SIN DING THU 56
Pawlpi Sungah Kipumkhatna A Om Nadingin Hanciam In
Unaute tawh i om khop ciangin, Kumpi David mah bangin: “Sanggamte kipumkhat in, a teenkhop uh ciangin hoihin nopci mah si e!” ci-in i ngaihsun hi. (Late 133:1, ZSV) Eite’ kipumkhatna pen ama thu-a hong piang hi lo hi. Kipumkhatna a om nadingin i hanciam ciat ding kisam hi.
1. Pasian’ mite lakah bang kilamdanna om a hiam?
Gamdanga pawlpi kikhopna khatah kikhawm lecin, amau kampau na tel loh hang, nuamsa veve ding hi teh. Bang hang hiam cih leh laibu laidal a kibang zangin Lai Siangtho kisin a, khatlekhat ki-it dingin kihanciam ciat ahih man hi. Koi mun koi munah i teng zongin, ‘Jehovah tung bekah thu ngenin, lungsim kipumkhatin a na i sem,’ ahih kei leh amah i biakhawm hi.—Zefaniah 3:9.
2. Kipumkhatna om dingin bang hih thei i hiam?
“Na lungsim khempeuh uh tawh limtakin na ki-it un.” (1 Peter 1:22) Hih thuhilhna pen koi bangin zui thei i hiam? Midangte thanemna mitsuan lo-in amau hoihna zong zaw un. Deihna i kibatpih mite tawh bek kikhawl lo-in nungthu a kibanglo unaute meltheih dingin hanciam in. Na neih theih deidanna lungsim khempeuh a beisiang dingin hanciam in.—1 Peter 2:17 sim in.a
3. Unau khat tawh na kithutuah loh ciangin bang hih ding na hiam?
I kipumkhat hangin, a cingtaak kuamah i om kei hi. Khat veivei ciangin khatlekhat tungah lungkim lohna ahih kei leh lungsim nat nadingin i kibawl khathei hi. Tua ahih manin Lai Siangtho in ‘khatlekhat na mawhna uh kimaisak un,’ a cihkhit ciangin, ‘Topa in note’ mawhna hong maisak bangin note zong khatlekhat na mawhna uh na kimaisak un,’ ci-in gen beh hi. (Kolose 3:13 sim in.) Jehovah lungsim i liamsak pahpah hangin amah in hong maisak hi. Tua ahih manin, unaute’ mawhna a maisak dingin hong lamen hi. Mi khat ii lungsim na liamsaklam na theih leh nang lam panin kilem nadingin bawl masa in.—Matthai 5:23, 24 sim in.b
ZON BEH INLA, MUH BEH IN
Pawlpi sungah kipumkhatna le kilemna a khan semsem nadinga na sep theihte kan in.
Kilem nadingin bang hih ding na hiam?
4. Deidanna lungsim paikhia in
Unau khempeuhte tungah itna i lak nuam hi. Ahih hang, ei tawh nungthu a kibang lo mite i san ding haksa thei hi. Tua ahih leh bang in hong huh thei ding hiam? Sawltak 10:34, 35 sim in. Tua khit teh hih dotnate kikum un:
Jehovah in minam khempeuh pen ama Tecite hi dingin sang hi. Nungthu kibatpih lohte tawh na kizop ciangin Jehovah koici etteh ding na hiam?
Na omna mun a koi bang kideidanna pen pelh nuam na hiam?
Korin Nihna 6:11-13 sim in. Tua khit teh hih dotna kikum un:
Nungthu a tuamtuam nei unaute tawh koici kimaingap semsem thei ding na hiam?
5. Mawhna kimaisak unla, kilem nadingin bawl un
Jehovah mawhna i maisak ding a kisap ngei loh hang, ama’n eite’ mawhna hong maisak hi. Late 86:5 sim in. Tua khit teh hih dotnate kikum un:
Jehovah in bangzah dongin mawhna hong maisak a hiam?
Jehovah’ mawhmaisakna tungah bang hangin lungdam na hiam?
Koi bang dinmunte-ah midangte tawh kilem ding haksa thei a hiam?
Jehovah ettehin unaute tawh kipumkhat dingin bang hih thei i hiam? Paunak 19:11 sim in. Tua khit teh hih dotna kikum un:
Mi khat peuhpeuh in hong hehsak hun ciangin bang hih leng hoih ding a hiam?
Ei mahmah in zong midangte heh nading kibawl khathei hi. Tua hun ciangin bang hih ding kilawm a hiam? VIDEO hong in. Tua khit teh a nuai-a dotna kikum un.
Video sunga unaunu in kilem nadingin bang sem a hiam?
6. Unaute’ hoihna zong in
Unaute tawh i kinai semsem ciangin amau hoihna le thanemnate i theithei hi. Amau hoihnate koici mitsuan thei ding i hiam? VIDEO hong in. Tua khit teh a nuai-a dotna kikum un.
Unaute ii pianzia hoihte i muh nadingin bang in hong huh thei a hiam?
Jehovah in i pianzia hoihte mitsuan hi. Khang Tangthu Nihna 16:9a sim in. Tua khit teh hih dotna kikum un:
Jehovah in na pianzia hoihte mitsuan ahihlam na theih ciang na lungsim bangci om a hiam?
Daimon suang khatah paubaanna a om hang, manpha lai veve hi. Unaute zong a cingtaak loh uh hangin Jehovah adingin manpha uh hi
MI PAWLKHATTE’ GEN: “Amahmah in mawhmaisakna hong nget ciang bekin maisak ning.”
Khatlekhat bang hangin lawp taka mawhna kimaisak ding kisam a hiam?
TOMLAKNA
Unaute’ mawhna na maisakna le na itna tawh pawlpi sungah kipumkhatna om dingin panpih thei hi teh.
Kikupkikna
Deidanna lungsim koici paikhia thei na hiam?
Unau khat tawh na kithutuak loh ciangin bang hih ding na hiam?
Jehovah’ mawhmaisakna pen bang hangin etteh nuam na hiam?
THEIH BEH NADING
Midangte’ mawhna zonna i pelh theih nadingin Jesuh’ thugentehna khat in hong huh theih dan en in.
Ei le ei mawh kisa kei leng, mawhmaisakna nget ding a kisam veve hiam?
“Mawhmaisak Ding Ngetna—Kilem Nadinga A Kisam Bulpi” (Vilnatausang, November 1, 2002)
Mi pawlkhatin kideidanna om lo-a mi dangte a et theih dan uh kan in.
Pawlpi kipumkhatna a siat loh nadingin kithutuak lohnate siansak theih dan thu sim in.
“Kithutuak Lohnate Itna Tawh Siangsak In” (Vilnatausang, May 2016)
a Hilhcianna 6 na-ah itna in Khristiante natna a kilawh loh nadinga a hanthot dan om hi.
b Hilhcianna 7 na-ah sumbawlna le upadi tawh kisai thute siansak theih dan om hi.