Xatuane Jë La Ka Ini Tus Troa Atrepengöi Iehova

1. Tune kaa eö la kola kökötr ngöne la nyipici hnene la ka ini Tus?

TUNE kaa eö la kola nyiqaane sine la itre icasikeu hnene la ka ini Tus me eö, me hamë mekun, me ce thawa me itre xan la hnei angeic hna inin, nge e thupen angeic a nue la mele i angeic koi Iehova? Drei jë kö la madrine i ö! Nyipici laka, Iehova la ka xatuane la itre ka ini Tus troa kuca la itre ewekë cili. Celë hi matre easa atrunyi Nyidrë, la kola kökötr ngöne la nyipici hnene la ka ini Tus.​—1 Kor. 3:​5-9; 3 Ioa. 3, 4.

2. Nemene la aja i Iehova kowe la itre ka ini Tusi Hmitrötr? (1 Timoteo 2:​3, 4)

² Aja i Akötresie “tro la nöjei pengön atr a . . . atrehmekune hnyawa la nyipici.” (E jë la 1 Timoteo 2:​3, 4.) Aja i Iehova tro la nöjei atr a atrepengöi Nyidrëti hnyawa memine la aja i Nyidrë. (Iere. 9:​24) Aja i Nyidrë tro sa atrehmekune hnyawa la nyipici. Kola hapeue lai? Önine la ketre bibliste, tha kolo kö a qaja la atr ka thel la itre ithuemacanyi göi Akötresie. Ngo kolo pe a qaja la atr ka thel troa atrepengöi Akötresie, nge ka “isine troa easenyi Nyidrë.” Celë hi hne së hna öhn. Ame la kola atre Iehova hnene la ka ini Tus, ke angeic a thele jën troa saze la aqane mele i angeic. Ketre, kola aijijë angeic troa hane hetrenyi la “mele ka pë pun.”​—Ioa. 17:3.

3. Nemene la itre hnying hne së hna troa ce wang ngöne la tane mekune celë?

³ Iehova a aijijë së troa kuca la huliwa ka sisitria, ene la troa xatuane la itre atr troa atrepengöi Nyidrë. Ame ngöne la tane mekune celë, tro sa ce wange la itre hnyinge celë: Pine nemen matre nyipiewekë tro la itre ka ini Tus a atrepengöi Iehova hnyawa? Tune kaa la aqane tro sa ini angatr la pengöi Nyidrë? Nge tune kaa la aqane tro sa xatua angatr troa trongën la itre ini hnei angatr hna kapa?

XATUA ANGEICE JË TROA ATREPENGÖI IEHOVA HNYAWA

4. Thenge la Mareko 12:​30, nemene la nyine tro sa kuca la easa ini Tus me ketre?

⁴ Öni Iesu, ame la wathebo ka tru, ke ene la “troa hnimi Iehova Akötresi eö hnene la hni eö ka pexej, me mele i eö ka pexej, me mekuna i eö ka pexej, me trenge catre i eö ka pexej.” (E jë la Mareko 12:30.) Tro la ka ini Tus a hnimi Iehova, e hnei angeic hna pane atre Nyidrë. Tha aja i easë kö tro la ka ini Tus a xomi bapataiso, ke angeic a pi nyi sinee së me itre xaa trejin, maine pine pena la ketre ini qa hnine la Tusi Hmitrötr. Ngo aja i easë tro angeic a xomi bapataiso, ke angeic a hnimi Iehova. Matre, ame la easa inine la ketre atr, loi e tro sa xatua angeic troa atrepengöi Iehova hnyawa me hnimi Nyidrë.

5. Nemene la hna troa kuca hnene la ka ini Tus, e ka tru la ihnim i angeic koi Iehova?

⁵ Ka ce tro la ihnim memine la idrengethenge. Maine tro la ka ini Tus a atre Iehova hnyawa me hnimi Nyidrë, tro hë angeice lai a drengethenge Nyidrë. Öni Iesu: “Matre tro la fen a atre laka, ka hnimi Kakati ni, eni hë a kuca la hnei Kakati hna amekötine koi ni.” (Ioa. 14:31) Tui Iesu, e tro la ka ini Tus a hnime catrë Iehova, tro angeice lai a dreng la itre hna amekötin hnei Iehova me mele nyipici.​—1 Ioa. 5:3.

6. Hnauëne laka tro la ka ini Tus a xomi mekun ka loi, e tro angeic a atrepengöi Iehova hnyawa? Qaja jë la ketre ceitun.

⁶ Maine tro la ka ini Tus a atrepengöi Iehova hnyawa, tro hë angeice lai a xomi mekun ka loi. Tro sa xome la ketre ceitun: Ame la atr ka pi inin troa xomi loto, ke tha tro kö angeic a goeëne hi la itre xan a xomi loto, maine e pena la itre itus ka qeje loto. Loi e tro angeic a xomi loto lapa matre atrein. Nge celë hi ka xatua angeic troa atre la nyine troa kuca, e traqa ju la ketre jol e cahu gojeny. Ketre tun, tro la ka ini Tus a atrepengöi Iehova hnyawa, jëne la hna ini Tus, ngo jëne mina fe la hna trongëne la itre hnei angeic hna inin. Eje hi, ame la angeic a öhne la itre thangan la hna trongëne la itre trepene meköt, ke angeice hi lai a atrepengöi Iehova hnyawa. E tro pala hi angeic a thele troa atre Iehova, me öhne la aqane xatua angeic hnei Nyidrë, ke tro angeice lai a axecië mekun ka loi ngöne la nöjei götran ne la mele i angeic.

7. Nemene la ka xatua Iosefa troa xomi mekun ka loi?

⁷ Pine laka atrepengöi Iehova hnyawa hi hnei Iosefa, matre tha ase kö angeic kei lo kola sipo ihanyi hnene la föi Potifara. Ame lo angeic a co, anyimua drenge hë angeic lo ewekë ka traqa koi Adramu me Eva, me Aberahama me Sara. (Gen. 2:​24; 20:​3, 6) Celë hi ka xatua angeic troa atre la mekuna i Iehova göne la faipoipo, memine la ce meköle trefën. Atrepengöi Iehova hnyawa ha hnei Iosefa, matre hnei angeic hna thipën la sipo ne la föi Potifara, me qaja ka hape: “Matre tro ni a kuca tune kaa la ngazo ka tru celë, me tria qëmekei Akötresie?” (Gen. 39:​7-9) Atre hi angeic la ka loi me ka ngazo qëmekei Iehova. Nge atre hi angeic la itre aqane ujë ka troa akötrë Nyidrë. Celë hi matre hnei angeic hna xomi mekun ka loi. Haawe, maine tro sa xatuane la itre ka ini Tus troa atrepengöi Iehova hnyawa, me atre la itre hnei Nyidrëti hna ajan, tro hë angatr a xomi mekun ka troa amadrinë Nyidrë.

INI ANGEICE JË LA PENGÖI IEHOVA

8. Tro sa huliwane tune kaa la itus Gojenyi Kowe La Nyipi Mel! matre xatuan la ka ini Tus troa atrepengöi Iehova?

⁸ Tune kaa la aqane tro eö a xatuan la ka ini Tus troa atrepengöi Iehova? Hnei Iehova hna xatua Iobu troa atrepengöi Nyidrë jëne la itre hnying. Traqa jë kö koi 50 lao hnyinge i Nyidrë! (Iobu 38:1–​41:34) Haawe, hnyinge jë fe së kowe la itre ka ini Tus me easë. Hna eköthe la itre hnying ngöne la itus Gojenyi Kowe La Nyipi Mel! matre xatuane la ka ini Tus troa atrepengöi Iehova hnyawa. (Wange ju la hna eköhagen “Troa Hamë Ini Jëne La Itre Hnying.”) Haawe huliwane jë la itre hnying matre xatuane la ka ini Tus troa atrepengöi Nyidrë.

9-10. (a) Nemene la ka xatuane la itre ka ini Tus me easë troa kepe thangan qa ngöne la hna e Tusi Hmitrötr? (Iakobo 5:​11) (b) Jëne la hna melën hnei Daniela, tune kaa la aqane tro la ka ini Tus a atre la hna ajan me hna xelen hnei Iehova?

⁹ Ame fe hë la easa nyiqane ini Tus me ketre, easa ithuecatr koi angeic troa e lapaane la Tusi Hmitrötr.a Tro sa xatua angeic tune kaa troa kepe thangan qa ngöne la hna e Tusi Hmitrötr? Ithuecatre jë koi angeic troa thel la kepin matre hnei Iehova hna amë la itre xötre cili hnine la Tusi Hmitrötr, memine la itre thiina i Nyidrë ka mama. Tro hë angeic a tui Iakobo. Hnei Iakobo hna qaja atrun la aqane cile hut i Iobu, ngo memine fe la itre thiina i Iehova, ene la nyipi menyik me utipin.​—E jë la Iakobo 5:​11.

¹⁰ Aja së tro la itre ka ini Tus a atre, jëne la itre hna melën e hnine la Tusi Hmitrötr, la hnei Iehova hna ajan memine la hnei Nyidrëti hna xelen. Maine tro la ka ini Tus me easë a goeën la götran “Aqane Troa Hetre Aja Matre Troa e La Tusi Hmitrötr” ngöne la itus Gojenyi Kowe La Nyipi Mel!, nge angeic a pi e la hna melën hnei Daniela ngöne la hnaope i liona, ke tro sa xatua angeic tune kaa? Ijije hi tro sa ithuecatr koi angeic troa hnying ka hape, ‘Pine nemen matre Iehova a amele Daniela? Nge tro lai a xatua ni tune kaa troa atre la ka amadrinë Iehova?’ (Dan. 6:​10, 22) Nge loi e tro fe angeic a hnying ka hape, ‘Nemen la ka traqa kowe la itre ka upezö Daniela? Nge kola xatua ni tune kaa troa atre la hna xel ma wang hnei Iehova?’ (Dan. 6:​4, 5, 24) Nge ithuecatre jë fe koi angeic troa thel la itre thiina i Iehova ka mama ngöne la hna melëne celë.​—Dan. 6:​26, 27.

11. Tune kaa la aqan tro epun a xatuane la ka ini Tus troa goeë Iehova tune la Atre ini angeic?

¹¹ Ame la itre ka ini Tus a kepe thangan ka loi qa ngöne la hna ini Tusi Hmitrötr, ke easa madrin. Ame pe, loi e tro sa qaja koi angatr ka hape, ame la itre thangan cili, ke qaathei Iehova, Atre Ini Ka Sisitria. (Isa. 30:​20, 21) Matre tune kaa la aqane tro sa ujë, e tro la ka ini Tus a olene kowe la itre ini hnei angeic hna kapa, maine qaja aloine pena la aqane hamë ini së? Ngacama pëkö engazon e tro angeic a qaja tun, ngo tha tro pi kö sa thëthëhmine laka, Iehova la nyine tro sa atrun, ke Nyidrëti la Atre Ini Ka Sisitria.

XATUA ANGEICE JË TROA TRONGËNE LA HNEI ANGEIC HNA ININ

12-13. Tune kaa la aqane tro epun a xatuane la ka ini Tus, e tha nyipi trotrohnine kö angeic la ketre hna melën e hnine la Tusi Hmitrötr? (Wange ju fe la foto.)

¹² Nyipiewekë tro la ka ini Tus a trongëne la hnei angeic hna inin göi Iehova, matre xatua angeic ngöne la mele i angeic. Matre tune kaa la aqane tro sa xatua angeic troa trongën la hnei angeic hna inin? Maine jol koi angeic troa trotrohnine la ketre hna melën e hnine la Tusi Hmitrötr, ke upi angeice jë troa mekun la itre hnei angeic hna atre göi Iehova. Pane mekune jë la: angeic a e la itre xötr ka qaja la aqane ameköti ewekë i Iehova, nge angeic a hnying ka hape: ‘Hnauëne la Iehova a humuth la itre xaa atr, nge Nyidrëti pe kö a amelene la itre xan?’ Tune kaa la aqane tro eö a xatua angeic?

¹³ Ijiji ö hi troa xatuane la ka ini Tus me eö troa mekune hmaca la hnei angeic hna atre göi Iehova, jëne la itre hnyinge celë: Tune kaa la aqane goeëne Iehova la mel? (2 Pet. 3:9) Nemene la hnei Nyidrëti hna kuca matre amele së, itre atr ka ngazo? (Efe. 2:​4, 5) Nyidrëti kö a amekötin la itre atr ngacama pëkö ewekë ka ngazo hnei angatr hna kuca? Nge hapeu, tro jë kö Nyidrëti a nyixölen la atr ka kuca la ngazo? (Eso. 34:​6, 7) Ame itre xaa ijin, tha Tusi Hmitrötr kö a qaja la kepin matre Iehova a kuca la ketre ewekë. Nge eje hi, tha nyipiewekë kö tro sa atre la itre ewekë cili. Atre hi easë la pengöi Iehova, matre xecie koi së laka, ka meköt pala hi la aqane ujë i Nyidrë.

14. Maine tro la ka ini Tus a xel ma wang la ketre trejin ngöne la ekalesia, nemene la aqane tro eö a xatua angeic?

¹⁴ Tro pena sa ce wang la ketre aqane tro sa xatuane la ka ini Tus troa trongën la hnei angeic hna inin. Pane mekune jë la: Angeice hë a nyiqaane sine la itre icasikeu, ngo xele angeic ma wang la ketre trejin, ke hnene la trejine cili hna akötrë angeic. Tune kaa la aqane tro eö a xatua angeic? Xatua angeice jë troa trotrohnine la aqane goeëne Iehova la itre trejin. Hnyinge jë koi angeic ka hape, ‘Nemene la hnei Nyidrëti hna kuca matre amamane la ihnim i Nyidrë koi angatr? (Ioa. 3:​16) Ka nyipiewekë kö koi Nyidrë troa casi la ekalesia? (Sal. 133:1) Tune kaa Nyidrë la easa isine troa acatrene la cas ne la ekalesia? (2 Kor. 13:11)’ Xatuane jë la ka ini Tus troa trotrohnin laka, tru la madrine i Iehova la easa goeën la ka loi thene la itre trejin, ngo tha itre tria i angatre kö.

15-16. (a) Tune kaa la aqane tro la ka ini Tus a nyitipu Iesu, la angeic a xome la ketre mekun ka tru? (Ioane 8:​29) (b) Hnei Marianne hna xatuane tune kaa la ka ini Tus troa axecië mekun ka loi? (Wange ju fe la foto.)

¹⁵ Ijije hi tro eö a xatuane la ka ini Tus troa trongëne la hnei angeic hna inin, e hetre mekun ka tru hnei angeic hna troa axeciën. Pane amamane jë koi angeic la mekene 35 ne la itus Gojenyi Kowe La Nyipi Mel! hna hape, “Tro Sa Iëne Tune Kaa La Itre Mekune Ka Loi?” Ngo e ka hape, ase hë angeice thith me ithel nge jol pala hi koi angeic troa axecië mekun, nemene la nyine tro eö a kuca? Maine jë, tru pala ha la itre trepene meköt nyine tro angeic a trongën, matre thatre hë angeic la nyine tro angeic a kuca. Ngaa upi angeice jë troa lapa mekune la tulu i Iesu. Nemene la ka xatua Iesu troa axecië mekun? Öni nyidrë: “Eni pala hi a kuca la itre ewekë ka amadrinë [Kaka].” (E jë la Ioane 8:​29.) Ithuecatre jë kowe la ka ini Tus troa ketre hnying ka hape, ‘Thenge la hnenge hna ithel me hnenge hna atre göi Iehova, nemene la mekun ka troa amadrinë Nyidrë?’ Ame asë hi la itre mekun ka amadrinë Iehova, ke mekun ka loi lai.

¹⁶ Hetre mekun ka tru hna troa xom hnene la ketre ka ini Tus e Chili. Kola uku angeic hnene la fami i angeic troa xome la ketre huliwa hna nyithupene hnyawa. Ngazo pe, tro la huliwa cili a sewe angeic troa sine lapaane la itre icasikeu. Öni Marianne, lo trejin föe ka hamë ini koi angeic ka hape: “Hnenge hna ithuecatr koi angeic troa meku Iehova. Tro jë kö Nyidrëti a madrin maine hleuhleu? Hnenge mina fe hna ithuecatr koi angeic troa qejepengöne hnyawa koi Iehova la jol hnei angeic hna melën, me goeën la aqane sa i Nyidrë. Matre tha kapa ju kö angeic la huliwa cili, nge e thupen hnei angeic hna öhne la ketre huliwa ka aijijë angeic troa sine lapaane la itre icasikeu.” Tha hnei Marianne kö hna qaja kowe la ka ini Tus la nyine troa kuca, ngo hnei eahlo pe hna ithuecatr koi angeic troa meku Iehova. Nemene hë la thangane lai? Epe catre hë la ka ini Tus koi Marianne, nge ka catrecatr la imelekeu i angeic me Iehova. Öni Marianne fe: “Hnene la ka ini Tus hna öhne laka, Iehova a thupë së la easa amë panë Nyidrë ngöne la mele së.”

ITRE MANATHITH HNA KAPA HNENE LA ITRE KA ATRE IEHOVA

17. Nemene la aja së kowe la itre ka ini Tus?

¹⁷ Ame la easa ini Tus, easa ce wange la itre ini ka tru ne la Tusi Hmitrötr, tune la pengöne la itre ka mec, me thupene mel, me Baselaia. Ketre, easë mina fe a ce wang la aqane trongene la itre icasikeu, me hnëqa ne la itre qatre thup, me hnëqa ne la Lapa Ne Xomi Meköt. Ngo tha ajane kö së tro la itre ka ini Tus a cil ngöne la itre ini cili. Aja i easë pe tro angatr a atrepengöi Iehova hnyawa.

18. Nemene la itre manathith hna troa kapa hnene la itre ka thel troa atre Iehova hnyawa?

¹⁸ Ketre manathith koi së troa inine la itre atr me xatua angatr troa atrepengöi Iehova hnyawa! Ame la itre ka atre me nyihlue i Nyidrë, ke angatre hë a mele madrine enehila. Hapeu, tha ketre manathith ka tru kö lai? (Sal. 25:​12-15) Nge ame elany, ame asë hi la itre ka “atrehmekune la Atre ka nyipici,” ene Iehova, ke tro angatr a mel uti hë epine palua. (1 Ioa. 5:​20) Ngo tha eje hmekuje kö lai! Öni Tusi Hmitrötr, ame la itre ka isine troa atre Iehova me hnimi Nyidrë, ke itre “hna atre hnei nyidrë.” (1 Kor. 8:3) Eje hi, kola goeë së hnene la Akötresie ka Tru Trenge Men, nge aja i Nyidrë troa nyi sinee së. Pëkö manathith ka tru hune lai!