Ini 8

Drei La Itre Ithupëjia Me Akötresie?

Ame la tane la itre ithupëjia me Akötresie, ke Satana Diabolo. Angeice la ketre ua ka icilekeu me Iehova. Satana pala hi a icilekeu me Akötresie, nge angeice mina fe la qaane la itre jole ka tru ka akötrëne la itre atr. Ame Satana ke, ngazo catre la thiina i angeic. Ka sili trenga thoi angeic, me ihumuth.​—Ioane 8:44.

Hna caasi me Satana hnene la itre xaa ua matre troa icilekeu me Akötresie. Kola hë angatre hnei Tusi Hmitrötre ka hape, itre dremoni. Ceitui angatre me Satana, laka, itre ithupëjia angatre memine la itre atr. Aja i angatre troa akötrëne la itre atr. (Mataio 9:32, 33; 12:22) Tro Iehova a apaatrenyi Satana epine palua, me itre dremoni angeic. Xoxopatre pe hi la hnepe ijine tro angatre a akötrëne la itre atr.​—Hna Amamane 12:12.

Maine nyipunie a ajane troa ce sinee me Akötresie, haawe, thipetrije pi la itre aja i Satana. Kola methinë Iehova hnei Satana me itre dremoni. Ithupëjia angatre me Akötresie, nge angatre a ajane troa kuca matre tro fe nyipunie a hane ithupëjia me Akötresie. Loi e tro nyipunie a iëne la hnei nyipunieti hna troa amadrinën​—Satana maine Iehova. Maine nyipunie a ajane troa mele epine palua, nyipi ewekë tro nyipunie a iëne troa kuca la aja i Akötresie. Nyimutre la itre aqane nyinyithina i Satana, me itre aqane troa amenune la itre atr. Ala nyimu la itre atr hna athixötrëne hnei angeic.​—Hna Amamane 12:9.