Eni a Nue Iehova Troa Ini Ni

Eni a sesëkötr la eni a goeëne la itre ewekë xötreithi ni. Ngo ame kö la ka ketri ni, ke ene la itre atr. Casi pala hi la huliwa hna kuca hnene la itre trejin nekö trahmanyi me jajiny. Nge ngacama pëkö ka öhne la huliwa hnei angatr hna kuca, ngo ka madrine pala hi angatr. Hnenge hna inin e cili la aqane troa ipië la easa nyihlue i Akötresie.

Ame ngöne la itre macatre thupen, hnei Iehova hna xatua ni troa maca ngöne la huliwa i Nyidrë. Ngo qëmekene lai, eni a pi qaja koi epun la hnenge hna kuca matre troa atre la nyipici, lo eni pala kö a bouddhiste.

ENI A THELE AKÖTRESIE LO CO PALA KÖ NI

Hna hnaho ni e Chicago (Etazini), nge hnenge hna tru e cili. Ala 4 eahun, nge eni la ka tru. Hnei kaka me nenë hna fek qaa Japon a tro Chicago, ke öni nyidro ka hape, ka lolo kö la mel e Etazini. Aja i nyidro tro la itre neköi nyidro a ini hnyawa, me hetre mel ka loi.

Lue ka hmi bouddhiste catre kaka me nenë. Hna hetru nenë ngöne la ketre uma laka, hetre hnë hmi koi Bouddha e kuhu hnin. Ame la kem memine la lue xa i eahlo, ke ka moine. Matre ka nyipiewekë catr la hmi cili ngöne la fami i eahun. Ame la pane ewekë hnenge hna kuca la eni a bëek qa hna ini, ke troa dreu ka pui loi me huujë lais me tim koi Bouddha. E nöjei sabath, eahuni a tro kowe la uma hmitrötr troa nyimane gufane la itre nyima kowe la ketre hnasaatr. Casi hi ej memine lo hnasaatre i eahun e koilo hnalapa, ngo ka tru pe nge hna pele goolën.

Eni a mekune hmaca lo eni a 7 lao macatre, nge eni a goeën lai hnasaatr e koilo hnalapa. Eni a ketre hnying ka hape, ‘Nemene la ka troa traqa koi ni e meci hë ni?’ Hna ini ni ngöne la hmi bouddhiste ka hape, tro pala kö a mele la ung. Eni e cili a trotrohnin ka hape, ngöne la ketre ijin tro hë ni a patr. Nyipici laka, tro pala hi a mele la ung, ngo tha tro hmaca kö ni a madrin tune la itre atr. Ame la eni a atre lai, ke hleuhleu pi ni!

Ame la eni a 15 lao macatre, eni a öhn laka, ame lo itre hnei eahun hna majemine kuca ngöne la hmi bouddhiste, ke ka pëkö alien. Nge ketre pëkö aliene la meleng. (Mat. 5:3) Ka xecie koi ni laka, hetre Akötresie ka mel nge ka tru trenge men. Eni a pi atre Nyidrë, matre hnenge hna itöne la ketre Tusi Hmitrötr (la Version du roi Jacques), ke ma celë hi lai ka troa xatua ni troa atrepengöi Nyidrëti hnyawa. Nge atre fe hi epun ka hapeu, hnenge hna itön la Tusi Hmitrötre cili ngöne la ketre ijine feet ne la itre bouddhiste!

Ame lo ketre ijin, eni a ngenu memine la kuling, nge hna traqa koi ni hnene la ketre trejin trahmany, Wilson Bashou la ëjen. Nge 17 lao macatreng la ijine cili. Hnei nyidrëti hna hnyinge koi ni ka hape, “Atre fe kö eö la hnei Akötresie hna hnëkën kowe la itre drai elany?” E cili hi la nyio a nyiqaane porotrikë Tusi Hmitrötr. Hnei Wilson hna e la tusi Hna Amaman 17:1 me hnying ka hape, “Ame koi ö, nemene ‘la itre tim ka nyimutre’ hna lapa hun hnene la föe ne gojeny?” Pëkö ca hnenge hna atre. Matre hnei nyidrëti hna amamane la xötre 15 ka qaja ka hape, ame la itre tim cili, ke kola qaja la itre atr. Eni a haine laka, itre Temoë Iehova a qejepengöne la Tusi Hmitrötr jëne kö la Tusi Hmitrötr. Nge qëmeken tro Wilson a tro, hnei nyidrëti hna hamë ni la itus La vérité qui conduit à la vie éternelle. Nge celë hi ka saze la meleng.

Treen lao drai thupen, hnenge hna sine la ketre icasikeu ngöne la Uma Ne Baselaia.Tha thëthëhmine kö ni la aqane kepe ni e cili. Qaane ju hi lai, pëkö ca icasikeu hnenge hna trian. Nge e thupen, hnenge hna nyiqaane ini Tus me Wilson. Kola ketri ni hnene la itre hnenge hna inin matre ame itre xaa ijin, traqa jë kö koi 8 lao hawa ne ini Tusi nyio. Kaka me nenë a xou matre hnei nyidroti hna icilekeu me eni. Ngo ame la eni a catre ini Tus, eni a öhne ka hape, celë hi lai nyipi hmi. Matre hnenge hna xomi bapataiso lo 1983.

ENI A NUE LA UNIVERSITÉ TROA PIONIE

Ame lo ijine eni a xomi bapataiso, eni a ini ngöne la ketre université ka tru. Eni a ini matre troa droketre. Hnei kaka me nenë hna nu asë la hnei nyidroti hna hetreny, matre aijijë ni troa lö kowe la université cili. Maine ju, ijijinge hi troa sisedrëne la ining, ngo ajang troa hamën asë koi Iehova, me huliwa i Nyidrë drai ka pexej.

Öni kaka, “E tro eö a aret la université, eö a sa trengetreng!” Hleuhleu catre ni, nge thatre kö ni la nyine troa kuca. Hnime catre ni la keme me thineng, nge tha ajane kö ni troa akötrë nyidro. Matre, ame ngöne la hnenyipajidr eni a tro nyipine la kampus, me goeëne la itre wëtresij, me thith ka hape, “Iehova, xatua ni jë troa axecië mekun ka loi.” E thupen, hnenge hna nue la ini, matre hnei kaka hna helë ni qaa kuhu hnalapa. Hnenge hna hë Wilson me qaja koi nyidrë la ewekë ka traqa. Nge hnei nyidrëti hna hë ni kowe la hnalapa i nyidrë. Matre hnenge hna xomi kar memine la sine watrengeng kowe la hnalapa i nyidrë. Mekune pala hi ni la aqane tingetinge la hning la ijine cili. Xecie koi ni ka hape, mekune ka loi la hnenge hna xom.

Pëhë ka xomehnöthe la meleng matre ijijnge hë troa huliwa i Iehova drai ka pexej. Ame lo 1984, hnenge hna xome la huliwa ne pionie.

Ame lo eni a pionie, hnei Iehova hna xatua ni troa hetrenyi la itre thiina ka lolo, tune la troa cile hut. Ame ngöne la ketre ijin, nyimutre la itre jol ka sewe ni troa tro troa cainöj. Eni a dekurag, ke pëkö ka cainöj me eni lo hnaipajö, ngo hnenge kö hna tro. Thupene la lue hawa, hnenge hna tro troa wange la ketre vizit ngöne la ketre ibatima. Kucakuca catre ni, nge eni casi pena. Ketre, kösë kola troa mani. Matre, eni hë a pi aret. Ngo ame la eni a traqa ngöne la hnaaluen etaz, ixelë ju hi ni memine la ketre nekö trahmany qaa Philippines. Öning pena kö, “Ma tha tro kö angeice lai a pi drei ni.” Ngo ka tria la mekunang! Hnenge hna sipo angeic troa ini Tusi Hmitrötr, nge hnei angeic hna kapa. Ame enehila, ketre trejine hë angeic.

IEHOVA A INI NI NGÖNE LA BETHELA E BROOKLYN

Ame lo 1985, lo eni pala kö a lapa thei Wilson, hna hë ni troa huliwa ngöne la Bethela e Brooklyn. Tune lo hnenge hna qaja ngöne la qaan, hna upi ni troa huliwa ngöne la atelier hnë ca itus. Ame lo ketre drai, hnenge hna huliwane la ketre masin ka fejan la itre tan ngöne la itre icetrön ne itus. Ngo hetre hnenge hna ketr, matre hna ngazo la itre xaa icetrön. Hna upi ni troa thuemacanyine la ka elemeken. Hnenge hna qaja asë koi nyidrë la kepin matre ngazo jë la itre itus. Ngo casi hi, tha ase kö ni qeje menu. Matre hnene la ka elemeken hna ithanata hnyawa koi ni, me ithuecatr koi ni ka hape, ka nyipiewekë tro pala hi a qeje menu. Eni a öhn e cili ka hape, loi e tro ni a inin troa qaja amamane la itre triang, me qeje menu.

Hnenge hna trotrohnine la alien la troa nyihluene la itre xan, la eni a goeën la aqane ujë ne la itre qatr ka huliwa ngöne la Bethela qaan ekö. Ame ngöne la ijine xen, hnei trejin Milton Henschel, ketre atrene la Lapa Ne Xomi Meköt, hna lapa ngöne la laulau i eahun. Ame la drai cili, tru hnei atr ka xen, matre tru catr la huliwa ne la itre trejin ka serveur. Ame ngöne la laulau i eahun, eni me itre xaa nekö trahmanyi a eetr, ke hmitre pala ha la xen. Pëkö hnei trejin Henschel hna qaja, ngo hnei nyidrëti hna cil me xatuane la itre serveur troa atë la tim, me falawa, me batra ngöne la itre laulau. Thatreine kö ni thëthëhmine la hna kuca hnei trejin Henschel ngöne la ijine cili. Ame la eni a goeë nyidrë, ke eni a meku Iesu, lo nyidrëti a wasine la waca ne la itre aposetolo.​—Ioa. 13:​3-5.

“HANE JË ININE QENE JAPONAIS!”

Ame lo 1987, hnenge hna tro Japon. Eni a haine la aqane catr me ipië ne la itre trejin e cili. Eni a pi ce cainöj me angatr, ngo thatreine kö ni qene japonais. Ame ngöne la Bethela, hnene la ketre trejine föe Michiko Oda hna goeë ni me hape, “Hane jë inine qene japonais!” Nge celë hi hnenge hna kuca. Tha mekune pi kö ni ka hape, tro la hnei eahlo hna qaja a saze la meleng.

Itre treu thupen, hnenge hna saze ekalesia, me tro kowe la ekalesia ka qene japonais e New York. Jëne la hnenge hna inine la qene japonais, hna fe la itre xaa qëhnelö ngöne la huliwa i Iehova. Ame lo 1989, hnenge hna sine la pane asabele katru qene japonais, e Los Angeles. Nge hnenge hna öhne la ketre nekö jajinyi ka pionie, Miwako Onami la ëjen, nge angeic a elo ngöne lo drame.

Hnenge me Miwako hna faipoipo lo 1992, nge hnei nyio hna ce huliwa ngöne la Bethela e Brooklyn. Ketre föe ka hmek, me ka hnime la itre xan, nge ka pi ixatua. Hnene la tulu i angeic hna ini ni la aqane troa loi thiina koi itre xan. Angeic la ketre ahnahna qaathei Iehova! E nöjei drai, angeic a hamë madrine koi ni, me ithuecatr.

BETHELA E JAPON ME PIONIE HUT

Ame e thupen, hna wezipo la kem me thine i Miwako ka mel e Japon. Ame lo 1999, hnene la organizasio hna aijijë nyio troa huliwa qa ngöne la Bethela e Japon, matre troa lapa ezi nyidro me thupë nyidro.

Hnene la fami ne la Bethela e Japon hna kepe nyio hnyawa, uti hë la nyio a majemi hnyawa koi angatr. Tru la itre ini hnenge hna kapa qaathene la itre trejin e Japon, itre ka ham me ka ikep. Itre ka huliwa catr angatr, nge ka huliwa hnyawa. Nge itre ka atreine ce huliwa. Ame la neköi atre Japon, tha angeic kö a huliwa cas matre troa pi mama, ngo angeice pe a ce huliwa me itre xan matre tro asë hi angatr a kepe thangan. Hnene la aqane ujë i angatr hna xatua ni troa ipië la eni a ce huliwa me itre xan, me atrehmekun laka, ame la hnenge hna kuca, ke ka co hi.

Ngo pine laka, isapengöi eni kö memine la itre trejin ne Japon, matre tha trotrohnine kö ni la aqane nyinyine angatr la itre jol. Hnenge hna inin troa atreine itreqe me xomihnine la itre trejin. E thupen, hnenge hna trotrohnine laka, ame asë hi la itre mekun hna xom thenge la itre hna amekötin hnene la organizasio, ke Iehova a amanathithin. Nyidrëti kö la ka aejën la itre projet.

Ame koi ni, ceitune hi la aqane ini ni hnei Iehova memine la aqane ini Mose ekö hnei Nyidrë. Ame ngöne la 40 lao macatre ne Mose a thupë mamoe, hnei Iehova hna xatua angeic troa ipië. Tui Mose, hnenge hna sine la itre ini ka tru. Nge hnene la itre ini cili matre eni a pi tru me mejiun kowe la sipu inamacaneng. Ngo hnene la Bethela hna ini ni troa ipië me mejiun koi Iehova. Tune la aqane ini Mose hnei Iehova, hnei Nyidrëti hna ini ni ngöne la itre macatre ka ase hë.

Hnei nyio hna thupëne la kem me thine i Miwako ngöne la 24 lao macatre, uti hë la nyidroti a mec. Ame ngöne la ijine cili, tha mano kö ho la telefon, nge nyio pala hi a seseu me tro pital. Ngazo catr la mec i Masako, thine i Miwako, nge thatreine hë eahlo cil. Jole catr koi eahlo troa sine la itre icasikeu me cainöje trootro. Itre wiik qëmeken tro eahlo a mec, hnei eahlo pë hë hna ti kaatr. Ngo ka catre pala hi la ihnim i eahlo koi Iehova. Ame la eahlo a qeje Nyidrë, ke kola ketrepengöne la iqëmeke i eahlo. Traqa ju hë la nöjei jol, ngo eahlo pala hi a catre nyihlue i Iehova me madrin. Hna ketri ni hnene la tulu i eahlo, nge eni a pi nyitipu eahlo.

Hetre ewekë ka saze ngöne la mele i nyio, lo 2024. Thupene la 30 lao macatre ngöne la Bethela, hna upi nyio troa pionie hut ngöne la hnapet e Okinawa. Ame ngöne la teritoare i eahun, hetre hnë lapa ne la itre soc, matre eahuni a madrin troa cainöj kowe la itre fami i angatr. Hnene la itre ini hnei nyio hna kapa ngöne la Bethela hna xatua nyio troa canga kapa la hnëqa ka hnyipixe celë. Nyio a isin troa hetre porogaram me huliwane hnyawane la traeme i nyio, ene la troa catre cainöj. Tru la ihnim i Iehova, matre hnei Nyidrëti hna hamë nyio la itre etud, nge kösë fami i nyio hë angatr. Trotrohnine hnyawa ha nyio enehila la enyipiewekën troa hnime la itre atr. E nöjei drai, eni me Miwako a olene koi Iehova la hnei Nyidrëti hna hamë nyio la huliwa ka hnyipixe celë.

TRO PALA HI NI A NUE IEHOVA TROA INI NI

Tha icilekeu hë la faming, ngo tha ka nyihlue i Iehova pala kö angatr. Ngo hnenge hna öhn la aqane eatr la hna thingehnaean hnei Iesu. Öni nyidrë, ame asë hi la itre ka nuetrije la fami i angatr matre troa xötrethenge nyidrë, ke tro angatr a kapa a 100 hmaca kö lao sinee. Eje hi, tro angatr a sine la ketre fami ka tru. (Mar. 10:​29, 30) Nge celë hi la hnenge hna öhn. Qaan ekö nge uti hë enehila, ala nyim la itre fami ngöne la fen asë ka xatua ni me hnimi ni.

Eje pala hi theng lo itus Vérité hnei Wilson hna hamë ni ekö. Ame la eni a goeëne la itusi cili, ke kola amekunë ni laka, hnei Iehova hna hnimi ni me ee ni koi Nyidrë. (1 Aq. Jo. 28:9) Eni pala hi enehila a nue Nyidrë troa ini ni, nge eni fe a xatuane la itre xan troa atre la nyipici ka troa hamë angatr la mel ka pë pun.