The Mano Kö Troa Cainöj
1 Ame itre xaa ijin, maine jë tro sa mekune, ka hape, hne së hë hna huliwaane lapaane la teritoare së, ene pe xalaithe pe hi la itre ka troa drei së. Ngo hetrenyi la itre kepine ka tru matre tro pala hi sa catre cainöj.—Mat. 28:19, 20.
2 Nyine Anyipicin: Hnei Iesu hna thingehnaeane laka, ame la kola cainöjëne la Baselaia, tre, celë hi ketre hatrene ka sisitria catre ne la “puatine la fewatin” nge tro hë eje mina fe a “nyine anyipicine kowe la nöjei nöj.” (Mat. 24:3, 14) Ame la kola goeë së e cainöjëne la maca ka loi ne la Baselaia, tre, kolo hi lai a hamëne la ketre nyine anyipicine ka trene mene catr. Ame la easa trotrije la teritoare së, maine jë tro la itre xaa atr a porotrikëne la traqa së ngöne la itre hawa maine itre drai thupe i easë, ngacama thaa hnei angatre kö hna drenge la maca hne së hna tro fë. Ame la easa wanga atrune hnyawa la itre kepine matre easa cainöj, tre, celë hi ka troa xatua së troa cile hut. Easa amadrinë Iehova ngöne la easa hamëne la hne së hna hetrenyi matre troa eatrëne la hna perofetane hnei Tusi Hmitrötr, ene la troa cainöj me qaja kowe la nöjei atr, ka hape, calemi catre hë la drai ne troa lepe apaatrenyi angatr.—2 Thes. 1:6-9.
3 Nyipi Ewekë Troa Cile Hut: Pine laka nyimutre la itre nyine madrin nge kola xome la traeme ne la itre atr, haawe, nyipi ewekë tro pala hi sa catre troa xatua angatre ngöne la götrane la ua. Caa macatre ne wange lapaane la ketre föe ngöne la nöjei wiik, qëmekene la eahlo a könën la itretre Anyipicine i Iehova troa lö ngöne la hnalapa i eahlo matre troa ithanatane la Tusi Hmitrötr. Tru catre la madrine i eahlo troa drenge la itre hna qaja, ene pe hmala ju hi eahlo troa inine la Tusi Hmitrötr, ketre hane jë hë eahlo nyiqaane sine la itre icasikeu, nge thaa hmitre ju kö nge eahlo a qaja la aja i eahlo troa hane xome la bapataiso.
4 Kola saze la itre ewekë ngöne la fen, ketre tune mina fe la aqane ujë ne la itre atr. Nyimutre la itre ka xele ma drei së ngöne lo easa xötrei cainöj, ngo ame hë enehila, maine jë angatre fe hë a hane kapa la mejiune ka keukawa hne së hna tro fë. Maine caasi hi la atr ka kapa hnyawa la maca ne la Baselaia, ngo kolo hi lai a nyi june la aqane catre cainöje së.
5 Ame cailo fen, nyimutre catre la itre atr ka “awe me teije latesi pine la ite ewekë ka sisi asë lo hna kuca.” (Ezek. 9:4) Ame la itre thangane la hne së hna cainöj, kolo hi lai a anyipicine laka ame la itre ka ajane la meköt, tre, angatr a kapa la maca ne la Baselaia. (Is. 2:2, 3) Qa ngöne lai, thaa tro kö sa mano troa cainöj, loi pe troa cile huti cememine la ihnimi, ngöne la troa “tro fë la loi.”—Is. 52:7; Ite Hu. 5:42.