Göi Itre Icasikeu Ne La Huliwa

Koi 12 Januare Me Wiike Cili

Nyima 224

10 men: Itre Ithuemacanyi koi së. Iëne jë la Itre Hna Amekötiin qa hnine la Huliwa Ne Baselaia. Xome jë la itre mekun nyine ixatua ngöne la götrane 4, nge troa iamacanyin la aqane troa tro fë la zonal La Tour de Garde ne 15 Januare me Réveillez-vous ! ne 22 januare. Maine caasi hi la hna amaman, ngo loi e troa hamën lue eje asë. Thupene la hna isa kuca lai lue iamacany, amamane hnyawa jë la itre xaa götran ka lolo ne la aqane nyiqaane ithanata.

15 men: “Inamacan Ka Sisitria Qaathei Akötresie.”a Maine ijije hi la traem, sipone jë kowe la itre atren la icasikeu troa qeje mekune ngöne la itre xötr hna hamën.

20 men: Itre Itus Hne Së Hna Madrin Troa Kapa! Troa ce ithanatan. Hne së hna madrin troa kapa la lue itusi ka hnyipixe ngöne la ijine Kovasio Ne Distrik hna hape “Atrunyi Akötresieti Jë.” Ka ketrepengöne kö la ketre itus hne së hna troa xeen amë hnine la hna ami tusi së, ene lo itus hna hape “ Voyez le bon pays ” (Hanawang Lo Nöje Ka Lolo). Ame la kola fe la itus, tre kola mama hnyawa la itre götrane ka isapengöne ne lo Nöje Hna Thingehnaean ekö. Amamane jë la itre xaa ewekë ka mama ngöne la nöjei map ka isapengön ne la itus. Amamane jë la itre xaa aqane troa huliwan la itusi cili. Atreine mina fe tro sa akökötren la mele ne la itre nekö së ngöne la götrane la ua, e hne së hna xome la itre ini qa hnine la itus Écoute le grand enseignant. Qaja jë fe la itre xaa topike ka lolo hnine la itus, kola amamane la aqane tro la itre keme me thin memine la itre thöthi a kepe thangane ka loi qa ngön. Sipone jë kowe la itre atren la icasikeu troa hamë mekun, ngöne la aqane tro xome hnyawa angatre la itre itusi ka hnyipixe cili.

Nyima 186 me thithi ne nyipun.

Koi 19 Januare Me Wiike Cili

Nyima 95

5 men: Itre Ithuemacanyi koi së.

10 men: Kola Sa La Itre Hnyinge i Nyipunie. Cainöj ne la ketre qatre thup.

15 men: Itre ihaji koi së.

15 men: “Tune Kaa La Aqane Tro Sa Xatuan La Itre Trefën Trahmany Maine Föe Ka Thaa Hmi Kö?”b Troa ithanata memine la ala caas maine ala lue ka hane nyihlue i Iehova hë, hnene hi la aqane ujë ka lolo ne la itre föi angatr ka pane kapa hë la nyipici.

Nyima 73 me thithi ne nyipun.

Koi 26 Januare Me Wiike Cili

Nyima 158

12 men: Itre Ithuemacanyi koi së. Troa cile fë la hna ithingë. Amekunëne jë la itretre cainöj troa hamën la itre rapor ne hna cainöj ngöne la treu Januare. Xome jë la itre mekune nyine ixatua ngöne la götrane 4, iamacanyine jë la aqane troa tro fë la zonal La Tour de Garde ne 1 Febuare me Réveillez-vous ! ne 8 Febuare. Maine caa zonale hi hna amaman, ngo loi e tro ce hamën lue ej. Ame ngöne lai ketre aqane nyiqaane ithanata, tre troa iamacanyin la aqane troa tro fë la itre zonal kowe la atr ka lapa easenyi së.

15 men: Trongëne Jë La Wesi Ula i Akötresie Ngöne La Nöjei Drai Ne Mele Së. Cainöj nge troa ce ithanatan. Ithuecatre jë la itre trejine asë troa wange hnyawa pala hi la itre topik ne la drai hnine lo itus hna hape, Éxaminons les Écritures chaque jour — 2004. Ithanatane jë la itre mekune hna xome qa hnine la itre götrane 3-4. Hnyingëne jë kowe la itre atren la icasikeu la traeme ka lolo hnei angatr hna xom, matre troa ce wange la topik ne la drai. Ce ithanatane jë memine la ekalesia la topik ne la drai memine la itre mekune ka qejepengöne ej. Sipone jë kowe la itre atren la icasikeu troa hamë mekun ngöne la aqane tro sa trongëne hnyawa ngöne la mele së la ithuemacany hna hamën. Xatuane asë jë la itre trejin troa pane wange la aqane troa trongën la itre mekune hna hamën, ngöne la angatr a ce ithanatane ngöne la nöjei drai la topik.

18 men: Loi e Troa Thele Troa Lolo La Aqane Imelekeu Së Memine La Itre Ka Ce Hmi Me Easë. (Ite edomë 18:24; 27:9) Cainöj nge troa ce ithanatan la itre mekun hna eköth hnine la zonal La Tour de Garde ne 1 Diseba 2000, götrane 22-3. Ame la ketre manathith hna kapa qa ngöne la hmi ka nyipici, tre, ene laka hetrenyi la itre nyipi sinee e hnine ej. Atreine hi troa hamëne koi së la ketre ithuecatre ka tru hnene la itre ka ce icasikeu me easë, me ce cainöje me easë, me ce kuca la itre xaa ewekë ju kö. Tune kaa la aqane tro sa thele troa ce sinee memine la itre xan hnine la ekalesia? Wange hmaca ju la itre mekune hna eköhagen, hna hape, “Sikisi Lao Jëne Troa Cile Huti La Aqane Troa Ce Sinee Memine La Ketre Atr,” nge sipone jë kowe la itre atren la icasikeu troa hamën la itre mekun ngöne la aqane troa trongën la itre mekune asë cili ngöne la easë a ce mele memine la itre trejine me easë.

Nyima 177 me thithi ne nyipun.

Koi 2 Febuare Me Wiike Cili

Nyima 204

10 men: Itre Ithuemacanyi koi së. Qaja jë la itus hna troa tro fë ngöne la treu Febuare. Ce wange ju la itre aqane nyiqaane ithanata nyine troa xom matre troa tro fë la itus Approchez-vous de Jéhovah ; itre eje hnine la Huliwa Ne Baselaia ne Januare 2003 götrane 4.

20 men: “Loi e Tro Sa Wange Hnyawa La Aqane Tro Sa Huliwan La Traeme Së.”c Sipone jë kowe la itre atren la icasikeu troa hamë mekun ngöne la hnei angatr hna kuca matre thaa tro kö a xome la itre traeme göi itre huliwa ne ua hnene la itre huliwa ka thaa nyipi ewekë kö.

15 men: Nyitupu Paulo Jë Tune La Aqane Xome Angeic La Tulu i Keriso. (1 Kor. 11:1) Troa ce ithanatan. Hnei Paulo hna tui Iesu, ngöne laka hnei angeic hna thele la itre ijine troa anyipicin kowe la itre atr ka “iöhnyi me nyidë.” (Ite Huliwa 17:17) Nemene la itre ijine ka lolo koi së, troa kuca tui Paulo ngöne la teritoare së? Drei la itre hne së hna “iöhnyi” memin ngöne la easë a itö, maine ngöne la easë a huliwa maine ini pena, maine ngöne la easë a xomi kar? Drei la itre ka troa traqa koi së ngöne la hnalapa së? Sipone jë kowe la itre atren la icasikeu troa qaja la itre hnei angatr hna melën, ngöne lo angatr a cainöje kowe la itre atr hnei angatr hna iöhnyi memin ngöne la nöjei drai.

Nyima 151 me thithi ne nyipun.

[Ithuemacany]