“Edrö Së Qaathei Iehova La Itre Nekönatr”

KOLA hapeu koi së la hna hape, “edrö”? Ma easa meku mani, maine hnepadro, maine uma, maine ketre mo hna hamë së hnene la ketre sinee së. Easa wangatrune me thupëne hnyawan la edrö hna hamë së.

Öni Tusi Hmitrötr, “Edrö së qaathei Iehova la itre nekönatr.” (Sal. 127:3) Ame kowe la itre keme me thin ka hmi, ketre ahnahna ka tru qaathei Iehova la itre nekö i angatr. Matre angatr a isine troa thupë nyudren, me hamë nyudren la ka nyipiewekë, me hnimi nyudren, me ini nyudren la itre jë i Iehova.

Ngazo pe, ame la itre xaa keme me thin, tha angatre kö a wangatrun me hnim la itre nekö i angatr. (Isa. 49:15; 2 Tim. 3:1-3) Ame pena la itre xan, tru catr la aja i angatr troa thupëne la itre nekö i angatr, ngo thatre kö angatr la aqane troa kuca. Nemene la ka ajolë angatr? Nemene la hnei Iehova hna ajan tro la itre keme me thin ka hmi a kuca? Nge nemene la aqane tro la itre keme me thin a hiane hnyawan la itre nekö i angatr?

ITRE JOL

• Kola iuku hnei fami me itre sinee. Ame ngöne la itre xaa nöj, kola metrötrëne la itre keme me thine ka tru hnei nekönatr. Ame itre xaa ijin, itre fami me itre sinee a iuku matre tro la lue trefën a hnaho atrun, ngacama tha ijiji nyidroti kö troa thupë nyudren asë.

• Kola seseu göne la itre drai elany. Ame ngöne la itre xaa nöj, itre nekönatr a mecitretr, ke pëkö xen, tru hnei sine mec, nge pëkö droketre. Matre itre trefën a hnaho atrun, ke e meci jë la ketre, hetre itre xan pala kö. Nge ame la itre xaa trefën, angatr a hnaho atrun, göne hi matre troa thupë nyidro elanyi hnene la ketre nekö i nyidro. Celë hi ka traqa ngöne la itre nöj laka, pëkö ixatua i mus kowe la itre qatr.

• Contraception. Ame ngöne la itre xaa nöj, pëkö contraceptions. Ketre, ame la itre xaa trefën ka hetreny, ke xou angatre fe troa fetra la itre xaa mec. Nge ka tru thupene pala ha kowe la itre xaa trefën.a

NEMENE LA HNEI IEHOVA HNA AJAN TRO LA ITRE KEME ME THIN A KUCA?

Loi e troa hetrenyi la ka nyipiewekë kowe la itre nekö i epun. Hnei Iehova hna up la itre keme me thin troa thupëne la itre nekö i angatr ka co (Itre ka tha sasaithe pala kö la 18 lao macatre). Aja i Nyidrë tro angatr a hetre uma thatraqane la itre nekö i angatr asë, me thua i nyudren me heetrë nyudren. Matre ame la itre keme me thine ka hmi, tha angatre kö a up la itre nekö i angatr ka adolescent troa lapa internat, ngo angatre pe a isine matre tro kö nyudren a lapa e kuhu hnalapa, matre tro angatr a ini, me hnimi nyudren. Ame la itre nekönatr hna hian hnei keme me thin, tingeting la hni nyudren ke, drenge hi nyudren la ihnimi kaka me nenë. Eje hi, ka itrotrohni Iehova, matre tha Nyidrëti kö a up la itre keme me thin troa trenamo. Ame ekö, hnei Nyidrë hna up la lue trefën ka pë ewekë, ngo ka catre huliwa, troa hian la nekö hnimina i Nyidrë.—Mat. 13:55, 56; Luka 2:24.

Tusi Hmitrötr: “Haawe, maine tha pane thupëne kö ketre la itre atrene la hnalapa i angeic, me itre xa sine la madra i angeic, angeice hi lai a xelene la lapaun, nge tru catre kö la ngazo i angeic hune la atre ka pë lapaun.”—1 Tim. 5:8.

Atre hi Iehova laka, ame la kola utipië la itre keme me thin, nyipiewekë troa xatua angatr. Ame la ketre aqane tro la itre nekönatr a metrötrëne la itre keme me thin, ke ene la troa thupë angatr hnyawa. (Eso. 20:12; 1 Tim. 5:4) Ngo Iehova a madrin la itre keme me thin a sikusikune la itre nekö i angatr, hune la troa sikusikun la aqane tro la itre nekönatr a thupë angatr elany.—2 Kor. 12:14.

Inine jë la itre nekönatr troa atre Iehova. Hnëqa ne la itre keme me thin troa inine la nekönatr la pengöi Iehova, matre tro nyudren a hnim me nyihlue i Nyidrë. Ame koi Iehova, ka nyipiewekë catre lai la itre keme me thin a hamë ini kowe la itre nekönatr.—Dreut. 6:6, 7.

Tusi Hmitrötr: ‘Hiane jë pe la itre nekö i epun ngöne la itre ihaji me itre ini qaathei Iehova.’—Efe. 6:4.

AJA I IEHOVA TRO EÖ A MADRIN

Troa pane mekune hnyawan. Maine epon a mekun troa hnaho, waipengöi epon hnyawa jë. Hapeu, ijiji epon kö troa thuan, me heetrën, me inin la itre nekönatr, e ka alanyim? Maine waea, acone ju hi la etrune la itre nekönatr, matre ijiji epun troa hnimi nyudreni asë me thupë nyudren thenge la aja i Iehova. Atre hi Iehova laka, kola traqa koi së asë la itre ewekë ka iasesëkötrë. (A. Cai. 9:11) Ngo tro kö Nyidrëti a amanathithine la itre trengecatr hnei epuni hna nu troa hiane la itre nekö i epun.

Tusi Hmitrötr: “Nyipici laka, troa eatre la itre mekuna ne la atr ka akötrehnine la huliwa, ngo troa pë ewekë la atr ka canga sesë, nge tha hna pane mekune kö la aqane troa kuca.”—It. Ed. 21:5.

“Drei e nyipunie la ka pi xupi uma nge tha tro kö angeic a pane lapa, me mekune hnyawa la thupen me wang ka hape, ijiji angeice kö troa afenesine la uma?”—Luka 14:28.

Amë panë Iehova jë. Loi e troa tro pa ngöne la mele ne la fami la hmi i Iehova. E hetre nekö i epuni hë, isine jë troa acian e kuhu hni i nyudren la ihnim koi Iehova. Xatua nyudreni jë troa drenge hnyawa ngöne ijine icasikeu me xomi ini. Nyipiewekë troa hmi ne la fami e nöjei wiik. Ini nyudreni jë la aqane troa cainöj. The upe kö kowe la itre nekö i epun ka tru maine kowe la ketre atrene la fami troa kuca la itre ewekë cili. Hnëqa i epuni lai! Nyipici laka, tro epuni a nue ijin me trengecatr troa hian la itre nekö i epun, ngo tro kö epuni a kepe thangan elany.

Tusi Hmitrötr: “Pëkö madrinenge ka tru hune la: ene la troa drenge ka hape, itre neköng a catre trongëne la nyipici.”—3 Ioane 4.b

Mejiune jë koi Iehova. Maine epuni a ajan troa hetre nekönatr, maine hetre nekö i epuni hë, loi e troa sisitria la itre trepene meköti Iehova hune la itre hna majemin ngöne la nöje i epun.

Maine ase hë epuni axeciën laka, tha tro kö a hnaho atrun, the luelu kö laka, tro kö Iehova a thupë epun elany la epuni a qatr. The drei itre xane kö me mekun laka, troa hetre nekönatr matre tro nyudreni a thupë epun elany. Tha tro kö a nuetriji epun. Ase hë Iehova qaja ka hape, tro Nyidrëti a thupë epun, nge thatreine kö Nyidrëti thoi.—Ios. 23:14.

Tusi Hmitrötr: “Mejiune ju koi Iehova hnene la hni i ö ka pexej, nge the lapa qale kö kowe la sipu inamacane i ö. Meku nyidrëti jë ngöne la itre huliwa nyine tro eö a kuca, nge tro pena nyidrëti a amekötine la itre jë i ö.”—It. Ed. 3:5, 6.

“Nekö trahmanyi ni ekö, nge qatr hë ni enehila, ngo tha ase kö ni öhne la kola nuetrije la atr ka meköt, me kola thele xen la itre nekö i angeic.”—Sal. 37:25.

“Celë hi matre, thele panëne jë la Baselaia memine la thiina ka meköt i nyidrë, nge troa hamë nyipunie la nöjei ewekë asë cili.”—Mat. 6:33.

Itre ahnahna qaathei Iehova la itre nekönatr. Iehova a madrin la itre keme me thin a thupën la itre nekö i angatr thenge la aja i Nyidrë! Angatr a thua i nyudren, me hnimi nyudren, me xatua nyudren troa atre Iehova. Angatr a mekune hnyawa la etrun la itre nekönatr hna troa hnahon, ngo tha angatre kö a xötrethenge la itre qenenöj me itre hna majemin kuca ngöne la itre nöje i angatr. Aqane tro hi la itre keme me thine lai a amamane laka, itre ahnahna la itre nekönatr, “edrö qaathei Iehova.”