Thuneihna Bang Hang Zahtak Ding Ihi Hiam?

1, 2. (a) Kua ii lamlahnate zui ding ihi hiam? (b) Hih khenpi-ah bang thudotnate kikum ding i hiam?

NA NAUPAN lai-in na sepnop loh khat peuhpeuh na nu le pa in hong sawlna tam veipi na tuak ngei ding hi. Na nu le na pa na it a, amau’ thu man ding ahihlam na thei hi. Ahih hang thu na mang den nuam kei hi.

² I Pa Jehovah in a hong itlam i thei hi. Eite hong thudonin, nuntak nuam i ngah theih nading a kisam khempeuh hong pia hi. I gualzawh theih nading lamlahna hong pia hi. Khat veivei ciangin, eite hong lamlak dingin Pasian in midangte zang hi. Jehovah’ thuneihna i zahtak ding kisam hi. (Paunak 24:21) Ahih hang khat veivei ciang lamlahna zuih ding bang hang haksa a hiam? Lamlahnate zuih ding Jehovah in bang hang hong kal a hiam? Pasian’ thuneihna i zahtak lam koi bangin lak ihi hiam?—Ciaptehna 9 en in.

BANG HANG HAKSA A HIAM?

3, 4. Mihingte koi bang danin a cingtaak lo mi suak ihi hiam? Midangte’ hong piak lamlahna i san ding bang hang haksa thei a hiam?

³ Mihingte in langpan nopna lungsim i nei hi. Nupa masa pen Adam le Eve in mawhna a bawl khit a kipan tua bangin hong piang hi. A cingtaak mi-in a bawl nangawn zong Pasian’ thuneihna na langpang uh hi. Tua huna kipanin mihing khempeuh nu’ gilsung pan a cingtaak lo mi-in i suak hi. Tua banga i kicintaak lohna in Jehovah le midangte’ hong piak lamlahna zuih ding haksa i sakna a hang khat hi. A hang dang khat pen hong lamlak dinga Jehovah in a zat mite zong a kicingtaak lo mite mah ahih hang uh hi.—Piancilna 2:15-17; 3:1-7; Late 51:5; Rom 5:12.

⁴ A cingtaak lo mi ihih manin kiphatsakna lungsim i nei thei hi. Kiphatsakna lungsim in lamlahnate zuih ding haksasak thei hi. Gentehna-in, tanglai Israel hun lai-in Jehovah in ama mite a makai dingin Moses na teel hi. Kum tampi sung Jehovah a bia Korah in kiphatsakna lungsim hong nei-in Moses na zahtak lo hi. Moses ahih leh Pasian’ minamte makai ahih hang kiphatsakna lungsim nei lo hi. Leitunga om mi khempeuh sangin a lungnemzaw hi ci-in kiciamteh hi. Ahih hang, Moses ii lamlahna Korah in na sang zo lo hi. Amah tawh kipawl dingin mipite nangawn khawmin Moses a langpang uh hi. Korah le a langpang mite tungah bang piang a hiam? A vekpi-un si khin uh hi. (Gamlak Vakna 12:3; 16:1-3, 31-35) Kiphatsakna lungsim pen a lauhuai lam a hong theisak limlahna tampi Lai Siangtho sungah om hi.—2 Khang Tangthu 26:16-21; Ciaptehna 10 en in.

5. Mi pawlkhat in thuneihna koi bangin zang khial uh hiam?

⁵ “Thuneihna zang khial” cih kammal za ngei tek ding hi hang. Tangtawng peka kipan mi tampi in thuneihna na zang khial uh hi. (Thuhilhna 8:9 sim in.) Gentehna-in, Saul pen Israel kumpi dingin Jehovah in a teel lai-in a kiniamkhiat mi le mi hoih khat ahi hi. Ahih hangin kiphatsakna le hazatna lungsim hong nei ahih manin mawhbaang lo David pen hong bawlsia hi. (1 Samuel 9:20, 21; 10:20-22; 18:7-11) A nung ciangin, David in kumpi hong sem a, Israel gamah kumpi hoihpen hong hi hi. Ahih hangin, David nangawn in zong thuneihna zang khial hi. Uriah’ zi Bathsheba mawhpih a, Uriah a sih nadingin galsimna-ah a madawkin koihsak a, ama’ mawhna seel dingin a hanciam hi.—2 Samuel 11:1-17.

JEHOVAH’ THUNEIHNA I ZAHTAKNA A HANG

6, 7. (a) Jehovah i itna in bang sem dingin hong hanthawn a hiam? (b) A haksat hun ciang zong thuman nading bang in hong huh ding a hiam?

⁶ Jehovah it ihih manin ama’ hong lamlahna i zahtak hi. Na khempeuh sangin le a kuamah peuh sangin Jehovah itzaw ihih manin a lung i damsak nuam hi. (Paunak 27:11; Marka 12:29, 30 sim in.) Eden huanah nupa masate a teng lai-a kipan Jehovah’ thuneihna tawh kisai mihing te’n thudotna a bawl ding uh Satan in deih hi. Jehovah in i sep ding hong hilh dingin thu nei lo hi ci-in Dawimangpa in hong umsak nuam hi. Tua pen zuauthu ahihlam i thei tek hi. “Kote’ Topa Pasian aw, nangmah in na khempeuh piangsakin, . . . minthanna, pahtawina, le vangliatna na ngah tawntung dingin a kilawm hi,” cih kammal pen i thukimpih hi.—Maangmuhna 4:11.

⁷ Na naupan lai-in, thu na mannop loh ciang zong nu le pate’ thu mang dingin hong kihilh hi. Tua mah bangin Jehovah’ mite adingin thu man ding a haksat hun zong om thei hi. Ahih hang Jehovah it a, i zahtak manin a hithei zahin ama thu i mang hi. Jesuh in i etteh ding lim hong lak hi. Jesuh in a haksat hun nangawn ciang zong Jehovah thu na mang hi. Tua ahih manin a Pa kiangah; “Kei deihna bang hi loin nangma deihna bang hi ta hen,” a ci thei hi.—Luka 22:42; Ciaptehna 11 en in.

8. Jehovah’ hong lamlahna pawlkhat in bang a hiam? (“Thu Hong Kihilh Ciangin Ngai In” cih bawm en in.)

⁸ Tu hunin, Jehovah in nam tuamtuamin lam hong lak hi. Gentehna-in, Lai Siangtho hong pia hi. Pawlpi upate zong hong pia hi. Hong lamlak dinga Jehovah in a zat mite i zahtak ciangin, Pasian thuneihna i zahtak lam a lak ihi hi. Amaute’ hong huhna i nial leh Jehovah a nial tawh a kibang ihi hi. Israel mite in Moses a nial uh ciang, tua pen Jehovah in thupilaak mahmah a, amah a nial bangin ngaihsun hi.—Gamlak Vakna 14:26, 27; Ciaptehna 12 en in.

9. Lamlahna zui dingin itna in koi bangin hong hanthawn ding a hiam?

⁹ Thuneihna i zahtakna pen i unaupihte i itna zong hikawm hi. Ngaihsun dih lecin; siatna lianpi a tun ciang huhna a pia mite in mi a tam thei penin a hotkhiat theih nadingun semkhawm ciat uh hi. Amau’ huhna mi te’n a phattuampih nadingin mi khat in makaih a, tua makaipa’ lamlahna a zuih ding uh kisam hi. Ahih hang mi khat in lamlahna thupiseh loin ama sepnop teng sem hi leh e? Ama ngimna a hoih ahi phial zongin, thu manlohna in a seppihte tungah buaina piangsak thei a, nakpi takin siatna piang thei hi. Tua mah bangin, Jehovah lamlahna le thuneihna a piak mite ii lamlahna i zuih kei leh midangte tungah siatna tung thei hi. Jehovah’ thu i man ciangin, unaute i itlam le Jehovah’ vaihawmna i zahtak lam a kilangsak ihi hi.—1 Korin 12:14, 25, 26.

10, 11. Tu’n, bang thu kikum ding ihi hiam?

¹⁰ Jehovah hong kalh khempeuhte pen i phattuam nading vive ahi hi. Innkuan sung, pawlpi sung le kumpi thuneite tawh i kizop ciang, thuneihna i zahtak lam lak lehang, i vekpi-in phattuamna ngah ciat ding hi hang.—Thu Hilhkikna 5:16; Rom 13:4; Efesa 6:2, 3; Hebru 13:17.

¹¹ Jehovah in midangte i zahtak ding bang hang deih hiam cih i theihna in midangte zahtak dingin hong panpih thei ding hi. I nuntakna-ah zahtakna i lah theihna nam thumte a kicingin kikum ni.

INNKUAN SUNGAH ZAHTAKNA LAK IN

12. Thuneihna a zahtak lam pasal in koi bangin lak thei a hiam?

¹² Jehovah in innkuan nuntakna kipansak a, innkuanpih khat ciat kiangah amau panmun tek a pia hi. Jehovah in bang hong kalh hiam, cih thei ciat lehang innkuan vaihawmna mapai ding a, innkuan bupin phattuamna kingah ding hi. (1 Korin 14:33) Jehovah in pasal pen innkuan lutang dingin a koih hi. Pasal in a zi le a tate kem a, a vaak ding le itna tawh lam a lah ding Jehovah in lamen cihna hi. Tua ahih manin pasal in amau a kep dan tawh kisai-in Jehovah kiangah a pulakkik ding hi. Jesuh in pawlpi itin a kep mah bangin Khristian pasalte in a innkuan itin a kem ding uh hi. Tua bang danin pasal in Jehovah a zahtak lam a lak hi.—Efesa 5:23; Ciaptehna 13 en in.

13. Thuneihna a zahtak lam zi in koi bangin lak thei a hiam?

¹³ Khristian zi in zong a thupi, a pahtawihuai panmun a nei hi. Innkuan lutang hoih a suah theih nadingin a pasal’ hanciamna a zi in a panpih hi. A tate pattah dingin a pasal tawh tavuan a nei hi. Mi zahtak siam tanu tapa a suah nadingun a pattah theih dan nam khat pen a mahmah ii etteh ding lim ahi hi. (Paunak 1:8) A pasal zahtakin a thu khensatnate a thukimpih hi. Thu khat peuhpeuhah a pasal tawh a kithutuak loh ciang zong, a ngaihsutnate nemtakin le zahtakna tawh a gen hi. Khristian numei in thu um lo mi tawh a kiten ciangin, haksatna a thuak thei hi. Ahih hangin a pasal tungah itna le zahtakna lak leh ni khat ni ciangin a pasal in zong Jehovah thu hong theinuam khathei ding a, Jehovah zong hong bia thei ding hi.—1 Peter 3:1 sim in.

14. Thuneihna a zahtak lam uh tate in koi bangin lak thei a hiam?

¹⁴ Tate pen Jehovah ading manpha a, hutna le lamlahna kisam phadiak uh hi. Tate in nu le pate’ thu a man uh ciang, nu le pate lungdam uh hi. Tua tham loin, thu manna tawh Jehovah a lungdamsak zahtakna a lah uh pen a thupi pen hi. (Paunak 10:1) Innkuan tampi-ah nu bek ahih kei leh pa bek in tate kemin pattah hi. Tua bang dinmun pen nu le pate ading ahi zong, tate ading ahi zong haksa tuaktuak thei hi. Ahih hangin ta te’n thu mangin a nu ahih kei leh a pa pen a huh uh ciangin innkuan nuntak hong nuamzaw hi. Bangbang hitaleh a cingtaak innkuan cih pen om lo hi. Ahih hang innkuanpih khat ciat in Jehovah lamlahna a zuih uh ciang innkuan sim in lungnopna ngahzaw uh hi. Tua bang danin innkuan khempeuh a Kipansakpa ahi, Jehovah a pahtawi ciat uh hi.—Efesa 3:14, 15.

PAWLPI SUNGAH ZAHTAKNA

15. Pawlpi sungah thuneihna i zahtak lam bangci lak thei i hiam?

¹⁵ Jehovah in Khristian pawlpi tungtawnin lam hong lak hi. Jesuh pen pawlpi tungah thuneihna khempeuh a pia hi. (Kolose 1:18) Jesuh in zong hih leitunga Pasian mite a kem dingin “a pil a citak nasem” tungah tavuan a pia hi. (Matthai 24:45-47) Tu ni-a, “a pil a citak nasem” pen Governing Body ahi hi. Governing Body in i upna a thakhauh theih nadinga a kisamte a hun manmanin hong vaihawmsak hi. Pawlpi upate, pawlpi nasemte le khawk makaipite in leitung bupa om pawlpite huhin a panpih uh hi. Amaute in Governing Body kiang pan lamlahna a ngah uh hi. Hih unaupate in hong don dingin tavuan nei uh hi. Hih tavuante a sep dan tawh kisai-in Jehovah tungah a kipulak ding uh hi. Tua ahih manin hih unaupate i zahtak leh Jehovah a zahtak ihi hi.—1 Thesalonika 5:12; Hebru 13:17 sim in; Ciaptehna 14 en in.

16. Pawlpi upate le pawlpi nasemte pen kha siangtho tawh kiseh hi cih bang hang gen thei ihi hiam?

¹⁶ Pawlpi upate le pawlpi nasemte in pawlpi a cihtak nading le a kipumkhat nadingin na sem uh hi. Amau zong ei mah bangin a cingtaak lo mi mah ahi uh hi. Tua hileh amaute koici kiteel hiam? Amaute in Lai Siangtho sunga i muh pianzia hoihte a cintaak ding uh kisam hi. (1 Timoti 3:1-7, 12; Titus 1:5-9) Hih pianzia hoihte tawh kisai a hilhcian dingin Jehovah in kha siangtho zangin Lai Siangtho a atte na huh hi. Pawlpi upate in upa le pawlpi nasem dinga a kiseh ding mite tungtaang a kikup uh ciangin, kha siangtho a ngah nadingun Jehovah kiangah thu ngen uh hi. Pawlpi pen Jesuh le Jehovah’ lamlahna nuai-ah om hi cih kician hi. (Sawltak 20:28) Eite hong huh ding le hong kem dingin a kiseh hih unaupate pen Pasian hong piak letsong ahi hi.—Efesa 4:8.

17. Zahtakna a lah nadingin unaunu in khat veivei ciangin, bang a sep ding kisam a hiam?

¹⁷ Khat veivei ciangin, pawlpi tavuan a len ding pawlpi upa le pawlpi nasemte om lo thei hi. Tua bang hun ciangin, a kituiphum khin unaupate in tavuan la thei hi. Tua bang unaupate zong om kei leh a kituiphum khin unaunu khat in tavuan a lak ding kisam thei hi. Tua bang hun ciangin dial hiam, lukhu hiam zangin a lu a khuh ding kisam hi. (1 Korin 11:3-10) Tua bang danin unaunu in innkuan sungah ahi a, pawlpi sungah ahi zongin lutang hihna tawh kisai Jehovah’ geelna a zahtak lam a lak hi.—Ciaptehna 15 en in.

KUMPI THUNEITE ZAHTAKNA

18, 19. (a) Rom 13:1-7 pan bang sin thei i hiam? (b) Kumpi thuneite i zahtak lam bangci lah ding i hiam?

¹⁸ Tu hunin Jehovah in kumpite tungah thuneihna pawlkhat a neih uh phal ahih manin i zahtak ding kilawm hi. Gam sung hoih taka a uk theih nading le mipite’ kisapte a piak theih nadingun, vaihawmna tuamtuam nei uh hi. Khristian te’n Rom 13:1-7 sunga lamlahnate i zui hi. (Sim in.) “Hong ukte” i zahtak banah, i tenna gam sunga upadite zong i zui hi. Tua upadite in innkuan, sumlepai zonna le neihlelam tungah hong sukha thei hi. Gentehna-in, siah i pia a, kumpi in hong nget adang a tuamtuamte zong i pia hi. Ahih hang Pasian thukhamte tawh a kitukalh na khat peuhpeuh sem dingin kumpi te’n hong kalh hileh bang cih ding i hiam? Sawltak Peter in hih bangin gen hi: “Mite’ thu sangin Pasian’ thu ka mangzaw ding uh hi.”—Sawltak 5:28, 29.

¹⁹ Thukhen mangte, palikte le adang kumpi thuneite khat tawh i kihopih ciangin, zahtakna i lah ding kilawm hi. Khristian khangnote in zong sangsiate le sanginn a nasem dangte a zahtak uh hi. Nasepna munah i naseppihte in i pute a zahtak kei uh le zong, i zahtak veve hi. Tua bangin zahtak ihih leh khat veivei a haksat hun ciang zong, kumpi thuneite tungah zahtakna a lak sawltak Paul a etteh ihi hi. (Sawltak 26:2, 25) Midangte in hoih takin hong thusim kei lezong, zahtakna i lak veve hi.—Rom 12:17, 18 sim in; 1 Peter 3:15.

20, 21. Midangte i zahtak lam i lah ciangin, bang phattuamnate ngah thei i hiam?

²⁰ Leitung bupah khatlekhat kizahtakna kiam semsem hi. Ahih hang, Jehovah’ mite pen amau tawh kibang lo uh hi. Mi khempeuh zahtak i sawm hi. “Mi khempeuh zahtak un,” ci-a sawltak Peter ii hong lamlahna i zui hi. (1 Peter 2:17) Midangte zahtakna i lah ciangin, tua pen amau na thei uh hi. Jesuh in, “Midangte in na gamtatna hoihte uh a muh ciangin . . . na Pa uh min a phat theih nadingun mite mai-ah na gamtat hoihna uh khuavak bangin na kilangsak un,” a ci hi.—Matthai 5:16.

²¹ Innkuan sung, pawlpi sung le adang i nuntaknate-ah zahtakna i lah manin, midangte in Jehovah thu sinnopna lungsim hong nei thei uh hi. Midangte i zahtakna pen Jehovah tungah zahtakna a lak ihi hi. Tua in Jehovah lungdamsak a, amah i itlam a lak ihi hi.