MEKENE 07
Pengöi Iehova Me Itre Thiina i Nyidrë
Tune kaa la aqane goeë Akötresieti hnei epun? Maine jë ame koi epun, tre ketre atr hnei epuni hna metrötrën. Ngo ka nanyi Nyidrë tune la enanyine la itre wëtresij. Maine pena, epuni a mekune ka hape, tha ketre atre kö Nyidrë, ngo ketre trengecatre pe, ceitu memine la ketre enyi ka tru. Drei hö lae Iehova? Ame e hnine la Tusi Hmitrötr, Iehova a amamane la itre thiina i Nyidrë, me qaja ka hape, Nyidrëti a meku epun.
1. Pine nemen matre thatreine kö së troa öhnyi Akötresie?
“Ame Akötresie tre, ketre U.” (Ioane 4:24) Tha ka ceitu kö la ngönetrei Nyidrë me itre atr. Ame Nyidrë tre, ketre u ka mel e hnengödrai ngöne la ketre götrane hna thatreine öhne hnene la itre atr.
2. Nemene la itre xaa thiina i Iehova?
Thatreine kö la atr troa öhnyi Iehova, ngo e tro sa thele troa atre Nyidrë, tro hë easë a hnimi Nyidrë, nge tro ha mama koi së la itre thiina ka lolo i Nyidrë. Öni Tusi Hmitrötr: “Iehova a ajane la meköt, nge tha hna tije kö la ite [ka mele nyipici].” (Salamo 37:28) Ka “nyipi menyike la ihnimi i Iehova nge ka iutipi,” kowe la itre atr ka akötr. (Iakobo 5:11) “Easenyi Iehova koi angetre ka akötr me itre ka kucakuca.” (Salamo 34:18, MN) Atre fe hi epuni ka hape, ame la itre aqane ujë së tre, kola ketri Iehova? E tro sa kuca la itre huliwa ka ngazo, tro hë sa akötrë Nyidrë. (Salamo 78:40, 41) Ngo maine tro sa kuca la itre huliwa ka loi, tro hë a amadrinë Nyidrë.—E jë la Ite Edomë 27:11.
3. Tune kaa la aqane amamane Iehova la ihnimi Nyidrëti koi së?
Ame la thiina ka sisitria i Iehova, ke, “ihnim.” (1 Ioane 4:8) Kola mama la ihnimi Nyidrë ngöne la Tusi Hmitrötr, me jëne la itre ewekë hnei Nyidrëti hna xup. (E jë la Itre Huliwa 14:17.) Pane mekune jë la aqane xupi së hnei Nyidrë. Hnei Nyidrëti hna aijijë së troa goeëne la nöjei pengöne han ka mingöming, troa drenge la ketre miuzik ka lolo, me troa tupathe la itre xen. Aja i Nyidrëti tro sa mele madrin.
TROA CE ITHANATAN
Tro sa wange la aqane aeatrëne Iehova la aja i Nyidrë. Nge tro fe sa wange la itre thiina i Nyidrë ka mingöming.
4. Ame la uati hmitrötr, ke mene i Akötresie
Easë a huliwa hnene la lue wanakoime i easë. Nge ame Iehova, Nyidrëti a huliwa jëne la uati hmitrötre i Nyidrë. Tusi Hmitrötr a qejepengöne ka hape, ame la uati hmitrötr, ke tha ketre atre kö. Ngo kolo pe a qaja la mene i Akötresie, hnei Nyidrëti hna huliwane matre eatrëne la aja i Nyidrë. E jë la Luka 11:13 me Itre Huliwa 2:17, nge ce ithanatane jë cahu itre hnying:
Tro Iehova a “hamëne” la uati hmitrötre i Nyidrë, e hne së hna sipon. Matre ijije kö tro sa qaja ka hape, ame la uati hmitrötr ke, ketre atr? Pine nemen?
Iehova a huliwane la uati hmitrötre i Nyidrë troa aeatrëne la itre aja i Nyidrë. E jë la Salamo 104:30 me 2 Peteru 1:20, 21, nge ce ithanatane jë cahu hnying:
Hnei Iehova hna huliwane tune kaa la uati hmitrötre i Nyidrë?
5. Ka lolo la itre thiina i Iehova
Ngacama ekö hë Mose nyihlue i Iehova, ngo ame la ketre ijin, hnei angeice hna thele troa atre hnyawa la Akötresi angeic. Öni angeice jë hi koi Iehova: “Eni a sipo nyipë, pane amamai ni jë la itre aqane ujë i nyipë, matre tro ni a atrepengöi nyipë.” (Esodro 33:13, MN) Hnei Iehova hna amamai Mose la itre xa thiina i Nyidrë. E jë la Esodro 34:4-6, nge ce ithanatane jë cahu itre hnying:
Nemene la aqane amamane Iehova la sipu pengöi Nyidrë koi Mose?
Nemene la itre thiina i Iehova ka ketri epuni catr?
6. Iehova a mekune la itre atr
Ame ekö, hna qanangazone la nöje i Akötresie e Aigupito, nge akötre catre angatr. Tune kaa Akötresie ngöne la ijine cili? Xome jë la Esodro 3:1-10 nge drenge ju la kola e la itre xötr maine pena e jë la itre xötr. E thupen, ithanatane jë cahu itre hnying:
Nemene la pengöi Iehova la Nyidrëti a goeëne la itre atr e akötr?—Wange ju la xötre 7 me 8.
Ame koi epun, atreine kö Iehova xatuane la itre atr? Pine nemen?
7. Kola mama la itre thiina i Iehova jëne la itre hna xup
Hnei Iehova hna amamane la itre thiina i Nyidrë, jëne la itre ewekë hnei Nyidrëti hna xup. Goeëne jë la VIDEO. Nge e jë la Roma 1:20, nge ce ithanatane jë cahu hnying:
Nemene la itre thiina i Iehova ka mama koi epun ngöne la itre ewekë hnei Nyidrëti hna xup?
HNE SË HNA MAJEMINE DRENG: “Ame Akötresie, tha atre kö, ngo ketre men.”
Nemene fe la mekuna i epun?
Hnauëne la epuni a qaja tun?
HANE HI LA HNE SË HNA CE WANG
Ame Iehova ketre u Nyidrë, nge nyimutre la itre thiina i Nyidrëti ka lolo, tune la ihnim.
Nyine Amekunën
Pine nemene matre thatreine kö së troa öhnyi Iehova?
Nemene la uati hmitrötr?
Nemene la itre xaa thiina i Iehova?
ITRE XAA NYINE WANG
Thele jë troa atre Iehova hnyawa jëne la 4 lao thiina i Nyidrë ka sisitria.
Goeëne ju la aqane anyipicine Tusi Hmitrötr laka, tha Akötresieti kö ngöne la nöjei ewekë, maine nöjei götran asë.
Goeëne ju la kepin matre Tusi Hmitrötr a aceitunëne la uati hmitrötr, me lue iwanakoime i Nyidrë.
Hnene la ketre atre ka timek hna mekune ka hape, tha Akötresieti kö a hane meku angeic. Ngo e thupen, saze hë la mekuna i angeic.
“J’ai maintenant le sentiment de pouvoir aider les autres” (Ita Ne Thup 1 Okotropa 2015)