Mekene 5
Nemene Hmi La Hna Kapa Hnei Akötresie?
1. Nemene la hnene la föe ne Samaria hna ajane troa atre, göi hmi?
HANE fe kö epuni isa thele ka hape ‘Nemene la hmi hnei Akotresieti hna kapa?’ Hna traqa la mekune celë kowe la ketre föe ngöne la ijine eahlo a ithahnata me Iesu Keriso, thaa nanyi ju kö qa ngöne la wetre ne Gerizim e Samaria. Ame hna qaja hnyawane hnei eahlo la pengöne la hmi ne la angetre Samaria, memine la hmi ne la angetre Iudra, laka isazikeu kö, önii eahlo ka hape: “Hnei ite xötapane huni hna hmeti ngöne la wete celë, nge nyipunieti a ulatin, ka hape, Ierusalema la nyipi hunahmi.” (Ioane 4:20) Hapeu, hnei Iesu kö hna qaja koi eahlo ka hape ceitune asë hi la nöjei hmi? Maine, hnei nyidrëti hna qaja la itre nyine tro së a kuca troa amadrinë Akötresie?
2. Hnei Iesu hna sa tuneka kowe la föe ne Samaria?
2 Hna haine la aqane sa i Iesu, öni nyidrëti ka hape: “Tro ha traqa la ijine thaa tro kö nyipunie a hmi kowe la Tetetro ngöne la wete celë, nge kete pëkö e Ierusalema.” (Ioane 4:21) Ekö catre hë angetre Samaria xoue Iehova, ngo angatre a hmi kowe la itre xaa haze ju kö hune la wetre ne Gerizim. (2 Ite Joxu 17:33) Haawe, Iesu a qaja ka hape, ame la nyipi hmi, ke, thaa ngöne kö la wetre Gerizim, memine fe ngöne la nöje Ierusalema.
HMI NGÖNE LA UA ME NYIPICI
3. (a) Hnauëne laka thatre Akötresieti hnyawa kö hnei angatr? (b) Nemene la jëne tro la angetre Iudra ka lapaune me itre xane fe a atrehmekunyi Akötresie?
3 Pane ce wange ju së la hna sisedrëne hnei Iesu: “Tha’te kö nyipunie la hnei nyipunie hna hmi kow, ngo ate hë huni la hne huni hna hmi kow; ke qa thei angete Iuda la iamele.” (Ioane 4:22) Hetrenyi la itre ini ka thoi ngöne la hmi i angetre Samaria; hnei angatre hna kapa hmekuje hi lo faifi lao pane itusi ne la Tusi Hmitrötr—nge angatre a ketre cinyihane kö itre eje me kapa hnyawa kösë Pëtatöke i angetre Samaria. Qa ngöne lai, thaa atrehmekunyi Akötresieti hnyawa kö hnei angatr. Ngo ame pe, ke, hnene la angetre Iudra hna mejiune kowe la atrehmekune qa hnine la Tusi Hmitrötr. (Roma 3:1, 2) Tusi Hmitrötre a hamëne kowe la angetre Iudra ka lapaune me kowe la itre xane ka troa dreng, la hna ajane hnei angatre matre troa atrehmekunyi Akötresie.
4. Ame koi Iesu, nemene la nyine tro la angetre Iudra me angetre Samaria a kuca e ajane angatre tro Akötresieti a kapa la hmi angatr?
4 Eje hi, hnei Iesu hna amamane kowe la angetre Iudra me angetre Samaria laka, loi e troa meköti la hmi i angatre matre amadrinë Akötresie. Hnei Nyidrëti hna qaja ka hape: “Nge tro ha traqa la ijin, nge dei ha la, e tro la nöjei ate nyipi hmi a hmi kowe la Tetetro ngöne la [ua, NW] me nyipici, ke Tetetroti a thele la ite ka tune lai troa hmi koi nyidë. Ua la Akötesie; nge qa i angete hmi koi nyidëti troa hmi ngöne la [ua, NW] me nyipici.” (Ioane 4:23, 24) Maine easë a ajan troa hmi koi Akötresie “ngöne la [“ua,” NW],” loi e eje the së la uati hmitrötre i Nyidrë, nge nyipi ewekë troa eatrongë së hnene ej. Ijije tro së a hmi koi Akötresie ‘ngöne la nyipici’ hnene la hna inine la Wesiula i Nyidrë, ene la Tusi hmitrötr, nge tro fe së a hmi koi Nyidrë jëne la nyipici hna amamane hnene la Tusi Hmitrötr. Hapeu, hetre aja i epuni fe kö troa trongëne lai?
5. (a) Nemene la aliene la hna ithahnata lo hna hape “hmi?” (b) E ajane së tro Akötresieti a kapa la hmi së, nemene la nyine tro së a kuca?
5 Hnei Iesu hna amamane hnyawa laka, Akötresieti hmekuje hi a kapa la nyipi hmi. Nyine tro lai a amamane ka hape, nyimutre catre la nöjei hmi hna thaa kapa kö hnei Iehova. Ame la troa hmi koi Akötresie, ke, kola hape troa atrunyi Nyidrë cememine la metrötr, nge troa hmitrötre la huliwa hna kuca kowe la aja i Nyidrë. E maine epuni a troa atrune la ketre hene ka tru ne la nöje ceitu me tixe i epun, ke, nyipici laka tro kö a nyipi atraqatre la aja i epuni troa nyihlue i nyidrë me trongëne la itre ewekë nyine amadrinë nyidrë. Eje hi, easë a ajane troa amadrinë Akötresie. Celë hi matre, thaa eje caasi kö la troa qaja ka hape, ‘Ketre, loi hi koi ni la hming,’ ngo, nyipi ewekë pe tro së a thele ka hape, hmi së kö a hane xötrethenge la itre hna amekötine hnei Akötresie.
LOI E TROA KUCA LA AJA I TRETRETRO
6, 7. Pine nemene matre thaa hnei Iesu kö hna waihatrene la itre xaa ka hane mekune ka hape angetre drei nyidrëti fe angatr?
6 Loi e tro së a e la Mataio 7:21-23, me wange ka hape nemene la itre götrane ka sisitria nyine troa waihatrene la hmi hna kapa hnei Akötresie. Hnei Iesu hna qaja ka hape: “Tha angat’asë kö angete qeje ni, ka hape, ‘Joxue, Joxue,’ ka troa hane lö kowe la baselaia ne hnengödrai; ngo loi la ate kuca la hanengë i Angakaka e hnengödrai. Ala nyimu la angete troa qaja koi ni ngöne la drai cili, ka hape, ‘Joxue, Joxue, hape u, thaa hane fe kö huni perofetane ngöne la atesiwa i cilie? nge kösaue la ite huliwa ka mene hne huni hna kuca ngöne la atesiwa i cilie?’ Nge tro ni a qaja koi angate, ka hape, Tha’te nyipunieti kö ni; iananyipi me ini, nyipunie angete kuca la ngazo.”
7 Ngöne la nyipi hmi, Iesu Keriso la Joxu, nge nyipi ewekë catre troa atrehmekunyi nyidrë tune lai. Ngo, hetre ketre ewekë ka paatre thene la itre ka mekune ka hape itretre drei Iesu fe angatr. Hnei nyidrëti hna qaja la pengöi angatr, önii nyidrë ka hape tro la itre xane a kuca la itre “huliwa ka men,” tune la itre nyine hain, ene la troa aloine la ketre atr, ngo thaa mene kö lai ka xulu qa thei Akötresie. Ngo ame pe, thaa hnei angatre kö hna trongëne la trengewekë ne mele hnei Iesu hna amekötin. Tha angatre kö lai a “kuca la hanengë i Angakaka.” E maine easë a ajane troa amadrinë Akötresie, ke, nyipi ewekë tro së a inine la aliene la aja i Tretretro, me trongëne ej.
NYIPI ATREHMEKUN—KA ITHUPË
8. Nemene ewekë hna troa hetrenyi the së matre ijiji së jë troa trongëne la aja i Akötresie, nge nemene la mekune ka ngazo nyine tro së a thipetrij?
8 Ame la troa kuca la aja i Akötresie, ke, kola hape koi së, troa hetrenyi la nyipi atrehmekune qa thei Akötresie, me Iesu Keriso. Tro la atrehmekune cili a thuejë së kowe la mele ka pë pun. Nyipici, loi e tro së asë a ajane troa thele troa hetrenyi la nyipi atrehmekune qa hnine la Wesiula i Akötresie, ene la Tusi Hmitrötr. Ngo önii itre xane pe, ame la nyipi ewekë, ke, ene la tro së a nyipici me catre ngöne la hmi, ijije hi lai. Nge, itre xane mina fe a mekune ka hape ‘E co hi la atrehmekune i epun, ke, tro fe a co la hna troa thele thei epun.’ Ngo Tusi Hmitrötre pe a xatua së troa kökötre ngöne la atrehmekune i Akötresie, me itre trepene mekune i Nyidrë.—Efeso 4:13; Filipi 1:9; Kolose 1:9.
9. Qa ngöne nemene matre kola ekögölithi së hnene la nyipi atrehmekun, nge pine nemene matre ka nyipiewekë lai koi së?
9 Hnene la nyipi atrehmekune hna thupë së wanga tro la itre ewekë ka ngazo a xötre kowe la hmi së. Hnei Paulo aposetolo hna qaja la ketre ua ka sipu mekune ka hape ketre “angela ka lai” angeic. (2 Korinito 11:14) Haawe, hnene la ketre ua ka asihngödri angeice kö—Satana—hna tupathe troa ajeanyi së qa ngöne la gojenyi ka meköt, matre troa kuca la itre ewekë ka thaa ihmeku kö memine la aja i Akötresie. Hna xötrethenge Satana hnene la itre xaa ua, matre hnei angatre hna angazone la hmi ne la itre atr; celë hi matre hnei Paulo hna qaja ka hape: “Ame la nöjei ewekë hna hujëne hnei angete ethen, angat’a hujëne koi ite demoni, nge thaa koi Akötesieti kö.” (1 Korinito 10:20) Matre, alanyimu la itre atr ka mekune laka thei angatre la nyipi hmi, ngacama thaa angatre kö a trongëne la itre hnei Akötresie hna ajan. Hna thoi koi angatre matre ee angatre kowe la hmi ka thoi, nge ka puingazo. Tro pë hë së a atre hnyawa thupen, la pengöi Satana, me itre dremoni, ngo eje hi laka, hnene lai itre ithupëjia me Akötresie hna apuingazone paluane la hmi ne la nöjei atr.
10. Nemene la nyine tro epuni a kuca e ase hë apoezinëne la timi ka qeqe hnei epuni hna iji qa ngön, nge troa xatua së tuneka hnene la nyipi atrehmekune qa ngöne la Wesiula i Akötresie?
10 E maine atre hi epuni laka, hna thë hnene la ketre atr troa apoizinëne la timi ka qeqe, hapeu tro pala kö epuni a iji qa ngöne la timi cili? Eje hi laka, loi e tro epuni a canga thele la ketre timi ka loi nyine ij, matre nyine mele koi epun. Ketre ceitun, kola xatua së hnene la nyipi atrehmekun, ene la atrehmekune qa thei Akötresie matre troa wangatrehmekune la nyipi hmi, nge matre nuetrije pi la nöjei ewekë ka sis, ke, celë hi kepine lai matre thaa kapa kö Akötresieti la hmi ka tune lai.
ITRE INI QA NGÖNE LA ITRE WATHEBO I ATR
11. Nemene la ka angazone la hmi ne la ka alanyimu e angetre Iudra?
11 Ame lo Iesu e celë fen, ke, alanyimu la angetre Iudra ka thaa trongëne kö la nyipi atrehmekun, ene la atrehmekune qa thei Akötresie. Qa ngöne lai, gufa ha la troa kepe angatre hnei Iehova. Haawe, ka eje hnyawa hi koi angatre lo hna cinyihane hnei Paulo ka hape: “Ini a wai hatenyi angate laka itete cate troa huliwa koi Akötesie, ngo thaa thenge la inamacan.” (Roma 10:2) Hnei angatre kö hna ketre sipu mekune la aqane tro angatre a hmi koi Akötresie, ngo thaa drenge pe la hnei Nyidrëti hna amekötin.
12. Nemene la ka angazone la hmi angetre Isaraela, nge nemene hë la pun?
12 Hnene la angetre Isaraela hna trongëne la hmi ka hmadradra hna acile hnei Akötresie ngöne la qaan, ngo hna apoizinëne pë hë hnene la itre ini, me nyi inamacane i atr. (Ieremia 8:8, 9; Malaki 2:8, 9; Luka 11:52) Ngacama hnene la itre hene ka tru ne hmi angetre Iudra, ene la ange faresaio hna mekune laka hna kapa la hmi angatre hnei Akötresie, ngo hnei Iesu hna qaja koi angatre ka hape “Loi la hnei Isaia hna perofetane göi nyipunie itete thoi, ene la hna cinyihan, ka hape, ‘Ame la nöje celë, te, kola atrunyi ni hnene la ukeineqë, ngo iananyi me ini la ite hni angat. Huliwapi hë angat’a hmi koi ni, ngo inine pe la nöjei wathebo i ate.’ ”—Mareko 7:6, 7.
13. Troa atre tuneka laka, ame la aqane ujë së ke, ceitu hi memine lo aqane ujë ne la itre faresaio?
13 Hapeu, Ka loi kö la tro së a hane xötrethengene la tulu ne la itre faresaio? Ohea, ngo troa traqa kowe lai, e hne së hna xötrethengene la itre edromë i atr hna kapa qa thene la hmi i itre xötrapane së, nge thaa wange pe la hnei Akötresieti hna qaja thatraqane la hmi. Hnei Paulo hna ithuemacanyine la ethanyine ej, me cinyihane ka hape: “Kola qaja amamane hnene la Ua, ka hape, tro ite xan a nue tije la lapaune ngöne la ite ijine hnapin, kola jëthenge la ite u ne amenun, me ite ihaji ne la ite demoni.” (1 Timoteo 4:1) Haawe, thaa tro hmekuje kö a mekune ka hape, hna kapa la hmi së hnei Akötresie. Tune lo föe ne Samaria ka ithahnata me Iesu, hne së hna kapa me xötrethenge la hmi ne la itre keme së. Ngo, nyipi ewekë troa xeci koi së laka, ame la itre ewekë hne së hna kuca, ke, ihmeku hi itre eje memine la aja i Akötresie.
TRO SË A HMEKËNE LA HAZE KA IANGAZO
14, 15. Ngacama atrepengöne hnyawa ha së la aja i Akötresie, pine nemene matre tro palahi së a hmek?
14 Nyipi ewekë tro pala hi së a hmek, wanga kuca jë së la ketre ewekë ka sisi qëmeke i Akötresie. Hanawange la ketre ceitun, hnei Ioane aposetolo hna kei hune la lue ca ne la ketre angela “troa thili koi nyidë.” Ngo, hnene la angela hna acilë angeice me hape: “Ohe pëkö; hlue ni me eö me nöjei tejine me eö, angete xome la nyine anyipici Iesu; thiliju pe koi Akötesie.” (Hna Amamane 19:10) Haawe, hnei epuni kö hna hane mekune hnyawa la enyipiewekëne la troa waipengöne la hmi, maine thaa hna löthe kö eje hnene la itre xaa pengöne aqane hmi koi itre idola?—1 Korinito 10:14.
15 Ame la itre keresiano a bëeke hmaca kowe la itre aqane hmi hna trije hnei Akötresie, ke, hnei Paulo hna hnyinge koi angatre ka hape: “Hna uë nyipunie laka ujë hmaca kowe la ite ini hnapane ka kucakuca, me thaa nyipi ewekë, lo hnei nyipunie hna ajane hmaca troa nyihluen? Nyipunie a trongëne la ite drai, me ite teu, me ite ijin, me ite macate. Ini a qou hni nyipunie wanga gufapi la hnenge hna huliwa koi nyipunie.” (Galatia 4:8-11) Hnene la itre xane e angatre hna hetrenyi la atrehmekune qa thei Akötresie, ngo e thupene hë, hnei angatre hmaca hna tro trije troa xötrethenge la itre aqane hmi, me ahmitrötrëne hmaca la itre xaa drai; itre ewekë lai hna thaa kapa kö hnei Akötresie. Tune la hnei Paulo hna qaja ka hape, nyipi ewekë catre tro së a “thele la nyine amadi Joxu.”—Efeso 5:10.
16. Nemene la mekune hna amamane hnene la tusi Ioane 17:16, me 1 Peteru 4:3 nyine xatua së troa atrepengöne la hnei Akötresie hna mekune göi itre feet, me itre huliwa ne la qene nöje së?
16 Nyipi ewekë tro së a atre hnyawa laka, thaa easë kö a nyipiine la itre drai hna ahmitrötrën, me itre xaa huliwa ka thaa ihmeku kö memine la itre trepene meköt i Akötresie. (1 Thesalonika 5:21) Drei la ceitune hna qaja hnei Iesu kowe la itretre drei i nyidrë, me hape : “Tha itete fene kö angat, nge tunge thaa ate fene kö.” (Ioane 17:16) Hapeu, eje pala kö ngöne la hmi i nyipunie la itre huliwa thaa hna kapa kö hnei Akötresie, me itre drai hna atrune ka atriane la itre trepene meköt i Akötresie, ene la hna qaja ka hape troa trotrije la itre huliwa ne la fen? Maine pena hna sine la itre qene nöj, me itre feet hnene la itre atr ne hmi epun, matre kola ujë tune la aqane qejepengöne hnei aposetolo Peteru? Hnei nyidrëti hna cinyihane ka hape: “Ea loiju hë la hna kuca la aja i angete etheni ngöne la ite ijine ka pat, lo hna trongëne la qene tratraij, me ite meciun, me iji waina atrun, me pelulu, me agö menu, me thithi kowe la ite idola ka sis.”—1 Peteru 4:3.
17. Pine nemene matre tro së a neëne wanga tro la itre aqane mekune ne la fen a hadrehadreue ngöne la mele së?
17 Hnei Ioane aposetolo hna amamane hnyawane la enyipiewekëne la troa ananyine la itre huliwa ka caasi memine la mekune ne la fene hnengödrai hne së hna lapa hnin ka thatre Akötresie. Hnei Ioane hna cinyihane ka hape: “The ajane kö nyipunie kowe la fen, memine fe la ite ewekë e celë fen. Maine kete ate a ajane la fen, pëkö aja koi Tetetro e kuhu hni angeic. Ke ame la nöjei ewekë asëjëihë e celë fen, ene la meciunyi ewekë i ngönetei, memine la meciune ne la lue mek, memine la nyidöne la mele celë, thaa qa thei Tetetroti kö, ngo qa hi la fen. Nge kola pate la fene hnengödrai, memine la hna aja kow; ngo troa cile huti epine palua la ate kuca la aja i Akötesie.” (1 Ioane 2:15-17) Hane kö epuni mekune hnyawa caha hna qaja, ene laka troa ‘cile huti epine palua la ate kuca la aja i Akötesie?’ Nyipici, e hne së hna kuca la aja i Akötresie, me ananyine la itre huliwa ka ihmeku memine la mekune la fene hnengödrai celë, ke, ijije tro së a hane hetrenyi la mejiune kowe la mele ka pë pun!
THUPËNE JU LA ITRE TULU KA SISITRIA QA THEI AKÖTRESIE
18. Nemene la mekune ka hmo ka eje ekö thene la angetre Korinito, nge nemene la ini tro së a xome qa lai?
18 Aja i Akötresie tro la itre ka atrunyi Nyidrë a trongëne la itre tulu i Nyidrë ka draië. Hnene la itre xaa atr ne Korinito ekö hna mekune menune ka hape, tro Akötresieti a kapa la thiina i angatre ka ngazo. Hne së hna öhne la itre ewekë ka ngazo hnei angatre hna kuca ekö, ngöne la easë a e la 1 Korinito 6:9, 10. E easë a ajane tro Akötresieti a kapa la hmi së, ke, nyipi ewekë tro së a amadrinë Nyidrë qa ngöne la aqane ithahnata së, me aqane ujë së. Hapeu, hna upi epuni fe kö hnene la hmi epuni troa trongëne la aqane ujë celë?—Mataio 15:8; 23:1-3.
19. Nemene la thangane la nyipi hmi, ngöne la aqane tro së a imelekeu me itre xan?
19 Tro la aqane imelekeu së me itre xaa atr a amamane la itre trepene meköti qa thei Akötresie. Hnei Iesu Keriso hna thuecatre së troa kuca koi itre xane la itre ewekë hne së hna ajane tro angatre a kuca koi së, ke, ketre hatrene la nyipi hmi lai. (Mataio 7:12) Hanawange la aqane qejepengöne hnei nyidrëti la nyipi ihnimi trejin: “Celë hi mate tro nöjei ate asëjëihë a wangate hmekune laka itete dei ni nyipunie, e tro nyipunie a ihnimikeu.” (Ioane 13:35) Loi e tro la itretre drei i Iesu a ihnimikeu, me kuca la loi kowe la itretre ce hmi me angatr, me koi itre xan.—Galatia 6:10.
HMI MEMINE LA HNI KA PEXEJ
20, 21. (a) Ka tune ka la hmi hnei Akötresie hna ajan? (b) Pine nemene matre nuetriji Isaraela hnei Iehova ngöne la hneijine i Malaki?
20 Eje ngöne la hni epuni la ajane tro Akötresieti a kapa la hmi epun. Maine eje hi, ke, nyipi ewekë tro epuni a kapa la aqane goeëne i Iehova la hmi. Hnene la ketre atre drei i Iesu, Iakobo la ëjene hna amamane hnyawa laka, sisitria kö la mekuna i Akötresie hune la itre mekuna së. Hnei Iakobo hna qaja ka hape: “Dei lola thina ne la hmi ka wië, me pë ethane xajawa i Akötesie Tetetro, ka hape, Troa wange la ite neköeng, me ite sine föe ngöne la aköte i angat, me thupë angeice mate thaa nyi ethanyi angeice kö hnene la fene hnengödrai.” (Iakobo 1:27) Easë a ajane troa amadrinë Akötresie, haawe, tro së isa alacasi a waipengöne hnyawane la hmi së matre xeci hnyawa koi së laka, thaa hna angazone kö eje hnene la itre huliwa ne fen, maine pena thaa hne së kö hna eatrëne la ketre ewekë ka tru koi Nyidrë, pine laka jëne iamele.—Iakobo 1:26.
21 Tro hmekuje hi la hmi ka pë ethan, memine la hni ka pexeje a amadrinë Iehova. (Mataio 22:37; Kolose 3:23) Ame ngöne la kola wangaconyi Akötresie hnene la nöje Isaraela, ke, hnei Nyidrëti hna qaja koi angatre ka hape: “Tro la nekön’a metötëne la kem, nge tro la hlu’a metötëne la tixe i angeic, maine keme kö ni e ka la metötë ni? Nge maine tixene kö ni, e ka la qoue ni?” Ngazo la thiina i angatre koi Akötresie, ene laka, angatre a hujëne koi Nyidrëti la öni ka timek, me ka genyi ca, me ka wezipo. (Malaki 1:6-8) Thatraqai Iehova la hmi ka wië, nge Nyidrëti a ajane troa atrunyi Nyidrë hmekuj.—Esodo 20:5; Ite Edomë 3:9; Hna Amamane 4:11.
22. Nemene la nyine tro së a thipetrije me kuca matre tro Akötresieti a kapa la hmi së?
22 Kola mama ngöne lo ijine porotrike hnene lo föe ne Samaria me Iesu laka, eahlo a ajane troa atrepengöne la hmi hna kapa hnei Akötresie. Maine celë jë fe hi la aja së lai, ke, loi e tro së a thipetrije la nöjei ini, me huliwa ka hetre ethanyin. (2 Korinito 6:14-18) E hune la itre ewekë cili, tro së a catre troa hetrenyi la nyipi atrehmekune qa thei Akötresie, me kuca la aja i Nyidrë. Nyipi ewekë tro së a trongëne asë la itre hna amekötine hnei Nyidrë, matre tro fe a hane kapa la hmi së. (1 Timoteo 2:3, 4) Kola thele hnene la itretre anyipici i Iehova troa xötrethenge lai, nge angatre fe a hane iele epuni troa ceme angatr, matre troa hmi koi Akötresie “ngöne la [ua, NW] me nyipici.” (Ioane 4:24) Hnei Iesu hna qaja ka hape: “Tetetroti a thele la ite ka tune lai troa hmi koi nyidë.” (Ioane 4:23) Maine jë, epuni la ketre atr ka trongëne la hna amekötine celë. Tune la föe ne Samaria, haawe eje hi laka, aja i nyipunie troa hetrenyi la mele ka pë pun. (Ioane 4:13-15) Ngo ame pe, nyipunie a goeëne la itre atr a qatre trootro, me mec. Haawe, tro la mekene hne së hna troa wange thupene a amamane la kepin.
HAPEUE LA HNEI EPUNI HNA ININ
Tune la hna amamane ngöne Ioane 4:23, 24, nemene la hmi hna kapa hnei Akötresie?
Tro së a atrepengöne tuneka la itre huliwa maine feet hnei Akötresie hna kapa?
Nemene lo itre xaa hna amekötine matre hane jë Akötresie kapa la hmi së?