Catre Jë Thel Troa Atrepengöi Iehova

1. Tune kaa së la easa mekun la inamacan me atrehmekun, memine la nöjei ewekë hnei Iehova hna xup?

TUNE kaa eö la eö a mekun la etrune la inamacane i Iehova, me edraiëne la atrehmekune i Nyidrë memine la itre hnei Nyidrëti hna xup? Easa hain la easa mekun la Atre Xupi së. Maine jë, casi hi la mekuna së me Paulo aposetolo lo angeic a hape: “Nyipici, ka pë sane la manathith, me inamacan, me ini hna kapa qaathei Akötresie! Pëkö ka trotrohnine la itre iameköti nyidrë! Nge pë fe kö ka hane öhn la etrune la itre huliwa i nyidrë!”​—Roma 11:​33, 34.

2. Nemene la ka amaman ka hape, ijije hi tro sa atrepengöi Iehova?

² Ngacama tha tro kö sa atre asë la pengöi Iehova, ngo ijije hi tro sa atre la itre xaa thiina i Nyidrë. Öni Dravita joxu koi Solomona, nekö i angeic: “Thele jë troa atrepengöne la Akötresi ne la keme i ö, nge nyihlue i nyidrëti jë hnene la hni ö ka pexej . . . e tro eö a thele nyidrë, tro hë nyidrëti a mama koi ö.” (1 Aq. Jo. 28:9) E thupen, öni Ioane aposetolo kowe la itre keresiano, hne së hna kapa “la inamacan matre atreine jë së atrehmekune la Atre ka nyipici.” (1 Ioa. 5:​20) Nge öni Iesu, ijije hi troa atrepengöi Iehova hnene la itre “atr hna inin hnene la Nekön.”​—Mat. 11:27.

3. Nemene la hne së hna troa ce wang ngöne la tane mekune celë?

³ Ame la itre hlue i Iehova, ke atre Nyidrëti hi hnei angatr. Ngo hetre xaa ewekë pala kö nyine tro angatr a inin göi Nyidrë. (Ioa. 17:3) Eje hi, easë pala hi a inine la aqane tro sa amadrinë Nyidrë, me aqane tro sa acatrene la mejiune së koi Nyidrë. Tro sa ce wang la köni hnying nyine tro sa isa mekun, ngacama ekö ju hë së maine ka xötrei nyihlue i Nyidrë: Kola hapeu la troa atrepengöi Iehova? Pine nemene matre nyipiewekë tro pala hi sa thel troa atrepengöi Nyidrëti hnyawa? Nge nemene la aqane tro sa kuca?

KOLA HAPEU LA TROA ATREPENGÖI IEHOVA?

4. Kola hapeu la troa atrepengöi Iehova?

⁴ Kola hapeu la troa atrepengöi Iehova? Loi e tro sa mekun lo hnei Iehova hna qaja kowe la angetre Iudra ka bëek qa Babulona. Öni Nyidrë: “Tro ni a hamë angatre la hni ka ajan troa atrepengöi eni.” (Iere. 24:7) Atre Iehova hi hnene la angetre Iudra ka bëek qa Babulona. Ngo tro angatr a atrepengöi Iehova hnyawa, e tro angatr a hetre hni ka ajan. Eje hi, loi e tro la itre aliene hni me itre aja i angatr a uku angatr troa atrepengöi Iehova. Önine la ketre itus: “Isapengöne catr la troa atre la itre ewekë göi Akötresie, memine la troa atre Akötresie. Ketre tun, isapengöne kö la troa e la itre itus ka qeje ihnim, memine la troa hnime la föi easë.” Tha ijije kö tro hi a atre la ëje i Akötresie, loi e tro sa atre hnyawa la pengöi Nyidrë.

5. Nemene la hne së hna inin qa ngöne la hna melën hnei Iosea joxu göne la aqane tro sa atrepengöi Iehova?

⁵ Ame la easa atre Iehova, easa öhne la itre ewekë ka amadrinë Nyidrë me itre ewekë hnei Nyidrë hna xele ma wang. Tro sa ce wang la pengöi Iosea joxu. Öni Tusi Hmitrötr: “Ngöne la kola 8 lao macatre ne mus i nyidrë, ngacama nekönatre pala kö Iosea, hnei nyidrëti hna nyiqaane thele la Akötresi Dravita qaaqaa i nyidrë.” (2 Aq. Jo. 34:3) Ngo tha hnei Iosea kö hna inine hi la hna qaja hnei Tusi Hmitrötr, hnei angeice fe hna trongën. Jëne Ieremia perofeta, hnei Iehova hna qeje Iosea ka hape, “hnei nyidrëti hna isigölin la meköt me thiina ka meköt” me “cilëgöline la emekötine la itre ka akötr me itre ka pë ewekë.” Nge öni Iehova hmaca jë hi: “Hapeu, tha celë kö aqane ujë ne la itre ka selën ka hape, ka atre ni?”​—Iere. 22:​15, 16.

6. Thenge la Salamo 9:​10, nemene la ewekë ka traqa la easa atrepengöi Iehova hnyawa?

⁶ E jë la Salamo 9:​10. Ame la easa atrepengöi Iehova hnyawa, ke easa mejiune catr koi Nyidrë. Celë hi hna melën hnei Paulo. Ame lo kola akalabusi angeic qëmekene tro angeic a mec, öni angeic: “Tha hmahma kö ni. Ke atre kö ni lo atr hnenge hna mejiune kow.” (2 Tim. 1:​12) Pine laka hnei Paulo hna atrepengöi Iehova hnyawa, me öhne la ixatua i Nyidrë qaan ekö, matre ka catre la mejiune i angeic koi Nyidrë. Önine la ketre ithuemacanyi göne la xötre celë ka hape: “Ka mejiune Paulo laka, tha tro kö Iehova a thëthëhmi angeic memine la itre huliwa i angeic, nge tro kö Nyidrëti a amele angeice hmaca.”

HNAUËNE LA TRO PALA HI SA ATREPENGÖI IEHOVA HNYAWA?

7. Nemene la ewekë ka traqa la easa nyihluei Iehova qaan ekö?

⁷ Ame lo easa xötrei atre la nyipici, hne së hna isin matre troa atrepengöi Iehova hnyawa. Ngo maine jë kola tro la itre drai, nge kösë tha easë hmaca kö a nue trengecatr tun ekö. Pine nemen? Maine jë, ame la easa e la Tusi Hmitrötr ngöne la hnalapa së maine ngöne la itre icasikeu, ke easa thele la itre mekun ka troa xatua së, maine xatua itre xan. Nge ka lolo catre lai, ke celë hi hna ithuecatre koi së hnei Tusi Hmitrötr. (2 Tim. 3:​16, 17) Ngo tha tro kö sa thëthëhmine laka, ame la ka sisitria la easa e Tusi Hmitrötr, ke ene la troa atrepengöi Akötresie. (Sal. 25:​8-10) Matre ame la easa e Tusi Hmitrötr, nyipiewekë tro fe sa hnying ka hape, ‘Nemene la ini hnenge hna xom göi Iehova?’a

8. Tune kaa la imelekeu së me Iehova, la easa atrepengöi Nyidrëti hnyawa? (Salamo 73:​24-28)

⁸ Ame la easa atrepengöi Iehova hnyawa, ke kola catrecatre la imelekeu së me Nyidrë. Tune kaa easë thupene la easa e Tusi Hmitrötr, maine goeë JW Télédiffusion, maine sin la ketre asabele? Easa easenyi catr kowe la Keme së. Pine nemen? Pine laka hetre hne së hna inine göi Nyidrë, matre kola uku së troa atrunyi Nyidrë me olene koi Nyidrë. Casi hi la mekuna së memine la atre cinyihane la Salamo, lo angeic a lapa mekune la itre thiina i Iehova. Öni angeic: “Akötresie la giti ne la hning, me edröng epine palua.” (E jë la Salamo 73:​24-28.) Ame asë hi la trengecatr hne së hna nu troa atrepengöi Iehova, ke kola acatrene la hni ne ole së koi Nyidrë, nge hna hane aijijë së troa nyisinee i Nyidrë.

9. Nemene la ka xatua së troa axecië mekune ka loi? Qaja jë la ketre ceitun.

⁹ Ame la easa “meku” Iehova, ene la troa mekune lo itre hne së hna inine göi Nyidrë, me thangane la itre huliwa së koi Nyidrë, ke kola xatua së troa axecië mekune ka loi. (It. Ed. 3:​5, 6) Tro sa ce xome la ketre ceitun: Ala nyim la itre trejin ka amë la foto ne la föi angatr ngöne buro, maine portefeuille, maine ngöne telefon. Celë hi ka xatua angatr troa mekune lapane la föi angatr, me xome la itre mekun ka troa amadrinë angeic, nge tha tro kö a akötrë angeic. Ketre tun, maine tro pala hi sa meku Iehova, tro fe sa xome la itre mekun ka troa amadrinë Nyidrë.​—Sal. 19:​13, 14.

10. Maine tro pala hi sa thel troa atrepengöi Iehova hnyawa, nemene la hne së hna troa atreine kuca?

¹⁰ Atreine hi së nyitipune la itre thiina i Iehova, ke hna xupi së hnaiji Nyidrë. (Gen. 1:​26) Maine tro sa atre hnyawa la itre thiina i Nyidrë, tro sa atreine nyitipu Nyidrë. Hnei Iesu hna amekötine la itretre cinyihan me itre faresaio, ke tha hnei angatre kö hna nyitipune la itre thiina i Iehova. Ka sisitria catre kö koi angatr la itre götrane ka co ne la Wathebo, “ngo tha nyipiewekëne kö [angatr] la itre götrane ka tru ne la wathebo, ene la meköt, me utipin, me inyipicikeu.” (Mat. 23:23) Tha tro kö sa nyitipune la itre he ne hmi, ngo loi e tro pe sa thel la itre thiina i Iehova ka mama ngöne la itre wathebo, me itre trepene meköti Nyidrë. Celë hi ka troa xatua së troa nyitipune la itre thiina i Iehova.​—1 Ioa. 4:​8, 11.

AQANE TRO SA ATREPENGÖI IEHOVA HNYAWA

11. Drei la ka ini ö la pengöi Iehova?

¹¹ Drei la ka ini ö la pengöi Iehova? Maine jë hna hetru eö ngöne la nyipici. Hnene la kem me thine i ö hna qaja koi ö la itre hna melën e hnine la Tusi Hmitrötr, memine la itre thiina i Akötresie ka mama ngöne la itre hna xup. Maine pena, hnei ö hna nyiqaane ini Tus memine la ketre Temoë Iehova. Jëne la itus Gojenyi Kowe La Nyipi Mel!, hnene la ketre trejin hna ini ö la itre thiina i Iehova ka mama ngöne la Tusi Hmitrötr me ngöne la itre hna xup.b (Neh. 8:8; It. Hu. 14:17) Ngo tro pena sa ce wang la aqane tro pala hi sa atrepengöi Iehova hnyawa.

12-13. Nemene la ini hne së hna xome göi Iehova la easa e Tusi Hmitrötr? Qaja jë la ketre ceitun. (Ieremia 39:​15-18) (Wange ju fe la icetrön.)

¹² Nemene la itre xaa aqane troa atrepengöi Iehova hnyawa? Ame la hnapan, ke troa e me inine la Tusi Hmitrötr. Ame itre xaa ijin, Tusi Hmitrötr a qaja hnyawan la itre thiina i Iehova. (Eso. 34:​6, 7) Ngo eje fe a qaja la itre hna melën hnene la itre atr, me itre mekun hnei angatr hna xom. Matre ame la eö a e la itre hna melën cili, ke thele jë la thiina i Iehova ka mama.

¹³ Hane hi la ketre ceitun. Ame la eö a e la Ieremia 38:​6-13, tro eö a öhn laka, hnei Ebede-Melek qa Aithiope hna xatua Ieremia perofeta. Maine jë, canga mekune hi ö la aqane tro eö a nyitipune la catr me ihnimi Ebede-Melek. Ngo öhne fe kö eö la itre thiina i Iehova ka mama ngöne la hna melëne cili? (E jë la Ieremia 39:​15-18.) Nemene la itre xötr ka amaman ka hape, hetre hni ne ole i Nyidrë, nge ka meköt me ka tha ië hna hnime kö Nyidrë? Nemene la itre xaa thiina i Nyidrë ka mama ngöne la hna melëne cili? Ame la eö a e la Tusi Hmitrötr, hnyinge jë ka hape, “Nemene la itre thiina i Iehova hnenge hna öhn e celë?” E thupen, olene jë nge qaja jë la etrune la ihnimi epun koi Nyidrë.

14. Pine nemen matre loi e tro sa lapa mekun la itre ewekë hnei Iehova hna xup?

¹⁴ Ame la hnaaluene aqane tro sa atrepengöi Iehova hnyawa, ke ene la troa lapa mekun la itre hna xup. (Sal. 145:​9, 10) Ngo tha tro kö sa goeëne hi la itre hna xup. Eje hi, itre xan a kuca la itre ini ka tru matre atrepengöne la itre hna xup, ngo tha atrehmekune kö angatr laka, hetre Akötresie! Öni Paulo, “Kola mama cile la itre thiina i nyidrë qaane lo kola xupe la fen, ke itre ej a mama jëne la itre ewekë hna xup.” (Roma 1:​20) Önine la ketre Tusi Hmitrötr ka hape, ijije hi tro sa öhne la itre thiina i Akötresie “e ka atreine së waiewekë.” Maine tro sa atreine waiewekë, ene la troa lapa mekun la hne së hna goeën, ke tro hë sa öhne la itre thiina i Akötresie ngöne la itre hna xup.

15. Nemene la hna kuca hnei Patrick matre atrepengöi Iehova hnyawa, nge tro sa nyitipu angeice tune kaa? (Wange ju fe la foto.)

¹⁵ Ala nyimu the së ka mel ngöne la itre traon ka tru nge gaa pë sinöe me öni. Maine eö fe hi la ketre, ijiji ö hi troa xomi ini qa ngöne la itre hna xup. Celë hi hna kuca hnei Patrick, ka mel e Brazzaville, traon ka tru ne la République du Congo. Öni angeic: “E nöjei drai, eni a thel troa goeën la ketre ewekë hna xup hnei Iehova. Ame itre xaa ijin, eni a öhne la itre neköi öni me itre neköi waco a sesë troa thele xen maine thele hnë lapa. Ame la ketre ijin, hnenge hna öhne la itre neköi waco a kuca la ketre trengene waco. Hnei nyudren hna hlem la nöjei ewekë hnei nyudren hna öhn matre nyi göhnene la itre neköi waco.” Ngo tha eje hmekuje kö la hnei Patrick hna kuca. Hnei angeic hna lapa mekun la hnei angeic hna goeën, nge celë hi ka easenyi angeic kowe la Atre Xup. Öni angeic: “Öhne hi ni laka, Iehova a wangatrune la itre hnei Nyidrëti hna xup ngacama itre ka tha nyipiewekë kö koi së. Celë hi ka amamane koi ni ka hape, Nyidrëti a hane wangatrunyi ni nge tro kö Nyidrëti a hamë ni la ka ijij.”

16. Nemene la hnei Maria hna kuca matre troa atrepengöi Iehova hnyawa, nge tro sa nyitipu eahlo tune kaa? (Wange ju fe la foto.)

¹⁶ Ame la hnaakönine aqane troa atrepengöi Iehova hnyawa, ke ene la troa lapa mekun la itre aqane xatua së hnei Nyidrë qaane ekö. Celë hi hna kuca hnei Maria, thine i Iesu. Atrepengöi Iehova hnyawa hi hnei eahlo, nge “hna hnimi [eahlo] hnei Akötresie.” (Luka 1:​30) Pane mekune jë la hnëqa ka tru hna ahnithe koi eahlo, ene la troa thine ne la Nekö i Akötresie. Hnei Iehova hna xatua eahlo me akeukawanyi eahlo jëne Gaberiela me Elisabeth, ketre sinee i eahlo. E thupen, hnei eahlo hna lapa mekun la itre ithuecatr me itre ini hnei eahlo hna kapa qaathei nyidro. Öhne hi eahlo laka, Iehova la Akötresie ka men, me utipin, nge ka hnim la nöjei atr, ene mina fe la itre ka ipië. (Luka 1:​46-55) Tru la hni ne ole i Maria kowe la ixatua i Iehova. Loi e tro mina fe sa hetre hni ne ole kowe la ixatua hnei Nyidrëti hna hamë së “ngöne la nyipi ijin.” (Heb. 4:​16) Ame la eö a öhne la ime i Iehova ngöne la mele i ö, hnyinge jë ka hape: ‘Nemene la itre thiina i Nyidrë hnenge hna öhn e celë?’

HETRE NYINE TRO PALA HI SA ININ GÖI IEHOVA

17-18. Hnauëne la easa qaja ka hape, hetre nyine tro pala hi sa inin göi Iehova?

¹⁷ Pane mekune jë la nöjei ewekë hne së hna troa atre elanyi göi Iehova ngöne la fen ka hnyipixe. Tro sa kapa la itre tus hna ewath me itre ithuemacanyi ka hnyipixe ka troa amaman la aja i Iehova koi së. (Hna Am. 20:12) Tro mina fe sa mel nyipine la itre hna xup. (Isa. 11:​6-9) Nge ame elany la kola amelene hmaca la itre sinee së, nge easa pexeje trootro, ke hetre xaa thiina i Iehova pala kö hne së hna troa öhn.

¹⁸ Nge uti hë epin, hetre nyine tro pala hi sa inin göi Iehova. Pine laka, pëkö qaane i Nyidrë,“ka pë ifegone la inamacane i nyidrë.” (Sal. 90:2; 147:5) Matre “tha tro jë kö [së] a atre la qaan, memine la pune la huliwa ne la nyipi Akötresie.” (A. Cai. 3:​11) Haawe, ekö ju hë së ngöne la nyipici maine easë petre hi a atre Iehova, ngo loi e tro pala hi sa xomi ijin troa atrepengöne hnyawa la Keme së ka ihnim.