Itre Hnyinge Ne La Itre Ka e

Eu la tro la itre nöj a sue ka hape, “Tingetinge hë nge pë hë hna mecin”?

Tune la hna qaja ngöne la ketre “Itre Hnyinge Ne La Itre Ka e” ka mama ngöne la ketre Ita Ne Thup,a tro Iehova a amë ngöne la hni ne la “treene lao jian” (ene lo itre politik) la “aja” i Nyidrë, ene la tro angatr a hamën la mus me mene i angatr kowe la “öni ka ses ka madra palulu,” lo ONU. Hna hëne fe la öni cili ka hape, “hnasaatr ne la öni ka ses.” (Hna Am. 13:14, 15; 17:3, 16, 17) E thupen, tro “la treene lao jian” memine la öni ka kapa la mus, a lep apatren la itre hmi ka thoi. Hapeu, tro kö la itre nöj a suen la maca “Tingetinge hë nge pë hë hna mecin”b qëmeken maine thupen la kola apatren la hmi ka thoi.—1 Thes. 5:3.

Thatre kö së la ijin troa suen ka hape, “Tingetinge hë nge pë hë hna mecin.” Maine atre ju së la ijin maine aqane trongen la itre ewekë, tha tro kö sa hmek. Ngo anyimua upi easë hnei Iesu troa “hmek.” (Mat. 24:42; 25:13; 26:41) Ame enehila, tro pena sa ithanatan lo hna perofetan hnei Iehova jëne Paulo aposetolo.

Öni Paulo: “E qaja ha angatre ka hape: ‘Tingetinge hë nge pë hë hna mecin!’ tro ha aca tro traqa koi angatre la itre akötre ka tru.” (1 Thes. 5:2, 3) Qaan ekö, easa qaja ka hape, tro ha suen ka hape, “Tingetinge hë nge pë hë hna mecin” qëmeken troa traqa la akötr atraqatr, ka troa nyiqaane la kola lepi Babulona Atraqatr, ene la nöjei hmi ka thoi. Celë hi hatren tixenuë ka amaman ka hape, kolo ha nyiqaane la akötr atraqatr.

Ngo hne huni hna wange hmaca la ini celë, nge ma hetre ketre aqane troa trotrohnin. Maine jë, troa suen ka hape, “Tingetinge hë nge pë hë hna mecin” thupen la kola apatren la itre hmi ka thoi. Pine nemene matre easa qaja lai? Tro sa ce wang la itre xaa hnying.

Hapeu, hmi ka thoi la atrekë zön la itre isi ngöne la fen? Öni Tusi Hmitrötr: “Hna öhne thei angeic [“föe ne gojeny ka hlemu catr,” Babulona Atraqatr] la madra ne la . . . ange ka hmitrötr, me nöjei hna humuth e cailo fen.” (Hna Am. 17:1, 5; 18:24) Qaan ekö, hnene la föe ne gojeny hna ukun la itre nöj troa isi, me ukun la itre atr troa imethinë. Matre zöi angeic la itre isi me iakötrë, pëkö tingeting hnei angeic hna hamën. Matre loi e tro sa hnying ka hape: Tro kö la itre nöj a sue ka hape, “Tingetinge hë nge pë hë hna mecin” thupen la kola apatrenyi Babulona Atraqatr? Thatre kö së.

Nemene la ewekë ka troa traqa thupen la kola sue ka hape, “Tingetinge hë nge pë hë hna mecin”? Öni Paulo: “Tro ha aca tro traqa koi angatre la itre akötre ka tru.” (1 Thes. 5:3) Önine la ithuemacany qene Wiwi ngöne la xötr ka hape: “Paulo a amaman e celë laka, thupene ju hi la kola sue ka hape, ‘Tingetinge hë nge pë hë hna mecin,’ ke kolo fe hë a lep apatren la itre ka suen la maca cili. Troa asesëkötrë angatr nge pëkö jë ne kötr.” Maine tro la itre politik a sue ka hape, “Tingetinge hë nge pë hë hna mecin” thupen la kola apatren la itre hmi ka thoi, haawe tro la itre atr a sesëkötr la kola lep apatrene fe la itre politik.

Tune kaa la aqane tro la itre hlue i Iehova a ujë ngöne la ijine cili? Öni Paulo: “Ange trejin, tha nyipunieti kö ngöne la jidr, matre tha tro kö la drai cili a asesëkötrë nyipunie, tune la aqane asesëkötrëne la atrekënö hnene la lai.” (1 Thes. 5:4) Pane mekune jë la: Maine kola sue ka hape, “Tingetinge hë nge pë hë hna mecin” thupen la kola apatren la itre hmi ka thoi, tro la itre hlue i Iehova a atre e cili laka, easenyi catre hë la ijin troa lep apatren la itre nöj. Ame pe, tro la itre nöj a sesëkötr, kösë kola traqa tun la atrekënö la ijine cili.

Nemene la hne së hna lapa treqen? Easenyi hë tro la “treene lao jian” memine la öni ka ses ka kapa la mus, a lep apatrene la hmi ka thoi. E cili hi la kola nyiqaane la akötr atraqatr. Atre hi së ka hape, troa traqa la ijin laka, tro la itre nöj a sue ka hape, “Tingetinge hë nge pë hë hna mecin.” Eu? Lue mekun hne së hna ce wang. Maine jë, troa suene lai qëmeken troa apatren la hmi ka thoi. Maine pena, troa suene lai thupen la itre politik a lep apatren la hmi ka thoi. Tro pë hë sa atre ngöne la ijin cili. Eje hi, easa trotrohnin la itre hna perofetan hnei Tusi Hmitrötr ngöne la kola eatr, maine thupen la kola eatr.—Wange ju fe la Ioane 12:16.

Ngo ame enehila, tha ka nyipiewekë kö troa atre la ijin troa sue ka hape, “Tingetinge hë nge pë hë hna mecin,” loi pe troa mele nyipici koi Akötresie. Loi e tro sa “hmek me atreine waiewekë,” matre hnëkë göne la itre ewekë ka troa traqa.—1 Thes. 5:6.