÖTRËN LA HNA AXECIËN HNEI ITRE XAN

10. Thenge la Iakobo 4:​12, ijiji së kö troa qaja angazon la hna axecië hnei itre xan, nge pine nemen?

¹⁰ Tusi Hmitrötr a qaja la itre kepin matre nyipiewekë tro sa metrötrëne la hna axeciën hnei itre xan. Hane hi la itre xaa kepin. Tha ijiji së kö troa hane qaja la hna axeciën hnei itre xan. (E jë la Iakobo 4:​12.) Iehova casi hi la Atre Acili Wathebo me Iameköti. Nyidrëti casi hi la ka ijij troa amekötine la mele së. Tro la itre trejin a isa qeje thiinan koi Iehova, ngo tha koi easë kö. (Roma 14:10) Ngacama tha ka ihmeku kö memine la mekuna së me aqane waiewekë së, ngo tha ijiji së kö troa amekötin maine qaja angazone la mekun hna axeciën hnene la ketre trejin.c

11. Nemene la aqane tro sa acatrene la cas ngöne la ekalesia? (Wange ju fe la foto.)

¹¹ Aja i Iehova tro la itre hlue i Nyidrëti a cas, ngo tha tro kö a ceitu. Eje hi, madrine catre Iehova la kola isapengöne la itre ewekë! Celë hi hne së hna öhne ngöne la itre hna xup. Eje hi, pëkö iaw ka ceitu. Nge tune kaa fe la itre atr? Ngacama 8 milliards lao atr e celë fen, ngo isapengöi angatre kö, me aqane waiewekë. Tha hnei Iehova kö hna xup la lue atr ka ceitu, ke tha celë kö aja i Nyidrë. Ngo aja i Nyidrëti pe tro sa cas. Matre tha easë kö a nue la eisapengöi easë troa thë la casi së. Ka nyipiewekë kö koi së troa tingeting me cas ngöne la ekalesia, hune la troa catre fë mekun.​—Roma 14:19.

AQANE TRO SA METRÖTRËN LA MEKUNA I ITRE XAN

12-13. Maine easa mekun ka hape, ketre a “nyiqaane kei,” nemen la nyine tro sa kuca? (Galatia 6:1; wange ju la hna eköhagen hna hape “E Tha Dakor Kö Eö.”)

¹² La kola axecië mekun hnei itre xan. Hnyinge jë ka hape, ‘Angeice kö a “nyiqaane kei” maine angeice hi a ië ewekë?’ Maine angeic a ena la ketre wathebo i Iehova, hnyinge jë ka hape, ‘Ijijinge kö troa ameköti angeic maine tro pena nue kowe la ketre trejin ka macaj?’ Maine ijiji eö hi, thele jë troa wenë ameköti angeic cememine la menyik. (E jë la Galatia 6:1.) Ngo maine eö a öhne laka, angeice hi a iëne la ketre mekun ka tha ihmeku kö memine la mekuna i eö, the mekuhni angeice kö maine xöjetriji angeic. Metrötrëne jë la aqane axecië mekune i angeic, nge the qaja angazo angeice kö.​—Roma 14:​2-4.

¹³ Tro sa xome la ketre ceitun: Eö a tro ngöne restaurant memine la ketre sinee i eö. Tro kö eö a musinë angeic troa xome la xen ka ceitu me eö? Waea. Tro eö lai a nue angeic troa ketre iën la hnei angeic hna pi xen. Ngacama tro angeic a iëne la ketre xen hnei eö hna xelen, ngo tha eö kö la ka troa xen. Ketre, tha tro kö eö lai a madrin e tro la sinee i eö a iën la hnei eö hna troa xen. Easë a metrötrë itre xan la easa nue angatr troa axecië mekun thenge la isa aja i angatr.

14. Tune kaa la aqane tro eö a acatrene la cas la eö a axecië mekun? (1 Korinito 8:​12, 13)

¹⁴ La eö a axecië mekun. Tro eö a acatrene la cas, e tha eö kö a athixötrë itre xan. (E jë la 1 Korinito 8:​12, 13.) Maine jë, atre hi eö laka, “ijiji” eö hi troa xom la ketre mekun. Ngo e kola athixötrëne la trejin me eö, hapeu, “nyine loi” lai?d (1 Kor. 10:​23, 24) Nyipiewekë tro sa meku itre xan hune la troa kuca la sipu aja së. (Roma 15:1) Ngo hapeu, tha hnei easë kö e kula hna qaja ka hape, loi e tro la itre xan a metrötrën la itre mekun hne së hna axeciën? Nyipici! Loi e tro angatr a metrötrëne la itre mekuna së, nge ketre tu së fe. Ngo nyipiewekë tro fe sa xötrethenge la hna qaja hnei Tusi Hmitrötr ngöne Roma 12:​18, kola hape: “Isa isine jë troa mele tingetinge memine la itre atr.” Haawe, easa isine matre tha tro kö a athixötrë itre xan, me mele tingeting me angatr.

15. Tune kaa la aqane tro la itre qatre thup a acatrene la cas ne la ekalesia? (1 Korinito 4:6)

¹⁵ Itre qatre thup a metrötrën la hna axeciën hnei itre xan. Itre qatre thup a acatrene la cas ne la ekalesia ke, tha angatre kö a acili wathebo, me nyixan la itre “hna cinyihan” ngöne la Tusi Hmitrötr. (E jë la 1 Korinito 4:6.) Nge, tha angatre kö nyixane la itre eamo hna hamëne jëne la itre itusi së. Ketre, ame la kola sipo ixatua koi angatr, ke tha angatre kö a hamë eamo qa ngöne la sipu inamacane i angatr. Ngo angatre pe a nyitrepene hnene la Trengewekë i Akötresie.​—Isa. 48:​17, 18.

16. Tune kaa la aqane tro la ketre qatre thup a metrötrëne la mekune hna axeciën hnene la lapa ne la itre qatre thup?

¹⁶ Itre qatre thup a metrötrëne la mekun hna ce axeciën hnene la lapa ne la itre qatre thup. Lapa ne la itre qatre thup a thith matre sipone la uati hmitrötr, me wang hmaca la itre hna amekötin, nge e thupen angatr a ce axecië mekun. Ngacama tha dakor kö la ketre memine la mekun hna axeciën, ngo angatr isa ala cas a kapa la mekun cili. (Efe. 5:​17) Ketre, loi e tro la itre qatre thup a trongëne hnyawane la hna qaja hnei Tusi Hmitrötr memine la itre itusi së, nge tha tro kö angatr a ujëne la itre hna amekötin matre acatrene la mekuna i angatr. Tha tro kö la ketre qatre thup a xome la ketre hnëewekë qa ngöne la itre itusi së, matre sajuëne la mekuna i angeic.

17. Nemene la itre thangan la easa metrötrëne la mekun hna axeciën hnei itre xan?

¹⁷ Tune la hne së hna ce wang, isapengöi easë kö. Isa hetre mekuna së kö me aja së. Ka lolo catre lai! Pine laka, easa traqa qa ngöne la itre xaa nöj, nge isa thiina i easë kö, matre ka mingöming la ekalesia, nge easa mele madrin. Tha easë kö a nue la isapengö së troa aisa së, ngo easë pe a thele la tingeting. Easa thupëne matre tha tro kö a athixötrë itre xan. Easë fe a metrötrëne la itre mekun hna axeciën hnei itre xan. Maine tro sa ujë tun, tro la ekalesia a cas me madrin.​—Sal. 133:1; Mat. 5:9.