Enyipiewekëne La Maca Ka Loi Kowe La Mele Ne La Itre Atr
NGÖNE la itre hnedrai së enehila, hne së hna pune drei mejene la ithanata celë: “Ame la itre trepene meköti ne la hmi Keresiano, tre, thaa ihmeku hmaca kö itre ej memine la pengöne mel enehila. Ka troa pë thangane itre ej kowe la itre atr ka mele ngöne la fene enehila ka tru ejolen, nge ka holehol.” Ngo isa pengöne kö la aqane mekune cili memine la hna amamane hnine la ithanata ne la lue atre mus: ketre tixene nöje ne Ëëd, Mohandas K. Gandhi memine la ketre atre mus qaa Agele Lord Irwin la ëje i nyidrë. Hna hnyingëne hnei Lord Irwin koi Gandi la hnei nyidrëti hna mekun matre nyi nyine la itre jole ka eje thene la lue nöj, Agele me Ëëd. Ene pe xome jë hi hnei Gandi la caa Tusi Hmitrötr me fe ngöne lo mekene faifi ne la tusi Mataio, me hape: “Maine troa trongëne hnene la lue nöje so la itre hna ini ngöne lo Cainöje i Iesu hune la wetr, haawe, atreine hë la lue nöje so troa seng, thaa ene hmekuje kö la itre jole ne la lue nöje so ngo ene mina fe la itre jole ne la fen asë.”
Kolo hi lo cainöje lai ka iupi troa pane thele la itre ewekë ngöne la ua me troa atre thiina ka menyik, me tingeting me ihnim, me troa ajane la thiina ka meköt. Thaa eje kö a jele ngazone hmekuje hi la ihumuth, ngo troa thipetrije pe la qaane ej, ene la troa elëhni kowe la ketre atr; ketre tune fe la nyi xetë, laka, thaa kolo hmekuje kö a jele ngazone ej, ngo troa trije fe lo itre mekune ne kuci ngazo ka axulune la ewekë cili. Ej a thuemacanyi së la itre ethanyine la troa sei hna cil, ewekë ka thë la itre lapa ka caa hae me ahleuhleune la itre nekönatr. Ej a qaja koi së, ka hape: ‘Hnime ju la itre ithupëjia me nyipunie, hamëne pi koi itre pë ewekë, the jele ngazo itre xane kö ngo hnimi angatre ju pe, kuca jë koi angatr la ewekë hnei nyipunie hna ajan tro angatr a kuca koi nyipunie.’ Nyipici, tro ha xulu koi së la itre manathithi atraqatr e tro sa trongëne la itre eamo cili. Maine troa catre xötrethenge hnene la lapa i nyipunieti la itre eamo cili, eje hi, ketre tro ha loi xölene la lapa i nyipunie!
Celë hi la aqane waiewekë ne la Itretre Anyipici Iehova. Tusi Hmitrötr a ini angatre troa metrötrëne la faipoipo. Ketre tune la itre nekö i angatr, nyudreni fe a inine la itre trepene meköti ka loi. Atre hmekune hnyawa hi la Itretre Anyipici Iehova la esisitriane me eloine e troa caas la itre atrene la lapa ka caa hae; thaa ngöne hmekuje kö la fami ngo ngöne fe la nöj. Nyimutre catre hnei ceitune ngöne la mele ne la atr ka amamane hnyawa laka, hna kei ekö me ae trootro la itre musi ka tru, pine laka hna utretre la itre otrene la lapa ka cahae, nge hna elë catre menu fe la kuci ngazo. Matre e ala nyimu la itre atr me itre hnepe lapa hna xatuane hnene la Itretre Anyipici Iehova troa melëne la itre trepene meköti ne la Keresiano, eje hi lai laka, tro pe hi a xalaithe la itre ka eni wathebo me ka kuci ngazo me ka ihumuth.
Ame la ixele ma wai me iwangatrehmekunyi atr, tre, celë hi ketre jole lai ka iapoizinë catre enehila. Isa pengöne pi hë memine la hna qaja hnei aposetolo Peteru, kola hape: “Nyipici wangate hmekunë hë ni Iaka tha hnei Akötesieti kö hna iwangate hmekunyine la ite ate, ngo hna kapa hnei anganyidëti la ate qoue nyidë me kuca la thina ka meköt, ngöne la nöjei nöj’ asë.” Ketre hnei Paulo hna cinyihane ka hape: “Nge pëkö ate Iuda me ate Heleni, pëkö ate hna itön me ate gufa kö, pëkö trahmanyi me fö; ke casi hi nyipunie asë hë thei Keriso Iesu.” (Ite Huliwa 10:34, 35; Galatia 3:28) Ini lai hna kapa hnene la Itretre Anyipici Iehova. Ngacama isa pengöne la itre atr, nge thaa ceitune kö la hane ngönetrei, ngo angatr a ce mele me ce huliwa hnine la itre wapicine la sasaiatri, me hnine la itre ekalesia.
Ame la itre xaa tribu ne Afrik, tre, ngacama angatr a thele troa ce mel, ngo hetrenyi pala hi la itre ihmönyinyi thei angatr. Ngo paatre fe kö la itine ka ngazo cili thene la Itretre Anyipici Iehova. Ame ngöne la itre hnei angatre hna icasikeu, kola ce traqa itronyi la itre atrene la itre tribu ka nyimutre, angatr a ce xen, me ce meköl, nge angatr a caasi ngöne la hmi nge keukawahnine la ihnimi trejine i angatr. Kola haine hnene la itretre musinëne la nöj, ngöne la angatr a öhne la ewekë cili! Ame la tulu ne caasi angatr hnine la hmi ne la nyipi Keresiano, tre, hna ithanatane ngöne la zonal ne New York hna hape, Amsterdam News ne lo drai 2 Ogas,1958. Kola ithanatane ngöne la zonale cili lo lai kovasio e cailo fen, hna hnen ngöne la traon e New York, ala 250 000 nge hetre munën lao atr ka sin la icasikeu ka tru cili!
“Kola isa traqa qa ngöne la fen asë la nöjei pengön atr asë, itre ka wetrewetr, ka madra nge ka isa pengöne aqane mel. Sheminge pi hë e troa wange laka pëkö ka nyi ifegone la caasi me ce madrine i angatr. . . . Ame angatr, Itretre Anyipici Iehova, angatr a isa traqa qa ngöne la 120 lao nöje matre troa ce atrunyi Akötresie ngöne la tingeting, me amamane fe kowe la itretre Amerika ka hape ijije hi troa traqa kowe la ewekë celë. . . . Drei la ketre tulu hna amamane hnene la icasikeu cili laka, ijije hi tro la nöjei atr asë a ce huliwa me ce mel.”
Ala nyimu la angetre qaja, ka hape, ame la itre trepene meköti ne la itre Keresiano, tre, ka pë hë menen ngöne la hneijine së enehila. Ngo hapeu, hetrenyi kö la ketre trepene meköti ka ceitune memine lai hna melëne hë hnene la itre atr enehila, maine ngöne la itre drai ka troa xulu? Loi pe, troa trongëne la itre trepene meköti ne la hmi Keresiano matre mama pi ngöne la mele së la menene ej, me enyipiewekëne ej. Maine tro la itre atr a trongëne la itre trepene meköti ne la Keresiano, eje hi lai laka, troa mama la menene itre ej, me enyipiewekëne itre ej ngöne la mele i angatr. Nge hna jëne itre ej matre kola troa hetrenyi la caas thene la ‘itre nöj asë, me itre tribu asë me itre atrene la fen’ asë elanyi ngöne lo ijine kola troa musinëne la itre atr asë hnene la Baselaia i Akötresie.—Hna Amamane 7:9, 10.
[Hna cinyihan ne la götran 23]
Hnënge pengöne atr me isa hane ngönetrei, angatr a ce huliwa
[Hna cinyihan ne la götran 24]
Ka hetre thangane catre la hmi Keresiano kowe la mele ne la atr. Hetre ketre trepene meköti kö ka ceitune memine lai?