Ini 7

Nyine Hmekë Së La Itre Ewekë Ka Traqa Ekö

Thaa tro jë kö Iehova a nue la itre atr ka ngazo, troa angazone la paradraiso. Itre sinee i Nyidrëti hmekuje hi, la itre ka troa mele ngön. Nemene ju pë hë la pengöne lo itre atr ka ngazo? Nyipi ewekë troa atre la pengöi Noa ekö. Hnei Noa hna mele ekö, itre thauzane hë lao macatre enehila. Angeice la ketre atr ka lolo, ka catre thele troa kuca la aja i Akötresie. Ngo hna kuca la itre ewekë ka ngazo e celë fen hnene la itre xaa atr. Haawe, Iehova a thuemacanyi Noa jë ka hape, Nyidrëti a troa apaatrene la nöjei atr asë ka ngazo hnene la iwë. Hnei Nyidrëti hna upi Noa troa cane la aka, matre thaa tro kö a meci hnei angeice me hnepe lapa i angeic, ngöne la kola iwë la fen.​—Genese 6:9-18.

Hnei Noa me hnepe lapa i angeice hna cane la aka. Hnei Noa hna thuemacane la itre atr laka, troa xulu la iwë, ngo thaa hnei angatre kö hna drei angeic. Hnei angatre hna kuca pala hi la itre ewekë ka ngazo. Fenesi hë la aka, ame hnei Noa hna alöne hnine eje la itre öni, nge hna lö fe hnei angeice me hnepe lapa i angeic. Thupene lai, hnei Iehova hna axulune la ketre hedrenge ka tru. Ame hna trotro pi la mani, 40 lao drai nge 40 lao jidr. Ene pe fene hnengödrai asë hë, a lapa e hnine la di.​—Genese 7:7-12.

Meci asë hë la itre atr ka ngazo, ngo mele pe kö Noa me hnepe lapa i angeic. Hnei Iehova hna thepe angatre qa ngöne la iwë, me eatrongë angatre kowe la ketre ihnadro ka pëkö ethan. (Genese 7:22, 23) Kola qaja hnei Tusi Hmitrötre ka hape, troa traqa la ijine tro hmaca Iehova a apaatrene la itre atr ka xele ma kuca la meköt. Troa mele pe la itre atr ka loi. Tro angatre a mele epine palua ngöne la paradraiso e celë fen.​—2 Peteru 2:5, 6, 9.

Ame enehila nyimutre fe la itre atr ka kuca la itre ewekë ka ngazo. Ka tiqa la fene hnene la nöjei pengöne jol. Iehova a upe ielene la Itretre Anyipici Nyidrë troa tro fë pala hi la itre ithuemacanyi ka nyimutre kowe la itre atr, ngo ala nyimu la ka xele ma drenge la itre trenge ewekë i Iehova. Thaa ajane kö angatre troa saze la itre aqane ujë i angatr. Thaa ajane kö angatre troa kapa la hnei Akötresie hna qaja, göi thiina ka loi me thiina ka ngazo. Nemene la pune kowe la itre atr cili? Hapeu, tro kö angatre a ujë elany? Nyimutre la itre ka thaa tro kö a hane saze. Troa traqa la ijine troa apaatrene la itre atr ka ngazo, nge thaa tro hmaca kö angatre a hane mel.​—Salamo 92:7.

Thaa tro kö a paatre la fene hnengödrai; tro hmaca pe eje a paradraiso. Troa mele epine palua ngöne la paradraiso e celë fen, hnene la itre sinee i Akötresie.​—Salamo 37:29.