Hnëkëne Jë La Itre Ka Xötrei Ini Tus Troa Cile Kowe La Icilekeu
1 Ame la itre atr ka nyiqaane ini Tusi Hmitrötr nge ‘ka ajane troa lapa fë la thiina ka ijiji Akötresie,’ tre, angatre hi la itre hna pane tupath hnei Satana. (2 Tim. 3:12) Ijije troa tupathi angatr hnene la itre sine huliwa, me sine ini, maine itre atre lapa ezi angatr. Ngo troa jole catre koi angatr, e tro la sipu hnepe lapa i angatr a icilekeu memine la itre ka xötrei atre la nyipici.—Mat. 10:21; Mar. 3:21.
2 Hna Thingehnaeane Hë La Icilekeu: Nyipi ewekë tro la itre ka xötrei atre la nyipici a trotrohnine laka, troa axösisi angatr, ke, celë hi ewekë lai ka amamane ka hape, itre nyipi hlue i Keriso angatr. (Ioane 15:20) Ame ngöne la itre xaa ijin, maine jë kola tupathi së hnene laka, hna lapa xomi angatre hnene la itre mekune ka thoi göne la Itretre Anyipicine i Iehova. Loi e tro sa lapa mekune hnyawa laka, ketre manathithi ka tru la troa ahmahmanyi së, hnene laka easa xötrethenge Iesu me drengethenge Akötresie. (Ite hu. 5:27-29, 40, 41) Loi e tro sa akeukawane la hni ne la itre ka xötrei atre la nyipici laka, tro pala hi Iehova a xatua angatr cememine la ihnim. (Sal. 27:10; Mar. 10:29, 30) Maine troa pë ethan la mele i angatr, haawe, angatre hi lai a sajuëne la musi cile i Iehova e koho hnengödrai me e celë fen.—Ite edomë 27:11.
3 Hnëqa Ne La Nyipi Atrehmekun: Amamane jë kowe la itre ka ini Tusi me epun la enyipiewekëne la troa kapa pala hi la nyipi atrehmekun, ngacama angatr a cile kowe la itre icilekeu. Jëne la icilekeu, Satana a thele troa sawa la itre ini hnei angatre hna kapa matre thaa tro kö itre ej a cia e kuhu hni angatr. (Ite edomë 4:23; Luka 8:13) Nyipi ewekë tro pala hi a kapa la nyipi atrehmekune ne la Wesi Ula i Akötresie, göne matre troa nyi wane me acatrene la lapaun.—Sal. 1:2, 3; Kol. 2:6, 7.
4 Nyipi Ewekë Troa Xomihni Ahoeany: Ame ngöne la itre itupath, ka nyipi ewekë catre la troa xomihni ahoeany, ke, ijije tro ej a wa wene ka loi. (Luka 21:16-19) Maine tro la itre ka xötrei ini Tus a xomihni ahoeany, haawe, tro hë angatr a isa kepe thangan, memine la itre xane fe. Angatre a melëne hnyawa la atreine i Iehova troa anyimua amanathithine atrune la itre ka catre xomihni ahoeany.—Iako. 1:12.
5 Kola madrine hnei Paulo aposetolo hnene laka, kola kökötre la itre trejine me angeice e Thesalonika. Hnei angeice hna olene koi Akötresie göi angatr, ene lo itre hnei angeice hna xatuane ngöne la nyipici. (2 Thes. 1:3-5) Ketre tu së mina fe, ijije tro sa hane melëne la madrine cili, e hne së hna hnëkëne hnyawa la itre ka ini Tusi me easë, troa cile kowe la itupath me xomihni ahoeany.