Hetrenyi Së La Itre Trenga Mo Ka Tru Alameken Nyine Troa Thawa
1 Nyimutre la itre ini ka sisitria catr e hnine la Tusi Hmitrötr, hne së hna hnin catrën. (Sal. 12:6; 119:11, 14) Ame ngöne la ketre ijin, hnei Iesu hna xome la itre ceitun ka amamane la itre götrane ka isapengön ne la Baselaia, nge thupene lai, hnei nyidrëti hna hnyingëne kowe la itretre drei nyidrë ka hape: “Hape u, trotrohninë hë nyipunie la nöjei ewekë asë cili?” Ame ngöne la angatr a sa ka hape trotrohnine hë angatr, öni Iesu jë hi: “Qa ngöne lai ame la ate cinyihanyi lo hna inine kowe la baselaia ne hnengödrai, te, tune la tene uma, kola jelë la nöjei ewekë ka hnyipixe me ka hekö qa ngöne la tenge nyi angeic.”—Mat. 13:1-52.
2 Ame lo itre nyipici qa hnin la Tusi Hmitrötr hne së hna xötrei inine ekö, tre, ijije troa goeëne itre ej kösë itre trenga mo ka hekö. Maine tro pala hi sa catre inine la itre ewekë ka jui ne la Wesi Ula i Akötresie, tro hë sa atre la itre xaa nyipici, laka, itre trenga mo ka hnyipixe koi së. (1 Kor. 2:7) Ketre, jëne “la hlue ka nyipici me ka inamacan,” ijije tro sa trotrohnine la itre trenga mo ka hnyipixe.—Mat. 24:45.
3 Easa wanga atrune catrëne la itre trenga mo celë ngöne la götrane la ua, ka hekö me ka hnyipixe. Haawe, kola uku së troa thele troa kapa la ini me maca, matre tro sa atreine hamë ini qa hnine la Wesi Ula i Akötresie ngöne la kola thawa koi itre xan la itre nyipici hne së hna inin.
4 Loi e Tro Sa Xomi Ini Qa Ngöne La Tulu i Iesu: Hnei Iesu hna amamane la aqane hnine catrëne nyidrë la itre trenga mo cili, hnene la hna catre thawa itre ej koi itre xan. Ketre, thaa hna sewe nyidrëti hnene la kucakuca troa tro fë la itre trenga mo qa hnine la “uma” i nyidrë.—Ioane 4:6-14.
5 Hna uku Iesu hnene la ihnimi nyidrë kowe la itre ka pë ewekë ngöne la götrane la ua, troa thawa la itre trenga mo, lo trenge nyipici Akötresie ka iamele. (Sal. 72:13) Nyidrëti a utipine la itre atr ka mecijine ngöne la ua, ewekë lai ka upi nyidrë troa “ini angate la nöjei ewekë ka nyimute.”—Mar. 6:34.
6 Loi e Tro Sa Nyitipu Iesu: Tro hë sa tui Iesu e hne së hna hnine catrëne la itre trenga mo hne së hna hetreny, haawe, tro hë sa catre troa amamane mekötine kowe la itre atr la itre trenga mo cili qa hnine la Tusi Hmitrötr. (Ite edomë 2:1-5) Ngacama ame itre xaa ijin, easa kucakuca, ngo loi e tro pala hi sa thawa la trenge nyipici qa hnine la Tusi Hmitrötr, cememine la madrine ka qa kuhu hni. (Mak. 6:34) Tro ha uku së hnene la hni ne ole së kowe la itre trenga mo ka eje the së, troa akökötrene la huliwa ne cainöje së, me thele pala hi troa catre cainöj.