Ini 6

Easenyi Hë La Paradraiso!

Kola amamane hnyawa hnene la itre ewekë ka traqa koi së enehila, laka, easenyi hë la paradraiso. Hna qaja hnei Tusi Hmitrötre ka hape, qëmekene troa traqa la paradraiso, tro së a pane öhne la itre ijine ka ngazo catr. Easë hi la a melëne la itre ijine cili! Hanawange la itre xaa ewekë hna qaja hnei Tusi Hmitrötr, ka troa traqa:

Itre isi ka tru. “Tro ha cile la kete nöje kowe la kete nöj, me kete baselaia kowe la kete baselaia.” (Mataio 24:7) Ketre ewekë la hna perofetan, ka eatre pala hi enehila. Hna nyiqaane lo macatre 1914, hnene la lue isi ka tru ka traqa kowe la fene asë, nge nyimutre pë hë la itre xaa isi ju kö ka nango co. Itre milio la etrune la itre atr ka meci hnene la itre isi cili.

Kola jilapane la fen hnene la nöjei pengöne mec. Tro ha hetrenyi “ngöne la ite hlapa la itre mec.” (Luka 21:11) Hapeu, hna traqa tune kö lai? Eje hi. Itre milio la etrune la itre atr ka meci hna tithe hnei cancer, me meci ne wenethëhmi, me tuberculose, me fiva ne tas, me SIDA, me itre xaa meci ju kö.

Jiinë xen. Hetrenyi ngöne la fene la itre atr ka mecijin, pine laka, pëkö xen. Nyimutre la itre atr ka meci hnei thë xeni ngöne la nöjei macatre, itre milio pala hi la etrun. Hetrenyi la ketre hatrene ka amamane ka hape, calemi hë la paradraiso. Kola qaja hnei Tusi Hmitrötre ka hape: “Tro ha traqa la ite jin.”​—Mareko 13:8.

Itre sa. “Tro ha . . . hete sha ngöne la ite hlapa.” (Mataio 24:7) Kola mama hnyawa la ewekë celë ngöne la hneijine së. Itre milio nge hetre munëne la etrune la itre atr ka meci qa ngöne la itre sa ka enijëne la fen, qaane lo 1914.

Itre atr ka ngazo. Tro la itre atr a “meciu mani” me “hnimi angate kö.” Tro fe angatre a “ajane la nyine amadine ngo tha ajane kö koi Akötesie.” Tro la itre nekönatre a “tha dei keme me thin.” (2 Timoteo 3:1-5) Hapeu, nyipici kö ka hape aqane melene hi la itre atr lai, ngöne la hnedrai së? Thaa metrötrë Akötresieti kö hnei angatr, nge angatre a sawa la itre ka pi ajane troa atrepengöi Nyidrë.

Ihumuth. Tro mina fe a “mana la ngazo.” (Mataio 24:12) Ma drei fe lai epuni a hane mekune ka hape elë catre enehila la pi humu atr, hune lo itre macatre hnapan. Ngöne la nöjei götran, kola elë la atrekënö, me huliwa thoi, maine iakötrë.

Kola mama jëne la nöjei ewekë asë cili laka, calemi hë la Baselaia i Akötresie. Kola qaja hnei Tusi Hmitrötre ka hape: “E öhnë hë nyipunie la nöjei ewekë celë a traqa, wangate hmekune ju nyipunie, laka, easenyi hë la baselaia i Akötesie.” (Luka 21:31) Nemene la Baselaia i Akötresie? Kolo hi lo musi Akötresie e hnengödrai, ka troa acile hmaca la paradraiso e celë fen. Tro la Baselaia i Akötresie a nyihnane la itre musi ne fen.​—Daniela 2:44.