Ketre Hnying Ka Hetre Thangan

Mary me John,a föi angeic a mele ngöne la ketre götrane laka, tru catr la angetre Philippines ka traqa troa huliwa. Ame ngöne lo ijine COVID-19, hnei Mary hna nyiqane ini Tus memine la itre atr ka mel ngöne la nöje i angeic, ngo memine fe la itre atr ka mel ngöne la itre xaa nöj. Tune kaa la aqane kuca i angeic?

Mary a hnyingëne kowe la itre ka ini Tusi me angeic ka hape, “Hetre atre kö hnei epuni hna atre ka hane pi ini Tus?” Nge maine hetreny, angeic a sa ka hape, ‘Nga qaja jë koi ni.’ Ka hetre thangane catre la hnying cili. Pine nemen? Pine laka, ame la itre atr ka hniine la Tusi Hmitrötr, ke angatr a pi thawa la hnei angatr hna inin memine la itre atr hnei angatr hna hnim, tune la itre atrene la fami me itre sinee. Nemene hë la thangan?

Hnei Jasmine ketre ka ini Tus me Mary hna qaja la 4 lao atr, matre hnei Mary hna nyiqane ini Tus me angatr. Ame la ketre, ke Kristine. Madrine catre angeic kowe la ini Tus, matre alua ini Tusi angeic ngöne la wiik. Ame la Mary a hnyingë angeic ka hape, hetre atre kö hnei angeic hna atre ka hane pi ini Tus, öni Kristine, “Öö, tro ni a trosai eö koi angatr.” Ame ngöne la itre wiik e thupen, hnei Kristine hna trosai Mary kowe la 4 lao sinee i angeic. E thupen, hnei nyidro hna wange la itre xaa sinee i Kristine, nge hnei angatr hna trosai Mary kowe la itre xaa sinee i angatr.

Aja i Kristine tro la itre xaa fami angeic ka mel e Philippines a hane ini Tus Hmitrötr. Matre hnei angeic hna ithanata koi Andrea, nekö i angeic jajiny. Ame lo xötrei, Andrea a qaja ka hape, ‘Ame la itre Temoë ke, ketre secte lai, tha angatre fe kö a mejiune koi Iesu nge angatre hi a huliwane la Isisinyikeu Hnaapan.’ Ngo ame hë la angeic a nyiqane ini Tus, angeic a öhne ka hape, ka tria lo mekuna i angeic. Ame la angeic a kapa la ketre ini ka hnyipixe, öni angeic “E Tusi Hmitrötr la ka qaja, ke eje hi lai!”

E thupen, hnei Andrea hna trosai Mary kowe la lue sinee me ca sine huliwa i angeic, matre hnei angatr hna nyiqane ini Tus. Ketre, thatre fe kö Mary ka hape, Angela ketre tretre i Andrea ka timek a nango drei nyidro a ini Tus. Ame lo ketre drai, hnei Angela hna qaja koi Andrea troa sipo Mary troa ini Tus koi eahlo. Madrine catre eahlo kowe la hnei eahlo hna inin. Thupene la ca treu, nyimu xötr hnei eahlo hna atre hnyawa, nge a foa lao ini Tus eahlo ngöne la wiik! Nge jëne la ixatua i Andrea hnei eahlo hna nyiqane sine la itre icasikeu jëne visioconférence.

Ame la Mary a atre laka, Joshua föi Kristine a lapa drei nyidro a ini Tus, hnei Mary hna hë nyidrë troa hane sin. Öni nyidrë, “Tro hi ni a dreng, ngo e hnyinge hë epon koi ni, eni ha tro.” Ngo tha 5 menetre ju kö, nge tru catre kö la itre hnyinge i nyidrë hui Kristine, nge aja i nyidrëti hë troa ini Tus.

Matre jëne hi la ca hnying, ka tiqa hnei atr hnei Mary hna nyiqane ini Tus memin. Hnei angeic hna nue la itre xan kowe la itre xaa trejin. Matre traqa koi 28 lao atr hnei angeic hna nyiqane ini Tus memin, ka mel ngöne la 4 lao nöj.

Hnei Jasmine lo ka pane ini Tus me Mary hna bapataiso lo Eiperem 2021. Ame Kristine, hnei angeic hna bapataiso lo Mei 2022 me bëeke hmaca kowe la fami angeic e Philippines. Hnene la lue xaa föe hnei Kristine hna traqa fë koi Mary hna hane xomi bapataiso. Itre treu thupen la kola bapataiso Kristine, hnei Angela hna bapataiso, nge ketre pionie lapa hë angeic. Nge kola kökötre lolo hnei Joshua föi Kristine me Andrea nekö i nyidro, memine la itre xaa ka ini Tus.

Ame ngöne la ijine la itre pane keresiano, hna kökötre la maca ka loi ngöne la itre fami me itre sinee. (Ioa. 1:41, 42a; It. Hu. 10:24, 27, 48; 16:25-33) Hnyinge jë kowe la itre ka ini Tus me eö, me itre atr ka pi atre la nyipici ka hape, “Hetre atre kö hnei eö hna atre ka hane pi ini Tus?” Maine jë, tru catre la itre atr hnei eö hna troa nyiqane ini Tus memin hnene hi la hnyinge cili.