Amë Panëne Jë La Baselaia
1 Thaa ewekë ka hmaloi kö la troa amë panën la Baselaia i Akötresie me troa lapa xome hnyawa, pine laka, easë a cile kowe la itre ejolen göi mani, maine itre xaa jole ju kö. Tune kaa la aqane tro sa amë panën la Baselaia, ngöne la kola traqa la itre jol kowe la mele së? Tune kaa së ngöne la kola hamën koi së la ketre huliwa ka troa xom la traeme së, matre triane pë hë së la itre icasikeu, maine ka sewe së pena troa hane sin la huliwa ne cainöj? Hapeu, tro kö së a amë pinën ngöne la mele së la Baselaia, nge pa i huliwa pena ha?
2 Nyipi Ewekë Troa Catre Lapaun: Maine kola tupath la lapaune së hnene la itre ewekë ka traqa kowe la mele së, thaa tro pi kö së a thëthëhmin la itre hna thingehnaean hnei Iehova memin la aqane qaja xeciën hnei Iesu laka tro Iehova a xatua së e hne së hna thel troa amë panën la Baselaia. (Sal. 37:25; Mat. 6:31-34) Atreine hi troa thung la lue meke së hnene la itre iajojezin la fen, memin la itre iakötrë, ene pe troa sewe së troa amë panën la Baselaia. Itre xan a nyipi ewekën la itre göhnë ka tru ngöne la hna huliwa, maine thele manie pena, kösë sipu aja ka nyipie wekë hi lai kowe la mele i angatr. Ngo tui Paulo, nyipi ewekë tro së a pane waipengön la ka nyipi ewekë kowe la mel.—Fil. 3:7, 8.
3 Nyipi Ewekë Kö Troa Amekötin La Aqane Waiewekë? Hna qaja hnene la ketre trejin ka hape: “Ame ni, tre, huliwange hi, celë hi ka nyipi ewekë catr kowe la meleng. Eni pe kö a mekun ka hape, atreine hi tro ni a ketre Atre Anyipicin, nge ngöne la ketre götran, eni a nue asë la itre hawang ka nyimutre kowe la huliwang.” Ngo eje pala hi thei eahlo la mekun laka, atreine hi tro eahlo a hane xom la itre hawa ka nyimutre troa nyihlue i Iehova. Ngöne la ketre ijin ka ijij, tre eahlo a nue pi la huliwa i eahlo, ke kola öhn laka, ej a sewe eahlo troa kökötr ngöne la götran la ua. Ene pe eahlo a hane nue apexejene jë la mele i eahlo kowe la huliwa ne Baselaia, öni eahlo ka hape: “Enehila, drenge hi ni laka, lolo la meleng xajawa i Iehova, nge celë hi ka nyipi ewekë catr kowe la mel.”
4 Easë a madrin laka, nyimutre la itre trejin ka nuetrij la itre huliwa ka tru me itre aqane troa thele mani, nge hnei angatr pena ha hna ahmaloeën la mele i angatr matre troa hane xom la huliwa ne cainöj ngöne la drai ka pexej. Hna kuca lai hnene la itre thöth, me itre drikona me itre qatre thup ka pë föen, me sin la Ini Thatraqane La Cainöj, nge angatr a madrin la hnëqa ka lolo hna amë qëmeke i angatr. Qa ngöne laka angatr a xom la tulu ka sisitria hna amë pe hnei Paulo, haawe, hetrenyi hë thei angatr la mejihni, tre, angatr a melën la ka ijij ngöne la götrane ngönetrei—1 Kor. 11:1; 1 Tim. 6:6-8; Heb. 13:5.
5 Maine troa hnyima fë la aqane mele së hnene la fen, ngo ame pe ke Iehova a amanathithi së. (1 Kor. 1:26-31) Hapeu, nyine ithuecatr koi së la troa atre ka hape, atreine hi tro Nyidrëti a hane ië së me xatua së troa kuca la huliwa i Nyidrë? Ijine tro hi së la a cainöjën laka cile hë la Baselaia i Akötresie, tre easenyi hë matre afenesine pi la huliwa celë. Qa ngöne lai, loi e tro së enehila a amë panën la Baselaia ngöne la mele së.