Acatrene Jë La Imelekeu i Epun Me Iehova

1. Nemene la ka nyipiewekë kowe la atr? (Mataio 5:3)

ATRE hi Iehova la ka nyipiewekë kowe la atr. Atre hi Nyidrë laka, tro sa mel, e hetre nyine xen, me iheetr, me uma. Maine patre kö la ketre ewekë cili ngöne la hnepe ijine hi, tro së lai a jol. Ngo tha eje hmekuje kö lai ka nyipiewekë kowe la atr. Hnei Iehova hna xupi së memine la aja troa atre Nyidrë, me thele ixatua thei Nyidrë. (E jë la Mataio 5:3.) Maine aja së troa madrin, loi e tro sa atre me catre thel la itre ewekë cili.

2. Pine nemene matre ceitui easë memine la atr ka lapa ifao?

² Ame la aliene la hnëewekë hna ujën ekö ka hape, ‘ka atrehmekun laka, nyipiewekë Akötresie koi angeic’ ke, kola qaja la ketre atr ka lapa ifao, nge ka aja ixatua. Ka dro la itre iheetre i angeic, nge angeic a thë xen. Ame e lai, kola cinajöni angeic, nge ame e jidr, angeic a xuxuhnötr. Kola sisi angeic hnene la itre atr. Angeic a kucakuca me dekurag. Atre hi angeic laka, tro angeic a mel me egöcatr, e hetre ka xatua angeic. Ceitune hi lai memine la itre atr ka atrehmekun laka, nyipiewekë Akötresie koi angatr. Angatr a ajan catrëne la ixatua i Nyidrë.

3. Nemene la hne së hna troa ce wang ngöne la tane mekune celë?

³ Ame ngöne la tane mekune celë, tro sa pane xomi ini qaathene la ketre föe ne Kanana, ka xëwe koi Iesu, matre tro nyidrëti a xatua eahlo. Kola mama thei eahlo la köni thiina nyine tro la itre atr ka thele Akötresie, a melën. E thupen, tro sa ce wang la tulu i Peteru, me Paulo, me Dravita, itre trahmanyi lai ka thele ixatua thei Iehova.

KETRE TULU NE IPIË, KA CATRE SIPO IXATUA ME LAPAUN

4. Hnauëne la kola tro koi Iesu hnene la ketre föe ne Kanana?

⁴ Ame ngöne la ketre drai, hnene la ketre föe ne Kanana hna tro koi Iesu. Pine nemen? Pine laka, hna löthe la nekö i eahlo jajiny hnei dremoni. (Mat. 15:​21-​28) Hnei eahlo hna tro me saiwatingöneca qëmekei Iesu, matre sipo ixatua koi nyidrë. Tru catre la itre thiina ka lolo hnei eahlo hna amaman ngöne lo ijine cili. Tro sa ce wange la itre xan.

5. Nemene la itre thiina ka mama thene la föe ne Kanana, nge nemene la hnei Iesu hna kuca? (Wange ju fe la foto.)

⁵ Hnene la föe ne Kanana hna ipië. Hnauëne la easa qaja lai? Tha hnei eahlo kö hna drengakötrën la Iesu a aceitunë eahlo memine la neköi kuli, ketre öni lai hna nyisiin hnene la itre atre ne fen. Maine eö ju, nemene la hnei eö hna troa kuca? Tro kö eö a drengakötrën, me xele ma sipo ixatua koi nyidrë? Tha celë kö hna kuca hnene la föe ne Kanana. Hnei eahlo hna ipië me sipo iele Iesu troa xatua eahlo. Hnauëne la eahlo a ujë tun? Pine laka, eahlo a lapaune koi Iesu. Hnene la lapaune i eahlo, matre hnei Iesu hna helëne la dremoni ka löth la nekö i eahlo, ngacama “hna upe meköti [nyidrë] kowe la itre mamoe ka paatr ne Isaraela.”

6. Tune kaa la aqane tro sa nyitipune la föe ne Kanana?

⁶ Maine aja së troa kapa la ixatua qaathei Iehova, ke loi e tro sa eënyine la itre thiina ka ej thene la föe ne Kanana. Nyipiewekë tro sa ipië, me catre sipo ixatua, me lapaun. Ame la atr ka sipo iele Akötresie troa xatua angeic, ke ka ipië. Ketre, loi e tro sa catre lapaune koi Iesu Keriso, me mejiun kowe la itre trahmanyi hnei nyidrëti hna acil troa iuji së. (Mat. 24:​45-​47) Madrine catr Iehova me Iesu la easa ipië, me sipo ixatua, me lapaun. E tro sa ujë tun, tro nyidro a xatua së me iuji së. (Wange ju fe la Iakobo 1:​5-7.) Tro sa wang enehila la aqane iuji së hnei Iehova, me hamë së la ka nyipiewekë matre tro sa madrin. Ketre, tro sa ce wang la tulu i Peteru aposetolo, me Paulo, me Dravita Joxu.

TUI PETERU LOI E TRO SA KAPA LA XEN QAATHEI IEHOVA

7. Nemene la hnëqa hna ahnith koi Peteru, ngo nemene la nyine tro fe angeic a kuca? Qejepengöne jë. (Heberu 5:​14–6:1)

⁷ Tro sa ce wang la tulu i Peteru aposetolo. Angeic la ketre atre Iudra ka pane öhne laka, Iesu la Mesia, ene lo atr hnei Iehova hna iëne troa thawa la “itre trengewekë ne mele ka pë pun” kowe la nöje i Nyidrë. (Ioa. 6:​66-​68) Qëmekene troa elë a tro hnengödrai, hnei Iesu hna ahnith koi Peteru la ketre hnëqa. Öni nyidrë: “Ithuane jë la itre neköi mamoeng.” (Ioa. 21:17) Hnei Peteru hna eatrëne hnyawa la hnëqa i angeic. Nge hnei Iehova hna upi angeic troa cinyanyine la lue tusi ne la Tusi Hmitrötr. Ngo, loi e tro mina fe Peteru a hane kapa la xen qaathei Iehova. Celë hi hnei angeic hna kuca la angeic a sin ajuine la itre tusi Paulo. Hnei angeic hna öhne laka, “tha ka hmaloi kö troa trotrohnine” la itre xaa hna cinyanyine hnei Paulo. (2 Pet. 3:​15, 16) Ngo hnei Peteru hna isine troa sin ajuine la “nyipi xen” hnei Iehova hna hamën jëne Paulo. Xecie koi angeic laka, tro kö Iehova a xatua angeic troa trotrohnin, me trongën.​—E jë la Heberu 5:⁠14–​6:1.

8. Tune kaa la aqane ujë i Peteru la Iehova a hamën la ketre hna amekötin ka hnyipixe?

⁸ Hnei Peteru hna amamane la lapaune i angeic koi Iehova, la angeic a trongëne la itre hnei Nyidrë hna amekötin. Ame lo angeic ngöne la traon e Iopa, hnei angeic hna öhne la angela i Akötresie a upi angeic troa öni la itre öni hna wathebone hnene la Wathebo i Mose. Tro la angetre Iudra a sis la angatr a dreng la hna amekötine cili. Celë hi matre, ame lo xötrei, öni Peteru: “Waea Joxu, ka tha hane fe kö ni öni la ketre ewekë ka sis nge hna wathebon.” Ngo önine jë hi la angela: “Loi ju hë hnei eö hna sisine la itre ewekë hnei Akötresie hna ahmitrötrën.” (It. Hu. 10:​9-​15) Hnei Peteru hna idrengethenge, me saze la aqane waiewekë i angeic. Nemene la ka amaman? E thupen, fetra pi hi la köni trahmanyi troa thei Peteru, nge itre hna up hnei Konelio, ketre atre ne fen. Hnei angatr hna hë Peteru troa dreng la maseta i angatr. Maine ekö ju, tha tro kö Peteru a lö hnine la uma ne la ketre atre ne fen, ke itre atre lai ka sis kowe la angetre Iudra. (It. Hu. 10:​28, 29) Ngo hnei Peteru hna kapa la hna amekötin ka hnyipixe qaathei Akötresie. (It. Ed. 4:​18) Hnei Peteru hna cainöj koi Konelio, me kowe la itre atrene la hnalapa i angeic. Madrine catr Peteru la angatr a kapa la uati hmitrötr me xomi bapataiso.​—It. Hu. 10:​44-​48.

9. Nemene la lue thangan hne së hna troa kapa, e tro sa inin ajuine la itre ini ka jui ne la Tusi Hmitrötr?

⁹ Tui Peteru, loi e tro sa inin ajuine la itre ini ka hmaloi troa trotrohnin, ngo memine fe la itre ini ka jui ne la Tusi Hmitrötr, ene lo itre ini ka jol troa trotrohnin. Nyipici laka, kola xom la traem me trengecatre së la troa inin ajuine la Tusi Hmitrötr. Ngo ka hetre thangan. Nemene thangan? Ame la hnapan, easa atre Iehova hnyawa, nge celë hi ka acatrene la ihnimi së me metrötre së koi Nyidrë. Nge ame la hnaaluen, kola thue aja së troa qeje Nyidrë koi itre xan. (Roma 11:33; Hna Am. 4:​11) Ngo hetre ketre ini hne së hna kapa qaathei Peteru. Ame la easa kapa la ketre ini ka hnyipixe, nyipiewekë tro sa saze la aqane waiewekë së me canga trongëne la ini cili. Celë hi ka troa acatrene la imelekeu së me Nyidrë, me aijijë Nyidrë troa hamë hnëqa së.

TUI PAUL HEETRËNE JË SË LA ITRE THIINA I IEHOVA

10. Thenge la Kolose 3:​8-10, tro sa amadrinë Iehova tune kaa?

¹⁰ Ketre, Iehova a iuji së me amamane koi së la aqane tro sa hetrenyi la itre thiina ka amadrinë Nyidrë. (E jë la Kolose 3:​8-​10.) Loi e tro pala hi sa nue trengecatr matre troa heetrëne la itre thiina i Iehova. Tro sa ce wang la tulu i Paulo. Qane lo angeic a co, angeic a isine troa kuca la itre huliwa ka amadrinë Akötresie. (Gal. 1:​14; Fil. 3:​4, 5) Ngo pine laka, thatre Akötresie hnyawa kö angeic, matre thatre kö angeic la aqane troa hmi koi Nyidrë. Ketre, thatre kö angeic la itre ini i Keriso, nge ka “pi tru” la hni angeic, matre tha madrine kö Akötresie kowe la aqane ujë i angeic.​—1 Tim. 1:​13.

11. Nemene la thiina hnei Paulo hna catre lepetrij? Qejepengöne jë.

¹¹ Qëmekene tro Paulo a xom la hmi Keresiano, ketre atr ka elëelëhni angeic. Önine la tusi Itre Huliwa, ka elëhni catr Paulo kowe la itretre drei Iesu, matre angeic ‘pala hi a qanangazo angatr me catre thele troa humuthi angatr.’ (It. Hu. 9:1) Ame hë la angeic a ketre atre drei Iesu, hnei angeic hna isine troa xometrij la thiina cili. (Efe. 4:​22, 31) Ngo ame lo ketre drai, hnei angeic hna iwesitrë me Banaba, matre hnei nyidro “hna icatrë.” (It. Hu. 15:​37-​39) Ngacama hna traqa la ewekë cili, ngo hnei Paulo hna isine troa lepetrij la thiina ka ngazo i angeic. Hnei angeic pala hi hna ‘jenge la ngönetrei’ angeic, ene la troa isi memine la itre thiina ka ngazo, matre troa amadrinë Iehova.​—1 Kor. 9:​27.

12. Nemene la ka xatua Paulo troa nuetrij la itre thiina i angeic hnapan?

¹² Hnei Paulo hna nuetrij la itre thiina hnapan, me heetrëne la itre thiina ka hnyipixe, ke tha angeice kö a mejiune kowe la sipu trengecatre i angeic. (Fil. 4:​13) Tui Peteru, Paulo a mejiune kowe la ‘trengecatr hna hamën hnei Akötresie.’ (1 Pet. 4:​11) Ngo ame itre xaa ijin, angeic a mekun ka hape, ka luzi hë angeic. Ame ngöne la itre ijine cili, angeic a mekun la itre hnei Akötresie hna kuca koi angeic, nge celë hi ka xatua angeic troa cile catr.​—Roma 7:​21-​25.

13. Tro sa nyitipu Paulo tune kaa?

¹³ Tro sa nyitipu Paulo tune kaa? Ngacama ekö ju hë së nyihlue i Iehova, ngo loi e tro pala hi sa nue trengecatre matre troa nuetrij la itre thiina së hnapan, me heetrëne la itre thiina ka hnyipixe. E traqa jë fetra hmaca la itre thiina së hnapan, tune la troa elëhni, maine qaja la itre trenge ka akötr, ke tha tro pi kö sa mekun ka hape, ka luzi hë së. Loi e tro pe sa isine troa saze la aqane ujë së, me aqane waiewekë së. (Roma 12:​1, 2; Efe. 4:​24) Ngo the thëthëhmine kö së laka, ame la itre hnaheetr, ke easa can atrun maine acon, matre troa ihmeku me easë. Ngo ame kö la hnaheetr qaathei Iehova, ene la itre thiina i Nyidrë, ke qanyi easë saze la itre thiina së matre ihmeku me itre ej.

TUI DRAVITA LAPA JË SË THEI IEHOVA

14-15. Tune kaa la aqane thupë së hnei Iehova? (Salamo 27:5) (Wange ju fe la icetrön.)

¹⁴ Maine aja së troa madrin, tha tro hmekuje kö sa kapa la xen qaathei Iehova, me heetrëne la itre thiina i Nyidrë. Nyipiewekë tro fe sa lapa thei Iehova, matre tro Nyidrëti a thupë së. Iehova a thupë së tune kaa? Nge nemene la nyine tro sa kuca matre tro Nyidrëti a thupë së?

¹⁵ Xecie koi Dravita Joxu laka, tro Iehova a thupë angeic ngöne la itre ijine ngazo. (E jë la Salamo 27:5.) Tune kaa la aqane thupëne Iehova la nöje i Nyidrëti enehila? Nyidrëti a thupë së qa ngöne la itre atr me itre ewekë ka troa angazone la lapaune së. Öni Nyidrë, pëkö ca jia ne isi hna kuca nyine akötrë së ka troa hun. (Sal. 34:7; Isa. 54:17) Ngacama ka catr Satana, me itre dremoni, me itre ithupëjia me easë, ngo ka mene catre kö Iehova hui angatr. Maine humuthi easë ju hë, ngo tro kö Iehova a amele së elany ngöne la fen ka hnyipixe. (1 Kor. 15:​55-​57; Hna Am. 21:​3, 4) Nge tune kaa fe la itre mekun ka ahacene la hni së? Ame e cili, Nyidrëti a xatua së matre tha tro kö sa nuetriji Nyidrë. (It. Ed. 12:25; Mat. 6:​27-​29) Ketre, Nyidrëti a hamën la itre trejin ka xatua së, me itre qatre thup ka ini së me thupë së hnyawa. (Isa. 32:​1, 2) Nge ame la easa sine la itre icasikeu, kola amekunë së la nyine tro sa kuca matre tro Iehova a thupë së.​—Heb. 10:​24, 25.

16. Tune kaa la aqane thupë Dravita hnei Iehova?

¹⁶ Ame la Dravita a drengethenge Iehova, ke Nyidrëti a xatua angeic troa xomi mekune ka loi, nge angeic a madrin. E cili, Iehova a thupë angeic. (Wange ju fe la Itre Edromë 5:​1, 2.) Ngo ame la Dravita a ena la itre wathebo i Iehova, ke Nyidrëti a nue angeic troa xeni pun la itre huliwa i angeic. (2 Sam. 12:​9, 10) Ngo tune kaa, e angeic a akötr nge tha zöi angeice pe? Angeic a fe la hni angeic koi Iehova jëne la thith. E cili, Iehova a akeukawanyi angeic me amexej la ihnimi Nyidrëti koi angeic, me qaja ka hape, tro kö Nyidrëti a thupë angeic.​—Sal. 23:​1-6.

17. Tro sa nyitipu Dravita tune kaa?

¹⁷ Easa nyitipu Dravita la easa thele eamo thei Iehova qëmeken troa xomi mekun. Nge ame itre xaa ijin, easa cil kowe la itre jol, ke hne së hna xomi mekun ka ngazo. Ngo tha kolo kö lai a hape, tha Iehova kö a thupë së. (Gal. 6:​7, 8) Ketre, maine easa akötr nge tha zöi easë kö, fe pi la hni së koi Iehova jëne la thith, ke tro kö Nyidrëti a thupëne la itre hni me mekuna së.​—Fil. 4:​6, 7.

CATRE JË SË QALE KOI IEHOVA MATRE KEPE IXATUA

18. Ka tune kaa la itre atr ka lapa xötreithi së, nge nemen la nyine tro sa kuca matre tro pala hi Iehova a eatrongë së? (Goeëne ju fe la itre foto.)

¹⁸ Ame la xötr ka nyitane la macatre 2026 ke kola hape: “Madrine la itre ka atrehmekune laka, nyipiewekë Akötresie koi angatr.” Nyipiewekë enehila troa kuca la hna qaja hnei Iesu me thele ixatua thei Iehova. Pine nemen? Pine laka, pëkö madrin ne la itre atr ka lapa xötreithi së, ke tha angatre kö a thele Akötresie, maine angatr a thele la ketre aqane troa nyihlue i Nyidrë jëne la hmi ka thoi, maine itre mekuna i atr. The nue pi kö la itre aqane mekune me itre huliwa cili troa löthi së. Tro sa tune kaa? Troa kapa la xen qaathei Iehova, me heetrëne la itre thiina i Nyidrë, me lapa thei Nyidrë.