Governing Body Kiang Pan Laikhak

Jehovah Pasian le ama Kammal Lai Siangtho a it mite aw:

Jesuh in: “Thuman na thei ding uh a, tua thuman in note hong suaktasak ding hi,” a ci hi. (Johan 8:32) Thuman na theih cil lai-a na omdan pen ngaihsunkik in. Zuau thu tawh a kidim leitungah, thuman kitheithei hi cih pen thalawphuai mahmah hi.—2 Timoti 3:1.

Jehovah Pasian in thuman hong theisak nuam hi. Mite it ihih manin thuman i gen nuam hi. Ahih hang Pasian na sepna-ah hih sang a tamzaw i sep ding kisam hi. Jehovah ii thubulte zahtak mahmah ihih manin Khristian banga nungta dingin ihih theih zahin i hanciam hi. Pasian it ihihlam i lah theih nading a thupi mahmah lampi Jesuh in hong hilh hi. Ama’n: “Ka Pa’ hong thupiakte zui-in ama itna sungah ka om mah bangin note in zong ka thupiaknate na hong zuih uhleh ka itna sungah a om na hi ding uh hi,” a ci hi.—Johan 15:10.

Jesuh in a Pa it takpi a, a Pa sawlna khempeuh a sem hi. I nuntakna-ah Jesuh etteh hi lehang Jehovah in hong it ding a, i lungnuam ding hi. Jesuh gen mah bangin, “hih thu thei-in na zuih uhleh na lung uh nuam mahmah ding hi.”—Johan 13:17.

Lai Siangtho thuman banga nuntak nading le Pasian lawm suak nading hih laibu in hong huh ding hi cih ka lamen uh hi. Pasian i itna a khan semsem nading, ‘tawntung nuntakna hong piak ding na ngakkawmun Pasian’ itna sungah na kip’ nadingun thu kong ngetsak uh hi.—Jude 21.