Nyipici, Troa Eatre Asë La Nöjei Hna Perofetane Hnei Akötresie!
1 Hna wangatrune pala hi hnene la Itretre Anyipici i Iehova, la itre hna perofetane hnine la Tusi Hmitrötr. Celë hi matre, easë a madrine pine laka, ame lo taane la kovasio ne distrik, ke hna hape “Itre Ewekë Hna Thingehnaeane Hnei Akötresie.” Hne së hna lapa treqene me atre laka, ase hë Iehova xeene thatraqai së la “xeni ngöne la nyipi ijin.” (Mat. 24:45) Thaa tro jë kö Nyidrëti a thoi koi së.
2 Itre Mekune Ka Tru Ne La Kovasio: Ame la cainöje kii ne la drai ka tru, ke, “Loi e Troa Wangatrune La Itre Ewekë Hna Thingehnaeane Hnei Akötresie,” hna hane qaja fe la eloine koi së lo kola ketre pengöne ekö hnei Iesu. (Mat. 17:1-9) Hna amamane hnene la ewekë cili laka, nyipici, easë enehila a troa qëmeke kowe la itre drai ka sisitria, pine laka, easenyi catre hë la pun, nge calemi hë la fene ka hnyipixe! Nyipi ewekë catre fe tro së a e pala hi la Wesi Ula i Akötresie. Hna hamëne jëne la ketre symposium, hna hape, “Ajane Jë Troa e La Wesi Ula i Akötresie;” celë hi itre mekune nyine ixatua, matre troa hetre thangane ka loi, nge madrine së troa e la Tusi Hmitrötr.
3 Ame ngöne la hnaipajö ne mecixen, hne së hna ce wange la itre kepine matre loi e troa xecie koi së laka, easë a melëne la itre drai hnapin. Hapeu, thaa thëthëhmine asë kö së itre ej? Ame ngöne lo hmakanyi ne mecixen, hne së hna trotrohnine jëne lo hna perofetane hnei Habakuka, ka hape, ceitune hi la hneijine së, memine la hneijine i angeic; nge hetrenyi la itre ewekë ka sisitria catr ka troa traqa, ngöne la Iehova a troa apaatrene la itre atr ka ngazo, me amelene la itre ka meköt. Hapeu, trotrohnine kö së lo darame göi Iakobo me Esau? Loi e tro pala hi së a thele la itre manathithi qaathei Iehova, me xomihnine la itre atr ka meci la mekun, nge ka xele ma wai së.
4 Itusi Ka Hnyipixe Nge Ka Nyipi Lolo: Drei lo madrine së troa kapa la itusi ka hnyipixe, Prêtons attention à la prophétie de Daniel ! Maine jë ase hë epuni hane e la itusi ka lolo cili. Hna qaja hnene la trejine ka amamane eje ka hape: “Itre xaa hnepe götrane pe hi, ngo ame asë hi la itre hna perofetane hnei Daniela, ke, eatre asë hë.” Hapeu, thaa nyine amamane kö lai laka, easenyi catre hë la pun?
5 Hna acatrene hnyawa hnene la porogarame ne la kovasio, la mejiune së laka, tro asë hi a eatre lo nöjei hna thingehnaeane hnei Akötresie, lo itre munëne pe. Qa ngöne lai, hetre ajane fe the së troa catre thuemacane la itre xaa atr, la itre hna thingehnaeane hnei Akötresie!