Troa Xomi Mekun Ka Loi Göi Ini Aqeany

1-2. (a) Nemene la mekun nyine tro la itre jeune a axeciën? (b) Kola hapeu la hnëewekë “ini aqeany”? (Wange ju la ithuemacany “Göi Troa Trotrohnin.”)

“NEMENE la huliwa hnei eö hna pi kuca elany?” Maine eö la ketre jeune, aija hnyingë eö hë la hnyinge cili. Nyipici laka, ame la huliwa ka sisitria nyine tro eö a kuca, ke ene la troa huliwa koi Iehova drai ka pexej. Ngo loi e tro fe eö a öhnyi huliwa matre hetre mani. (2 Thes. 3:​10) Maine jë, atre hë eö la huliwa hnei eö hna pi kuca elany.

² Ame la itre xaa jeune, angatr a ce ithanatane me keme me thin, me axeciën troa sisedrëne la ini matre canga öhnyi huliwa. Maine jë eö fe a mekun troa ini aqeany,a ngo thatre kö eö la nyine tro eö a iën. Tro la tane mekune celë a amamane la itre trepene meköt ka troa xatua eö troa axecië mekun. Loi e tro eö a lapa mekun la itre trepene meköt celë, matre tro eö a xomi mekun ka loi. Ngacama thatraqane la itre jeune la tane mekune celë, ngo ka nyipiewekë fe kowe la itre keresiano ka pi kuci formasio. Tro fe la itre trepene meköt a aijijëne la itre keme me thin troa xatuane la itre nekö i angatr.

TRO KÖ EÖ A INI AQEANY?

3. Hnauëne la itre xaa keresiano a iën troa ini aqeany?

³ Ame ngöne la itre xaa nöj, tha nyipiewekë kö troa sisedrëne la ini matre öhnyi huliwa ka loi. Ngo ame pena ngöne la itre xaa nöj, loi e troa hetre diplômes matre öhnyi huliwa hna nyithupene hnyawan, nge ka lolo hi la itre hawa ne huliwa. Tro lai a aijijëne la keresiano troa catre cainöj, me kuca la itre xaa huliwa i Iehova. Ngo nyipici laka, e tro angeic a ini aqeany, tro angeic a nue traem, me trengecatr, me mani, me cil kowe la itre xaa jole ju kö.

4. Drei la ka axecië mekune kowe la keresiano göi ini aqeany? (Wange ju la ithuemacany.)

⁴ Öni Tusi Hmitrötr, “tro kö së a isa thu ehnefen.” (Gal. 6:5) Matre isa qanyine kö la itre keresiano iën ka hape, tro kö angatr a ini aqeany.b Ngo hnëqa i keme me thin troa thupëne la itre nekö i angatr. (Efe. 6:1) Matre hnëqa i nyidro troa iëne kowe la itre nekö i nyidro ka co. Ngo tro la itre eamo hnei nyidro hna troa hamën, a xatua nyudren troa axecië mekun ka loi elany, e tru hë nyudren.​—It. Ed. 22:6.

5. Eu la ijine troa nyiqane mekun troa ini aqeany, nge pine nemen? (Wange ju fe la icetrön.)

⁵ Ame ngöne la itre xaa nöj, tha fenesi pala kö la itre jeune la ini, nge kolo fe hë a upi angatr troa iëne ka hape, tro kö angatr a ini aqeany. Nyipiewekë tro angeic a ithanatane hnyawan me keme me thin qëmekene troa axecië mekun. Tro lai a aijijë angatr fami troa isa ithel matre öhne la ka loi koi angeic. Nge tro angatr a ce iëne la itre ini maine huliwa hnei angeic hna pi kuca. Ngo hapeu, tro kö angatr a canga axecië mekun, nge tha fenesi pala kö angeic la ini? Waea. (It. Ed. 21:5) Hnene la itre xaa jeune hna axecië mekun thupene la angatr a ase ini, maine thupene la kola öhnyi huliwa maine xom la huliwa ne pionie. Ijije hi troa xom la mekune cili thupen, e tru hë angeic.

6. Nemene la ka troa xatuane la ketre atr troa axecië mekun ka loi göi ini aqeany?

⁶ Nemene la ka troa xatua eö troa axecië mekun ka loi göi ini aqeany? Troa pane thith koi Iehova me sipo ixatua koi Nyidrë. (Iako. 1:5) E thupen, trongëne jë la lue mekune celë: Hnapan, troa pane atre la kepin matre eö a pi ini aqeany. (Sal. 26:2) Hnaaluen, troa mekun hnyawa la ini hnei eö hna pi kuca. (It. Ed. 14:15) Tro sa ce ithanatane la lue mekune celë.

NEMENE LA KEPIN MATRE EÖ A PI INI AQEANY?

7. Nemene la nyine troa mekune hnyawane hnene la keresiano ka ajan troa ini aqeany?

⁷ Maine eö a mekun troa ini aqeany, loi e tro eö a hnying ka hape, ‘Hnauëne la eni a pi kuca la ini celë?’ Ame la itre xan, angatr a pi öhnyi huliwa ka lolo, maine hna nyithupene hnyawa. Ka ngazo kö lai? Waea. (1 Tim. 5:8) Ngo Tusi Hmitrötr a hmekë së göne la aja mo, me mejiune koi mani. (It. Ed. 23:​4, 5; 1 Tim. 6:​8-10; 1 Ioa. 2:​17) Maine tro eö a ini aqeany matre trenamo maine pi mama, tro eö lai a hleuhleu me ananyi Iehova.

8-9. (a) Tune kaa la aqane tro la itre keresiano a goeëne la ini? (Mataio 6:​33) (b) Nemene la itre ini hne së hna xom qa ngöne la hna melën hnei Josefina, Morine, me Iris?

⁸ Tune kaa la aqane tro sa goeëne la ini? Pëkö ketre ewekë ka sisitria hune la troa nyihlue i Iehova. (Mat. 22:​37, 38; Fil. 3:8) Matre ame la itre ini me itre formasio, ke göne hi matre tro sa catr nyihlue i Iehova me hetrenyi la ka ijij.​—E jë la Mataio 6:​33.

⁹ Nemene la ka xatuane la itre xaa jeune troa atreine waiewekë? Hane hi la hna qaja hnei Josefina qa Chili. Öni angeic: “Eni a ini aqeany matre troa aijijë ni elanyi troa huliwa catr koi Iehova. Ame la ka tro pa ngöne la meleng, ke ene la itre objectifeng ngöne la huliwa i Iehova. Nge ame la itre xaa huliwa ke, e thupene pë hë.” Hnei Morine ketre trejin föe, hna iëne troa formasio koi ca macatre matre inine troa coiffeuse. Pine nemen? Öni angeic: “Ame la ajang ke, troa cainöj ngöne la ketre götrane gaa aja ixatua. Matre hnenge hna thele formasio ka aijijë ni troa kuca la ajang. Ame la eni a ase formasio, hnenge hna huliwa me ami mani acon matre tro kowe la ketre götran gaa aja ixatua. Ame hë la eni a fek, hnenge hna canga öhnyi huliwa e cili.” Öni Iris ka ini aqeanyi matre dentiste ka hape: “Hetre eloine troa ini aqeany, ngo tha celë kö lai ka hamë madrin. Pëkö xaa jëne madrin hune la troa amë panë Iehova ngöne la mele së.” Eje hi, maine ka tro pa ngöne la mele së la imelekeu së me Iehova, tro la itre mekun hne së hna axeciën a amadrinë së utihë epine palua.

MEKUNE HNYAWA JU LA ITRE ELOINE ME ENGAZON

10. Tro la tusi Dreuteronomi 32:29 a xatua së tune kaa troa wang ka hape, tro kö së a ini aqeany?

¹⁰ Maine jë, eö ha mekun la ketre ini maine ketre formasio hnei eö hna pi kuca. Ngo loi e tro mina fe eö a thel la itre xaa ini maine itre xaa formasio ngöne la itre xaa götran. (Wange ju la Itre Edromë 18:17.) Hetrenyi enehila la itre xaa pengöne formasio, tune la troa ini jëne Ëternet. Nge maine jë, ame ngöne la nöje i eö, ijije hi troa öhnyi huliwa ngacama pëkö diplômes i eö. Matre xomi ijine jë troa lapa mekune lai. Ame Johanna ka mel e Finlande, ke tha hnei angeice kö hna ini aqeany. Öni angeic: “Ame la eni a ase ini, hnenge hna thele huliwa sine la drai me xom la huliwa ne pionie. Nyimutre la itre huliwa hnenge hna kuca, nge eni a jelenyipicine laka, Iehova pala hi a hamën la ka nyipiewekë.” The thëthëhmine kö laka, maine eö a mekun troa ini aqeany, maine iëne la ketre formasio, tro pala hi a hetre eloin me engazon. Isa hnyinge jë ka hape: ‘Tru kö la itre eloine maine itre engazon?’ (E jë la Dreuteronomi 32:29; 1 Kor. 10:23) Tro sa ce wang la itre xaa mekun ka troa xatua eö troa sa la hnyinge celë.

11. Pine nemene matre ka nyipiewekë tro sa atre la porogarame së ngöne la hna ini? (Goeëne ju fe la itre foto.)

¹¹ Nemene la porogarame i eö? Ije hawa hnei eö hna troa lapa e koilo hna ini, me kuci qa, maine formasio? Tro kö eö a hetre ijine troa kuca la itre huliwa i Iehova me kuca la hnëqa i eö ngöne la fami? (Fil. 1:​10) Maine tro pena eö a kucakuca troa hnëkëne la itre icasikeu, maine e me inine la Tusi Hmitrötr. Celë hi ka traqa koi Jeroz ka mel e Inde. Öni angeic: “Jole koi ni troa cainöj lapa, me drenge hnyawa ngöne la itre icasikeu. Ame itre xaa ijin, tha eni kö a sine la itre icasikeu. Eni a öhne enehila laka, tru catr la itre trengecatr me traem hnenge hna aluzine la eni a ini aqeany.” Ngo ame la itre xaa ini, ke tha tru kö hnei qa maine tha kolo kö a ini e nöjei drai. Madrine catr Rabeca ka mel e Mozambique, kowe la ini hnei angeic hna iën. Öni angeic: “Ame ngöne la drai, eni a ini koi lue hawa hi. Matre hnenge pala hi hna pionie lapa.”

12. Nemene la nyine troa mekun hnene la atr ka pi huliwane hnyawane la traeme i angeic? (Atre Cainöj 12:1)

¹² Ije macatre ne ini? Ije treu maine macatre ne ini qëmekene tro eö a kapa la diplôme? Tro kö eö lai a huliwane hnyawane la traeme i eö? (Efe. 5:​15-17) Tro kö la formasio cili a aijijë eö troa huliwa koi Iehova drai ka pexej e jeune petre kö eö? (E jë la Atre Cainöj 12:1.) Hetre ketre formasio kö ka hopatr? Ame la itre xaa ini maine formasio ke, kola ini eö troa hetre métier, nge ka co thupene ju kö me nyimenyim hune la troa tro université. Öni Mario ka mel e Chili ka hape: “Hnenge hna iëne la ketre formasio koi lue macatre. Ka co thupene kö hune la troa tro université. Pine laka, eni hi a ini 4 lao drai ngöne la wiik, matre hnenge hna xom la huliwa ne pionie.”

13. Nemene la jol ka troa traqa e ka nanyi la uma ne ini?

¹³ Ekaa la hnei eö hna troa ini? Maine jë, tha nanyi kö la uma ne ini i eö qa ngöne la hnalapa i eö. Ngo thupëne kö, e eö a fek kowe la ketre traon maine lapa kampus! Tru catr la itre jol hnei eö hna troa cile kow e tro eö a lapa ananyine la fami i eö, maine ce lapa memine la itre atr ka tha nyihlue i Iehova kö. (It. Ed. 22:3; 1 Kor. 15:33) Hnei Matias ka mel e Mozambique, hna sine la ketre formasio ka ca macatre, nge tha ka tru thupene kö. Ngo tha madrine kö angeic. Pine nemen? Öni angeic: “Hnenge hna lapa ëterna. Matre e nöjei drai kola uku ni troa kuca la itre ewekë ka ngazo. Ame koi ni, ka loi tro la itre jeune a ini, ngo tro kö a lapa thei kaka me nenë.” Önine la ketre trejin föe qa Russie: “Pine laka, hnenge hna lapa thei kaka me nenë, tha traqa kö koi ni la itre jol me itre itupath.” Maine jë, ijije hi tro eö a öhnyi formasio ngöne Ëternet.

14. Tro la tusi Luka 14:28 a xatua së tune kaa troa axecië mekun ka loi göne la itre ini?

¹⁴ Ka ije thupen la itre ini i eö? Hetre xaa formasio ka co thupen, maine hetre ixatua i mus. Itre formasio lai ka aijijë eö troa hetre hna atrein, matre troa canga öhnyi huliwa. Ngo ame la itre xaa formasio, ke ka tru thupen. Nge hetre xaa nyine troa nyithupen, tune la itre cours particuliers matre lö kowe la itre uma ne ini ka tru. Ame la itre xan, itre macatre hnei angatr hna huliwa matre të la gufa hnei angatr hna xom lo angatr a ini. Tha madrine kö Adilson qa Mozambique, kowe la hnei angeic hna kuca ekö. Öni angeic: “Hnene la faming hna tuluthe hi la aqane tro angatr a xen matre nyithupene la 4 lao macatre ne ining.” Qëmekene troa ië formasio, pane hnyinge jë ka hape: ‘Ka ije thupen? Ijijinge kö me faming troa nyithupen? Hetre xaa formasio kö ka co thupen?’ (E jë la Luka 14:28.) ‘Maine eni a xomi gufa, ije macatre ne tro ni a të? Tro kö la huliwang elanyi a aijijë ni troa të la gufang me hetrenyi la ka nyipiewekë kowe la meleng?’​—It. Ed. 22:7.

15. Pine nemene matre loi e troa pane waipengöne la itre huliwa qëmekene troa iën troa ini?

¹⁵ Tro kö a hetre huliwa i eö? Nemene la itre huliwa hna thel ngöne la nöje i eö, maine ngöne la götran hnei eö hna pi tro kow. Tro kö la formasio a aijijë eö troa öhnyi huliwa? Ame la itre ini enehila, ke kola ini së troa inamacan, ngo tha kolo kö a ini së troa huliwa. (Kol. 2:8) Önine la ketre trejin föe ka mel e Inde ka hape: “Ame la itre ini hnenge hna kuca, ke tha kolo kö a ini ni troa huliwa. Celë hi matre, tha pi xomi ni kö hnene la itre maseta. Matre pëkö huliwa hnenge hna öhn ka ihmeku memine la itre ini hnenge hna kuca.” Ketre, ame ngöne la itre xaa götran, ke pëkö huliwa. Hnei Sublime, ketre trejin trahmanyi qa Centrafrique, hna kuca la itre formasio matre nyihnyawane la itre klim. Ngo öni angeic: “Ame e celë, itre atre kö a isa nyihnyawane la itre klim i angatr. Matre jol koi ni troa öhnyi huliwa.”

16. Pine nemene matre troa mekune hnyawane la itre huliwa hne së hna troa xom thupene la hna ini?

¹⁶ Pane mekune jë la huliwa hnei eö hna troa xom elany, e hetre diplôme i eö hë. Tro kö eö lai a madrin? (A. Cai. 3:​12, 13) Tro kö a tingeting e koilo hna huliwa? Tune kaa la huliwa, hetre engazone kö? Itre sine huliwa kö a iwajahuj? Maine tru la stress pena? Tune kaa la thupei eö? Ijije kö la mani tro eö a melën? Tro kö eö a kuci formasio lapa? Hapeu, tro kö la huliwa i eö a aijijë eö troa amë panëne la itre huliwa i Iehova? (A. Cai. 12:13) Nyipici laka, e pëkö huliwa, tro hi a kapa la hna hetreny. Ngo tro la ini hnei eö hna iën a xatua eö elany troa canga öhnyi huliwa. Hnei Tabitha ka mel e Inde hna iëne troa inine cai mano koi 6 lao treu. Öni angeic: “Hnenge hna iën troa cai mano matre aijijë ni troa pionie. Itre atr asë a thele ka cai mano, matre tro pala hi ni a hetre huliwa. Ketre, eni la ka iëne la itre hawa ne huliwang, nge tha ka hace kö.” Celë hi ka aijijë Tabitha troa öhnyi huliwa me pionie.

17. (a) Tro la keresiano a öhne tune kaa la itre ithuemacany matre axecië mekun ka loi? (b) Nemene la itre trepene meköt ka troa xatua angeic troa xomi mekun? (Wange ju la hna eköhagen “Itre Trepene Meköt Nyine Troa Lapa Mekun.”)

¹⁷ Ame ngöne la tane mekune celë, hne së hna ce wang la itre mekune nyine tro sa waipengön göne la ini aqeany. Ekaa la hnë tro eö a ithel matre öhne la itre ithuemacanyi ka troa xatua eö troa xomi mekun ka loi? Vizitëne jë lai uma ne ini, maine tro jë kowe la site Ëternet i angatr. Goeëne ju la itre offres d’emploi, matre wang ka hape, tro kö eö a canga öhnyi huliwa elany. Hnyinge jë fe kowe la itre ka kuca ha la huliwa hnei eö hna pi kuca. (It. Ed. 13:10) Hnyinge jë koi angatr ka hape, “Nemene la eloine me itre engazone la formasio cili, memine la huliwa hnei epun hna kuca?” Ithanata jë memine la itre ka madrin troa huliwa koi Iehova. (It. Ed. 15:22) Hetre huliwa kö maine formasio hnei angatr hna mekun? Maine jë tro angatr a qaja la ketre huliwa laka, tha ase kö eö hane mekun.

18. Nemene la nyine tha tro kö së a thëthëhmin?

¹⁸ Tune la hne së hna ce wang, hetre eloin me engazone la troa ini aqeany. Thithi jë, nge mekune hnyawa jë la nyine tro eö a kuca. The thëthëhmine kö laka, itre ini a aijijë eö troa hetre huliwa matre thupëne la mele i eö, ngo ame la jëne madrin, ke ene la imelekeu së me Iehova. (Sal. 16:​9, 11) Tro kö Nyidrëti a thupëne la itre hlue i Nyidrë, ngacama tha hnei angatre kö hna ini aqeany. (Heb. 13:5) Ngo e hnei eö hna axeciën troa ini aqeany, ke nemene la ka troa xatua eö troa lapa qal koi Iehova ngöne la ijine cili? Celë hi hne së hna troa ce wang ngöne la tane mekun ka troa xulu.