Enyipiewekëne La Itre Trepene Meköt

1-2. (a) Hnauëne la easa qaja ka hape, itus ka hekö la Tusi Hmitrötr? (b) Hnauëne laka, ka nyipiewekë pala hi ej enehila?

KETRE itus ka hekö la Tusi Hmitrötr. Hna nyiqane cinyanyine ej a 3 500 lao macatre enehila, nge hna afenesin ej a 2 000 hë lao macatre. Ngo ka mel me mene pala hi enehila la “trengewekë i Akötresie.” (Heb. 4:​12; 2 Tim. 3:​16, 17) Itre milio lao atr enehila ka öhne la ixatua i Tusi Hmitrötr matre troa elëhun la itre jol.

² Ngo hnauëne laka, ka nyipiewekë pala hi enehila la Tusi Hmitrötr? Lue kepin. Hnapan, qaathene la “Akötresie ka mel” la maca ne la Tusi Hmitrötr. Nyidrëti la Atre Xup, nge ka pë san la inamacane i Nyidrë. (1 Tim. 4:​10; Roma 16:​26, 27) Hnaaluen, hna qatreng e hnine la Tusi Hmitrötr la itre ini qaathene la Akötresie ka tha saze kö. Matre itre ej a xatuane la itre atr enehila, tune la itre atr ekö.

3. Nemene la itre hnying hne së hna troa sa ngöne la tane mekune celë?

³ Nemene la itre trepene meköt? Pine nemene matre ka nyipiewekë koi së enehila? Tro sa öhne itre ej tune kaa la easa e Tusi Hmitrötr? Tro la tane mekune celë a sa la itre hnying e caha. Tro fe sa ce wang la aqane kuca i Iesu matre xatuane la itre atr troa trotrohnine la mekuna i Iehova.

NEMENE LA TREPENE MEKÖT?

4. Nemene la itre trepene meköt?

⁴ Ame la itre trepen meköt ke, kola qaja la itre nyipici ka nyitrepene la itre wathebo i Akötresie. Ame itre xaa ijin, ka mama hnyawa la trepene meköt ngöne la wathebo. (Mat. 22:37) Ngo ka sisitria kö la itre trepene meköt hune la itre wathebo. Ame ngöne la itre xaa jol, tha ijije kö la wathebo. Pine nemen? Ke kola acil la ketre wathebo thatraqane la ketre jol, nge goi hnepe ijine hi. Ngo ame la itre trepene meköt, ke kola qaja amamane la mekuna i Iehova, nge ka ihmeku memine la nöjei pengöne jol. Ame la kepin matre acile jë la itre wathebo ke, hnene la itre trepene meköt. Ame asë hi la itre wathebo i Iehova, ke hetre trepene meköt e hutrö. Nge ame la itre trepene meköt cili ke, thatraqane la nöjei pengöne jol, me nöjei hneijin. (Sal. 119:111) Ame itre xaa ijin, troa saze la wathebo, ngo ka hut la itre trepene meköt.​—Isa. 40:8.

5. Nemene la eisapengönene la wathebo me trepene meköt? Qaja jë la ketre ceitun. (Goeëne ju fe la itre foto.)

⁵ Tro sa xom la ketre ceitun matre wang la eisapengönene la wathebo me trepene meköt. Önine la thine kowe la nekönatr ka hape, ‘The ketr kö lai furno.’ Ketre hna amekötine lai, maine wathebo. Ngo ame la trepene meköt e hutrö ke: Maine tro eö a ketr la ketre ewekë ka idreuth, tro eö lai a eatr. Ame la trepene meköt cili ke, thatraqane la furno, me aean, me hnaeë, me nöjei ewekë ka idreuth. Ka nyipici e kuhu hnalapa, me ngöne la nöjei götrane mina fe. Nge ame hë la nekönatr a tru, tro angeice lai a huliwane la furno. Ngo tro pala hi angeic a hmek wanga dreuthi angeice pi. Matre kola saze la wathebo, ngo casi pala hi la trepene meköt.

ENYIPIEWEKËNE LA ITRE TREPENE MEKÖT

6. (a) Nemene la hnei Iehova hna amë ngöne la Tusi Hmitrötr matre xatua së? (b) Iehova a wangatrunyi së tune kaa?

⁶ Tru la ihnimi Iehova koi së, matre Nyidrëti a hamëne la itre wathebo nyine thupë së. (Iako. 2:​11) Nge Nyidrëti a xatua së troa trotrohnine la itre trepene meköt, hutrö ne la itre wathebo. Jëne la Tusi Hmitrötr, Nyidrë a xatua së troa axecië mekun ngöne la itre götrane laka, pëkö wathebo. Itre trepene meköt a xatua së troa xomi mekun ka loi, me huliwa nyipici. Hnei Iehova hna hamë së la itre trepene meköt ke, Nyidrëti a wangatrunyi së, nge aja i Nyidrë tro sa isa ië ewekë me amamane la ihnimi së koi Nyidrë me itre hna amekötin.​—Gal. 5:​13.

7. Qaja jë la ketre ceitun ka amamane la aqane xatua së hnene la itre trepene meköt. (Wange ju fe la foto.)

⁷ Tro sa xom la ketre ceitun ka amamane la aqane xatua së hnene la itre trepene meköt. Ame ngöne la itre xaa nöj, hetre panneau de signalisation ngöne la itre gojenyi ka tru. Ame la itre xaa pano, ke kola up la itre ka xomi loto troa nyap hmidra, maine cil wanga amadë angatre jë. Ngo ame la itre xaa pano, ke göne hi troa hmekë angatr ka hape, ka ucic la gojeny, maine hetre öni e cili. Nge qanyine pë hë la ka xomi loto hmek me atreine waiewekë. Ka tune la kola hlupi lai mani maine xaxapo, isa qanyi angatre kö nango hnyap hmidra. Ketre tun, Tusi Hmitrötr a qaja hnyawane la itre aqane ujë hna wathebon. Nge eje fe a hamëne la itre trepene meköt ka xatua së troa atreine waiewekë, me lepetrij la itre mekun me itre aqane ujë ka troa uku së kowe la ngazo. Celë hi matre, nyipiewekë tro sa atreine waiewekë.

8. Thenge la Roma 12:​1, 2, nemene la hne së hna troa trotrohnin e tro pala hi sa thel la itre trepene meköt e hnine la Tusi Hmitrötr?

⁸ Hetre xaa manathith hne së hna troa kapa e tro sa thel me trongëne la itre trepene meköt. Kola xatua së troa atre la mekuna i Iehova. Ame la easa e la itre hna melën e hnine la Tusi Hmitrötr, loi e tro sa xomi ini qa ngön. Thele jë la kepin matre hnei Iehova hna amë la itre hna melën cili e hnine la Tusi Hmitrötr, me aqane tro itre ej a xatua së. Celë hi ka troa xatua së troa nyihlue i Iehova cememine “la mekune ka pexej.” Ame e cili, tro sa öhn laka, ame la aja i Akötresie, ke “ka lolo, nge ka iamadrinë, nge ka pexej.”​—E jë la Roma 12:​1, 2.a

9. Nemene la ketre eloin e tro sa mel thenge la itre trepene meköt qa hnine la Tusi Hmitrötr? (Heberu 5:​13, 14)

⁹ Ame la easa majemine xötrethenge la itre trepene meköt ke, kola xatua së troa macaj. Ame la easa mel thenge la itre trepene meköt ne la Tusi Hmitrötr, ke kola acatrene la imelekeu së me Iehova. (E jë la Heberu 5:​13, 14.) Ame la itre nekönatr, ke loi e tro sa hamën la itre hna amekötin maine itre wathebo, matre tro angatr a atre la nyine troa kuca. Nge angatr a xötrethenge la itre hna amekötin, ke angatr a xoue jia. Ngo ame Iehova, tha Nyidrëti kö a goeë së tune la itre nekönatr, ngo tune la itre ka macaje hë. Nyidrëti a mejiune koi së. Atre hi Nyidrë laka, tro kö sa axecië mekun thenge la aja i Nyidrë. Nge ame la easa ujë tun, easa amadrinë Nyidrë.​—Sal. 147:11; It. Ed. 23:​15, 26; 27:11.

AQANE TRO SA ÖHN LA ITRE TREPENE MEKÖT

10. Tro sa öhne tune kaa la itre trepene meköt e hnine la Tusi Hmitrötr?

¹⁰ Ame la easa sin ajuine la Tusi Hmitrötr, tro së lai a öhne la itre trepene meköt ka xatua së troa trotrohnine la mekuna i Iehova me aliene hni Nyidrë. Tro fe sa öhne la itre trepene meköt e tro sa thel la itre kepin matre Nyidrë a hamën la itre wathebo. Maine tro sa atre la itre kepine cili, ke tro hë së lai a trotrohnine hnyawa la mekuna i Iehova. Ngo nyipiewekë fe tro sa sipo ixatua thei Nyidrë me atreine thele ewekë. (It. Ed. 2:​10-12) Matre hnyinge jë ka hape: ‘Hnauëne la Iehova a hamën la wathebo cili? Maine Iehova a xelene la aqane ujë celë, nemene hö la mekuna i Nyidrë, e tro ni a kuca la ketre huliwa ka ceitu? Nemene la ini hnenge hna xom qa ngöne la hna melëne celë, nge tune kaa la aqane tro ni a trongën?’ Maine öhne hi së la kepin matre kola acile la itre wathebo, me xomi ini qa ngöne la itre hna melën, ke ijiji easë hë troa xomi mekun ka loi nge ka ihmeku memine la aja i Iehova.

11. Ame ngöne lo Cainöj Hune La Wetr, nemene la hnei Iesu hna kuca matre tro sa öhne la itre trepene meköt e hnine la Tusi Hmitrötr? (Goeëne ju fe la itre foto.)

¹¹ Ame ngöne lo Cainöj Hune La Wetr, hnei Iesu hna amaman la aqane tro sa öhne la itre trepene meköt. Tro sa ce ithanatan la köni ceitun. Ame ngöne la köni ceitune cili, hnei Iesu hna pane qaja la ketre wathebo. Thupen, hnei nyidrë hna qaja la mekuna i Iehova, maine trepene meköt ka nyitrepene lai wathebo. Maine tro sa lapa mekun la itre ini hnei Iesu hna hamën, tro hë së lai a trotrohnine la aqane tro itre ej a xatua së troa xomi mekun ka loi.

12. Nemene la trepene meköt hutrö ne la wathebo hna qaja ngöne Mataio 5:​21, 22? (Wange ju fe la foto.)

¹² E jë la Mataio 5:​21, 22. “The ihumuthi kö.” Nemene la trepene meköt hutrö ne la wathebo celë? Tha aja i Iehova kö tro sa methinëne la itre xan, aja i Nyidrëti pe tro sa nuetrij la itre huliwa, me itre trenge ithanata, me itre mekun ka imethinë. Hnei Iesu hna qaja ka hape, ame la atr ka methinëne la trejin me angeic, ke angeic a ena la wathebo celë, ngacama tha angeice kö a ihumuth. Maine tro pala hi angeic a “lapa fë trenge hni kowe la trejine me angeic” maine qaqa angeic me thaipië angeic, ke tro kö Iehova a ameköti angeic. Eje hi, itre huliwa lai ka uku së kowe la ihumuth.​—1 Ioa 3:​15.

13. Tune kaa la aqane tro sa trongëne la trepene meköt ka mama ngöne Mataio 5:​21, 22? (Goeëne ju fe la itre foto.)

¹³ Tune kaa la aqane tro sa trongëne la ini hna qaja ngöne Mataio 5:​21, 22? Tha tro kö sa lapa fë trenge hni kowe la ketre atr, ngacama hnei angeic hna qanangazo së. (Lev. 19:18; Iobu 36:13) Pine nemen? Pine laka, tro lai a aciane e kuhu hni së la imethinë ka troa uku së troa qaja maine kuca la ketre ewekë ka ngazo. (It. Ed. 10:12) Maine tro sa ixöjetrij maine silitrengathoi ketre, tro lai a adron la ëje i angeic me thaipië angeic. (It. Ed. 20:19; 25:23) Matre, ase hë Iesu hamëne la trepene meköt ka hmekë së göne la itre media sociaux, me itre blogs me Ëternet maine itre xaa applications de messagerie. Haawe, tha tro pi kö së a qanangazon maine silitrengathoi ketre, ke ka ceitu hi lai memine la ihumuth.

14. Nemene la trepene meköt hutrö ne la wathebo ngöne Mataio 5:​27, 28? (Wange ju fe la foto.)

¹⁴ E jë la Mataio 5:​27, 28. “The nyixetë kö.” Nemene la trepene meköt e hutrö? Methi Iehova la nöjei pengöne huliwa ka sis, ngo memine fe la itre mekun ka troa uku së troa kuci ngazo. Öni Iesu, ame la atr goeën me piin la ketre föe (nge tha föi angeice kö), ke ase hë angeic kuca la ngazo. Celë hi matre, isine jë së troa lepetrij la itre mekun ka ngazo, ngacama ka jole catr. (Mat. 5:​29, 30) Ame la trepene meköt celë, ke thatraqane mina fe la itre keresiano ka pë föen.

15. Tro sa trongëne tune kaa enehila la trepene meköt ngöne Mataio 5:​27, 28? (Goeëne ju fe la itre foto.)

¹⁵ Tro sa trongëne tune kaa enehila la trepene meköt ngöne Mataio 5:​27, 28? Tha tro kö sa mekun la itre ewekë ka sis. (2 Sam. 11:​2-4; Iobu 31:​1-3) Nyipici laka, tha tro kö la keresiano ka macaj a goeë pornographie. Tha tro kö angeic a mekun ka hape, angeice hi a goeëne la itre foto ka ngazo. Maine mekun ka hape, ka loi la itre xaa pengöne pornographie, ke tha kolo kö a amamane la itre huliwa ka sis. Ame ngöne lo hneijine i Iesu, pëkö telefon, maine film, maine foto. Ngo hnei Iesu hna hamëne la ketre trepene meköt, matre tro sa atre la mekuna i Iehova göne la itre ewekë ka mama ngöne Ëternet enehila. Celë hi ka xatua së troa trotrohnine laka, tha madrine kö Iehova la easa qaja la itre ewekë ka sis maine iupifë la itre foto me video ka ngazo jëne message, maine kuca la itre xaa pengöne ce meköl ngöne Ëternet. Tro fe la trepene meköt celë a xatuane la itre ka faipoipo troa mele nyipici kowe la itre föi angatr. (Mala. 2:​15) Ketre, tro fe lai a xatuane la itre keresiano asë, ka faipoipo ju hë maine ka tha faipoipo kö, troa thipetrij la itre ewekë ka troa akeinyi angatr.​—It. Ed. 5:​3-14.

16. Nemene la trepene meköt hutrö ne la wathebo ngöne Mataio 5:​43, 44? (Wange ju fe la foto.)

¹⁶ E jë la Mataio 5:​43, 44. “Qa i eö troa hnime la atr lapa easenyi eö.” Nemene la trepene meköt e hutrö? Ame koi Iehova, ame la atr lapa easenyi së ke, kola qaja la nöjei atr, matre aja i Nyidrë tro sa hnimi angatr. Ngazo pe, tha trotrohnine hnyawa kö la angetre Iudra ngöne la hneijine i Iesu la wathebo celë. Ame koi angatr, ijije hi tro angatr a methinëne la ithupëjia me angatr. Ngo atre hi Iesu laka, tha celë kö aja i Iehova. Aja i Iehova tro sa hnim la nöjei pengöne atr, ngacama isa nöje së kö maine hane ngönetrei.​—Mat. 5:​45-48.

17. Nemene la itre thangane ka loi, e tro sa trongëne la trepene meköt ngöne Mataio 5:​43, 44? (Goeëne ju fe la itre foto.)

¹⁷ Tro sa trongëne tune kaa enehila la trepene meköt ngöne Mataio 5:​43, 44? Ame la atr ka hnim la atr lapa easenyi angeic, ke tha angeice kö a sine la itre isi maine itre jole ne la fen. (Isa. 2:4; Mika 4:3) Nge angeic a hnim la itre atr, ngacama isa hane ngönetrei kö, maine nöj, maine hmi. (It. Hu. 10:​34, 35) Nge angeic a nue la ngazo ne la itre ka akötrë angeic, maine akötrëne la itre atr hnei angeic hna hnim.​—Mat. 18:​21, 22; Mar. 11:25; Luka 17:​3, 4.

THELE JË TRO PALA HI A TRONGËNE LA ITRE TREPENE MEKÖT

18. (a) Nemene la nyine tro pala hi sa thel la easa axecië mekun? (b) Nemene la hne së hna troa ce wang ngöne la tane mekun ka troa xulu?

¹⁸ Easa olene koi Iehova ke, tha Nyidrëti kö a goeë së tune la itre nekönatr, ngo tune la itre atr ka macaj! Aja i Nyidrë tro sa trongëne la itre trepene meköt la easa axecië mekun, ke celë hi ka troa xatua së. (1 Kor. 14:20) Haawe, maine hetre mekun nyine tro sa axeciën, loi e tro pala hi sa ‘thele troa trotrohnine la aja i Iehova.’ (Efe. 5:​17) Ihnimi së koi Nyidrë la ka troa xatua së troa xom la itre mekun ka ihmeku memine la aja i Nyidrë, ngo tha ene kö la xou. Ngo, hetre ketre ahnahna hnei Nyidrëti hna hamë së, ene la mekuthetheu. Celë hi hne së hna troa ce wang ngöne la tane mekun ka troa xulu.