Kolo Kö a Hnëkë Hnene La Hnepe Lapa i Epuni Matre Troa Mele Elany?
1 Hnene laka kola eatre la itre hna perofetane hnei Tusi Hmitrötr, haawe, kola xecie hnyawa koi së laka, calemi catre hë la pun kowe la fene ka ngazo celë. Easa melëne enehila la itre drai tixenuë ceitu memine lo itre ka mele qëmekene lo Iwë. (Mat. 24:37-39) Hna mele pe hnei Noa qa ngöne la kola lepe apaatrene lo fene ka hekö, pine laka hnei nyidrëti “hna ce trotro me Akötesie.” (Gen. 6:9) Hnei Noa hna inine hnyawa lo itre hna amekötine i Iehova kowe la hnepe lapa i nyidrë, ene pe hna hane amele angatr ngöne lo kola traqa lo Iwë. Qa ngöne lai, tune kaa la aqane tro sa nyitipu Noa me hnëkëne fe la hnepe lapa së tro sa hane mele pe elanyi ngöne la kola lepe apaatrene la fene celë ka ngazo?
2 Atre Cainöjëne La Thiina Ka Meköt: Hnei Noa pala hi hna catre me xomihni ahoeane ngöne la 40 koi 50 lao macatre, ceitu me ketre “atre cainöjëne la thina ka meköt.” (2 Pet. 2:5) Ame la itre ka lapa easenyi nyidrë, ngacama hna ajojezi angatre hnene lo itre angela ka nyi ngönetrei ne atr me icilekeu, nge hnei angatre hna hnyima fë la maca hnei nyidrëti hna cainöjën. Ketre ceitune mina fe, ame ngöne la easa cainöj, tre, ijije tro sa ixelë memine la itre atr ka xele ma drei së me ihnyima sai, celë hi ewekë ka anyipicine laka calemi catre hë la pun kowe la fene celë. (2 Pet. 3:3, 4) Ngo thaa ceitu kö memine lo itre atr ne lo hneijine i Noa; ame enehila, nyimutre catre la itre ka hane kapa la maca jëne la itre trenge catre së, me hane ‘xötre’ kowe la hmi i Iehova. (Is. 2:2) Eje hi laka, tro hë sa ‘amele së kö me angetre drei së’ e hne së hna catre me xomihni ahoeane pala hi. (1 Tim. 4:16) Drei la ketre hnëqa ka sisitria catre kowe la itre keme me thin, ene la troa inine la itre nekö i angatr la enyipiewekëne la huliwa ne cainöj, jëne la hnei angatre hna qaja me jëne la tulu i angatr!—2 Tim. 4:2.
3 Hnei Nyidrëti Hna Kuca “Tune Hi Lai”: Hna amele Noa memine la hnepe lapa i nyidrë, hnene la hnei angatre hna xötrethenge hnyawa la hnei Iehova hna amekötin. (Gen. 6:22) Ketre, nyipi ewekë catre koi së enehila troa “canga deng” la hna amekötine hnene la Tusi Hmitrötr memine la hlue ka nyipici. (Iako. 3:17) Hnene la ketre keme hna xötrethenge hnyawa la itre mekune ka ixatua hna kapa qa ngöne la organizasio i Iehova. Drei la ketre ceitun, tune lo hna ahnith kowe la itre kem, hnei nyidrëti hna xomiujine la ini tusi ne la hnepe lapa ngöne la nöjei wiik, me hane cainöje trootro me angatr e nöjei mecixeni me sabath. Hnei nyidrëti mina fe hna ithöeëne la aqane ce cainöje i nyidrë memine la itre nekö i nyidrë ngöne la nöjei mecixeni me sabath. Ame la aqane cile huti nyidrë ngöne la troa kuca “tune hi lai,” tre, hetre thangane ka loi kowe la itre nekö i nyidrë, pine laka sikisi e angatr la itre ka kökötre hnyawa ngöne la ua, matre troa itre hlue i Iehova ka mele nyipici.
4 Nyipici, tro elanyi a canga traqa la pun kowe la fene celë. (Luka 12:40) Qa ngöne lai, maine tro sa nyitipu Noa me lapaune catre kowe la iamele, haawe, tro ha xecie hnyawa e kuhu hni së, laka itre ka hnëkë hë së memine la hnepe lapa së!—Heb. 11:7.