Aqane Tro Sa Nyipi Sinee Koi Itre Xan

HAPEU hnei epuni kö hna hane mekune ka hape, epuni casi hi qëmekene la ketre jol? Easa melëne “la itre ijin akötr hna thatreine xomihnin” matre tro së lai a dekurag me mekune ka hape, easë casi hi. (2 Tim. 3:1) Ngo tha easë casi kö. Öni Tusi Hmitrötr, ame la easa melëne la “itre ijine akötr,” tru la ixatua hna hamën hnene la itre nyipi sinee.​—It. Ed. 17:17.

IXATUA QAATHENE LA ITRE NYIPI SINEE

Hetre sinatronge i Paulo la angeic a cainöj trootro ngöne la itre götran. Nge nyimu aqane xatua angeic hnei angatr. (Kol. 4:7-11) Ame lo kola akalabusi angeic e Roma, hnene la itre sinee i angeic hna kuca la itre xaa huliwa, ke tha ijiji angeice kö. Hnei Epaferodito hna traqa fë koi Paulo la itre hna hnëkëne koi angeic hnene la itre trejin ne Filipi. (Fil. 4:18) Nge hnei Tukiko hna tro fë la itre tusi Paulo kowe la itre ekalesia. (Kol. 4:7) Jëne la ixatua ne la itre sinee i Paulo, hnei angeic hna catre cainöj ngacama hna umë angeic ngöne la ketre uma e Roma, nge e thupen ngöne la kalabus. Nge ame eö ke, tune kaa la aqane tro eö a xatua itre xan me hane nyipi sinee?

Hetre itre tulu enehila ka amamane la enyipiewekëne troa hetre nyipi sinee. Tro sa ce wange la hna kuca hnene la ketre trejin föe koi Elisabet, ketre pionie e Espagne. Ame la angeic a atre ka hape, hna tithe la thine i Elisabet hnene la ketre cancer ka pëkö nyin, hnei angeic hna iupi fë la itre xötr ne Tusi Hmitrötr matre ithuecatre koi Elisabet. Öni Elisabet, “Jëne la itre message i angeic, tha eni casi kö. Celë hi ka xatua ni troa hetre trengecatr e nöjei drai.”​—It. Ed. 18:24.

Tro së lai a acatrene la aqane imelekeu së me itre trejin, e tro sa xatua angatr ngöne la itre huliwa ne la ekalesia. Hapeu, ijiji eö kö troa trotheng la ketre trejin ka qatre hë matre sine la itre icasikeu maine cainöj trootro? Tro lai a ithuecatre koi eö, la epon a ce tro. (Roma 1:12) Ngo troa xatuane tune kaa la itre trejin ka lapa hnalapa? Tune kaa la aqane tro eö a nyipi sinee i angatr?

NYISINEENE JË LA ITRE TREJIN KA LAPA HNALAPA

Ame la itre xaa trejin, angatr a wezipo maine melëne la ketre jol ka sewe angatr troa sine la itre icasikeu ngöne la Uma Ne Baselaia. Tui David, hna tithi angeic hnene la ketre cancer (lymphome). Hnei angeic hna kuci chimio koi sikis lao treu. Nge ame ngöne la ijine cili, hnei angeic me Lidia föi angeic hna sine la itre icasikeu jëne visioconférence.

Nemene la ixatua hna hamëne koi nyidro hnene la itre trejin ne la ekalesia? Ame la kola fenes la icasikeu, itre trejin a ithanata koi David me Lidia qa ngöne la Uma Ne Baselaia. Nge ame la nyidroti a hamë mekun, itre trejin a iupi fë message matre felisite nyidro. Nemene la thangan? Kösë tha nyidroti casi kö.

Ijije kö tro sa hane cainöj memine la itre trejin ka lapa hnalapa? Maine jë, tro së lai a nango saze la itre hne së hna majemine kuca. Ngo easë hi lai a amamane ka hape, tha thëthëhmi angatre kö hne së. (It. Ed. 3:27) Ijiji eö kö troa cinyanyi tus maine cainöj jëne telefon me angatr? Ketre ame la itre trejin ka lapa hnalapa, ke ijiji angatr troa sine la itre icasikeu ne cainöj jëne visioconférence. Madrine catre David me Lidia kowe la hna acile cili. Öni David, “Ame la nyio a ce porotrik memine la itre trejin me thith me angatr, ke kola ithuecatr koi nyio.” Maine ijije hi nge pëkö engazon, tune kaa, e tro eö a ce tro memine la ka ini Tus me eö troa ini Tus thene la trejin ka lapa hnalapa?

Ame la easa ce tro memine la itre trejin ka lapa hnalapa me öhne la itre thiina ka lolo i angatr, ke kola acatrene la aqane imelekeu së me angatr. Tune kaa la eö a ce cainöj me angatr, me öhne la aqane huliwane angatr la Tusi Hmitrötr matre ketr la hni ne la itre atr? Tha kolo kö lai a acatrene la metrötre i eö koi angatr? Maine tro eö a ce tro memine la itre trejin ngöne la huliwa ne cainöj maine ngöne la itre icasikeu, tro eö lai a öhne la itre xaa sinee.​—2 Kor. 6:13.

Hna akeukawanyi Paulo la Tito a traqa koi angeic. (2 Kor. 7:5-7) Atre hi easë laka, nyipiewekë troa utipine la itre atr ka akötr. Ngo easa öhne ngöne la tulu i Tito laka, easa utipine la itre trejin la easa ce tro me angatr me kuca la hne asë hna atreine matre xatua angatr.​—1 Ioa. 3:18.

NYIPI SINEE JË NGÖNE LA IJIN IAXÖSISI

Ketre tulu ka lolo la hna amamane hnene la itre trejin qa Russie göne la troa itö ixatua. Tro sa ce wange la hna melën hnei Sergey me Tatyana föi angeic. Thupene la hna fouiller la hnalapa i nyidro hnei polis, hna xomi nyidro kowe la buro ne polis. Tatyana la hna pane nu. Öni Sergey: “Ame la [Tatyana] a bëek kowe la hnalapa, traqa ju fe hi la ketre trejin föe. Hnene fe la itre xaa trejin hna traqa matre xatua nyio troa nyidrawane la hnalapa.”

Öni Sergey: “Pi tro catre ni a e lapane la tusi Itre Edromë 17:17, kola hape: Ame la nyipi sinee, angeic a amamane la ihnim i angeic e nöjei ijin nge trejin angeic kowe la ijine akötr. Ngo qane lo eni a melëne la itupath cili, trotrohnine hnyawa ha ni la aliene la xötre celë. Ame la eni cas ngöne la itre ijine akötr, Iehova a hamë ni la itre sinee.”a

Kola tro la itre drai, nge troa catrehnine trootro la itre jol, matre nyipiewekë tro sa hetre nyipi sinee. Nge the qaja pala ha elany ngöne la ijine akötr atraqatr. Haawe, kuca asë jë la hne së hna atrein, matre troa ketre nyipi sinee koi itre xan enehila!​—1 Pet. 4:7, 8.