SIN DING THU 28
Jehovah le Jesuh’ Hong Sepsaknate Tungah Lungdamna Lak In
Na lawmte khat in letsong a hoih mahmah khat hong piak ciangin na lungsim bangci om a hiam? Nuam mahmahin, na lungdamna zong lakkhia nuam ding hi teh. Jehovah le Jesuh in letsong a hoihpen hong pia hi. Bang letsong a hiam? I lungdamna koici lak ding i hiam?
1. Jehovah le Jesuh’ hong sepsaknate tungah i lungdamna i lah theih dan nam khat in bang a hiam?
Lai Siangtho in, “Tapa [Jesuh] a um mi khempeuh” in tawntung nuntakna ngah thei uh cih hong kamciam hi. (Johan 3:16) Jesuh i upna koici lak thei ding i hiam? I upna pen i deih teelna le i sepnate tungtawnin lak thei hi hang. (James 2:17) I uplam pen i kampau le i sepna tawh i lahkhiat ciangin, Jesuh le a Pa, Jehovah tawh i kinai semsem ding hi.—Johan 14:21 sim in.
2. Jehovah le Jesuh’ hong sepsaknate tungah i lungdamlam bang hun ciangin lakkhia thei ihi hiam?
Jesuh in a sihma zanin a kipiakkhiatna tunga lungdamna i lah theih dan adang nam khat pen a nungzuite kiangah na gen hi. Lai Siangtho in, “Topa’ Nekkhawmna,” ci-a a gen Khrih’ Sih Phawkna pen a khatveina adingin na bawlpih hi. (1 Korin 11:20) Jesuh in eite adingin a nuntakna piakhia ahihlam sawltakte le Khristian mante khempeuh phawksak nuam ahih manin hih Topa’ Nekkhawm Bawlna na zatpih hi. Tua khit ciangin Jesuh in, “Kei nong phawk nadingun hih bangin na bawl un,” ci-in vaikhak hi. (Luka 22:19, ZSV) Sih Pawkna-ah na kikhop ciangin, Jehovah le Jesuh ii a lian mahmah hong itna tungah na lungdamna a lakkhia na hi hi.
ZON BEH INLA, MUH BEH IN
Jehovah le Jesuh ii a lian mahmah hong itna tungah lungdamna na lah beh theih dan ding kan in. Khrih’ Sih Phawkna a thupi dan limtakin ngaihsun in.
3. Lungdamna in sepna tawh lakkhia dingin hong hanthawn
Tui na kiat laitakin mi khat in hong hon bangin ngaihsun in. Ama hong huhna pen mangngilh lel ding na hiam? Ahih kei leh ama tungah na lungdamna na lah theih dan zong zaw ding?
Jehovah hangin eite in nuntak theihna hunpha i ngah hi. Johan Masa 4:8-10 sim in. Tua khit teh hih dotnate kikum un:
Jesuh’ kipiakkhiatna in bang hangin a hoihpen letsong hi a hiam?
Jehovah le Jesuh’ hong sepsaknate tungah na lungsim bangci om a hiam?
Ei adinga Jehovah le Jesuh’ hong sepsaknate tunga i lungdamna koici lak thei ihi hiam? Korin Nihna 5:15 le 1 Johan 4:11; 5:3 sim in. Lai Siangtho mun khat na sim khit sialin, hih dotna kikum un:
Hih Lai Siangtho muna i muh mah bangin, lungdamna koici lak thei ding i hiam?
4. Jesuh etteh in
Jesuh ettehna tawh zong lungdamna i lakkhia thei hi. Peter Masa 2:21 sim in. Tua khit teh hih dotna kikum un:
Koi bang danin Jesuh’ khekhap zui thei ihi hiam?
Jesuh in Pasian’ Thu it a, lungdamna thu taangko-in, midangte huh hi
5. Khrih’ Sih Phawkna-ah kihel in
A masa pena kibawl Topa’ Nekkhawm Bawlna-a a kihelte na theih nadingin, Luka 22:14, 19, 20 sim in. Tua khit teh hih dotnate kikum un:
Topa’ Nekkhawm Bawlna-ah bangteng kihel a hiam?
Anlum le leenggahzu in bang etsakna nei a hiam?—A neu 19 le 20 en in.
Jesuh in kum khatin khatvei, a sih ni-ah a nungzuite’n Topa’ Nekkhawm Bawlna nei dingin deih hi. Tua ahih manin, Jehovah Tecite in Jesuh’ thupiak mah bangin Khrih Sih Phawkna kikhop pen kum simin nei uh hi. A thupi mahmah hih kikhopna thu na theih nadingin VIDEO hong in. Tua khit teh a nuai-a dotna kikum un.
Sih Phawkna-ah bangteng kihel a hiam?
Anlum le leenggahzu pen etsakna lim ahi hi. Anlum pen ei adingin a hong piakkhiat Jesuh ii a cingtaak pumpi etsakna ahi hi. Leenggahzu pen Jesuh’ sisan etsakna ahi hi
MI PAWLKHATTE’ GEN: “Jesuh um peuh leng gupkhiatna a kingah hi lel.”
Up ziau bek tawh kingah lo ahihlam Johan 3:16 le James 2:17 zangin koici hilhcian ding na hiam?
TOMLAKNA
Jesuh’ hong sepsaknate tunga i lungdamna pen amah i upna le ama Sih Phawkna-ah i kikhopna tawh i lak hi.
Kikupkikna
Jesuh i upna koici lak thei ding i hiam?
Nang ading Jehovah le Jesuh’ hong sepsaknate tunga na lungdamna koici lak thei na hiam?
Khrih’ Sih Phawkna-ah kikhop ding pen bang hangin thupi mahmah a hiam?
THEIH BEH NADING
Khrih’ sihna in bang sem dingin hong hanthawn a hiam?
Upna thu le i upna i lahkhiat theih dan kan beh in.
“Jehovah’ Kamciamte Na Upna Lakkhia In” (Vilnatausang, October 2016)
Khrih ii kipiakkhiatna thu a theihna hangin, numei khat’ nuntakna a kikhelna thu pen “Ka Nuntakna Siangtho Kikin, Lungnuam Ta Ing,” cih thu-ah sim in.
“Lai Siangtho In Nuntakna Kikhelsak” (Vilnatausang, August 1, 2011)
Sih Phawkna-ah bang hangin mi tawmno bek in etsaknate ne uh a hiam?