Catre Jë Easenyi Iehova La Eö a Ini

1-2. (a) Maine eö a mekun troa ini aqeany, nemene la nyine tro eö a hmekën? (b) Kola hapeu la troa “nyinyape hnyawa ngöne la iwaja ka cas”? (Filipi 3:​16)

ITRE xaa hlue i Iehova a iëne troa ini aqeany. Pine nemen? Pine laka, tro lai a aijijë angatr troa öhnyi huliwa, matre thupëne la mele i angatr me nyihlue i Iehova. Maine eö a mekun troa ini aqeany, nemene la aqane tro pala hi eö a easenyi Iehova? (Iako. 4:8a) Qane lo eö a nyiqane ini, hna tupath la lapaune i eö. Ame enehila, nyipiewekë ‘tro pala hi eö a nyinyape hnyawa ngöne la iwaja ka cas,’ ene la troa catre mele nyipici koi Iehova, tune la aqane kuca i eö qan ekö.​—E jë la Filipi 3:​16.

² Ame la hnëewekë qene Geres hna hape, “nyinyape hnyawa ngöne la iwaja ka cas,” ke kola qaja la itre sooc ka ce tro, casi hi la aqane feke ca i angatr. Maine hnei eö hna mekun troa ini aqeany, loi e tro pala hi eö a ce tro me Iehova, me catre huliwa i Nyidrë. Ame ngöne la tane mekune celë, tro sa ce wange la foa lao trepene meköt ka troa xatua eö. Atre hnyawa hi eö la itre trepene meköt cili. Ngo loi e tro pala hi eö a trongëne itre ej la eö a ini aqeany me e thupene fe.

TROA KUCA LA ITRE HNA MAJEMIN KA LOI

3. Nemene la ka troa traqa la eö a nyiqane ini?

³ Jol. Ame la eö a ini, tro ha tru hnei huliwa i eö, nge co hë la traeme i eö. Aja i eö troa ini hnyawa, matre tro hë eö lai a nyiqan wangacone la itre huliwa i Iehova. Maine jë, tro eö a nyiqane triane la itre icasikeu, me wangacone la huliwa ne cainöj me ini Tusi cas me thith.​—Hna Am. 2:4.

4. Nemene la ka aijijë eö “tro pala hi a tru hnei huliwa i [eö] koi Joxu”? (1 Korinito 15:58)

⁴ E jë la 1 Korinito 15:58. Troa nyinyap la velo, e tro la atr ka tith a pédaler. Ketre tun, maine aja së troa acatrene la imelekeu së me Iehova, ke loi e troa huliwa catre koi Nyidrë. Celë hi matre, öni Tusi Hmitrötr, “loi e tro pala hi a tru hnei huliwa i nyipunie koi Joxu.” Nyipiewekë tro la itre huliwa cili a tro pa ngöne la mele i eö. The thëthëhmine kö laka, ame la ka sisitria ngöne la mele së ke, ene la troa nyihlue i Iehova, ngo tha ene kö la ini. (Mat. 22:37) Öni Samantha ketre jeune ka hape, “Maine tro la itre ini hnenge hna kuca a sewe ni troa huliwa i Iehova, ke tro hë ni a nuetrij itre ej.”

5. Nemene la nyine tro eö a kuca matre catre nyihlue i Iehova?

⁵ Qëmeken troa ini, kuca jë la: Loi e xecie koi eö tro pala hi a amë panë Iehova ngöne la mele i eö. Hnyinge jë ka hape, ‘Nemene la nyine tro ni a kuca, matre tro pala hi a sine la itre icasikeu, me cainöj trootro me inine la Tusi Hmitrötr?’ (Ios. 1:8; Mat. 28:​19, 20; Heb. 10:25) Ketre, mekune hmaca jë lo ijine eö a nyiqane ini, nge hnyinge jë ka hape: Hnenge hna kuca tune kaa matre troa amë panëne la itre huliwa i Iehova lo ijine cili? Maine eö a mekun ka hape, hetre nyine tro pala kö a saze, nemene la nyine tro eö a kuca? Isine jë troa catre huliwa i Iehova la eö a ini. Ka nyipiewekë la troa ini, ngo the nue eje kö troa sewe eö troa nyihlue i Iehova.a​—Mat. 6:​24.

6. Nemene la itre hnying ka amamane ka hape, eö pala hi a amë panë Iehova ngöne la mele i eö? (Wange ju fe la foto.)

⁶ Ame la eö a ini, loi e tro eö a waipengöi eö e nöjei treu. Hnyinge jë ka hape, ‘Ame lo itre huliwa ka nyipiewekë, ke itre ej pala kö a tro pa ngöne la meleng?’ Haawe, isa hnyinge jë ka hape, ‘Eni kö a triane la itre icasikeu maine traqa tar? Eni kö a mekune la itre qang ngöne la ijine icasikeu? Eni kö a sine la icasikeu jëne visioconférence hune troa ce sine memine la itre trejin? Nge hapeu la thith, me ini Tusi cas, me cainöj trootro, hace hë koi ni troa kuca?’ Maine celë hi hnei eö hna öhn, ke hmeke kö! The nue kö la ini troa sewe eö troa amë panëne la itre huliwa i Iehova ngöne la mele i eö.

TROA “ATREINE THELEWEKË”

7. Nemene la thangane la itre ini kowe la mekuna i eö?

⁷ Jol. Ame itre xaa ijin, troa ini eö la itre mekun ka tha ihmeku kö memine la hna qaja hnei Tusi Hmitrötr. Kola qaja la “inamacane i fen, me itre mekune ka pë alien.” Tune la kola qaja ka hape, pëkö Akötresie, nge tha hna xupe kö la atr. (Kol. 2:8) Ketre, tro la itre xaa ini a uku eö troa mejiun koi eö kö. Önine la ketre trejin trahmany: “Kola ini hun troa atreine huliwa, ngo kolo fe a ini hune la ketre aqane mekun ka tha ihmeku kö memine la mekuna i Iehova. Kola ini hun laka, troa lolo la mele së e tro sa huliwa catr. Matre tha easë kö a bezoë Iehova. Celë hi matre jole koi ni troa mejiun koi Nyidrë.”

8. Pine nemene matre nyipiewekë tro eö a “atreine thelewekë”? (Itre Edromë 5:​1, 2)

⁸ E jë la Itre Edromë 5:​1, 2. Tusi Hmitrötr a ithuecatre koi së troa “atreine thelewekë.” Ka nyipiewekë catr, ke Satana me fene i angeic a thel troa ajojezi së matre tro sa mekun tui angeic. (1 Pet. 5:8) Tro la aqane waiewekë ne la itre atre ne fen göi loi me ngazo, me göne la qane la mel, a ajojezi së. Nge tro sa nyiqane luelu göne la itre ini hna hamën hnei Tusi Hmitrötr. Tro la itre ka hamë ini me itre xan a qaja ka hape, ame la mekuna i angatr ke, ka sisitria kö hune la hna qaja hnei itre xan. Ngo ame la itre mekune cili, ke “hmo lai koi Akötresie.”​—1 Kor. 3:​18-20.

9. Nemene la nyine tro eö a kuca matre tro pala hi a atreine thelewekë?

⁹ Qëmeken troa ini, kuca jë la: Loi e xecie koi eö ka hape, ka nyipici la hna qaja hnei Tusi Hmitrötr qëmeken tro eö a nyiqane ini. Hnyinge jë ka hape: ‘Hnauëne la eni a lapaun koi Akötresie? Nemene la ka amaman ka hape, Trengewekë i Nyidrë la Tusi Hmitrötr? Nemene la ka amaman ka hape, ka sisitria kö la mekuna i Akötresie göi loi me ngazo hune la hna qaja hnei fen?’ Ketre, mekune hmaca jë lo ijine eö a nyiqane ini: Maine jë, hna hane amenu eö hnene la aqane mekune i fen ngöne lo ijine cili. Hetre ka mejiune kowe la ini évolution, matre hapeu, hna hane kö ajojezi eö hnene la ini cili? Hapeu, hnei eö kö hna hane pi kuci ngazo tune la itre sine ini eö? Maine eö a mekun ka hape, hetre nyine tro pala kö a saze, tune kaa la aqane tro eö a acatrene la lapaune i eö? Isine jë matre tro pala hi a atreine thelewekë la eö a ini.​—2 Tim. 2:​16-18.b

10. Nemene la aqane tro pala hi eö a atreine thelewekë?

¹⁰ Ame la eö a ini, catre jë waipengöi eö. Hnyinge jë ka hape: ‘Kolo kö a ajojezi ni hnene la itre atr ka tha metrötrëne kö la itre trepene meköti Iehova? Canga mama kö koi ni la itre ini maine mekun ka pë alien? Xecie kö koi ni laka, Baselaia i Akötresie hmekuje hi la ka troa nyinyine la itre jole ne la atr?’ Catre jë inine la Tusi Hmitrötr, matre tro pala hi a atreine thelewekë. Maine tro eö a inine me lapa mekun la Tusi Hmitrötr, ke tro ha xecie koi eö laka, eö ngöne la nyipici.​—1 Tim. 4:​15.

HULIWANE HNYAWANE JË LA TRAEME I EÖ

11. Pine nemen matre nyipiewekë troa huliwane hnyawane la traeme i eö la eö a ini?

¹¹ Jol. Ame la ijine eö a examen maine hetre projet hna sa draine hi, ke tro lai a xome la traeme i eö. Maine tha huliwane hnyawane kö eö la traem, ke tro eö lai a stress me burn-out. Matre nyipiewekë troa xomi ijine mina fe troa thupëne la mele i eö.

12. Nemene la itre huliwa laka, loi troa “huliwane hnyawane la traeme” i eö? (Efeso 5:​15, 16)

¹² E jë la Efeso 5:​15, 16. Tha ka hmaloi kö troa “huliwane hnyawane la traeme” së. Ngo loi e troa atreine tulu ewekë. Eje hi, ka nyipiewekë koi eö la itre ini. Ngo ka nyipiewekë catre kö la troa xomi ijine troa ce tro memine la itre trejin me fami i eö. (Sal. 133:1; It. Ed. 18:1) Nge the qaja pala ha la itre huliwa i Iehova, loi e tro itre ej a tro pa ngöne la mele i eö. (Mat. 6:​33) Maine jë, hetre hnëqa i eö ngöne la fami, nge hetre huliwa i eö fe. Ketre, nyipiewekë tro eö a meköle hnyawa me kuci spor, matre thupëne la mele i eö. (A. Cai. 4:6; 1 Tim. 4:8) Maine aja i eö troa eatrëne lai, ke loi e troa huliwane hnyawane la traeme i eö.

13. Tune kaa la aqane tro eö a huliwane hnyawane la traeme i eö?

¹³ Qëmeken troa ini, kuca jë la: Öni Tusi Hmitrötr ka hape, troa eatr la huliwa e hna eköthe hnyawan. (It. Ed. 21:5) Matre kuca jë la ketre porogaram ka hmaloi qëmeken tro eö a nyiqane ini. Mekune hmaca jë lo eö a ini matre xatua eö: Hnei eö kö hna huliwane hnyawane la traeme i eö? Maine eö a mekun ka hape, hetre nyine troa saze, nemene la nyine tro eö a kuca enehila? Isine jë troa huliwane hnyawane la traeme i eö, ngo the nue eje pi kö troa musinë eö.c

14. Nemene la itre hnying ka troa xatua eö troa waipengöi eö?

¹⁴ Ame la eö a ini, catre jë waipengöi eö. Hnyinge jë ka hape: ‘Ame ngöne la porogarameng, ke hetre ijinenge kö troa mano maine kuci spor? Kolo kö a aijijë ni troa ce tro memine la itre trejin? Eni kö a afenesine la itre qang ngöne la hawa hna sa? Maine tha eje kö, ke hnene laka, tru la itre jol nyine kuca, maine eni pena a uthe lapan. Nemene la mekuna ne la itre sineeng me faming?’ Maine eö a mekun troa saze la porogaram, maine kuca hnyawane la itre huliwa, ke canga kuca jë. Nge sipo ixatua jë kowe la itre atr ka atreine huliwane hnyawane la traeme i angatr.​—It. Ed. 11:14.

CATRE JË “CE TRO ME ITRE KA INAMACAN”

15. Nemene la hna troa kuca hnene la itre xaa sine ini eö, nge pine nemen matre loi e tro eö a hmek?

¹⁵ Jol. Tro la itre sine ini eö a hë eö troa ce madrine me angatr. Maine jë tro eö a pi ce tro me angatr, ke casi hi la macatre i epun, me klas, nge casi hi la hnei epun hna pi kuca. Ame koi eö, ceitu eö hi me angatr, ngo tha tune kö la itre trejin ne la ekalesia. Nyipiewekë tro eö a hmek. Ngacama casi hi la klas i epun, ngo isapengöi eö kö me angatr. Ame la aja i eö, ke troa amadrinë Iehova, nge tha celë kö aja i angatr. E tro eö a ce tro lapa me angatr, ke tro hë eö lai a nyiqane xome la aqane waiewekë i angatr. (1 Kor. 15:33) Hnei Michael, hna kuci formasio ngöne tirisite göi 4 lao macatre. Öni angeic, “Ame ngöne la wiik, traqa koi 40 lao hawa ne ce lapa ni memine la itre sine huliwang. Angatr a qeje ka sis, me drenge la itre miuzik laka, tha nyine tro kö la itre Temoë a dreng, nge tha angatre kö a metrötrëne la itre föe. Matre ame hë koi ni, tha ka ngazo kö la itre hnei angatr hna qaja me kuca.”

16. Kola hapeu la troa “ce tro me itre ka inamacan”? (Itre Edromë 13:20)

¹⁶ E jë la Itre Edromë 13:20. Tusi Hmitrötr a hmekë së göne la itre sinatro ka ngazo. Ngo, “ame la atre ce tro me itre ka inamacan, ke tro ha inamacan.” Ame la ini koi së ke, tro la itre atr hne së hna iën troa ce tro memin a uku së troa kuca la loi maine ngazo. Haawe, iëne jë troa nyisineen la itre atr ka tui eö, ka nyihlue i Iehova memine la hni ka pexej.​—Sal. 101:​6, 7; 119:63.

17. Tune kaa la aqane tro eö a neën la itre sinatro ka ngazo?

¹⁷ Qëmeken troa ini, kuca jë la: Pane mekune jë la aqane tro eö a ce tro memine la itre sine ini eö, nge ami ifego jë. Öni Trenton, ketre Temoë Iehova ka hape: “Eni a porotrik memine la itre xaa sine ining, ngo thupene la ini, tha eni kö a ce tro me angatr. Ame koi ni, itre sine ininge hi angatr, ngo tha itre sineeng kö.” Nemene fe la itre ifego hnei eö hna troa acil? Mekune hmaca jë lo eö a ini matre xatua eö: Nemene la itre ifego hnei eö hna acil ekö? Maine eö a mekun ka hape, hetre nyine tro pala kö eö a saze, nemene la nyine tro eö a kuca? Isine jë troa “ce tro me itre ka inamacan” me ananyine la itre ka tha nyihlue i Iehova.d

18. Nemene la itre hnying nyine tro eö a hnyingën? (Wange ju fe la foto.)

¹⁸ Ame la eö a ini, catre jë waipengöi eö. Hnyinge jë ka hape: ‘Eni kö a nyiqane ce tro lapa memine la itre xaa sine ining? Eni kö a ithanata, me mekun maine ujë tui angatr? Nemene la mekuna i Iehova göne la imelekeung me angatr?’ (Sal. 1:1) Maine eö a öhne ka hape, hetre nyine tro eö a saze, ke canga kuca jë. Thele jë la itre sinee ka hnimi Iehova, tui eö. Nge the cile kö troa qeje Nyidrë kowe la itre xaa sine ini eö. Eö hi la ka ijij troa xatua angatr troa atre la nyipici.

HNËKË JË

19. Tune kaa la aqane tro eö a hnëkë matre cile kowe la itre jol ngöne la hna ini? Qaja jë la ketre ceitun.

¹⁹ Nyipiewekë tro la atr ka eli wetr a pane hnëkë qëmeken troa tro. Thatre kö angeic la itre jol ka troa traqa, ngo angeic a thupën matre troa egöcatr, me heetrën la itre iheetr ka ihmeku, me atre la götrane hnei angeic hna tro kow. Ketre tun, qëmeken me ngöne la ijin eö a ini, thele jë tro pala hi a acatren la lapaune i eö, nge “heetrëne asë jë la hna heetre ne isi qaathei Akötresie.” Ketre, isine jë troa eatrëne la objectif, tha ene kö la troa hetre mani me atre ka hlemu, ngo tro pe a kuca la nöjei ewekë asë, nyine atrunyi Akötresie.​—Efe. 6:​11-13; 1 Kor. 9:​26, 27; 10:31.

20. Tune kaa la aqane tro eö a ‘isa tupathe ka hape, eö kö ngöne la lapaun’?

²⁰ Öni Tusi Hmitrötr: “The mano kö nyipunie isa tupathe ka hape, nyipunieti kö ngöne la lapaun. Nge catre jë isa waipengöi nyipunie.” (2 Kor. 13:5) Trongëne jë la eamo celë la eö a ini. Waipengöi eö jë ngöne la 4 lao götrane ne së hna ce wang ngöne la tane mekune celë. Hapeu, eö kö a kuca la itre hna majemin ka loi ngöne la huliwa i Iehova? Eö kö a atreine thelewekë, me öhne laka, ka tria la inamacane i fen? Eö kö a huliwane hnyawane la traeme i eö? Eö kö a acatrene la imelekeu i eö memine la itre xaa trejin, me nuetrij la itre sinatro ka ngazo? Itre hnyinge la nyine tro eö a lapa mekun la eö a ini, maine huliwa, maine ngöne la itre xaa ewekë. Isine jë troa acatrene la lapaune i eö, ngöne la nöjei götrane la mele i eö. Nge loi e xecie koi eö laka, tro kö Iehova a amanathithine la itre trengecatre i eö.​—It. Ed. 3:​5, 6.