‘Tro Angatr a Dreng Tune Kaa?’
1 Hnei Iesu hna qaja hnyawa ka hape: “Ijije troa pane cainöjëne la evangelia kowe la nöjei nöj’ asëjëihë.” (Mareko 13:10) Ngacama tru catre hë la hne së hna kuca troa cainöj, ngo nyimutre catr pala kö la itre atr, itre hadredre milio ka thaa hane sipu dreng la maca ka loi. Itre xaa mus a wathebon la huliwa së. Nyimutre la itre atr ngöne la itre nöj ka tru, kola kökötre nyimenyim la etrun. Qa ngöne lai, ‘tune kaa la aqane tro angatr a dreng?’—Rom. 10:14.
2 Nyipi Ewekë Tro Sa Lapaun Koi Iehova: Loi e tro pala hi së a mekun, laka, atre hi Iehova la alien la hni ne la nöjei atr asë. Thaa tro kö së a goeën la aqane mele ne la ketre atr, eje hi lai laka, maine angeic a thel la nyipici göi Akötresie hnene la hni ka menyik, haawe, tro kö angeic a öhne ej.—1 A. l. ite jo. 28:9.
3 Hna hnehengazon hnei Aberahama la pengön la itre atr ka mel e Sodoma me Gomora. Ngo hnei Akötresie hna qaja xeciën koi angeic, ka hape, thaa tro kö a lep apaatrenyi Sodoma ngacama treene hi lao atr ka meköt hnei Nyidrëti hna öhn. (Gen. 18:20, 23, 25, 32) Thaa hnei Iehova kö hna ce apaatren la itre ka meköt memin la itre atr ka ngazo, tune lo aqane amele Lota me itre nekö i angeic jajiny. —2 Pet. 2:6-9.
4 Hna mekun mina fe hnei Elisaia ka hape, angeic hmekuje hi la ka nyihlue ne la nyipi Akötresie. Ngo hnei Iehova hna qaja hnyawa koi angeic ka hape, thaa angeice caasi kö, nge ame la huliwa hnei angeic hna nyiqaane hë, tre tro kö a afenesine ej. (1 Ite jo. 19:14-18) Tune kaa fe la mel enehila?
5 Catre Pi Së Troa Huliwa i Akötresie: Tune kaa la etrun la nyine tro pala kö a kuca ngöne la fene hnengödrai, göi huliwa ne cainöj? Eje hi laka thatre kö së. Iehova la atrekë ewekën la huliwa cili, nge Nyidrëti a upe la itre angela troa elemeken ej. (Hna ama. 14:6, 7) Nyidrëti hmekuje hi la ka atre la etrun la huliwa ne cainöj, nyine tro pala kö a kuca ngöne la nöjei nöj asë. Iehova kö la mus, atreine hi tro Nyidrëti a kuca la itre aqane troa akökötren la huliwa ne cainöjën la maca ka loi, matre tro la itre atr ka ala nyim a “hane deng la wesi ula ne la maca ka loi qa ngöne la qeng, me lapaun,” nge eje hi lai laka, thatreine kö tro sa mekun la aqane tro Nyidrëti a eatrëne lai. (Ite Huliwa 15:7) Ame la hnei Iehova hna troa kuca, tre, kolo kö a troa tro thenge la pengö i Nyidrë, ene laka, Akötresieti Nyidrë ka ihnim, me ka inamacan, nge ka meköt.
6 Ketre madrin ka tru la troa huliwa thenge la aja i Iehova, ene la troa kuca la hne së hna atrein matre tro fe la itre xaa atr a hane dreng la maca ka loi.—1 Kor. 9:16.