SIN DING THU 30
I It I Ngaih A Sisate Tawh Kimukik Thei Ding!
Sihna in mihingte nakpi takin dahsak hi. Tua ahih manin Lai Siangtho in sihna pen gal na ci hi. (1 Korin 15:26) Sin Ding Thu 27-a i kikupsa mah bangin, hih gal pen Jehovah in susia ta ding hi. Tua hileh a sisate tungah bang hong piang ding a hiam? Hih sin ding thu-ah, Jehovah kamciam a hoih mamah adang khat kikum ding hi hang. Jehovah in nuntak nuam nei den dingin mi tampite thokiksak ding hi! Tua pen a hong tung thei takpi ding hiam? Amaute vantunga a teng dingin thokik ding uh maw? Ahih kei leh leitungah thokik zaw ding?
1. I it i ngaih a sisate adingin Jehovah in bang sepsak nuam a hiam?
Jehovah in a sisate nungtasakkik nuam mahmah hi. A citak mi Job in a sih ciangin Pasian in mangngilh lo ding cih pen muang hi. Ama’n Pasian kiangah, “Nong sam dinga, [han sung pan] kong dawng ding hi,” ci-in gen hi.—Job 14:13-15, ZIV sim in.
2. A sisate nungtakik thei hi cih pen koici theih i hiam?
Jesuh leitungah a om lai-in, mite nungtasakkik thei dingin Pasian in vangliatna pia hi. Kum 12 a pha numeino le meigongnu’ tapa nungtasakkik hi. (Marka 5:41, 42; Luka 7:12-15) A nung ciangin, Jesuh’ lawm Lazaras hong si hi. Lazaras a kivui zawh ni li bang a phakkhit hang, Jesuh in nungtasakkik hi. Pasian kiangah thu a nget khit ciangin, Jesuh in: “Lazaras aw, hong pusuak in,” ci-in sam hi. Tua ciangin, “a misi pa . . . hong pusuak hi.” (Johan 11:43, 44) Lazaras’ innkuanpihte le a lawmlegualte lungdam dan ding uh ngaihsun in!
3. I it i ngaih a sisate adingin bang lametna om a hiam?
Lai Siangtho in: ‘Thawhkikna om ding hi,’ ci-in hong kamciam hi. (Sawltak 24:15, ZIV) Jesuh’ thawhkiksak mite pen vantungah tung lo uh hi. (Johan 3:13) Leitungah hong nungtakik uh ahih manin lungdam mahmah uh hi. Tua mah bangin, a sawt lo-in Jesuh in mi tampite nungtasakkik ding a, amaute leitung paradais-ah a tawntungin tengsak ding hi. Jesuh in, “han sungah a om misi khempeuh”—mite in a phawk nawn loh uh hangin Pasian’ ciaptehna-a a om mite khempeuh—thokik ding uh hi, ci-in gen hi.—Johan 5:28, 29.
ZON BEH INLA, MUH BEH IN
Misite nungtakik thei-in, nungtakik ding uh ahihlam Lai Siangtho pan sittel in. Thawhkikna in hehnepna le lametna hong piak theih dan kan in.
4. Jesuh in misite nungtasakkik thei ahihlam lak
A lawm Lazaras adinga Jesuh’ bawlsakte kan beh in. Johan 11:14, 38-44 sim in. Tua khit teh hih dotnate kikum un:
Lazaras si takpi ahihlam koici theih i hiam?—A neu 39 en in.
Lazaras vantungah tungkhin hileh, leitunga nungtakik dingin Jesuh in a samkik ding hiam?
5. Mitampite hong thokik ding uh hi!
Late 37:29 sim in. Tua khit teh hih dotna kikum un:
Hong thokik ding mi tampite koi-ah teng ding uh a hiam?
Jesuh in Jehovah a bia mite bek hi lo-in, midang tampite zong thokiksak ding hi. Sawltak 24:15 sim in. Tua khit teh hih dotna kikum un:
Thawhkikna-ah kua mu nuampen na hiam?
A pa in a tapa ihmu lai a phot mah bangin Jesuh in a sisate nungtasakkik thei hi
6. Thawhkikna in hehnepna le lametna hong pia
Jairas’ tanu thu Lai Siangtho ciaptehna in a dah a kap mite hehnepna pia-in tha ngahsak hi. Luka 8:40-42, 49-56 sunga thupiang sim in.
Jesuh in Jairas’ tanu a thawhkiksak ma-in, Jairas kiangah, ‘Lunghimawh kei in; upna nei in,’ ci-in gen hi. (A neu 50 en in.) Thawhkik ding lametna in . . .
na it na ngaih khat a sih ciangin koi bangin hong huh thei a hiam?
sih theihna dinmun na tuah hun ciangin koi bangin hong huh thei a hiam?
VIDEO hong in. Tua khit teh a nuai-a dotna kikum un.
Thawhkik ding lametna in Phelicity’ nu le pate koici hehnemin tha ngahsak a hiam?
MI PAWLKHATTE’ GEN: “Misi khempeuh vantungah thokik ding uh hi.”
Nangh bangci ngaihsut na hiam?
Misi a tam zawte leitungah thokik ding, cih pen bang Lai Siangtho mun zangin hilhcian ding na hiam?
TOMLAKNA
A sisa mi tampite hong thokik ding uh hi. Jehovah in amaute nungtasakkik nuam a, nungtaksakkik dingin Jesuh kiangah vangliatna pia hi.
Kikupkikna
Jehovah le Jesuh in misite nungtasakkik nuam uh cih koici theih i hiam?
Hong thokik mi tampite ten nading mun pen vantungah maw, leitungah? Bang hangin tua bangin dawng na hiam?
Na it na ngaih a si khinsate hong thokik ding cih bang hangin muang na hiam?
THEIH BEH NADING
Dahnate na thuakzawh theih dan sim in.
Lai Siangtho thubulte in a dah a kapte a huh thei takpi hiam?
A it a ngaih uh a sih cianga a thuakzawh nadingun naupangte bang in huh ding a hiam?
Vantunga a thokik ding a om hiam? Kuate thokik lo ding uh hiam?