Aqane Tro Sa Acatrene La Imelekeu Së Me Itre Trejin

1. Tro sa öhn ekaa la itre nyipi sinee?

KA JOL la mel ngöne la fene celë. Nge ka jole catre kö e pëkö sinee së. Atre hnyawa hi lai hnei Iehova, matre Nyidrëti a hamë sinee së ngöne la organizasio i Nyidrë. (Sal. 119:63) Eje hi, easa sine la lapa ne la itre trejin hna acasine hnene la ihnim, nge itre ka nyihlue i Iehova.

2. Nemene la pengöne la imelekeu së memine la itre trejin ne la ekalesia?

² Easa isine troa hetre imelekeu ka loi memine la itre trejin. Tha easë kö a thel tro hi a atre angatr, ngo easa thel troa epe catr koi angatr. Easa sine la fami Iehova, ene la itre atr ka hnimi Nyidrë me Iesu. Nge celë hi ka acasi së. (Ioa. 13:35) Ngo ame la imelekeu cili ke, tha ka traqa xane kö. Loi e tro sa nue trengecatr, matre acatrene ej. Ngo pine laka, itre atr ka tha pexeje kö së, matre ijije hi tro la itre jol a thë la imelekeu së me angatr.

3. Pine nemene matre ka jol tro pala hi a imelekeu memine la itre trejin?

³ Ka epe catre kö së kowe la itre xaa trejin hu itre xan. Nge aqane kö lai. Pine nemen? Maine jë, hnene laka, ceitune hi la itre aja së, nge casi hi la aqane waiewekë me ujë së. Nge maine jë, jol tro sa nyisineene hmaca la ketre trejin, ke hne së hna iwesitrë me angeic, matre hna thë la ihnimekeu së me angeic. Maine pena, isapengöi easë kö me angeic matre, kösë tha ka ihmeku kö la itre thiina së me angeic. Maine jë, hna tithi angeic hnei mec maine dépression, matre jol koi së tro pala hi a nyisinee angeic. Ame ngöne la tane mekune celë, tro sa ce wang la aqane tro la tulu i Iesu a xatua së troa acatrene la imelekeu së memine la itre trejin. Ngo tro sa pane ce wang la aqane tro la itre thiina i Iehova a xatua së.

ITRE THIINA I IEHOVA A XATUA SË TROA IMELEKEU HNYAWA ME ITRE XAN

4. Tro sa acatrene tune kaa la imelekeu së me itre trejin?

⁴ Tro sa acatrene la imelekeu së memine la itre trejin, e tro sa thel la ka loi thei angatr. Ame la ketre aqane tro sa öhne la itre thiina ka loi i angatr, ke ene la tro sa ce tro lapa me angatr. Tru la aja i Paulo troa iöhnyi memine la itre trejin. Öni angeic kowe la angetre Thesalonika ka hape: “Hne huni hna isin troa iöhnyi hmaca me nyipunie.” (1 Thes. 2:​17) Alanyim la itre ka qaja ka hape, ame la easa iöhnyi me porotrik lapa memine la sinee së, ke kola acatrene la imelekeu së me angeic. Celë hi hne së hna kuca la easa ce cainöj, me sine la itre icasikeu me itre asabele ka tru. Ngo tro sa öhne laka, ce tro lapa ju hë së, ngo hetre jol pala hi ka troa traqa.

5. Nemene la ka troa xatua së troa acatrene la imelekeu së me itre xan, la kola traqa la itre jol? Qaja jë la ketre ceitun. (Kolose 3:​12)

⁵ Tro la itre thiina i Iehova a xatua së troa acatrene la imelekeu së me itre xan. (E jë la Kolose 3:​12.) Eje hi, e tro sa hetrenyi la ipië, me atreine itreqe, me utipin, me loi thiina, tro së lai a atreine elëhun la itre jol ka troa traqa. Tro sa xom la ketre ceitun: nyipiewekë troa ami oel ngöne la loto matre tro ej a nyiap hnyawa. Ketre tun, nyipiewekë tro sa hetrenyi la itre thiina i Iehova matre troa tro loi la imelekeu së me itre xan. Tro sa ce ithanatane la köni ewekë ka troa thë la imelekeu së me itre trejin. Nge tro fe sa ce wang la itre thiina i Iesu, tune la ipië, me xomihni, me loi thiina, me utipin. Itre thiina lai ka troa xatua së troa imelekeu hnyawa me itre xan.

E THA ITROTROHNI KÖ EPON

6. Nemene la thangane kowe la imelekeu së me ketre e tha itrotrohni kö së?

⁶ Nemene la jol? Maine tha itrotrohni kö la lue atr, ke tro nyidro a isa catrefë mekun. Pane mekune jë laka, tha dakore kö la lue trejin trahmany göne la aqane tro la gurup ne cainöj a cainöj trootro. Nyidro a isa catrefë mekun. Tune kaa la aqane troa kökötr lai jol utihë la troa thë la imelekeu i nyidro? Maine jë tro nyidro a nue la pi hun troa aisa nyidro. Maine tha canga nyinyine kö nyidro la jol, tro hë nyidro a ixele ma iwai. Nge e thupen, tro hë nyidro a iananyi utihë la troa ithatre. Hnei nemen? Hnene hi la neköi jol ka co hi.

7. Nemene la aqane amamane Iesu laka, nyipiewekë tro la itretre dreng a ipië e tha itrotrohni kö angatr?

⁷ Tro sa nyitipune tune kaa la aqane ipië i Iesu? Hnei Iesu hna amamane kowe la itretre dreng la enyipiewekëne troa ipië ngöne la itre ijine tha itrotrohni kö angatr. Anyimua iwesitrë angatr matre troa atre ka hape, drei la ka tru thei angatr. Matre öni Iesu, loi e tro angatr a mekun ka hape, sisitria kö itre xan hui angatr. (Mat. 20:​25-28) Aja i nyidrë troa lepetrij la mekuna i angatr ka ngazo, hna ini angatr qane lo angatr a co. Matre hnei nyidrë hna ini angatr la aqane troa ipië. Ame lo jidr qëmekene tro nyidrëti a mec, hnei nyidrë hna “amamai tulu.” Eje hi, hnei nyidrë hna wasine la lue ca i angatr, huliwa hna kuca hnene la ketre hlu. (Ioa. 13:​3-5, 12-16) Hnei nyidrë hna amamane la aqane troa acatrene la imelekeu i angatr. Maine tro angatr a mekun ka hape, sisitria kö itre xan, tro ha hmaloi koi angatr troa kapa la mekuna i ketre. Ngacama tha itrotrohni kö angatr, ngo tro pala hi a catr la imelekeu i angatr.

8. Tro la ipië a xatua eö tune kaa troa acatrene la imelekeu i eö me itre xan e tha itrotrohni kö epun? (Kolose 3:​13) (Goeëne ju fe la itre foto.)

⁸ Tune kaa la aqane tro pala hi sa acatrene la imelekeu së me itre sinee së? Tro la ipië a xatua së troa thëthëhmine maine nue la ngazo i itre xan. (E jë la Kolose 3:​13.) Tro pala hi a catr la imelekeu së me itre xan e tro sa lapa thaup maine nu. (Sal. 4:4) Maine hna akötrë eö hnene la hna qaja hnei ketre, the thëthëhmine kö laka, hnei eö fe hna hane ithanata menu me hacefë e thupen. (A. Cai. 7:​21, 22) Isa hnyinge jë ka hape, ‘Nemene la ka sisitria koi ni? Troa catrefë mekun maine imelekeu i nyio?’ Kapa ju la mekuna i angeic. Tro ha tingeting la mekuna i eö, e tha tro kö eö a wangatrune menune pala ha la jol, me amexeje hmaca.

9. Tune kaa la aqane tro la ipië a xatua së la kola jol koi së troa iloi? (Itre Edromë 17:9)

⁹ Tro fe la ipië a xatua së ngöne la itre ijine laka, jol koi së troa iloi. The isi ithanata kö. (E jë la Itre Edromë 17:9; 1 Kor. 6:7) Ame la ka sisitria, ke tro pala hi a imelekeu memine la trejin me eö. Alanyim la itre ka öhne laka, ka hetre thangan la troa ithanata mekötine kowe la trejin. (Sal. 34:14) Qaja jë ka hape: ‘Tha lue trenyiwa kö nyiso, matre eni a pi ithanatane me eö lo ewekë ka traqa.’ The cile kö troa qaja ka hape, zöi eö la ewekë ka traqa, nge atre hi eö laka, hnei eö hna akötrë angeic. E thupen, qeje menu jë. Nge e tro angeic a qeje menu koi eö, kapa ju. (Luka 17:​3, 4) The thëthëhmine kö laka, ame la ka sisitria ke, troa nyinyine la jol me acatrene la imelekeu i epon, ngo tha ene kö la troa catrefë mekun.​—It. Ed. 18:24.

E ISAPENGÖNE KÖ EÖ MEMINE LA SINEE I EÖ

10. Pine nemen matre jole koi së troa nyisineene la itre xan?

¹⁰ Nemene la jol? Maine jë, jole koi së troa nyisineene la itre atr ke, isapengö së kö me angatr. Ame la itre xan, ke kola aelëhni së la aqane ujë i angatr. Ame pena la itre xan, tha ka loi kö la aqane ujë i angatr koi itre xan, ke hna qanangazo angatr ekö lo angatr a co. Maine pena, ame ngöne la nöje i angatr, itre atr ka lapa pe hi, maine iahlë. Maine jë, ame easë, ka pi wai atr, nge ame kö angatr ka pi lapa cas.

11. Nemene la ka aijijë Iesu troa nyisineene la itre atr ka isapengöne kö me nyidrë?

¹¹ Tro sa nyitipune tune kaa la aqane xomihni i Iesu? Hnei Iesu hna nyisineene la itre atr, ngacama isapengöne kö la itre thiina i angatr me nyidrë. Lue ka pi mama Iakobo me Ioane ke, hnei nyidro hna sipo nyidrë troa lapane la itre göhnë ka tru ngöne la Baselaia. (Mar. 10:​35-37) Ngo ame kö Iesu, hnei nyidrë hna nue la göhnë i nyidrë e hnengödrai me itre hnëqa ka tru matre troa ut kowe la fen. (Fil. 2:​5-8) Isapengöne catr la aqane ujë i nyidro me nyidrë. Ngo hnei Iesu pala hi hna xomihni Iakobo me Ioane me itre xan.

12. Nemene la ka xatua Iesu troa xomihnine la itre sinee i nyidrë?

¹² Atre hi Iesu la pengöne la itre sinee i nyidrë, matre tha nyidrëti kö a treqen tro angatr a kuca pala hi la meköt. Atre hi nyidrë laka, ame la sipo i Iakobo me Ioane ke, kolo hi a amamane la pengöne la itretre dreng asë, itre ka pi draië me pi mama. (Mar. 9:​34) Hnei Iesu hna ce tru me angatr, casi hi la qenenöj me hmi angatr. Atre hi nyidrë laka, hna hetru angatr matre troa xom la itre göhnë ka mama. Ngo hnei nyidrë hna xomihni angatr, me treqene hnyawan tro angatr a fej qa kuhu hni angatr la pi tru me pi draië ka ej thei angatr qane lo angatr a co.​—Mar. 10:​42-45.

13. Nemene la aqane tro la xomihni a xatua së troa acatrene la imelekeu së me itre sinee? (Efeso 4:2)

¹³ Tune kaa la aqane tro pala hi sa acatrene la imelekeu së me itre sinee së? Catre jë xomihnine la itre xan, me ce mel hnyawa me angatr, ngacama hetre thiina i angatr hnei easë hna xele ma wang. (It. Ed. 14:29) Isa hetre thiina i easë kö. Tha itre thiina ka ngazo kö, ngo pengöi easë. Hapeu, tha madrine kö së la itre xan a xomihni së? (E jë la Efeso 4:2.) Ketre, nyipiewekë tro sa trotrohnine la pengöne la itre trejin me easë, me xomihni angatr. Pane mekune jë la trengecatr hna nu hnene la trejin ka xou nge ka lapa pe hi, matre troa porotrik me itre xan. Nge loi e tro fe sa xomihnine la trejin ka inagala me ka ithaithanata. Nyipici laka, tha tro kö së lai a ep kowe la nöjei trejin, ngo ijiji së hi troa ce huliwa memine la itre trejin ka isapengöne kö me easë.

14. Maine tro sa xomihni, nemene la hne së hna troa goeën thei itre xan?

¹⁴ Tro la xomihni a xatua së troa goeëne la ka loi thene la itre trejin. Maine celë hi hne së hna kuca, tro së lai a nyisinee i angatr, ngacama isapengö së kö me angatr. Tro hmaca së a ithanatane la pengöi Iakobo me Ioane. Nyidro a meku nyidroti hi, matre hnei nyidro hna thel troa pi mama. Ngo kolo fe a amamane hnene la aqane ujë i nyidro laka, ka mel la Baselaia e kuhu hni i nyidro. Hnei Iesu hna öhne la lapaune i nyidro, nge celë hi hnei nyidrëti hna wangatrun. Ame la easa goeëne la ka loi thene la itre sinee së, easa nyitipu Iesu me Iehova.

15. Drei la ka xatua së troa acatrene la imelekeu së memine la itre trejin ka isapengöne kö me easë?

¹⁵ Ame la ketre aqane tro sa acatrene la imelekeu së me itre trejin ka isapengöne kö me easë, ke ene la troa sipo ixatua koi Iehova. Eu la ijine troa jole koi eö troa xomihnine la ketre trejin? Pane mekune jë la ijine cili, nge canga thithi jë matre tha tro kö eö a elëhni. Iehova la Atre Xup matre trotrohnine hi Nyidrë laka, isapengöne kö së. Matre ame la eö a thith, the luelue kö laka, atre kö Nyidrë la hnei eö hna ajan matre cile catr. Nge ame la kola jol koi eö troa xomihni, sipone jë la uati hmitrötr matre xatua eö.​—Luka 11:13; Gal. 5:​22, 23.

LA KOLA AKÖTR LA TREJIN ME EASË

16. Tune kaa la aqane ujë ne la trejin ka akötr, nge pine nemen matre ka jol koi së?

¹⁶ Nemene la jol? Ame la kola akötr la ketre trejin maine dépression, ke tro angeice lai a qaja maine kuca la itre ewekë ka aelëhni së. Maine jë, tro angeic a xele ma wai atr, maine elëhni, maine sa drai, maine akötrë itre xan. (Iobu 6:​2, 3) Pine laka, thatre kö së la jol hna melëne hnene la trejin, matre tro së lai a upi angeic troa kuca la itre ewekë hnei angeic hna thatrein.

17. Nemene la ini hne së hna xom qa ngöne la aqane ujë i Iesu koi Baratimaio?

¹⁷ Tro sa nyitipune tune kaa la aqane loi thiina me utipine i Iesu? Hnei Iesu hna loi thiina me utipine la itre ka akötr, ngacama thatre angatre kö hnei nyidrë. Celë hi aqane ujë i nyidrë koi Baratimaio, ketre ka timek. Ame la angeic a dreng ka hape, Iesu la ka tro e cili, angeic pa sue catre jë, me hë Iesu. Matre hna wesitr hnene la ka alanyim. Nge itre xan a thahe angeic. Ngo pine laka, aja i angeic tro Iesu a aloinyi angeic, hnei angeic hna sue catr hmaca kö. Maine jë, hnene la itre xan hna elëhni pine la aqane ujë i angeic. Ngo hnei Iesu hna “utipi” angeic. Kola amamane laka, hna ketri nyidrë hnene la ewekë ka traqa koi angeic, nge aja i nyidrë troa xatua angeic. (Mat. 20:34; Mar. 10:​46-52) Hnei nyidrë hna ithanata amenyiken koi Baratimaio me qaja aloinyi angeic. E thupen, hnei nyidrë hna aloinyi angeic.

18. Tune kaa la aqane tro eö a ujë kowe la itre sinee i eö ka akötr? (1 Thesalonika 5:​14)

¹⁸ Tune kaa la aqane tro pala hi sa acatrene la imelekeu së me itre sinee së? Loi e tro sa loi thiina me utipi itre xan. Tro lai a uku eö troa “hamëne la itre trenge ithanata ka keukawa” kowe la itre trejin ka akötr maine dépression. (E jë la 1 Thesalonika 5:​14.) The thëthëhmine kö laka, itre nyipi sinee a hamë ixatua, ngöne mina fe “la ijine akötr.” (It. Ed. 17:17) Tha angatre hi a loi thiina, ngo angatre fe a kuca asë la hnei angatr hna atreine matre troa hamë ixatua me ithuecatr.

19. Nemene la aqane tro eö a loi thiina me utipi itre xan? (Goeëne ju fe la itre foto.)

¹⁹ Nemene la aqane tro eö a loi thiina me utipi itre xan? Nyipici laka, thatreine kö eö apatrene la akötr ka ej thene la trejin me eö. Ngo ijije hi tro eö a trotrohnine la jol ka traqa koi angeic. (Mat. 7:​12; 1 Pet. 3:8) Drei angeic hnyawa ju la angeic a fe la hni angeic. Qëmekene troa ithanata, thele jë la itre trengewekë ka troa akeukawanyi angeic. (It. Ed. 12:25) The canga mekune kö ka hape, atre hi eö la hnei angeic hna melën. (It. Ed. 18:13) Xomihni angeice jë, nge the upi angeice kö troa kuca la hnei angeic hna thatreine kuca.​—Efe. 4:​32.

20. Tune kaa la aqane tro eö a nyipi sinee?

²⁰ Ka tru koi easë la imelekeu së memine la itre trejin. Ngo the thëthëhmine kö laka, itre atr ka tha pexeje kö së, matre pëkö thei easë ka kuca pala hi la loi. Alanyim thei easë ka melëne la itre akötr ka tru ekö. Matre wangatrune jë së la itre trengecatr hna nu hnene la itre trejin matre troa ipië, me xomihni, me loi thiina me utipin, me acatrene la imelekeu i angatr me easë. Isine jë tro fe a nyipi sinee koi itre xan.