SIN DING THU 29
Mi A Sih Ciang Bang Piang A Hiam?
Na it na ngaih khat in hong sihsan ngei hiam? Lunggimin na dah mahmah hun ciangin: ‘Mi a sih ciang bang piang a hiam? I it i ngaihte tawh i kimukik thei diam?’ ci-in ngaihsun khathei ding hi teh. Hih sin ding thu le a zom sin ding thu-ah, Lai Siangtho sung pan hong hehnem thei a dawnnate kikum ding hi hang.
1. Mi a sih ciang bang piang a hiam?
Jesuh in sihna pen ihmut tawh na genteh hi. A ihmu mi khat in a gei-a thupiangte thei lo hi. Sihna pen ihmut tawh koici kibang a hiam? Mi khat a sihkhit ciangin nasa-a gimna thuak nawn lo hi. A nusiat a innkuanpihte le lawmlegualte phawk a, lungleng cih bang zong om lo hi. “A sisate in bangmah thei nawn lo uh hi,” ci-in Lai Siangtho in gen hi.—Thuhilhna 9:5 sim in.
2. Misite’ dinmun tawh kisai thuman i theihna in koi bangin hong huh a hiam?
Mi tampite in sih ding lau uh a, misite zong lau uh hi. Ahih hangin sihna tawh kisai Lai Siangtho genna na theihna pan hehnepna ngah thei hi teh. “Thuman in note hong suaktasak ding hi,” ci-in Jesuh in gen hi. (Johan 8:32) Mi a sih ciangin a kha nungtasuak bangin biakna pawlkhat in gen uh hi. Ahih hang Lai Siangtho in tua bangin gen lo hi. Tua ahih manin, misite in gimna thuak nawn lo uh hi. Misite in bangmah thei nawn lo uh ahih manin bawl zong hong bawlsia thei lo uh hi. Tua ahih manin misite’ lungkim nadinga kithoih ding, ahih kei leh misite biak ding kisam lo a, amaute adingin thungetsak ding zong kisam lo hi.
Mi pawlkhatin misite hopih thei bangin kigen uh hi. Tua pen hithei lo hi. I gensa mah bangin, misite in “bangmah thei nawn lo” uh hi. A sisa a it a ngaihte uh tawh kizom banga a kingaihsun mite pen a taktakin ci leng, dawite tawh a kizom uh hi zaw hi. Tua ahih manin misite’ dinmun i theihna in dawite’ bawlsiatna lak panin hong kemcing hi. Jehovah in dawite tawh kizop a lauhuailam thei ahih manin misite tawh kizom lo dingin hong kham hi.—Thu Hilhkikna 18:10-12 sim in.
ZON BEH INLA, MUH BEH IN
Sihna tawh kisai Lai Siangtho hilhna kan beh inla, misite a bawlsia lo itna Pasian pen na up semsem nadingin hanciam in.
3. Misite’ dinmun man thei dingin kan in
Mi a sih cianga thupiang tawh kisai-in leitung bupa mite in up dan tuamtuam nei tek uh hi. Ahih hang, tua upna khempeuh pen a vekpi-in man thei lo hi.
Na omna munah, misite’ dinmun tawh kisai-in koi bang upna tam a hiam?
Lai Siangtho hong hilhna na theih nadingin VIDEO hong in.
Thuhilhna 3:20 sim in. Tua khit teh hih dotnate kikum un:
Hih Lai Siangtho mun in a gen bangin, mi khat a sih ciangin bang piang a hiam?
Mi khat a sih ciangin a kha mun danga nungtasuak bangin a gen hiam?
Lai Siangtho in Jesuh’ lawm it mahmah ahi, Lazaras a sihna thu gen hi. Johan 11:11-14 sim in. Lazaras’ dinmun tawh kisai-a Jesuh’ thugen ciamteh in. Tua khit teh hih dotnate kikum un:
Jesuh in sihna pen bang tawh genteh a hiam?
Tua gentehna in misite tawh kisai-in bang hong theisak a hiam?
Sihna tawh kisai Lai Siangtho’ hilhcianna pen bangci ngaihsut na hiam?
4. Misite’ dinmun tawh kisai thuman i theihna in hong huh hi
Misite’ dinmun tawh kisai thuman i theih manin misite i lau nawn kei hi. Thuhilhna 9:10 sim in. Tua khit teh hih dotna kikum un:
Misite in hong bawlsia thei hiam?
Lai Siangtho thuman i theih ciangin, misite’ lungkim nadinga kithoih ding, ahih kei leh biak ding cih upnate i nei nawn kei hi. Isaiah 8:19 le Maangmuhna 4:11 sim in. Tua khit teh hih dotna kikum un:
Misi a biate le a kianga huhna a ngente Jehovah in bangci muh dingin ngaihsun na hiam?
Misite’ dinmun tawh kisai thuman in Jehovah’ deih loh ngeinate panin hong suaktasak
5. Misite’ dinmun tawh kisai thuman i theihna in hehnepna hong pia
Mi tampite in na hoih lo a sep uh leh a sih khit uh ciangin bawlsiatna thuak ding bangin um uh hi. Ahih hangin mi khat pen migilo ahi phial zongin, a sih khit ciangin gimna thuak lo ahihlam i theihna in hehnepna hong pia hi. Rom 6:7 sim in. Tua khit teh hih dotna kikum un:
Hih Lai Siangtho mun in a gen bangin, mi khat a sih khit ciangin a mawhna pan suakta ta ahih teh, na hoih lo a sem mi khat in a sih ciangin gimna a thuak ding hiam?
Jehovah’ thu thei semsem lehang, misite cikmahin gimna pia lo ding ahihlam i theician semsem ding hi. Thu Hilhkikna 32:4 le 1 Johan 4:8 sim in. Tua khit teh hih dotnate kikum un:
Hih Lai Siangtho munte-a a kigen pianziate a nei Pasian in misite gimna a pia ding hiam?
Misite’ dinmun tawh kisai thuman na theihna pan hehnepna na ngah hiam? Bang hang hiam?
MI PAWLKHATTE’ GEN: “Misite’ hong bawlsiat ding lau ing.”
A thangahhuai bang Lai Siangtho munte genpih thei ding na hiam?
TOMLAKNA
Mi khat a sih ciangin bangmah thei nawn lo a, gimna bangmah thuak nawn lo-in, a nungtalai mite zong bawlsia thei nawn lo hi.
Kikupkikna
Mi a sih ciangin bang piang a hiam?
Misite’ dinmun tawh kisai thuman i theihna in koi bangin hong huh a hiam?
Misite’ dinmun tawh kisai thuman i theihna in koi bang hehnepna hong pia a hiam?
THEIH BEH NADING
“Kha” tawh kisai Lai Siangtho hilhcianna sim in.
Pasian in migilote hell khukah a bawlsiat lohlam kan in.
Pasal khat in misite’ dinmun tawh kisai thuman a theih cianga hehnepna a ngah dan sim in.
“A Muantaak le A Kician Mahmah Lai Siangtho’ Dawnna Pen Hoihsa Ing” (Vilnatausang, February 1, 2015)