Itre Aqane Tro Fë Angatre La Maca Ka Loi

EJE hi laka hna upe la itre Keresiano troa “inine la nöjei nöj’ asëjëihë,” ngo thaa kolo kö a troa hule ielene la itre atr maine musinë angatre pena. Ame la hna ahnithe hnei Iesu, tre, ene la “troa cainöjëne la maca ka loi kowe la ite ka aköt,” me troa “atuthe la itete thë fë hni,” me “troa aupunyi angete treij’ asë.” (Mataio 28:19; Isaia 61:1, 2; Luka 4:18, 19) Itretre Anyipici Iehova a thele troa kuca lai jëne la troa cainöjëne la maca ka loi qa hnine la Tusi Hmitrötr. Tui perofeta Ezekiela ekö, Itretre Anyipici Iehova enehila a tupathe troa öhne la itre atr “itete awe me teije latesi pine la ite ewekë ka sisi asë lo hna kuca nyipin’ ej.”—Ezekiela 9:4.

Nyimu aqane tro fë la Itretre Anyipici Iehova la huliwa göi troa thele la itre hna akötrën hnene la aqane melëne la fene enehila, ngo ame la ka mama hnyawa, tre, ene la troa cainöje trootro ngöne la itre hnalapa. Catre angatre kuca la huliwa cili matre troa ketr la ka ala nyimu, tui Iesu lo nyidrë a “trongëne la nöjei lapa me nöjei hnalapa, kola cainöjën, me amamane la maca ka loi ne la Baselaia i Akötesie.” Hna kuca tune lai hnene lo itre pane drei nyidrë. (Luka 8:1; 9:1-6; 10:1-9) Ame enehila, kola catre thele hnene la Itretre Anyipici Iehova troa anyimua wange trongëne la nöjei hnalapa asë ngöne la macatre. Angatre a thele troa pane xome la itre hnepe ijine matre troa ithanatane memine la itre atr, la aliene la itre ewekë ka traqa ngöne la itre hnepe götrane hnei angatre hna mele ngön, maine e cailo fen. Angatre a acatrene la itre mekune i angatre hnene la caas maine lue xötre qa hnine la Tusi Hmitrötr. Maine mama ha ka hape, hetre aja thene la atr hnei angatre hna cainöje kow, haawe, kola isa pui ju kowe la ketre drai göi troa iwai hmaca matre sisedrëne hmaca lai mekune hna ce porotrikën. Angatre a tro fë la itre Tusi Hmitrötre me itre tus nyine qejepengöne la Tusi Hmitrötr, matre e ajane la atr, tro angatre a tro kowe la hnalapa i angeice me ce inine me angeice la Tusi Hmitrötr, nge pëkö thupen. Itre milio lao etid hna kuca e nöjei wiik ngöne la fen memine la itre atr maine itre hnepe lapa ka ajane troa inine la Tusi Hmitrötr.

Kola icasikeu hnene la Itretre Anyipici Iehova ngöne la itre uma hna hëne ka hape, Uma Ne Baselaia. Ketre hna hnëkëne lai matre hnë troa cainöjëne la “maca ka loi ne la baselaia.” Nyimu icasikeu hna kuca ngöne la itre uma cili e nöjei wiik. Ame la ketre icasikeu, lo cainöje hna cile fë kowe la ka ala nyimu, tre, nyine troa qeje pengöne la ketre tane mekune hna hnëkëne thatraqane la nöjei atr. Thupene lai kola sisedrëne la icasikeu cili hnei ketre pena, kola ce wange la ketre tane mekune maine ketre hna perofetane e hnine la Tusi Hmitrötr jëne la zonal La Tour de Garde. Ame la ketre icasikeu, tre, thatraqai Itretre Anyipicin nyine troa hnëkë angatre troa cainöjëne hnyawa la maca ka loi. Ame la icasikeu e thupen, tre, kola troa qaja la aqane troa tro fë la maca ka loi ngöne la götrane hne së hna cainöje ngön. Ame la ketre icasikeu, tre, ene la Ini Tus; Itretre Anyipicin ka ala xalaithe hi a itronyi ngöne la hnalapa i ketre trejine troa inine la Tusi Hmitrötr.

Ame la itre icasikeu cili tre, itre hna fe asë hi koi nöjei atr nge ka hetre thangane catr. Pëkö kuië mani. Hna qaja hnei Tusi Hmitrötr, ka hape: “Nge tro sha imekunekeune mate troa aciane la ihnimi me ite huliwa ka loi, tha tro kö a tije la icasikeu shë tune la thina i ite xan ; ngo loi pe troa [“ithuecatrekeu,” MN], nge nue catëne jë e tro nyipunie a goeëne la drai a eashenyi hë.” Maine ka nyipi ewekë la tro sa isa ini tus me thel ngo, ketre ka ithuecatre mina fe la tro sa ce icasikeu memine la itre sine hmi së: “Idei la fao hnei fao, kete maca mekë hë la ate hnene la enehmu i angeic.”—Heberu 10:24, 25; Ite Edomë 27:17.

Hnene la Itretre Anyipici Iehova hna thepe ijine pala hi matre troa ithanata kowe la itre atr ngöne la itre ijine ka nyimutre ne la mele i angatr. Itre trenge ewekë ka co hi la hnei angatre hna ce thawa memine la atre lapa easenyi angatr, me ketre ka ce ti kar maine ti avio me angatre pena, maine kolo pena a nango ce porotrik ahoeanyi me ketre enehmu maine ketre sine lapa, me porotrike hi me itre sine huliwa ngöne lo itre hnepe ijine hutihut. Caa pengöne hnyawa hi la itre aqane anyipicine i angatr enehila memine lo aqane anyipicine i Iesu ekö—tune lo nyidrëti a xötrëne lo ketre pala ne la hneopegejë, me lapa hune la gaa draië ne la wetr, me ce xeni hnine la uma i ketre atr, me sine lo ketre faipoipo, maine tithe pena la he ne nyi ie ngöne la hnagejë ne Galilaia. Hnei nyidrëti hna hamë ini ngöne la itre sunago me hnine la ēnē e Ierusalema. Ngacama nyidrëti ju hë ngöne la götrane celë maine e koilo pena ngöne la ketre götran, Iesu pala hi a hmekë ijine troa ithanatane la Baselaia i Akötresie. Celë hi la aqane catre ne la Itretre Anyipici Iehova enehila troa xötrethenge hnyawa pala hi la itre thupaca i Iesu ngöne la huliwa ne cainöj.—1 Peteru 2:21.

ANGATRE A CAINÖJE HNENE LA TULU KA LOI

Troa gufa la itre jia ne huliwa hna xome matre troa cainöjëne la maca ka loi, e thaa hna trongëne kö hnene la atre cainöje la ini hnei angeice hna tro fë. E maine tro sa qaja la ewekë nge itria kö me hna kuca, hapeu, tha easë kö a thoi? Hnene hi la aqane iaö ne la itre hmi hna ajeane la itre milio lao atr enehila qa ngöne la Tusi Hmitrötr. Nge thaa zöi Tusi Hmitrötre kö lai! Ketre tune mina fe, hetrenyi ekö thene la itretre cinyihan me itre Faresaio la Itre Hna Cinyihan Qene Heberu ngo hnei Iesu hna jelë angatr me hape, itretre thoi! Pine hi la aqane e i angatre la Trenge Wathebo i Mose, ene pe öni nyidrëti kowe la itretre drei nyidrë: “Ame la nöjei ewekë asëjëihë hnei angate hna qaja koi nyipunie, kucajë, me thupëneju ; ngo the kuca thenge kö la thina i angat ; ke angate hi a qaja, ngo tha kuca pe.” (Mataio 23:3) Sisitria catre kö troa amamai tulu ka loi hnene la Keresiano, hune la troa xome la itre hawa ka nyimutre troa cainöj. Hna amamane la pengöne cili kowe lo itre keresiano föe ekö ka faipoipo me itre trahmanyi ka thaa hmi kö, kola hape: “Denge thenge ju la ite fö’ i nyipunie ; thatraqan e hetete tha denge thenge la wesi ula, mate ahmalanyi angate hnene la thina ne la ite ifënekö i angat, ngo tha hnei wesi ula ; e goëne hnei angate la thina i nyipunie a pë ethan nge kola qou.”—1 Peteru 3:1, 2.

Celë hi aqane tro fë maca ka loi la hna catre qaja hnene la Itretre Anyipici Iehova, ene la tro sa amamai tulu göi troa melëne la thiina ne la nyipi Keresiano qëmekene troa qaja koi itre xan. Angatr a thele troa ‘kuca koi itre xan la hnei angatr hna mekun tro itre xan a kuca koi angatr.’ (Mataio 7:12) Angatr a tupath troa ujë tune lai kowe la nöjei atr asë, thaa kowe hmekuje kö lo itre sine hmi angatr me itre enehmu me itretre lapa easenyi angatr, me itre atrene la lapa ka cahae i angatr. Ngo pine laka itre ka tha pexeje kö angatr, haawe, ketre thatreine kö tro angatre a eatrëne apexejene la götrane cili! Ngo hnene la aliene hni angatre matre kola kuca la loi koi nöjei atr asë thaa hnene hmekuje kö jëne la hna cainöjëne la maca ka loi ne la Baselaia ngo jëne fe la ixatua e ijij troa hamën.—Iakobo 2:14-17.

[Iatr ne la götran 19]

Venezuela

[Iatr ne la götran 19]

Hawaii

[Iatr ne la götran 19]

Yougoslavie

[Iatr ne la götran 20]

Ame la itre Uma Ne Baselaia, celë hi itre göhnë ka lolo, hna hnëkën matre troa ce ithanatane la itre ini qa hnine la Tusi Hmitrötr

[Iatr ne la götran 21]

Ngacama e hnine ju hë la hnepe lapa maine ngöne pena la aqane imelekeu i angatre me itre xan, ame la Itretre Anyipici Iehova, tre, angatre a thele troa trongëne hnyawa la itre ini hnei angatre hna tro fë