Nyipunieti Kö a Trongën La Hnei Nyipunieti Hna Inin Ngöne La Kovasio Ne Distrik, “Itretre Inin La Wesi Ula i Akötresie”?
1 Atreine hi troa öhn hnene la itre atr ka sin la kovasio ne distrik ne la macatre celë laka, kola thel hnene la nöje i Iehova troa eatrën la hnëqa i angatr, ene la troa tro fë la Wesi Ula i Akötresie. (Mat. 28: 19, 20) Ame hë la epun a bëek kowe la itre hnalapa i epun, nemen la itre nyipi mekun hnei epun hna ajan troa trongën ngöne la sipu mele i epun, me ngöne la hna cainöje trootro?
2 Ka Nyipi Ewekë Catr La Itre Xötr Ngöne La Easë a Hamën La Ini: Ame la pane taan la drai tre, kola troa ce ithanatan atrun la 2 Timoteo 3: 16. Hna amaman hnene la cainöj kii laka, loi e troa “Pexej La Itre Jia ne Huliwa Së Itretre Inin La Wesi Ula i Akötresie,” nyipi ewekë tro sa wangatrun catrën la Wesi Ula i Akötresie, me metrötrën pala hi la Tusi Hmitrötr hune la mekune ne la itre atr maine qene nöje i angatr, me huliwane lapaan ej. Loi e tro mina fe së a thithi pala hi o drai, me sipon la uati hmitrötr troa xatua së troa cainöje trootro, me catre eën la itre wene ne la ua, ene la ihnim. Nge loi e tro fe së a nue la organizasio i Iehova e celë fen, troa ini së ngöne la nöjei icasikeu ne la ekalesia, matre tro së a itretre tro fë hnyawa la maca ka loi.
3 Hnene la cainöj hna ithewethewen, hna hape, “Pane Ini Së Jë Qëmeken Tro Së a Inin La Itre Xan,” hna qaja la enyipi ewekëne la tro së a amamai tulu ngöne la (1) troa fedre hnyawa kowe la itre trenge wathebo i Akötresie, ngöne la nöjei götran la thiina ne la Keresiano, (2) troa majemin troa inin la Wesi Ula i Akötresie, me (3) thipetrij la itre aqane ujë me itre aliene hni me mekun hnei Diabolo hna troa xom matre troa amenu së. Thupene lai, hne së hna kapa la itre ixatua, göi troa thupën la itre hnepe lapa së qa ngön la aqane catre iajojezin la fen ngöne kuci huliwa ka sis. Hna ithuecatre fe kowe la itre keme me thin troa amamai tulu, ngöne la aqane troa thipetrij la itre götran la ketre film ka amamai kuci ngazo, ngacama ketre hnepe ijin ka co catr, nge ketre, troa thupën la aqane tro la itre nekönatr a huliwan la Internet me wai televizio. Nemen la itre mekun hna kapa qa ngön la drai ne asabele ne drai ka tru, a hnei nyipunieti hna nyiqaan troa trongën.
4 Ame la cainöj tixenuë ne la drai, tre, eje a troa akökötren la aja së troa lapa xom la lai i Iehova, troa qale catre kowe la itre hna iën ka mele nyipici koi Akötresie, me troa ce eköth la tingeting memine la nöje i Iehova. Ase hë epuni e la itus ka hnyipixe La prophétie d’Isaïe, lumière pour tous les humains II ?
5 Troa Atreine Hnyawa Inin La Itre Xan: Ame la topik ne la hnaaluene drai ne kovasio, tre 2 Timoteo 2:2. Ame ngöne la epuni a dreng la cainöj hna thawathawa ngöne la mecixeni hmakany, hane kö epuni xom la itre xaa mekun ngöne la aqane (1) thel la itre atr ka hetre hni ne ajan, (2) troa akökötren la aja ka eje thei angatr, me (3) troa ini angatr troa trongën la nöjei hna amekötin hnei Keriso? Epuni kö a trongën la hnei epuni hna inin, ene la troa amaman la ketre mekun qa hnin la Tusi Hmitrötr, me troa hnëkën hnyawa la itre mekun hna ajan troa ithanatan ngöne la kola troa iwai hmaca?
6 Hna amaman ngöne la porogaram ne hnaipajö, la enyipi ewekëne troa xötrethenge pala hi la tulu ne la Atre Ini Ka Tru, ene Iesu. Ngöne nemen götran, epuni a catr thel pala hi troa tui nyidrë? Qa ngön la hnei epuni hna inin ngöne la hnaaluene cainöj hna ithewethewen ne la drai, tune kaa, drenge hi epun laka, ijjije tro epuni a “Kapa La Itre Manathith Qa Ngön La Ini Qaathei Akötresie”? Nemen la itre mekun nyine ixatua hnei epun hna trongën matre troa thele troa trotrohnine hnyawa me drenge hnyawa ngöne la epuni a ketre inin la Tusi Hmitrötr, me sine la itre icasikeu ne la ekalesia?
7 Eje hi laka, ame la hna amekötin ka troa traqa hna hape, Tirez profit de l’École du ministère théocratique, tre kola xatua së troa kökötr ngöne la aqane tro së a ithanata, me inin la Wesi Ula i Akötresie. Loi e troa wangatrun hnyawa la aqane tro fë la itre trenge ewekë, ke kola troa qejepengöne jëne lai, la itretre nyihlue i Akötresie ngöne la hneijine i Tusi Hmitrötr. Kola amaman ngöne la nöjei ini e hnine la itus ka hnyipixe thatraqai ini, la itre hne së hna ajane troa kuca, la kepin matre ka nyipi ewekë catr, memine la aqan troa kuca ej. Hetrenyi fe e hnin la itre qa nyine troa kuca. Ame koi itre sör, tre 29 lao jëne cainöj hna troa xome qa hnin nyine nyitrepen la itre xötreqa nyine tro angatr a hnëkën. Tro kö a traqa lo itre xaa hna amekötin ngöne la ijine ka ijij, ngo troa qaja itre ej ngöne la ijine ini. Hapeu, ka majemin epun troa isa inin me hnëkë hnyawa matre troa kepe thangane ka loi qa ngöne la Ini Ne Cainöj Qaathei Akötresie e nöjei wiik?
8 Loi Itretre Ini Së Nge Kola Easenyi La Ijin: Kola hnëkë së kowe la drai ne kovasio e sabath, jën la tusi Heberu 5: 12. Ame ngöne la hmakany, tre troa cile fë la ketre cainöj hna thawathawa, hna hape, “Kola Hnëkë Së Hnene La Hna Perofetan Hnei Malaki Kowe La Drai i Iehova;” hna xatua së troa nue la mele së koi Akötresie, nge troa methinën la nöjei aqane mele ihnihni, matre ijije fe koi së troa hane mele pe qa ngön la drai i Iehova, drai ka tru nge hna xouen. Hna amaman hnene la daram, hna hape, “Metrötrëne Jë La Musi Iehova,” la aqane uku Kora me itre sine xöle i angeic, hnene la pi draië, me pi hun, me izalukeu, me thi lapa, troa icilekeu me Iehova. Tro la cainöj hna troa cile fë thupene lai, a amamane hnyawa la enyipi ewekën enehila troa ipië kowe la mus i Akötresie e hnine la itre hnepe lapa, me hnine mina fe la ekalesia. Tro la cainöje kowe la ka ala nyim, hna hape, “Drei La Itre Ka Inine La Nyipici Kowe La Nöjei Nöj?,” a anyipicin laka, Itretre Anyipici Iehova la ka kuca thenge lai, thaa ceitui angatre kö memine la itre nöj ka uun ka hape angatr la itre keresiano laka, göi tro hi a qaja ka hape kola hane inine la nyipici ngöne la Tusi Hmitrötr.
9 Haawe kola mama hnyawa ka hape, Iehova a ini së matre troa itre ka atrein tro fë hnyawa la Wesi Ula. Loi e trongën hnyawa së la hne së hna inin, me ‘wang la aqane ini së; cile huti ju së kowe lai; ke maine tro së a kuca lai tro së a amele së kö, me angate fe hna drei së.’ —1 Tim. 4: 16.